الأحد، 14 فبراير 2010

واهو فلانتين وهيعدي...(خمسة نفسنة)

يادي النيلة

عيد حب ايه بس وبتاع ايه...

هيا ناقصة غم...

لازم يعني عيد تقليب المواجع ده كل سنة؟؟

طب ميخلووه سنة اه وسنة لأ...

......................

امبارح كان كتب كتاب واحد من اصحابي.... (اسمع زغرودة)...

وده تاني واحد يعملها من الشلة الفائدة بتاعتي..

طبعا كعادتنا في الافراح والمناسبات ... يظهر التساؤل الابدي مبينا وبين بعض...

"طب واحنا يامواكيس.... محدش ناوي فيكم يعملها؟؟؟......"..

"بذمتكم مش نفسك بتتفتح لما تشوفو عريس وعروسة كده قدامكم؟؟"... (شوية نفسنة).....
ونفضل سرحانين كده شوية لحد مانفوق.. علي الواقع المظلم... اه وربنا المظلم....

فمعظمنا- انا واصحابي يعني- حاجة من تلاتة.... النوع الاول: ظروفه النفسية متسمحلوش بالارتباط ومن ثم الجواز- ودي غالبا بتكون عقدة بسبب قصة حب فاشلة- ودول قليلين نسبيا.... والنوع التاني: ظروفه المادية هيا العائق الابدي بالنسبة ليه...ودول بقي اغلبية.... اما النوع التالت: فبتبقي ظروفه النفسية والمادية في نفس ذات الوقت –اانا شخصيا من النوع ده- بتخلي الارتباط (الجد) صعب الي ابعد الحدووووووووووووود......

علشان كده انا مبحبش الفلنتين.... لأنه بيفكرني بفيلم هنيدي وهوا بيقول ل احمد صيام هابي نيو يير... فالتاني بيقولو اربعين سنة ومفيش ست... مع اختلاف نوع العيد...

انا حاسس ان كلامي ملهوش علاقة ببعضه... بس مش مهم...

المهم... اني في الفلنتين... مش هقول كل سنة وانت طيب لحد....

مش هعمل زي دعوات (السنجلز) ال زي حالاتي .. البيقولو ... ممكن نقول هابي فلنتين لاصحابنا واقاربنا... والكلام ده....

لا....

انا هقول هابي فلنتين للانسان الوحيد اليستاهل اني اقولها له....

العبدلله بين قوسين.... أنا.... (حبة بارانويا بقي)....

ايوة .. هقف في المرايا وهقول.... هابي فلنتين يا احلي أنا في الدنيا...

فهرد علي نفسي وهقول... وانا طيب... واحتمال اخد نفسي بالحضن كمان...

تصدقو بقي... انا بفكر اجيب لنفسي هدية...

بس تفتكرو.. أنا هفتكر اجيبلي هدية انا كمان... ولا هنساني....

محدش يتصل بالخانكة.... انا متجننتش اوي كده...

اهو فلانتين وهيعدي.....

هناك 17 تعليقًا:

Mahmoud Ahmed يقول...

بلا فلانتين بلا نكد
احنا كده تووووماااااام
اكبر تحيه و سلالالام ليك يا كبيييير
^_^

سمع هوص (Abo 3li) يقول...

احنا تومام التوماااااام...
نورتني ياباشا...


تحياتي... وصباحك زي الفل

سمع هوص (Abo 3li) يقول...

احنا تومام التوماااااام...
نورتني ياباشا...


تحياتي... وصباحك زي الفل

سواحة يقول...

http://www.youtube.com/watch?v=tjjzkklz95s&feature=player_embedded

سمع هوص (Abo 3li) يقول...

wanda

موتشكرين علي اللينك.. ربنا يخليكي.. ضحكتيني والله.. انا اصلا بحب الجزء ده من الفيلم اوووي...


ps: كنت هتقفش ... الصوت كان عالي .. وانا في الشغل...


نورتيني..

تحياتي.. وصباحك شيكولاتة

صيدلانيه طالعه نازله يقول...

ههههههههههههههه
انا اتصلت بالخانكه و هما جايين فى السكه
ان شاء الله السنه الجايه تكون العوائق الماديه و المعنويه اختفت
و تيجى هنا و تقول ياريت اللى جرى ما كان
ههههههههههههههههه
هابى فالانتين

سمع هوص (Abo 3li) يقول...

صيدلانية طالعة نازلة
لا يادكتورة علا... انا كده زي الفل... الا اذا لو كنتي ناوية تديني قرض حسن منغير فوايد.. ساعتها افكر..

البلوج كان مضلم .. بقالك فترة مش بتزوريه...

نورتيني..
ومتنسيش تبقي تطمنيني .. الهدية ال قلتلك عليها جات ولا لسه؟؟


تحياتي.. ويومك زي الفل ان شاء الله

وصف الاحساس يقول...

ههههههههههه
والله زمان كنت بقول كدة وممكن كنت اعزم نفسي علي حاجة حلوة " افيد برده "
بس بلاش الاكتئاب ده دلوقت وانت لسه صغير والعمر قدامك انت بس ابدء وحاول وحط هدف واوصله وربنا ال بيسهل بعد كدة
وهتلاقي في يوم حد يقولك هابي فلانتين داي وهابي ماري داي
وهابي بيرث داي وكل الهبلات ال في الدنيا
كل عام وانتم بخير
تحياتي

سمع هوص (Abo 3li) يقول...

wasf_elahsas
وانتي بخير...
ثم ...لالالالا... ده مش اكتئاب خالص... بالعكس... دنا متفائل جدا جدا جدا...
وبالنسبة للهدف... انا حاطط لنفسي هدف من زمان... ومتغيرش.. هدفي: اني اسيطر علي العالم... (وش شرير)...
نورتيني...

سؤال خبيث: الهدية جات ولا لسه؟؟

تحياتي

ستيتة يقول...

متخافش يابني انت طبيعي خااااااااااالص
احنا ها نضحي بالمزة والعيل علشان انت تعيش :)

لسه جارة ليا شارية بوكيه ورد لنفسها من محل تحت العمارة

بصيت لها وواضح اني كان في عيوني حول
لأنها بصت لي وقالت انا بحب ابسط نفسي وابعت لها هدايا

وعلى رأي ممثل قديم زمااااااااااان
كله يدلع نفسه

خير خير
خلاص الفلانطيني عدى
امشي يا يوم
امشي يا عووووووووووو :)

سمع هوص (Abo 3li) يقول...

دكتورة ستيتة
انا عارف اني طبيعي جدا..
وانا اسمي شرشر اسمي شرشر المضلع... انا مش مجنون انا مخي شوية مخلع...

... دنا حتي هطلب لنفسي دلوقتي حالا ايس كريم بالفرولة...
خالي بالك ان الفراولة حمرا...


بس سيبك يادكتورة.. عليا الفلنتين انتي نورتيني بزيرتك الحلوة دي...

تحياتي

الشعب لابد له من حكومه تشكمه يقول...

هو داااااااا الكلام,دلع نفسك .
وخليك فخور انك سينجل ايه يعنى سينجل,
ومتنساش وهم بيلبسوك بدله العباسيه تمشى تقول:
انا مش كابيل منحنح انا سينجل متسنجل,
وبكده انت من العقلاء ياعلى قصدى من الاحرار ياعلى...

سمع هوص (Abo 3li) يقول...

الشعب لابد له من حكومة تشكمه:

المفروض ان البنات زوقهم حلو...
ف انا عاوز منك نصيحة انثوية.. تفتكري ياشيما ايه لون الكرافتة اليمشي مع البدلة دي؟؟؟؟
ههههههههههههه

وانا مش مكبل ومهبل.. انا سينجل ومتدنجل...


نورتيني...
تحياتي ياشيما

sony2000 يقول...

انا اول مره بشارك هنا بالتعليق
وبجد مبسوطه جدا جدا
انا رايي ذي ماقريت مره نعمل يوم فلانتين للسناجل اللي ذيينا واهو كل حد يحب يافنفسه ياللي فالي حوليه لان بجد الواحد احيانا بيلاقي ناس كويسه حوليه
تقبل مروري وتحياتي

سمع هوص (Abo 3li) يقول...

sony2000
وان شاء الله متكونش اخر مرة..

وانا مبسوط اكتر بزيارتك.... ومعاكي في يوم السناجل العالمي-مش عارف ليه حاسس السناجل زي السناجب-..

نورتيني بجد..
تحياتي... وصباحك لذيذ

غير معرف يقول...

هههههههههه

معلش بكره ربنا يكرمك بزوجه صالحه وتقول

اشتري لنفسك هديه .... ولو انت بيحبك موش هينسى يجبلك هديه

تحياتي

سمع هوص (Abo 3li) يقول...

فتاة من الصعيد
ايه الدعاوي الحلوة دي علي الصبح... ربنا يكرمك يارب
تخيلي بقي اني نسيت اجبلي هدية!! انا الوغد نستني...

تحياتي... ليكي وللصعيد كله_علي فكرة انا كمان اعتبر من الصعيد_... نورتيني
وصباحك جميل