الاثنين، 1 فبراير، 2010

رد هارتي ... (افلام جديدة .. أم القديمة)


فيلم رد قلبي من اكتر الافلام البحبها (بغض البصر) عن انه فيلم لتمجيد الثورة بكل مميزتها وعيوبها... بس برضو الفيلم ده من افلامي المفضلة وهيفضل من افلامي المفضلة لأسباب كتير... مش وقته اني أقولها...

بالصدفة كنت بتفرج علي الفيلم ده من كام يوم وتخيلت لو الفيلم ده اتعمل سنة 2010 هيبقي عامل ازاي:

اولا هيبقي اسمه (رد هارتي) بدلا من (رد قلبي)...

بطل الفيلم (علي) هيظبط (إنجي) من علي الفيس بووك.... ابو انجي- اكيد مش باشا من بتوع زمان- ابو انجي هيبقي راجل كبير من رجالة الحزب الوطني.... والريس عبدالواحد ابو علي وحسين مش هيبقي جنيني... لأ مدرس اعدادي...

طبعا علي هيبقي واد صايع وهيعرف يوقع انجي بنت الناس الواصلة... رغم انه ابن المدرس الغلبان... وانجي بأستغلال سلطات ابوها هتتوسط ل علي في كذا حاجة..

هتتوسطلو عند الدكتور -ال مستقصد علي وبيسقطوا بقالو 7 سنين في هندسة- علشان يتخرج....

وهتتوسطلوا علشان يطلع رخصة سواقة- رغم انه معندوش عربية-

وهتتوسطلو تاني علشان يتعين مهندس في احد الاحياء-اصل البت بتحبه بقي...

وهتتوسطلو لما رخصته هتتسحب-وهوا سايق عربية سليمان صاحبه ال 128 –علشان مكنش رابط الحزام....

وهتتوسطلو كمان علشان يطلع في القرعة العشوائية علشان يحجز شقة في اسكان مبارك للشباب....

وافضال انجي علي عمنا علي مش هتوقف عند كده... دي هتستخدم كل نفوذها ونفوذ ابوها علشان تطلع علي من قضية الرشوة – رغم ان كل الادلة ضده ورغم اعترافه بالجريمة- يسلاااام بقي فيه حب كده..... ياحلوتك يا علي....

وهنلاقي في الفيلم ده حسين الهلاس اخو علي هيعمل فيديو كليب.... وهياخد بهية ترقص معاه في الكليب ده...

وهنلاقي ابو إنجي لما هيعرف العلاقة ال بين علي وانجي... هيهددوووه ... ولما مش هينفع معاه التهديد... هيأذي ابوووه عبدالواحد... وهيتدخل علشان الاستاذ عبدالواحد يسقط في امتحانات كادر المعلمين... وهيقفلو مركز الدروس الخصوصية البيشتغل فيه...

والاستاذ عبدالواحد مش هيستحمل الصدمة وهيتشل وهيتخرص....

وهيفضل اخرص كده لحد ميقف في البلكونة مع اولاده علي وحسين وام حسين وبهية... وهما ماسكين علم مصر وبيحتفلو بفوز منتخب مصر علي الجزائر اربعة صفر.... ولما حماسهم هيذيد مع حماس الجماهير في الشارع وهما بيرددو شعار المرحلة الجديدة بعد الانتصار (أييي أأأووو .... قال ايه عاوزين ياخدوووه)... وفجاءة صوته هيرجعلوو وهيردد معاهم الشعار وبأعلي صوت عبدالواحد هيقول "أأييي أأأووووه قال ايه عاوزين ياخدوه.... انا صوتي رجعلي يولاد"...

وطبعا هنلاقي سليمان صاحب علي... بينضم لحزب الغد.. لحد ميتقبض علي ايمن نور... وبعدين ينضم لحزب التجمع... وهيسيبه لما مش هيلاقي منه راجا... وهيقرر الانضمام للأخوان... ومن ساعتها هيختفي من احداث الفيلم.. وهتطلع اشاعات تؤكد اعتقاله... واشاعات تانية هتقول ان الحكومة خطفته... واشاعة تالتة ان الحكومة خلصت عليه...

وطبعا بما ان حب علي وانجي اكبر من كل الظرووف... هيقررو انهم يضربو ورقة عرفي...

وفجاءة احداث الفيلم هتاخد منعطف جديد... لما ابو انجي حاله هيبتدي يتدهور.. علشان اعداءه في الحزب هيحربووه بكل قوتهم وهيخرجوو من الحزب بفضيحة انه بيبع بزازات ملوثة... وتجارته هتضرب كمان لما القراصنة بتوع الصومال هيخطفو سفينته ال كانت شايلة شحنة سلاح رايحة لدول شرق افريقيا....

وهتيجي القشة ال هتقطم ورك البعير...

لما إنجي بنته هتدخل عليه وهيا بطنها كبيرة... وبتعيط....

البنية حبلت.... والواد علي استندل معاها.... وساعتها هيقرر انه ينتحر ,وهيرمي نفسه من فوق البرج...

وانجي هتلاقي نفسها يعين اومها لوحدها وبطولها- طبعا هتسألو اومال فين علاء اخوها هقولكم انه هيبقي هاجر كندا من اول الفيلم- وهتبتدي تدور بالواد الهتخلفه علي المحاكم علشان تثبت نسب الواد ابنها ل علي...

وهتفضل تلف علي المحاكم لحد م أبنها يكبر...

وينتهي الفيلم بمشهد وهيا خارجة من باب المحكمة.... وفي ايدها العيل ابنها....

والفيلم يخلص بموسيقي حزينة... ويتكتب علي الشاشة:

ومازال البحث عن سليمان مستمرا......

هناك 20 تعليقًا:

norahaty يقول...

هههههههههههههه
هههههههههههههههه
هههههههههههههههههه
بقى هى القشة اللى قسمت
ورك البعير:قشة وزن الفيل دى:)

norahaty يقول...

ايه دا...أول تعليق!
يبقى لى عندك تذكرة فوتيه
لووووج فى الفيلم الجديد بتاعك
مع المشاريب وأجرة التاكسى والمرافق
ماشى ياأبووووووووووووووووووووووو على

norahaty يقول...

وحررررررام عليك
لسه سايب تحقيق الكلمة
بلاش ظلم وافترا وشيلوهاااا
على راى الستيتن الفوووواضلتين
الست ريا واختها الست سكيننننة

Abo 3li يقول...

نورتيني يانورا
يسلام علي القناعة, التاكسي والمشرووب بس؟؟ لا وليكي فشار عندي كمان

"وحررررررام عليك
لسه سايب تحقيق الكلمة
بلاش ظلم وافترا وشيلوهاااا"

مش فاهم حاجة!!! ممكن توضيح؟؟!!
عموما بجد نورتيني

Abo 3li يقول...

نورتيني يانورا
يسلام علي القناعة, التاكسي والمشرووب بس؟؟ لا وليكي فشار عندي كمان
وحررررررام عليك

"لسه سايب تحقيق الكلمة
بلاش ظلم وافترا وشيلوهاااا
مش فاهم حاجة!!! ممكن توضيح؟؟!!"

عموما بجد نورتيني

صيدلانيه طالعه نازله يقول...

هههههههههههههههههه
بصراحه رد هارتى المفروض يبقى جيت ماى هارت باك
هههههههههههههههه
عشان يبقى مترجم صح
بس القصه الجديده تحفه و بعدين انت اضفت ليها الاحداث الجاريه كلها قرصنه و بزازات ملوثه و حزب الغد و الاخوان

ناقص حاجه مهمه ان انجى حتنحرف بعد ما المحكمه ترفض طلبها فى اثبات نسب ابنها لعلى
و تتجه للفيديو كليب و تتعرف على شهاب طلعت مصطفى
و تقلب الملايين بتاعته و فى الاخر حيسلط عليها و يقتلها و يطس اعدام يا معلم

ده التطور الطبيعى للحاجه الساقعه قصدى للفيلم

ياريت تكتب اسمى جنبك على الافيش و المكسب بالنص

سلاااااااااااااااام

norahaty يقول...

اقولك ولى تذكرة فى الفيلم بعد القادم مع الذى منه
(المشروب والساندوتشات والتاكسى واجرة المرافق)المهم
لما بتحط تعليق بيطلع كلمة بالعنجليزى مفروض تكتبها قبل جناب بلوجر أفندى ما يرضى يحط التعليق
انت عارف ثقافة معظمنا هيروغليفى وبالتالى بيحصل غلطات كتير وناس برضه كتير مابترداش تعلق
المهم أنت ما بتشوف الكلمة دى لانك صاحب
البيت اللى هى المدونة يعنى
طيب نجى للمهم (الخلاصة فى المصاصة وأبقى اكتب لى جواب شكر
1-الاعدادات
2-التعليق
3-تأكيد الكلمة شيل علامة الصح اللى موجودة فى المربع اللى جنبها
4-اعمل حفظ للتغيرات
5-ادينى حق التاكسى اللى حروح فيه بقى للمدونة بتاعتى

Abo 3li يقول...

دكتورة علا
لا انا قاصد اخليه رد هارتي... مش ترجمة.... دي زيادة في الاسفاف.. عربي علي انجليزي .. واوووول انجليش اووول زااا تايم...
وممكن بقي نعمل جزء تاني للفيلم نزوود فيه انحراف انجي وكل الشخصيات ال نفسك فيها...
بس موضوع الاسم علي القفيش والمكسب بالنص ده ... صعب... ممكن القفيش... بس النص كتييييييييييير... كفاية عليكي التومن...
القناعة كنز مبيخلصش

Abo 3li يقول...

نورا
تصدقي كنتي ناسي الراديوبتون ده....
ههههههههههههههههههههههه...بجد شكرا جدا انك خلتيني اخد بالي... علشان ابطل غلاسة علي الشعب..
بس لما سيدتك تاخدي تذكرة في كل فيلم... انا اعيش منين؟؟؟ اكسب منين؟؟؟ اتعشي منين؟؟؟
يرضيكي ابات منغير عشا؟؟!!

norahaty يقول...

ايووووة
يرضينى وحاخد
التذكرررررتين:)

norahaty يقول...

لولولوىىىىىىىى
لولولوىىىىىىىىىى
لولولوىىىىىىىىىىىى
ادعيلى بقى ياابو على

Abo 3li يقول...

يااااااااااه ... ايه الشر ده كله.. علشان تذكرتين تموتيني من الجوع.... فين ايام زمان... خلاص الانسان مبقاش يضحي علشان اخوه الانسان..

وايه الزغاريد دي كلها؟؟؟؟؟
كل ده علشان مش هتكتبي بالانجليزي السيكيورتي تشك!!!!
هههههههههههههههههههههه
عموما
ربنا يوفقك.. ويكرمك..

شفتي دعوة ببلاش اهو منغير تذاكر ولابتاع

الشعب لابد له من حكومه تشكمه يقول...

هههههههههههههههه حلوه بجد.
والله حلوه.
لاااا وفعلاااا الجنانينى زى المدرس دلوقتى بالنسبه للمسؤل:)

اول زياره ومش الاخيره ان شاء الله

الشعب لابد له من حكومه تشكمه يقول...

ممكن اقولك حاجه هى مش تخصنى يعنى بس لو تغير اسمك لانى فى ابو على كتير اوى دلوقتى

Abo 3li يقول...

وانا بقول برضو البلوج منوور...
زيارتك فرحتني... وزياراتك بعد كده هتفرحني اكتر...

وحياتك مش المدرس بس... الشعب كله عند المثؤلين.. بني ادمين درجة تالتة...

وبالنسبة لاقتراح ال اسم... قيد الدراسة

wasf_elahsas يقول...

ههههههههههه حلو الفيلم
شكرا

سمع هوص (Abo 3li) يقول...

ههههههههههههه
الحمدلله ان جمهوره بيكتر اهووو..

هتشجعوني ننزل بالجزء التاني

شكرا ليكي انتي يا وصف.... علي زوقك

نورتيني... وصباحك زي الفل

sweet angel يقول...

ههههههههه
هيه دي قصص الحب ولا بلاش
وانا ممكن اغنيلك اغنيه التتر

سمع هوص (Abo 3li) يقول...

sweet angel


وانا موافق تغني التتر... بس هتدفعي كام؟؟؟ لازم استغل نجاح الفيلم اسؤ استغلال.... نيهاهاهاهانيهاهاها..

بس علشان الاحراج هديلك رقم (علي الحجار) تعتزريله بالنيابة عني علشان اتفقت معاه يغني ريمكس ذئاب الجبل تتر للفيلم..


نورتيني... تحياتي

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل