السبت، 27 فبراير 2010

مواقف من شقق العزوبية

الحياة بعيد عن الاهل- بحكم الدراسة او الشغل- ليها مميزات كتيرة وعيوب اكتر...

اهم مميزاتها انك بتعيش مع اهل جداد انت ال بتختارهم... وبتختار المكان ال تعيش فيه..

بس مهما كان المكان ال بتختاره كويس او سئ... كله بيندرج تحت اسم واحد... شقة عزاب...

وشقق العزاب للمجربش او المشفش... بيحصل جواها مليون فيلم كل يوم وكل يوم مختلف عن التاني.. يوم فيلم رعب ويوم كوميدي.. ويوم تراجيدي...

يمكن الحادث الاليم ال حكتلكم عنه البوست الفات هوا ال شجعني اكتب شوية واحكيلكم عن شوية فضايح من ال عاصرتهم في شقق العزاب .. بلاوي حصلت في الشقق الكنت عايش فيها... وبلاوي حصلت قدامي في شقق ناس تانية...

ودي شوية مواقف صغيرة من ال ممكن يتحكو... ال ميتحكيش... بيبقي مع اصحابي علي القهوة بس...

............................

الحلقة الاولي

عداد الكهربا

كنت بزور واحد من اصحابي وكان لسه من اسبوع مأجر شقة مفروش وعايش فيها لوحده... والباب خبط... قومنا فتحنا لقينا محصل الكهربا ومعاه شخص تاني مقدرناش ساعتها نفهم هوا مين...

المهم الاخ قالنا كهربا... صاحبي رد عليه ان الست صاحبة البيت هيا ال بتحاسب علي الكهربا والمية وهيا ساكنة في الشقة التحت...

المحصل رد عليه بقرف محدش بيفتح تحت ثم انا هقري العداد... ويبقي ادفعو براحتكم بعدين...

المهم المحصل والشخص المجهول ال معاه دخلو شافو العداد...

راح محصل الكهربا صارخ: ايه ده؟؟؟؟؟؟ وكأنهم شافو عفريت...

انا وصاحبي بصراحة اتخضينا .... انا قلت في عقلي شكلهم مدفعوش الكهربا من عشر سنين... ولا مثلا الشارع كله موصل تكيفاته علي العداد ده ...

المهم المحصل راح قايلنا بلهجة المتهكم: ايه ده يا استاذ؟؟

انا تدخلت- لأني صاحبي كان من النوع الطيب ال مش هيسد مع العالم دي- وقلتله ده عداد حضرتك ان شاء الله...

راح رد عليا بطريقة فيها شماته: منا عارف انه عداد... بس عداد بلغاري...

صاحبي فتح فمه علامة علي عدم الاستيعاب...

وانا حاولت استفسر: وايه يعني لما يكون بلغاري.... ورحت مستظرف : مش احسن ميكون صيني...

الراجل اتنرفز: يااستاذ بقولك بلغاري... بلغاااااااااااااااااااااري....

انا بصراحة حسيت بهول المصيبة والوارطة ال صاحبي فيها... قلت لازم انقذه بشهامتي المعهودة... وادبس الست صاحبة البيت... لحسن يطلع العدادات البلغاري مخلة بالاداب... ولا من الممنوعات واحنا منعرفش...

رحت قافلوو فمه ال كان لسه مفتوح... وشخطت فيه: ازاي الست صاحبة البيت تأجرلك شقة فيها عداد بلغاري.. عالم معندهاش ضمير صحيح...

ورحت قايل للمحصل : طب والحل ايه؟

المحصل: العداد ده لازم يتفك... ويتسلم في المصلحة...

رديت عليه: انا بصراحة مكنتش اعرف ان مصر قاطعة علاقتها الكهربية مع دولة بلغريا... ومكنتش اعرف ان ...

راح مقطعني بغضب: هنهزر يااستاذ... انا بشوف شغلي... العداد ده بلغاري ولازم يتصادر..

انا بحماس: شيل ياراجل شيل ... العداد البلغاري ابن الكلب ده بسرعة ياراجل ... ال بلغاري ال... انا صاحبي يتأجرلو شقة زبالة كده... عالم بقي معندهاش ضمير...

وابتدي هوا وال شخص المعاه يفكو العداد...

وانا بأنب صاحبي: يابني مش تتأكد من ان الشقة مفهاش حاجة غلط قبل متأجرها... شفت طيبتك دي ودتك لفين؟؟

المهم المحصل اخد العداد ومشي...

وانا اقنعت صاحبي ننزل نتخانق مع صاحبة البيت علي نصبها وانعدام ضميرها- ازاي تأجر شقة لشب فيها عداد بلغاري لو اوكراني كنا سامحناها لكن بلغاري لايمكن نسكت - وفعلا نزلنلها وحكينلها ال حصل.... وعاتبتها وقلتلها بقي ينفع كده ياحاجة هوا علشان صاحبي طيب تعملي فيه كده؟؟

ردت: يابني مكل العدادات ال في البيت بلغاري...

انا: معقولة ؟؟؟ دي كارثة... وازاي ساكتين علي نفسكم كده...

الست طبعا قعدت تتريق علينا شوية وعلي خيبتنا اننا حتي مأخدناش اسم المحصل...

انا روحت بعد الموقف ده وعرفت من صاحبي بعدها بكام يوم... اان المحصل كان بيشتغلنا... وشال العداد علشان حاجة تانية خالص... ان الشقة متأخر عليها فواتير كتير... وانا الكنت عامل ناصح اوي وصايع وواقف للراجل ند بالند..

بس ساعتها عرفت اننا ضحايا سهلة جدا لجميع انواع الاشتغالات والنصب في كل ما نجهل...

الحلقة الجاية بقي عن النضافة في شقق العزاب

الخميس، 25 فبراير 2010

اغتيالي...

كارثة قومية

فضيحة عالمية

حادثة القرن

دي عناوين الجرايد والمجلات.. بعد الحادث المرووع... او علي الاقل دي العناوين ال مفروض تبقي علي الصفحات الاولي ....

بس للاسف الصحافة عندنا بتخاف تنشر الحوادث الفظيعة ال ممكن تقلب الرأي العام كله....

لكل الناس الميعرفوش ايه الحادثة ال بتكلم عنها....

اليكم الخبر:

محاولة اغتيال فاشلة (الحمدلله) للعبدلله ....

ايون محاولة اغتيال .. ليا...

بس الحمدلله ربنا نجاني منها...

طبعا المغتالين الاوغاد.. استخدمو معايا اسؤ انواع الاغتيال واكثرها قرفا...

حاولو يسمووووني....

شوفتو...

ولاد التيت .. حاولو يسمموني....

بس علي مين.... انا بطني مصفحة ضد كل انواع الاكل منتهي الصلاحية.. والغير صالح للاستخدام الادمي... دنا حتي لما باكل الاكل بتاع الحاجة بحس ان فيه حاجة غلط... بحس انه اكل نضيف زيادة عن اللزوم..

ف احب اطمنكم ... انا الحمدلله بخير... والازمة في مراحلها الاخيرة... اينعم... انا لسه في السرير ...

ولسه بطني قفشة عليا.... ولسه دماغي عاملة زي البتاع البيكسرو بيه الاسفلت...

بس كله تمام.... والامن مستتب...

وابتديت تحقيقاتي لتحديد هوية الجناة...

وبما اني شرلوك هولمز زماني...

فتوصلت لتلت مشبوهين... ملهومش رابع...

جاد... عادل .. كنتاكي...

انا اتعشيت من عند (جاد) قبل منام.... ولما صحيت ... فطرت في الشغل سندوتشات بيعملها (عادل) الاوفيس بوي.... ولما روحت – وبما اني كنت لسه قابض جزء من مرتب شهر يناير ال لسه مقبضتوش بسبب مشاكل مع الكاش زي ما الراجل صاحب الكشك بيقول- فقلت اطلب اكل بقي لحد البيت شوية تناكة والاطة ومش هانزل بنفسي .. وطلبت من (كنتاكي).....

كده عندنا المشتبه بهم.... لازم نحدد الدوافع...

المشتبه الاول محلات جاد: مفيش مبيني وبينه عداوة بالعكس... دحنا جيران... والجيران ميعملوش كده في بعض... الا اذا كان اتضايق شوية اني ديما بسرب كل انواع الفلوس المعدنية ال بتخنق منها في جيبي عنده... بس مهو ديما بيردهالي لما مبيكونش معايا فكة ... وباخد الباقي كوينز برضو...

المشتبه التاني عادل: يمكن يكون متضايق مني علشان مشربتش ال نسكافيه ال عملهولي من كام يوم.. بس مهو عارف اني مبشربش نسكافيه معمول بلبن بودرة – تم استبدال اللبن العادي بلبن بودرة مؤخرا عندنا في الشركة اقصد الكشك علشان مشكلة الكاش البقولكم عليها- بس كان شكله زعلان وهوا راجع بالمج بتاعي مليان... وبصلي بصة كده..... بس عادل ده صعيدي زيي والصعايدة ميعملوش كده في بعض....

المشتبه الاخير كنتاكي: طول عمري مبثقش فيه... تحسوه راجل مولعب كده... عجوز وشايب وعايب... بصوو كده علي دقنه العملها سكسوكة ولا نضرته... والمصيبة بقي ضحكته... ضحكة عجوز في السبعين عاوز يتجوز بنت عندها عشرين سنة... بصراحة انا شاكك فيه .. وخصوصا ان الامريكان ليهم نفوذ معاه.. وطبعا انا مستهدف من الامريكان ... بسبب خطورتي الشديدة علي الامن الكومي الامريكي.. والجوكر الامريكي كمان مش الكومي بس....... بس رجعت وقلت لالالالالالا اكيد مش كنتاكي.... كان هيوصلني خبر لو فيه خطة لتصفيتي... انا زارع عندهم عميل.. صاحبي المعايا في الشقة بيشتغل مساعد مدير في فرع من فروعهم... كان اكيد هيديني خبر...

وفي النهاية توصلت لان المشتبه فيهم لسه زي مهما... اكيد واحد فيهم المنفذ.. بس المحرض والغرض من الجريمة لسه مجهولين...

ال عنده اي معلومات عن الحادث الاليم.... يتصل علي 0900 0900 ويمكن يكسب رحلة لشخصين لزيارتي بس مينساش يجيب معاه كيلو موز وازازة بيبسي لتر... ال هيجيب كانز هزعله....

ومازال البحث مستمرا..........

السبت، 20 فبراير 2010

البرادعي ليه؟ علشان نجم



الظاهر ان الحملة الحكومية نجحت...
اه نجحت... الحملة الحكومية ضد الامل في التغيير...
الحكومة ديما بتطلع القطط الفطسانة في اي حد ممكن الشعب يعتبروو امل.. في التغيير... حتي لو التغيير ده للأسوء..
زي ما الحكومة نجحت قبل كده... في انها تظهر ايمن نور علي انه خاين وعميل لامريكا- حتي لو ده صحيح- ونجحت تخلي الناس معظم الناس مش واثقين فيه... وده برضه يتحسب علي ايمن نور نفسه.. انه ادي الفرصة للحكومة المبجلة انها تمسك عليه الحاجات دي...
طيب مهو جمال بيه مبارك امين سياسات حزبنا الوثني.. كل يومين في امريكا.... حد قال عليه عميل ... ولا بيرضخ لمطالب امريكا؟؟؟
طبعا لأ...
عمرو موسي لما شعبيته زادت بين الناس وبين حكام الدول العربية ... ايه الحصل؟؟ اتنفي في جامعة الدول... ال هيا منظمة لا ليها طعم ولا لون ولا ريحة- غير ريحة الاكل الحمضان-...
واخيرا البرادعي...
اول ما الراجل قال انا ممكن ارشح نفسي بشرووط كذا وكذا وكذا....
هوبا الجرايد الحكومية كلها نزلت فيه شتيمة... وتجريح.. وتشخيص...
اليقول ده ماله ومال السياسية .. وال يقول ده بره مصر من زمن.. وده يعرف ايه عن مشاكلنا... واليقول ده بيسمع كلام امريكا بأمارة الحرب علي العراق والعقوبات بتاعت ايران...

المصيبة الاكبر لما تسمع الكلام ده من ناس مسئولة.... يعني لما صحفي يطلع يقول ده عالم ... ايه الدخله في السياسة ... هنقول صحفي مقراش عن الموضوع البيكتب عنه... ومعلوماته قليلة في الحتة دي...
لكن لما وزير ورجل مهم في حكومتنا الفاضلة زي مفيد شهاب ... يطلع يقول انا بحترم البرادعي لأنه عالم ذرة شرف مصر... لكن ده ميخلهوش ليه الحق انه يتكلم في السياسة وفي الترشح للرئاسة..... دي بقي مصيبة...
تلفيق وكدب مفيش بعد كده.... واي كلام بيتقال علشان يتردد.. ويترسخ عند الناس...
ياناس ياهووو... البرادعي مش عالم زرة.... ولا يعرف عنها حاجة...
البرادعي رجل قانون دولي.... اتخرج من كلية حقوق... واشتغل في وزارة الخارجية المصرية.... والامم المتحدة.... ثم الوكالة الدولية للطاقة الذرية... مش لازم رئيس وكالة زي دي يبقي عالم .... دي وكالة دولية محتاجة مدير... فاهم في القانون الدولي .. والسياسة الدولية.... راجل العالم كان واثق فيه من سنة 97 لحد نهاية ولايته التالتة....
انا مش بقول هنا ان البرادعي نبي.. ولا مخلص جايلنا بسيف وحصان....
جايز ميكونش شخصية تصلح لقيادة بلد... بس نقدر نعتبره اسم لنجم...
اه نجم... احنا مش محتاجين شخصية زي فيدل كاسترو تقود ثورة او انقلاب...
لا احنا محتاجين شخصية مشهورة في مصر وبره مصر... شخصية قوية... جذابة...
محتاجين نجم...
نجم اسمه والتفاف الناس حوليه يضغط علي اعصاب الحكومة ...
ويقلق راحتهم...
ويمكن !!
يمكن نجوميته تبقي سبب في تغيير..
حتي لو للأسوء ..
بس اسمه تغيير...
ومفتكرش ان فيه اسوء من حالنا ال احنا فيه دلوقتي...
مفتكرش ان فيه اسوء من الحزب الوثني بكل اصنامه...
ف ليه... منلمعش النجم ده....
طالما مصلحتنا القريبة معاه...
بمعني... لو حصل- لوحصل- تغيير ما... الناس هتفووق...
هتحس وتعرف ان اصنام الحزب مش الهه مخلدة... وانهم ممكن يتغيروو....
وساعتها اي تغير بعد كده هيكون سهل... يعني الهيجي والشعب مش هيقتنع بيه...
هيبقي سهل يشيله ويجيب غيره... هتبقي جزوره في الارض لسه ضعيفة... الشعب هيخلعها بسهولة...
لكن وضعنا الحالي ده... محتاج معجزة علشان الناس تفوق... وتعرف انها ممكن تغير... وممكن تتحكم في مصيرها...
التغيير في اوله صعب..
لكن مش مستحيل....
علشان كده انا مع النجم-حتي لو مرشحش نفسه-...
انا مع البرادعي

الاثنين، 15 فبراير 2010

ذكريات ... وكلام قديم 2




زي موعدتكم اني اغلس كل فترة وانشر حاجة هنا في البلوج من الكتابات بتاعتي ايام المراهقة.... والفترة دي انا بعتز بيها....
والمرة دي مش هجبلكم ارانب ولا قطط زي الجزء الاول - ال مشفش الجزء الاول يرجع يبص عليه- المرة دي خاطرة كده من الحاجات العزيزة عليا... وبرضو مش عاوزين تريقة... لأني كاتب الحاجات دي وانا عندي اربعتاشر ولا خمستاشر بالكتير...
يلا اسيبكم معاها... اسمها " من غير اسباب"


من غير أسباب

أبداء منين واحكي لمين

أنا قلبي فين راح مني فين

حبيبي راح

وملاني جراح

ومنين ارتاح

ده من يوم معرفته

وبعيوني شوفته

قلبي سلم

ولساني ما تكلم

وعقلي غاب

وتقولوا ليه

من غير أسباب

جايز سحرتني عينيه

بعد ملمستني أيديه

حبيته أنا ليه

معرفش

متستنوش جواب

ده من غير أسباب

كأنها نجمة وعالية

وليها ايدي مش طايلة

ركبتلها سحابة

زي عنيها المليانة غرابة

لا مش زي عنيها

زي عيوني أنا

نهيتها دموع

ونزول من غير رجوع

ويقيدوا عليها شموع

تكتر النار والعذاب

ليه؟؟

من غير أسباب

ليه بعد مجرحتيني

جايه بتترجيني

ياما قولتيلي كلام

ورديت بكلام

وعشت في أحلام

ودي كانت أوهام

وبعيدة سراب

ومن غير أسباب

دي عنيها كانت بريئة

مكنتش أبدا جريئة

دلوقتي بانت الحقيقة

ليه جرحتي

ليه بعدتي

وقلبي خنتي

فين كلام زمان

والحب الكان

ويريته ما كان

مش كنا أحباب

ليه بعتيني ‍‍‍

من غير أسباب؟؟؟؟؟؟؟؟؟

أسئلة امتحان اللغة العربية

جاتلي رسالة علي الميل من شوية..

ممكن تكون قديمة بالنسبة للبعض منكم..

بس عجبتني اوي .. قلت افرجكم عليها انتو كمان..

الرسالة هحطها زي مهيا بدون اضافات مني

.................................


أسئلة امتحان اللغة العربية لعام2010 للصف (مش عارف)

السؤال الأول: التعبير

اكتب ما لايقل عن 650 سطر فى أحد الموضوعات التالية

لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة


شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز


بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
ـــــــــــــــــــــــــــــــــــــــــــــــــــــــــ

السؤال الثانى: القصة


من قصة " وعهد الله ما انت داخل الانتخابات" .. اقرأ القطعة وأجب عن الآتى
ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟

ما هى اللحمة؟ أو على الأقل حدد أقرب معنى خيالى لها

مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

لماذ ضربه الرجل بالجزمة وليس بالعصى مثلا؟؟
أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية عشان العصاية شغالة مع واحد تانى.. افهم انت بقى اختر

حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــــــــــــ

السؤال الثالث القراءة


من موضوع ( الزعيم..والفنان.. والقدوة) اقرأ القطعة وأجب
وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة

فى رأيك هل يصلح عادل إمام لوزارة الثقافة أم لوزارة الصناعة باعتبار أنه صرح فى فيلم السفارة فى العمارة أنه بيحب المَكَن؟؟

ذكرنا فى الدرس أن عادل إمام سيتقاضى فى فيلمه القادم 12 مليون جنيه.. فى رأيك ياعم المحروم تبقى البوسة بكام فى الفيلم؟؟

دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟

أكيد معزومطبيعى معزوموربنا معزوم.. اختر على أن تضع إيدك على المصحف وانت بتحلف للمراقب بتاع اللجنة
ــــــــــــــــــــــــــــــــــــــــــــــــــــــــــــــ

السؤال الرابع النصوص


أجب عن أحد النصين الآتيين
من نص ( ماشربتش من نيلها)..اقرأ ثم أجب
ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها

بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟

المسيسبى - الأمازونيونج يانج

هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه

أكمل الأبيات إلى آخر كحكة فى الكليب

قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى
ـــــــــــــــــــــــــــــــــــــــــــــــــــــــــ
من نص (حين ميسرة)..أجب عن الآتى

اذكر اسم مصيبة واحدة محصلتش فى النص الأسود ده

وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى

سبب وجود الشرطة كل خمس دقائق فى النص

موسم ترقيات عقبال أملتك ولازم شغلأخو خالد يوسف ظابط ولازم يخدم أخوهعشان الشرطة بتراقب قسم البوليس اللى جنب أحداث النص اختر
ـــــــــــــــــــــــــــــــــــــــــــــــــــــــــــ

السؤال الخامس النحو

أعرب ما تحته خط.. لو مالقيتش القطعة أصلا ..اتصرف

ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا ياكلب

كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده

فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ

السؤال السادس الخط

كوز المحبة انخرم..طرطش على كمى..ياحبيبى بطل جفا وارحم عذاب امى

اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

بس كاتب الامتحان نسى يقول لسنه كام

غالبا ثانويه عامه

اصلها ناقصه