الأربعاء، 13 يونيو، 2012

ليه هنتخب مرسي... ومش هقاطع... (خرء للصمت الانتخابي)

بدون مقدمات كتير ندخل في الموضوع علي طول...
اولا مرسي مش شفيق... وكل اللي يساوي بينهم يأما جاهل او غبي او بيزيط في الزيطة...
الاتنين زي الخري.. انا عارف..
بس من الظلم اننا نساوي فاسد بمشروع فاسد محتمل...
ومن الظلم كمان نساوي بين واحد كان معتقل في سجون مبارك ايام الثورة وبين التاني اللي كان وزير وبقي رئيس وزرا لانقاذ مبارك!
او نساوي بين عداوتنا مع شفيق اللي من اهم رموز مبارك.. وبين فصيل سياسي كان معانا في ايام الثورة الاولي وبعدها بقي بينا خلاف سياسي...
لنفرض الاخوان كانوا نزلوا معانا في محمد محمود ومجلس الوزرا... مش كان زمان ناس كتير منكم هيأيدهم بشكل كبير؟؟ طيب يبقي الخلاف معاهم سياسي... هما ليهم وجهة نظر -جايز تكون غلط- واحنا لينا وجهة نظر تانية... بس شفيق الخلاف معاه علي دم...
انا عن نفسي بعتبر -ومبحبش- الاخوان تيار سياسي زيهم زي اليساريين زي الليبرالين... تيار مقتنع بأفكاره وبيحاول يترجمها... غشم اغبية بهايم.. اه... بس ده حال كل التيارات السياسية في مصر... بس غباوتهم اوضح علشان هما اللي متصدرين المشهد السياسي بحشدهم...
وطبعا فكرة انهم هيكوشوا علي كل حاجة وهيبقوا حزب وطني جديد فكرة غبية فشخ واللي بيقولها اغبي منها... ﻷن اكيد ساعتها مش الذكاوة انك تروح تنتخب الحزب الوطني نفسه!!
ثم ان بأنتخاب مرسي ممكن نشوف قصاص من مبارك والعادلي بجد... لان الاخوان بيكرهوهم... انما شفيق! هنشوف قصاص الداخلية مننا احنا!
ده غير انك يوم ماهتنزل تعمل مظاهرة ضد مرسي والاخوان ، الجيش والشرطة هيبقوا في ضهرك... وهتلاقي تشكيلات الامن المركزي بدل مابتضربك بتوزع علينا مياه معدنية وعصير ويمكن يهتفوا معانا كمان "الامن المركزي والشعب ايد واحدة" !! لان الجيش والشرطة والقضاء بيعتبروا الاخوان عدو وصعب اوي الاخوان يخترقوا الاجهزة دي في فترة صغيرة او حتي كبيرة!
.....
......
اصل الاخوان هيحجبوا الستات بالعافية...
كانوا اتشطرو علي لامؤخذة نسوانهم الاول...
ف متخفيش ياختي محدش هيلبسك حجاب بالعافية ومحدش هيعرف يمنع الفيزون كمان!
اللي بيشبه ايران باللي ممكن يحصل في مصر ميعرفش طبيعة ايران وللاسف شكله كمان ميعرفش مصر!
..
...
هيفشخوا الحريات الشخصية...
طب تخيل كده معايا مجموعة شباب ملتحي لابس جلاليب بيضة قصيرة وماسك خرزانات -الصورة الذهنية الثابتة عندنا- داخلين علي قهوة ينصحوا الناس متلعبش طاولة علي المشاريب... تفتكر الناس علي القهوة هتعمل فيهم ايه بعد ما يعلقوهم زي الدبايح في الشارع؟؟
المصريين ممكن تقرفهم في اكل عيشهم... ممكن تقرفهم في بنزين وبوتجاز.. بس هتقرفهم في مزاجهم.. يبقي انت بتحضر عفريت مش هتعرف تصرفه فعلا...
...
.....
هيدبحوا في المسيحين...
اصلا مبارك خلي عندنا خلط... وبقينا نحط كل التيارات السياسية -اللي بتتمسح في الاسلام - في سلة زبالة واحدة... رغم ان كل تيار منهم له سلة الزبالة الخاصة بيهم... والشهادة لله اللي اعرفه ان سلة الزبالة اللي فيها الاخوان مفيهاش دم.. عكس الجماعة الاسلامية او بعض السلفيين...
عكس نظام مبارك نفسه اللي كان بيقتل المسيحيين او يدافع عن القتلة علشان يشعل الفتنة اكتر... ويخلي المسيحيين عايشين ديما في رعب... 
جاب للناس اسلاموفوبيا حرفيا...
والموضة حاليا بقيت اخوانوفوبيا!
...
.....
لسه عايز تنتخب شفيق...
....
منك لله ياشيخ..
....
.....
......
........
..........
....
ويلعن %$#@#$ امك يابن المرة يا ^%$%#$$% ياجزمة...
...
.....................
مش هتنتخب شفيق بس هتقاطع؟
لو في المقاطعة اي خير كنت قاطعت معاك...
بس للاسف المقاطعة بتصب في صالح شفيق...
لأن ببساطة مفيش حد فلول او ابن وسخة زعل مثلا ان عمرو موسي مدخلش اعادة ف قرر يقاطع... كل الفلول خايفين علي مصالحهم الشخصية وهيدعموا شفيق بكل قوتهم... يبقي المقاطعة بتقلل فرص مين!؟؟ اكيد زفت مرسي...
ده غير ان معظم "النشتاء"  اللي بيدعوا للمقاطعة ولا يفرق معاهم اي حاجة غير انهم يفضلوا في الصورة ...
وغرورهم مبيسمحلهمش يأيدوا اي حد ممكن الضوء ميتسلطش عليهم بسببه...
زي ما عملوا مع خالد علي كده.. دبسوه في الترشح علشان يفضلوا في المشهد مش اكتر...
.....
.......
.........
برضه لسه ناوي تقاطع....
انا معاك ان اصلا الانتخابات من الاول مفيهاش مرشحين يبلوا الريق.. لانك لو كنت من التيار الاسلامي ف اكيد كان نفسك في ابواسماعيل... ولو من التيار المدني كنت تتمني البرادعي... ولو كنت فلول ابن مرة يبقي اكيد كان نفسك في عمر سليمان...
بس دول اللي دخلوا الانتخابات... ولازم تختار..
....
......
برضه هتقاطع او هتبطل صوتك؟؟
ماشي...
اقولك بقي ان 60% من اقتناعي بضرورة انتخاب مرسي في الشوية الجايين دول...
...
....
-قرفان من الاخوان؟؟
-اه
-وانا كمان... 
-طب نعمل ايه
-اديهم سلطة
-نعم!؟
ايوة
الاخوان اخدوا 11 مليون صوت في البرلمان و 5 بس في الرئاسة...
تفتكر ال 6 مليون دول راحوا فين؟؟
قرفوا من الاخوان...
طب ليه؟؟
علشان اخدوا سلطة ومعرفوش يعملوا بيها حاجة...
والكلام ده في اربع شهور... تخيل في اربع سنين!!!
وكده كده الرئيس الجاي هيلبس في الحيطة...
لو جيه ابوتريكة نفسه هيلبس في الحيط... لان البلد حرفيا خربانة...
ده غير ان الشرطة والجيش بيكرهوا الاخوان... ف هيضيقوا عليهم علي قد ماهيقدروا... 
وبالتالي هيبقي فيه صراع سلطات... عكس شفيق اللي الجيش والشرطة هيدافعوا عنه باستماتة...
وسط كل الصراع اللي هيبقي الاخوان محشورين فيه علشان ينجحوا وهما في السلطة -ومش هينجحوا- شعبيتهم هتقل... والتنظيم الهائل بتاعهم هيتفكك بشكل كبير...
لكن كونهم يفضلوا عايشين دور المعارضة المظلومة اللي نفسها تخدم الشعب بس مش عارفة، ده بيحافظ علي قوتهم وشعبيتهم...
وهتبقي فرصة لتيارات جديدة تكون كيانات قوية منظمة... ولو معرفناش نعمل ده يبقي نستاهل نفضل شايلين الخري طول عمرنا... لكن تقولي احنا مكانا الشارع وبتاع هقولك الشارع مبقاش طايق ابونا... ولازم نعترف بده ونشتغل عليه بشكل جديد...
الثورة فشلت او اوشكت... اه
بس لازم نبقي شايفين الواقع كويس... ان المعركة اتحولت من معركة غاز وطوب لمعركة سياسية...
والسياسة قذارة... وانكتبت علينا...
.....
.......
.........
انا معنديش يقين ان كلامي ده صح او غلط... دي مجرد ارهاصات -زي المثقفين- بس حاولت ابقي فيها واقعي علي قد ماأقدر...
...
.....
.......
صوتي لمحمد مرسي... وربنا يسامحني علي الجريمة دي...
....
.......
.........
.............
...
ملحوظة: مش عايز حد الفكاكة قتلاه يجي يقول تلاقيه اخوان وبيستعبط... وعلشان اثبتلكم... 
المرشد ده ابن م#$%ة و م$#@ص...
بس خلاص.

الأحد، 26 يونيو، 2011

هم يضحك... وهم يبكي...

فات شهر بالظبط علي التدوينة الفاتت ... ال كتبت في اخرها يتبع...
التدوينة ال كنت اتكلمت فيها عن القبض عليا وحبسي في السجن الحربي...
التدوينة دي بقي هتكلم فيها عن شوية مواقف متنوعة حصلت معانا جواه...


#1 من سبع سنين ل خمستاشر سنة...
اول يوم في السجن كان اغبي واطول يوم واصعبهم... ﻷننا مكناش لسه عارفين راسنا من رجلنا... ومش عارفين بيتقال علينا ايه بره...
سمحولنا بليل نتصل بأهلينا او اصدقائنا... كل واحد ليه مكالمة تليفون... طبعا بيبيعوا كارت المصرية للاتصالات ابو 5 ب 8 جنيه - ده الجيش بيكسب مكاسب- المهم معظمنا اتصل بناس بره وكانت الاخبار صادمة... ان ال بيتقال علينا بره في الميديا اننا بلطجية وكسرنا الشارع وسرقنا البنك واحنا ال اكلنا الجبنة وال خرمنا الاوزون... وهنلبس من 7 ل 15 سنة سجن!!! 


#2 الممبار...
في يوم من ايام السجن السبعة كنت انا وواحد من رفقاء الزنزانة في الفردة التانية - الفردة التانية مصطلح يطلق علي الجناح التاني من السجن ال فيه المساجين ال بجد مش السيس ال زينا - علشان كبينة الاتصالات هناك... وشوفنا عساكر شايلين اطباق كبيرة فيها "ممبار" وفراخ... بطننا لعبت بصراحة علي الممبار....
المهم رجعنا جناحنا وحكينا علي الممبار لباقي زمايل البورش... وبليل عدي علينا عسكري ابن ناس كده كان بيتكلم معانا كتير... ف فوسط كلامنا رحت قايله : "هوا ايه حكاية الممبار ال شفناه الناحية التانية ده, واحنا مبيجلناش غير جبنة بس ليه!؟!؟" ف رد عليا وقالي: "لاااا ده بيروح للناس ال لما نفسها في اي حاجة بتجيلهم" قلتلوا:"مين دول يعني؟؟" قالي: "ال واخدين اعدام!!"....
اعداااااام!!! وبتقولها في وشي .... الله يخربيتك.... احنا كلنا سمعنا كلمة اعدام ازبهلينا!! ومشيناه بره... وفضلنا مصدومين يجي نص ساعة!!! وقررنا نعتزل الممبار الي الابد....
لما خرجت لاقيت امي عاملة ممبار... قعدت اضحك ولما حكيتلها مكنتش عاوزة تخليني اكل منه!!!


#3 اغتصاااااااااااااااااب....
في يوم لقينا العساكر داخلين علينا بليل وبيقوللنا نلم حاجتنا علشان هننقل الزنزانة ال جنبنا علشان في ناس من الفردة التانية هتبات في الجناح بتاعنا الليلة... ولما سألناهم دول محبوسين في ايه.. قالولنا اغتصاب...
المهم رحنا ضمينا علي الزنزانة ال جنبنا من زملاء السفارة برضه... العيال كانو نايمين وصحيوا لما ضمينا عليهم... فبنحكيلهم علي الحصل....
ف واحد منهم سأل: طب وال في الزنزانة الجنبنا دول بتوع اغتصاب ستات بس ولا رجالة كمان!!!! وكان بيتكلم جد وكان مرعوب وخصوصا ان الزنازين ممكن تتفتح بسهولة من بره ومن جوه لانهم بيقفلو الجناح بس بالاقفال...


يتبع بس مش دلوقتي بعدين....

الخميس، 26 مايو، 2011

محدش يقولي كفارة....



تحذير: البوست ده فيه شتايم قذرة هنقلها زي م هي....


البوست ده كنت ناوي اكتبه اول مخرج من النيابة العسكرية بما اني كنت واحد من المعتقلين في احداث السفارة الصهيونية... بس أتأخرت اوي في كتبته ﻷني خارج حاسس بحالة من التوهان وعدم الاتزان ولسه مستمرة....
المهم... هحكيلكم ال حصل...
انا اصلا مكنتش مقتنع بفكرة الاعتصام امام السفارة للمطالبة بانزال العلم وطرد السفير في الظروف المنيلة ال البلد فيها دي... بس في نفس الوقت مصدرتش حق ال عاوز يعتصم او يتظاهر, لانه ليه رؤيته وحريته....
المهم, انا كنت راجع من السفر الساعة 11 ونص تقريبا انا وواحد صاحبي... وأول مدخلت الشارع - بالمناسبة انا بيني وبين السفارة 3 دقايق مشي علي الاقدام - لقيت واحد صاحبي تاني خارج من الشارع جري وبيقولي الناس بتموت عند السفارة والشرطة رجعت تقل ادبها... فقررت اني اروح معاه علشان اصور وانقل الاخبار ليف علي تويتر وغيره اعمالا لقناعة اخدتها من بعد الثورة وهي " انصر اخاك المتظاهر ظالما او مظلوما"...
وصلت عند تمثال نهضة مصر... الامن المركزي كتير فشخ وبيضرب غاز.... الشباب بيرد علي الاعتداءات بالطوب من شارع الجامعة.... طبعا بما اني مليش في موضوع الطوب ده ومعترض عليه حتي من ايام الثورة فكنت مكتفي بتصوير اعتداءت الامن وخطفهم كل شوية لواحد من الشباب...
شوية والموضوع هدي... الشباب بطل يضرب طوب والامن بطل يضرب غاز وخرطوش....
اتكلمنا مع ظابط امن مركزي رتبته ملازم اول وواحد تاني رائد.... اتفقنا معاه انهم يبطلوا ضرب للمتظاهرين مقابل انهم يعتصموا اعتصام سلمي عند التمثال وميقربوش اكتر من كده.... الشباب وافقوا وابتدوا ينظموا نفسهم بشكل متحضر....
بعد 5 دقايق وبدون اسباب جديدة... الامن ابتدي يضرب تاني بكثافة والكل اتفرق....
وصلنا عند الفورسيزون لقينا شاب ملتحي - لما قابلته في السجن الحربي عرفت واتأكدت انه عقله خفيف شويتين - مسك طوبة وحاول يكسر بيتزا هت ال هناك علي اعتبار انه امريكاني... لحقناه ومسكناه واتنين شباب ملتحيين تانين مكنوش معاه اصلا هدوووه وفهموه ان المطاعم دي بتاعتنا احنا ومينفعش نكسرها....
طبعا ال كل كان ناوي يرووح بيتهم خلاص لان الليلة اتفضت خلاص...
فجاءة لقينا عساكر امن مركزي جاية بتجري علينا من ناحية السفارة.... وقدامنا عساكر شرطة عسكرية جايين يجروا من ناحية ميدان الجيزة...
جرينا في شارع جانبي كان فيه جراج - لو سألت هتلاقي معظم ال اتقبض عليه اتقبض عليه في شارع الجراج او في الجراج نفسه - لقينا شرطة عسكرية قافلة اخر الشارع... وراحوا ضاربين نار في الهوا....
تحذير تاني: من هنا هتبتدي الالفاظ الخارجة ال مكنتش عاوز انشرها بس قررت انقلها زي م هي...
ارقد... ارقد يابن الوسخة انت وهوا....  دي بداية القصيدة, الكل نزل علي ركبه مع ضرب النار التهديدي...
اجبرونا اننا ننام علي بطننا وايدينا ورا ضهرنا....
شاب رفض وقال: مش هتهيني ومش هتعاملني ك اسير.... راح ظابط شرطة بزي مدني راح قايله: مش ههين مين يا ** امك... وراح نازل عليه اقلام وشلاليت....
الظباط كانوا حريصين اننا منرفعش راسنا علشان منشوفش اشكالهم او نحفظها ﻷنهم رغم كل ده كانوا خايفين مننا....
عسكري شرطة عسكرية راح قايل: كله يقف انتباه... كلكم وقفتوا... طيب... ارقد تاني يابن الشرمو** منك له... دحنا هنزل ال خلفوكم النهاردة... طبعا مع ضرب شوية رصاص في الهوا استعراضا للقوة...
ال نايم جنبي رفع راسه علشان يشوف ال بيحصل راح عسكري امن مركزي ضربه بالبيادة في وشه وهوا علي الارض... وراح ضربني انا كمان بالبيادة في كتفي - للامانة دي الضربة الوحيدة ال انضربتها شخصيا يمكن علشان حظي حلو - عسكري تاني بتوجيهات من ظباط الامن المركزي راح ماشي علي ضهرنا واحد واحد والظابط بيقول: عاوزين تنزلوا العلم! اهوا انتو النزلتوا اهو ياولاد المتن*** ....
نقلونا من الشارع ده لشارع النيل تحت كوبري الجامعة... كل عسكري امن مركزي مسك واحد ومشي بيه... انا كان حظي حلو ان العسكري ال معايا كان خانقني بس... 
صاحبي وهوا ماشي مع العسكري بص علي الظابط راح ال ظابط ضاربوا بونية في عينه.. والعساكر اشتغلت بالعصيان علي ضهره وصدره...
الظابط ده عوور نص المقبوض عليهم بال بونيات ده غير الضرب بخزنة المسدس علي الرأس والشد من الدقون للشباب الملتحي... هوا كان لابس ملكي.. تيشرت ابيض تحديدا.... الظابط ده كان مطلب شعبي لكل المعتقلين بعد كده في السجن الحربي... 
طبعا باقي الشباب عمالين يطلطشوا اقلام وشلاليت وعصيان وهما ماشين...
اي شاب ملتحي اتعامل معاملة خاصة من سب دين و ياسلفي يابن المتنا**...
شاب صغير وشكله ابن ناس اوي دقنه خفيفة - عرفت بعد كده انه من مصر الجديدة وبيدرس اعلام - عسكري مسكه وقاله انت فلسطيني ياااض... الشاب قاله ﻷ... العسكري: طب اسم الكوبري ده ايه.... الشاب من الرعب واللخبطة قاله: كوبري النيل... العسكري: تبقي فلسطيني ابن وسخة... ونزل فيه ضرب!!!!
وصلنا عند عربيات الترحيلات... لقينا عقيد شرطة عمال يسبلنا الدين ويقولنا: انتوا بقي شباب الثورة يشوية خولات... ثورة ايه يامتنا*** ... دي بلدنا احنا... مش بلدكم....
لواء دفاع مدني تاني: فاكرينا خلصنا يوم 28 يامعر*** ... رجعنالكم اهوا... قال ثورة قال... دي ثورة خولات... دي بلدنا ومضيين عليها... يشباب الفيس بوك ياشواذ....
بلدنا وماضيين عليها... جملة عجبت معظم الظباط فبقوا يكرروها مع كل شتيمة او سب دين لينا...
لموا البطايق واخدوا الموبيلات - موبيلات كتيرة عساكر وامناء الشرطة سرقوها - وكلبشونا وركبنا عربية الترحيلات مع شوية ضرب وشتيمة كمان...
ظابط شفناه بيجري علي كوبري الجامعة مخصوص علشان يشتمنا ويقول: مسكناكم ياولاد الوسخة يبتوع الثورة يوم 28 مش هيتكرر تاني يامعر*** ....
فضلنا في عربية الترحيلات ساعة قبل منتحرك....
شاب هرب الموبيل بتاعه منهم وطلع بيه... كل واحد كل اهله يعرفهم...
انا اتصلت بواحد صاحبي علشان يستخدم ال لاب توب بتاعي ويعرف النشطاء علي التويتر اننا اتقبض علينا...
بعد شوية اتحركنا علي س 28 نيابات عسكرية... اخدوا اسمائنا منغير مننزل...
وبعدها نقلونا السجن الحربي... كنا حوالي 130 واحد...
فضلنا في عربية الترحيلات 40 بني ادم 8 ساعات كاملين...
في السجن الحربي للامانة المعاملة كانت مختلفة... كانوا بيحترمونا... وعقيد اسمه العقيد خالد مدير السجن وصي علينا العساكر انهم يتعملوا باحترام معانا... وحطونا في مكان لوحدنا اسمه "الكراكون" بعيد عن باقي المساجين علشان يبقي لينا معاملة خاصة محترمة - افتكر انهم عاملونا بأحترام علشان عندهم توجيهات اننا خارجين بعد فترة ومش عاوزين شوشرة - معظم المقبوض عليهم طلبة وموظفين محترمين.. 
الشرطة قبضت علي كل كائن حي متواجد في شارع الجامعة او النيل او مراد من الاتجاهين.... لدرجة انهم قبضوا علي عامل ديلفري... واحد واخوه كانوا بيركنوا تحت البيت... شاب نزل من التاكسي يشوف فيه ايه.... ده غير طلبة الثانوي الكتير ال مسكوهم وهما راجعين من دروسهم...
بعد يومين تم الافراج عن حديثي السن - تحت 18 سنة - وكانوا تقريبا عشرين واحد....
بعد اسبوع تمت محاكمة عسكرية مسرحية... عرفنا ان الاحكام اصلا جاية للقاضي في ظرف متشمع بالشمع الاحمر بسنة مع ايقاف التنفيذ....


يتبع......

الاثنين، 25 أبريل، 2011

تونسي وافتخر: من أم الثورات تونس إلى أم الدنيا مصر : عتاب ورجاء

تونسي وافتخر: من أم الثورات تونس إلى أم الدنيا مصر : عتاب ورجاء: "أما بعد فهذا رجاء للثوار المصريين للبر بثورتهم الام كما يهرول سارقو ثورتنا للغرب مستجدين الدعم لوأد ثورتنا فإني اكتب هذه التدوينة راجيا دعم..."

الخميس، 17 مارس، 2011

لأ علشان مش عاوز: ابني يبقي في حجري وادور عليه..

تعديلات الدستور....
دستور ايه ولامؤخذة؟؟
اه اه الدستور ده ال احنا اسقطناه لما عملنا الثورة ولا دي تعديلات لحاجة تانية؟؟
الدستور ده ال بقاله 41 سنة بيتشخرم وبيتلون وبيتظبط وبيتربط؟؟
هوا اايوة والنبي هوا..
هوا بغباوته وشكله العكر...


ليه مش "نعم"؟؟؟
نعم يعني انا بعترف ان كل العملناه سوا ده كان لعب عيال.. أسقط دستور ومعترفش بيه وبعد كده اوافق علي تعديلات في نفس ذات الدستور!!!!
نعم يعني انتخابات برلمانية دلوقتي... دلوقتي يعني الاخوان والحزب الوطني " كمستقلين" هما ال هيعملولي الدستور الجديد.. وانا مش مستعد حد يتكلم بأسمي لمجرد انه كان مُنظم من قبلي واستغل ضيق الوقت لصالحه...
نعم يعني انا موافق علي سياسة الاخوان -الاحترم ذكاءهم لكني محترمش اساليبهم- في تخويف الناس .. انا شفت بنفسي منشورات للاخوان بتحرم التصويت ب لا ... ده غير حملتهم الشرسة ال بتوهم البسطاء ان التصويت ب لا هيخلي المجلس العسكري يفرض الاحكام العرفية.. والمسيحين - علي حد تعبيرهم- هيلغوا المادة التانية.. والاستقرار والاقتصاد و الخ الخ...
سياسة الترهيب دي بجد حاجة وسخة...
نعم يعني انا موافق علي كل التناقضات الموجودة في الدستور لحد ميتعمل واحد جديد..
نعم يعني انا موافق علي ان رئيس الجمهورية يمسك الحكم بكل الصلاحيات المهووووولة ال في ايده دي...
نعم يبقي مش هدي اي فرصة لأي حركة سياسية تنظم نفسها علشان تشارك بشكل فعال في الحياة السياسية في مصر الخمس سنين الجاية..
نعم يبقي انا اقتنعت بالفكرة الغبية بتاعة الاستقرار.. طب م كده كده هنعمل دستور جديد ... طب منعمله دلوقتي ونخلص... علي رأي المثل الشعبي: يبقي ابني في حجري وأدور عليه؟؟؟


علشان كده انا هقول لأ


وبمناسبة الارهاب الفكري ال الأخوان والسلفين عملينه للناس علشان ميصوتوش ب لأ خوفا وحرصا علي المادة التانية...


المادة التانية..
«الإسلام دين الدولة واللغة العربية لغتها الرسمية ومبادئ الشريعة الإسلامية المصدر الرئيسي للتشريع»..
هكتبلكم رأي واحد صاحبي مسيحي لما سألته علي رأيه في الموضوع ده...


قال: انا مش معترض خالص علي المادة دي.. لانها بتقول المصدر الرئيسي مش الوحيد للتشريع..
ثم مصر مش زي السعودية .. يعني مش بتطبق الشريعة بشكل كامل .. بتطبق القانون المصري .. وفي الحاجات البتطبق فيها الشريعة علي المسلمين مش بتطبق علي المسيحين زي الجواز والطلاق وخلافه..
ف ليه هخاف من المادة دي وهحاول اغيرها!!؟؟ وانا عارف ان ده هيعمل مشاكل وحساسية في المجتمع المصري...
اه الاسلام الدين الرسمي للدولة بسبب ان الاغلبية مسلمة وده طبيعي... تبقي فين المشكلة!؟!؟


ده كلامه ال انا متفق معاه فيه... يبقي مينفعش حد يستغل فطرة الناس المتدينة ويخوفهم علي المادة دي او يحرم ويحلل التصويت بنعم او لأ علي حسب هوااااه...


يبقي ببساطة كده .. كل واحد يفكر ويشوف ايه مميزات وعيوب نعم او لأ... ويختار...
المهم انه يشارك ... ويحاول يقنع غيره انه يشارك...
ويفتح عقله ويتقبل الرأي الأخر ويناقشه.. ويبقي عنده استعداد للاقتناع... يعني ميتربسش دماغه وخلاص..


وتاني انا هنزل يوم السبت ان شاء الله وهقول لأ لتعديلات الدستور لأ لترقيع الدستور لأ لاننا نستحق بعد العملناه دستور جديد دلوقتي مش بعدين لأ علشان مش عاوز: ابني يبقي في حجري وادور عليه..





الأحد، 13 مارس، 2011

بيان هاااام.....





بيان رقم واحد:
مبروك الحرية- رغم انها متأخرة..

بيان رقم اتنين: 
انا لسه عايش....

بيان رقم تلاتة:
عودتي المصونة للمدونة...

بيان رقم خمسة -مبحبش رقم اربعة انا حر-:
فترة الانقطاع عن المدونة كانت بدون اسباب معلومة او غير معلومة..

بيان رقم ستة:
لا للتعديلات الدستورية. لا للدستور المرقع...

بيان رقم سبعة:
اللهم احفظ مصر...

بيان رقم سبعة - تاني- :
الشرطة الهتتظاهر تتحاكم احسن...

بيان رقم سبعة -كبرت في دماغي بقي وكل الجاي سبعة- :
يارب خد القذافي وريحنا...

بيان رقم سبعة:
القذافي وعلي عبدالله صالح.. اتلم تنتون علي تن تن واحد نتن والتاني انتن..

بيان رقم سبعة:
وحشتوني..

بيان رقم سبعة:
تتوالي البيانات في حينه...

والله المستعان...

السبت، 30 أكتوبر، 2010

هستحملكم....



انا النهاردة قررت قرار مهم...
انا قررت ابقي رئيس جمهورية...
ايووون ... انا قررت اكون رئيس جمهورية ...
بصراحة انا شايف نفسي اصلح واحد للمنصب ده...
ايوة انا اصلح واحد للمنصب ده...
صدقوني...
او متصدقونيش.. مش مهم...
ده لمصلحتي.... ولمصلحتكم...
متقلقوش مش لمصلحتي بس...

والنهاردة هو يوم تنصيبي لنفسي علي كرسي الحكم...
تا
تا
تا
تن

بسم الامة
احب ارحب بيكم ياشعبي..
واحب ابركلكم عليا..
واهنيكم اني اخترتكم انتو دونا عن باقي شعوب العالم علشان احكمك...
مش عايز هتافات... انا لو عايز هتافات دي اسهل حاجة ممكن احصل عليها...
انا رئيس واقعي...
عارف انكم هتكرهوني بعد فترة...
والهتاف ده هيبقي مجاملة...
انا عارف كل ده...
ندخل علي المهم علشان مش فاضيلكم..
اما انكم شعب رغاي صحيح...
بس هستحملكم...
مهي علاقة متبادلة..
هستحملكم وهتستحملوني...
هتستحملو دكتاتورتي...
هتستحملو اتباعي..
هتستحملو شطحاتي..
وهتستحملو نرفزتي عليكم (وانا نرفزتي وحشة.. انا بحزركم)...
وانا بالمقابل هستحملكم..
هستحمل قرفكم..
وشكوتكم علي الفاضي والمليان..
وهستحمل انكم مش عاوزين تشتغلو... وفي نفس الوقت عاوزني ازودلكم اجوركم...
هستحمل بلاويكم... ودي كتير...
هستحمل انكم راضين بواقعكم ومش عاوزين تغيرووه... رغم انكم ساخطين عليه...
هستحمل مزحمتكم لبعض في الموصلات...
هستحمل نصبكم علي بعض... وسرقتكم لبعض.. هستحمل كدبكم ونفاقكم...
هستحمل لما هتفترو علي بعض... وتدوسو علي بعض...
هستحمل...
بصو بصو... علشان انا ورايا مراسم تنصيب...
من الاخر كده انا شاريكم علي عيبكم...
وانتو طبعا ملكوش حق الرفض او القبول....
مش كفاية اني هرضي بيكم...