الأربعاء، 1 سبتمبر 2010

العزوبية ورمضان (من شقق العزوبية 3 او 4 مش فاكر)



الحياة كعازب وعايش لوحدك بتبقي زي الفل ومحتملة جدا لحد م رمضان يجييي....

كلنا واخدين اننا في رمضان بنتلم علي الفطار وعلي السحور... والعزايم بقي والحركات ال من دي...
وكمان واخدين ان الاكل في رمضان حاجة تانية...
لان من العادات المصرية القديمة ان الاسرة المصرية تفضل تحوش تحوش... وتستلف كمان قبل رمضان علشان "تسرف" -  بالسين -  كل ده في رمضان علي الاكل.... يعني الاكل في رمضان محمر ومشمر –نفسي اعرف ايه المشمر ده  - ومحاشي و.. و...و... و...

احنا بقي يامعشر العزاب العايشين بطولهم بنعاني في رمضان جدا....
ليه؟؟؟
اولا
 تخيل نفسك صحيت الصبح نزلت, اتمرمطت المرمطة اليومية الطبيعية ورجعت قبل المغرب بساعة مدروووخ من الحر.... مفرهد من الزحمة.... بتشحر من العطش.... هتموووووت وتنام...
اكيد طبعا مش هتسيب نفسك تموت.... طبعا هتنام...
المغرب يأذن.... تفتكر هتصحي – ده لو سمعته اصلا – مفتكرش.. هتفضل نايم لحد العشا... هتقوم تاكل بسرعة وتصلي ... اصلك هتقوم علي المغرب بالظبط ليه....  خليك نايم احسن... واصحي افطر برحتك بعدين... كده كده محدش مستنيك علي الفطار....
ولنفرض انك صحيت...
طبعا سيدتك مبتعرفش تطبخ ولو فكرت تدخل المطبخ بتتشنكل وبتتكفي علي وشك.... فأكيد برضه سيدتك وانت راجع جبت معاك أكل جاهز... او طلبته ديليجري (ديلفري يعني) – ربنا يكرم ال اخترعه – ونستنتج من هنا ان ميزة "المحمر والمشمر" وقعت خلاااااص.... حتي لو هتفطر كباب وكفتة... برضه اسمه اكل جاهز... مش مشمر خاالص...
وطبعا سيدتك هتاخد الاكل وتقعد لامؤخذة زي ال "تييييييييت" لوحدك تاكل.... وهنا بقي مربط الفرس....
ارخم احساس انك تلاقي نفسك بتفطر لوحدك في رمضان... هتحس انك مقطوع بكل معني الكلمة... حتي لو واخد علي العيشة لوحدك... واهلك مش بيوحشوك اوووي.... هيوحشوك ساعتها... وهتحس يعني ايه عيلة ولمة...
نيجي للسحور...
طبعا بتوع شيبسي قالو في الاعلان ان "الفول السوداني مش هيتبهدل تاني"... بس معانا كل انواع الفول بتتبهدل...
في رمضان واخدين علي طشت الفول - الاكلة الرسمية الاولي للسحور-  البيتحط قدامك انت واهلك...
طبعا لو لوحدك هتبقي مضطر تشتري وتاكل الفول سندوتشات – للاسف – قولي ليه؟؟
علشان لو جبت فول وحطيته في طبق هتبقي مضطر تغسل الطبق...
وعلشان تغسل الطبق .. يبقي لازم تدخل المطبخ....
وعلشان تدخل المطبخ يبقي هتتشنكل وتتكفي علي وشك زي مقولتلك فوووق...
فالسندوتشات بتكون حل ... علي الرغم من ان الفول في السندوتشات بيفتقد لكل انواع الحميمية والاصالة المصرية الفولية...
حاجة كمان بالنسبة للسحور.... هتكون مُجبر انك تتسحر الساعة 12 ولا 1 بالكتير.. حتي لو مش جعان ولا ليك نفس.... هتاكل بالاكره... علشان تلحق تنام علشان تصحي تتمرمط تاني يوم.. اصلك لو حبيت تتسحر متأخر مين هيصحيك؟؟ المنبه!!! لاااااا انســـــــــي.... المنبه اخره يصحيك علشان تلحق المرمطة بدري... لكن لو ضرب علشان تصحي تاكل... ساعتها هتعمل نفسك مش سامعه...
طبعا انا اختصرت رمضان من جانب واحد ... ال هوا الاكل...
فيه جوانب تانية اكتر... متكلمتش فيها... ومش هعرف اتكلم فيها...


علشان كده الاجازات الاسبوعية – الويك ايند يعني – بتبقي عيد لينا.... لانك ممكن تروح تقعد مع اهلك يوم ولا اتنين ... ولو فكرت تطنش ومتروحش, اولا هتبقي انت الخسران, ثانيا احتمال اهلك يأجرو قاتل محترف يجي ويخلص عليك علشان غايب عنهم طووول رمضان....
بس خلاص..

في النهاية انا بعتزر لكل الناس ال كانت عايزاني اجي الفطار الجماعي بتاع المدونين... بس للاسف انه كان يوم سبت... وانا كنت عايز اقضي الاجازة – الويك ايند... اتعلمو انجليزي بقي – مع اهلي خارج نطاق القاهرة الكبري...
بجد كان نفسي ابقي معاكم وكان نفسي اقابل كل الناس الراحوو الفطار ... كان نفسي اقابل الناس الشفتهم وقبلتهم قبل كده تاني... وكان نفسي اشوف الناس لسه محصليش شرف اني اشوفهم... كان نفسي اقابل منونة وبنت عمي واندا.... وباقي المدونين ال ربنا هيجزيهم خير علي الخير البيعملووه...
بس الحمدلله برضه.... وتتعوض في خير تاني ان شاء الله....

هناك 35 تعليقًا:

أع ـقل مـ ج ـنـونــة يقول...

:((

مش لاقية كومنت

الا انا كدا اول واحدة ؟؟؟؟؟؟

سواحة يقول...

اقولك بقى السنتين الى فاتوا كنت بصوم بره ازى علشان تقول الحمد لله علىالصيام فى مصر:-) حتى لو وحدانى يا بوى وحدانى

بص تتساحر بكثيرة 10 او 11 لانك مش لوحدك فى الاوضه و ده اخرك فى ترتيب اكله ليك
ثم تصح و تشتغل و ترجع على 3 و انت صائم وسط ناس فطرانين و مش فاهمين انت اساسا مجوع نفسك لسه حتى من كوباية النسافية :-))
من 3 لحد 9 دورلك على حاجة تعملها لانك لو نمت من قلة السكر حتصحى بصداع بشع و مينفعش تقعد تطبخ كل ده لانك حتجوع و يسلام لو تعبان المطاعم الجامعية اخرها 5
و تجيب الاكل بارد او تصتبر و تطبخ على 7 و نص
انا كنت عموما بقضيها مشى و تنزه علشان متجننش :-)
ارجع افطر 9 و اتسحر 10 و انام لثانى يوم
العيد بقى و لا عيد و لا حاجة لانك مع نفسك ومحدش حاسس بيك
فتفطر يوم او اثنين و تكلمهم ايام البيض و القضاء و الشهر يقرب لشهرين
:-)) عليه السنة دى و الى فاتت ظبط انزل رمضان علشان اقدر عليه اساسا
و كل سنة و انت طيب
الوالدة كانت طبخالك ايه ؟؟:-)

سمع هوص (Abo 3li) يقول...

أع ـقل مـ ج ـنـونــة

تقريبا انتي اول واحدة ياريموووووو....
عاملة ايه؟؟؟؟

سمع هوص (Abo 3li) يقول...

Wanda

اكيد حالتك اصعب وارخم... ربنا يكون في عونك... الا انتي هتخلصي التوجيهية البتخديها دي امتي؟؟

علي فكرة انا بحب العيشة المستقلة بمعني اني بحب الحالة بتااعتي دي في معظم الاوقات... وانا داخل علي الاربع سنين علي الحال ده...


والله منوراني جداااااا ياون ون... ومبسوط اني بدخل الاقي كومنتك منغير مشوف علم بولندا عندي السجل...

تصبحي علي خير

سَارةٌ يقول...

قدر احسن من قدر .. الحمدلله على كل شيء ..

إنت مجربتش تتفرج على اي برنامج طبخ ولا تجيبلك كتاب .. او تخلي حد يتطوع ويعلمك .. والله المطبخ متعه .. مش هتتشنكل لو انت داخله منشكح ومبتسمله كده :D

ربنا معاك .. ويهونها عليك إن شاء الله :)

سمع هوص (Abo 3li) يقول...

حَـبآيـۃْ.بـטּـدۉڷ

لا لا لا لا لا لا لا ... مطبخ ايه بس حرام عليكي ثم من رابع المستحيلات اني احاول اتعلم حاجة زي دي... هههههههههههه...

ربنا يكرمك...
تحياتي..

FAW يقول...

يا عم صباح الفل أنا كمان بقالي أربع سنين كده , بس الواحد خلاص إتعود والله . .
رمضان كريم

ســـهــــر يقول...

يا ضنايا يا ابنى :(
لازم تبقا طموووووووووووووح وتبص لقدام يعنى تخلى ست الكل تعملك أكل وتشيلة فى التلاجة وتبقا تسخنه قبل الفطار يا حمادة
وياسيدى بكرة تتجوز وتقول ياريتنى فضلت عازب وفطرت لوحدى

فراشة يقول...

ابو علي ... ازيييييك

اه فعلا رمضان ف اللمه ليه طعم تاني يعني هنا ف السعودية مع بابا وماما بس برضه تحس ان مفيش لمه ولا عزومات كدا حاجه مستغرباها

وعلى رأي بابا أحسن حل للي قاعد عازب انه يجيب ميكروويف عشان اول ما يصحى يحط اى حاجه فيه وتستوي فى خلال دقائق

وربنا يعينك وياسيدي خايفه اقولك اتجوز تقولي اقضى اخف من قضى هههههه

رمضان كريم

سمع هوص (Abo 3li) يقول...

FAW

زميل كفاح يعني... ههههههههه...
يلا الحمدلله....

منورني..

سمع هوص (Abo 3li) يقول...

ســـهــــر

حاسك بتتريقي ياساسو...
لا مليش برضه في التسخين والحركات دي...


صباحك فيروزي بالقهوة البتحبيها...

سمع هوص (Abo 3li) يقول...

فراشة

لاااااااا العزوبية احلي فعلا....
مش طالبة نكد.... هههههههههههه....

عاملة ايه يامني؟؟؟ كويسة؟؟ يارب تكوني بخير...

ghada mOhsen يقول...

هلا أبو علي
:)

أهو أخواتي الأولاد متمرمطين هناك باليمن من غيرنا إحنا البناتيت في حكاية الأكل

ألاقيهم كل يوم باعتين لماما عشان توصفلهم الأكله الفلانيه بتتعمل إزاي عشان يخترعوها في المطبخ عندهم
ده في رمضان بس

أما الأيام العاديه تقريبا مش بيهمهم كتير من بره ولا أي حاجه ...

هو في واحد فيهم مستحيل يعمل حاجه في المطبخ بس التاني أهو اقدر أقول إنه اشطر مني :))) فبيشجع الأولاني شوي ...

ربنا معاك وأكيد أيامك دي راح تتعوض عاجلا أم أجلا

خواتم مباركه عليك وعلى إللي حواليك

تحياتي الملونه ليك
^_^

Ana keda يقول...

يا عينى يا ضنايا
هههههههههههه
والله بجد فعلا كلامك صعب وبيحصل اصعب حاجة انك مش تلاقى اللمة
يلا بقى معلش يابوعلى
استحمل بكره ربنا يكرمك ببنت الحلال الى تونسك وتملا عليك حياتك
ويديك ابن كده ميخلكش تعرف تفكر اصلا هههههههه
زى عبد الرحمن كده وقتول يا ريت كنت عازب
ههههههه
كل سنة وانت طيب

gogo!sf يقول...

ما تروح تتجوز وتتكن انت وهى فى بيت واحد كده على رأى ممدوح عبد العليم اتكن

يا ابنى اشترى لك كوكى او بانيه جاهز او اى حاجه من الحاجات الى هتشتريها تحمرها على طول ولا تتعب نفسك وتوجع دماغك مش عارفه اقولك ايه

والله يا احمد انا شايفه انك تتجوز اسهل من مرمتط الشرا والتحمير دى
اصلا دخولك المطبخ كمان مشروع فاشل
ههههههههههههههههههه

ربنا يكرمك ببنت الحلال بسرعه يعنى عشان ان شاء الله رمضان الجاى ماتتمرمطش

بس الا لو طلعت مش بتعرف تطبخ اصلا هههههههههههههه ايه هيكون وضعك وموقفك

بجد بوست خفيف جدا وجميل اوى بصراحه اسلوبك فى الكتابه ضحكنى


كل سنه وانت طيب
ورمضان كريم يا مان

من كل بستان زهرة يقول...

لألألألأ بجد صعبت عليه
الدمعه هتفر من عيني خلااااااص

أيه يابني حالة اليتم الي أنت عايشها دي
بس تصدق فعلا الكلام ده حقيقي
أنا قعدت أسبوع في رمضان من غير ماما ربنا يخليها
وكان معايه أخواتي كان أسوء أسبوع
خصوصا لما ترجع من الشغل ولازم تطبخ يانهار أبيض وأحمر وأسود أحلى سيرك تتفرج عليه في المطبخ والحريقه والأكل المعجن
بس دلوقتي ربناااااااايخليكي ياماما ياحبيبتي
محمر ومشمر ومقلي ومحاشي ياااااااااه
مش قادره
حرام كفايه عليك كده
ربنا معاك

طوبه فضه وطوبه دهب يقول...

بجد انا موت من الضحك على البوست دا اصل الرجاله طول عمرها بتتريق على دور الستات والامهات فى الحياه عرفتوا بقى النعمه اللى ربنا بيكرمكوا بيها وبتتريقوا عليها هههههههههههه كل سنه وانت وكل العيله بالف خير وفى وسطيهم وسعيد منهم وبيهم

E73 يقول...

بسم الله الرحمن الرحيم

السلام عليكم ورحمة الله وبركاته

لو هنتكلم عن الأكل

ودا لو لقيت عندك صحة يعني

فممكن المدونة دي تساعدك كتير جدا بكل سهولة وبساطة تعمل المحمر والمشمر في البيت بأقل التكاليف وبأسهل الطرق

http://julienjulia2.blogspot.com/

لكن بقى لو هتتكلم عن "النوستالجية" والحنين للماضي فدي مشكلتك حاول تشد حيلك وتخلي مامتك ولا اختك يدورولك على عروسة تحفزك إنك تعمل لمة وعيلة

ورمضان كريم

sweet angel يقول...

ايه ده

وجعت قلبي يا مستر محمد والله

ربنا يهون عليك

وبعدين منا قولتلك اشوفلك عروسه مرضيتش

اشرب بقى

Single Mummy يقول...

قلبى معاك يا بن بلدى بس اقولك اية ...الغربة صعبة ربنا يبعتلك اللى تتسحر معاك وتعملك المشمر اللى نفسك فية
تحياتى

الامير سلطان بهنسى سلطان عدو المراة يقول...

كل سنة وانت طيب


الحمد الله انك عازب

اللى مجوز طالع عينة

تحياتى

داليـ ـ ـ ـ ـ ـ ــــا يقول...

معلشى خيرها فى غيرها
الأيام جايه وهتقابل الناس الا شوفتهم قبل كده والا نفسك تشوفهم

بالنسبه لكل الكلام اللى قلته انتا معاك حق فى كل كلمه
احلا مافى رمضان لمة الاسره كلها على الفطار

sony2000 يقول...

بصصصصصص ياعمونا
عاادي يعني
ويااااااااااااارب
نخلص منك بقي علشان تستريح وتريحنا
هههههههههههههه
وبأذن الله تيجي معانا المره اللي جايه
ومفيهااااااااااااااش اعذار
ماشي؟؟

سمع هوص (Abo 3li) يقول...

ghada mOhsen


اهو انا اكسل من اخوكي الملهوش في المطبخ ده 1000 مرة... هههههههههههه...
ربنا يفرحكم ويسعدكم...

تحياتي..

سمع هوص (Abo 3li) يقول...

Ana keda

ايه ده؟؟؟ اانا غبت كتير اوي فعلا... بيدووو وصل بالسلامة امتي؟؟؟؟ الف مبرووووووووووووووووووووووك يامروة ربنا يخليهولك ويفرحك بيه...
كل سنة وانتي وطيبة وبخير انتي وبيدو وابو بيدو...

سمع هوص (Abo 3li) يقول...

gogo!sf

لاااااااااااااااا... تطلع مبتعرفش تطبخ ازاي... اومال انا هتجوزها ليه!!
لازم اعملها امتحانات كتيرة قبل الجواز.. ههههههههه...

بالمناسبة انا مسميش احمد.. هههههههههههه..

منوراني بجد..

سمع هوص (Abo 3li) يقول...

من كل بستان زهرة

ربنا يخليلك مامتك... بس المفروض تتعلمي منها... زنبه ايه تبقي تعمليله معجن ومحرووق ان شاء الله؟!؟!؟ هههههههههههه...


منوراني وتحياتي..

سمع هوص (Abo 3li) يقول...

طوبه فضه وطوبه دهب

هههههههههههههههه
لا محدش يقدر يتريق علي الدور البطولي للست قدام البوتجاز والغسالة والمكنسة.. وش بيطلع لسانه...


تحياتي...

سمع هوص (Abo 3li) يقول...

E73

وعليكم السلام ورحمة الله وبركاته...

حرام عليكي... قولك بكره المطبخ... تديني لينك ادخل الاقي طريقة عمل المقلوبة الفلسطيني!!! دنا عملت فرح زمان لما مرة قليت بيض!! ههههههههههههه...

كل سنة وانتي طيبة ورمضان كريم...

سمع هوص (Abo 3li) يقول...

sweet angel

لااااا انا رضيت ... بس قولتك علي الموصافات ال انا عايزها...
متنسييش .... شبه ميريام فارس...

سمع هوص (Abo 3li) يقول...

Single Mummy

شكرا علي الدعوة ياسارة ربنا يكرمك...

بس ياجدعان ليه محدش رد عليا وقالي ايه هو "المشمر" ده؟؟؟؟

سمع هوص (Abo 3li) يقول...

عدو المرأة

الحمدلله علي كل حال...
محدش عاجبه حاله تقريبا...


نورتني.. تحياتي...

سمع هوص (Abo 3li) يقول...

داليـ ـ ـ ـ ـ ـ ــــا


يارب ... وتكوني وموجودة ساعتها...

منوراني ...
صباحك ورد...

سمع هوص (Abo 3li) يقول...

sony2000

اخص... عاوزة تخلصي مني وتجوزيني..
ان شاء الله انتي.... ههههههههه...

ربنا يسهل.. بس ميبقاش سبت برضه...

E73 يقول...

لأ دا مش رابط الوصفة دي بس

لو قلبت في الصفحات اللي قبل كدا هتلاقي وصفات كتير سهلة وسريعةوطعمها جميل جدا