الأحد، 31 يناير 2010

مصر مصر مصر

عاوز تهدوووو هاتلوو جدووو

مبروك مبروووك مبروووك

80 مليون مبروك

لكل المصريين الفرحوو

وكل المصريين المفرحووش

وكل العرب الفرحوو

وكل العرب ال مفرحووش

مبروك لكل الناس ال بتحب مصر بجد

لكل الناس ال بتفرح لمصر بجد

وعاوز اقول شكرا

شكرا يا سيادة العميد احمد باشا حسن

شكرا يا حضري

شكرا يامعوض

شكرا يامحمدي

شكرا ياهاني

شكرا يافتح الله

شكرا رؤوف

شكرا ياعبدالملك

شكرا ياحسني

شكرا ياجمعة

شكرا ياعبدالواحد

شكرا ياعبدالشافي

شكرا ياغالي

شكرا يافتحي

شكرا ياسقا

شكرا ياشيكا

شكرا يامعتصم

شكرا ياجدووووووووو

شكرا يازيدان

شكرا للناس النسيتها من فرحتي

شكرا لكل المصريين ال كانو واثقين من الفوز النهاردة

والحمدلله... الحمدلله علشان عارف ان الشعب ده غلبان ومكسور... ومحتاج حاجة يفرح بيها...

حاجة تصبروو علي غلبه...

حاجة تفكروو انه مصري...

حاجة تفكروو انه بيحب البلد دي...

بحبك يا مصر

الجمعة، 29 يناير 2010

ياني ياني ياني



والله وعملوها الرجالة
اولا مبرووووووووووووووك لكل المصريين... التأهل للنهائي......
مبرووك لكل المصريين... الاداء والنتيجة.....
مبروووك لكل المصريين..... مبارة رد الاعتبار مع (الاشقاء) الجزائريين....
مبروك لكل المصريين علي حاجة كمان....
اننا عندنا لعيبة محترمين.... مبيحبوش يفترووو....
اه مبيحبوشو الافتري....
يعني كلنا شفنا ازاي منتخبنا كان رأف بحالهم -في الشوط التاني كله- .. والجزائر وصلت لكده ... بعد تمريرات .. واهداف... وعنف منهم خلاهم يلعبو ناقصين- رغم انهم كدا كدا ناقصين- واللعيبة بتوعنا اكتفو بالتمريرات... ومحولوش يهجمو... لأنهم اي هجمة هيعملوها بجووول....
وقالو الافتري حرام....
ورغم كده برضو... جبنا التالت والرابع.... وتحسوو كده اننا كنا رايحين علي الجون بنتدلع.... مش فارقة معانا.... جات جات ...ولو مجتش مش هتفرق كتير لأننا دمرناهم اصلا نفسينا وبدنينا.. وعلي صعيد النتيجة...
ولولا الرأفة دي.. كانت النتيجة خلصت برقمين جنب بعض -احاد وعشرات- بس ده كرم مننا... ورأفة بتدهورهم...

حاجة كمان... لما تلاقي لعيبة بتلعب بهدف انها تأذي خصمها... لأنهم عاجزيين عن انهم يوقفو اذللهم بالطريقة دي... يبقي اللعيبة دي فعلا (تيييييييييييييييييييت).... وهيتفضحو -فضيحة اللحمة في العيد- في المونديال.....
اخيرا مبروك لمصر ولينا
واحب اغني اغنية -من روائع الفن (الراقي)- بهديها للمنتخب الجزائري

واه ياني ياني ياني .... مش هعمل كده تاني....
واه ياني ياني ياني .... مش هتلعب كورة تاني....
وهروح ادور اروح ادور اروح ادور.... علي نفسي

الثلاثاء، 26 يناير 2010

ممكن صورة يا خواجة؟



اشمعنا يعني بتحبو تتصورو مع الخوجات .... ليه متتصوروش مع اي واحد مصري عادي في الشارع؟؟ يعني دي هتبقي ذكري حلوة والتانية ذكري نص نص؟؟

النهاردة كنت بحضر محاضرة كده عن ال open source في شركة ميكروسوفت - رغم اني مبحبهومش بس قلت اهو اشوف هيقولو ايه- المهم الراجل ال كان بيدي المحاضرة راجل امريكاني اتنين متر في تلاتة متر.. ولابس برنيطة ال كاو بويز... وكان نقصو حصان ومسدسين.. المهم الراجل خلص المحاضرة بتاعتو... والناس كلهم قامت وراحو يتصورو معاه -رغم انه مش بيل جيتس مثلا- بس مش ده الضيقني .. الضيقني لسه جاي في السكة... المهم بعد مرجعت شركتنا.... قلت ادعبس ورا الراجل ده شوية علي النت.... المهم قفشتو علي ال تويتر... ولقيته لسه كاتب حالا من 9 دقايق (تويتة) كده... قلت اقراها... لقيتو بيتريق علي المصريين في موضوع التصوير ده .. وبقول انه لسه مخلص محاضرة في مصر والناس هناك خنقووووه بالموضوع ده.... طبعا انا شفت كده .. قلت ابدا.. وانا هسكتلو كده.. رحت مديهملوو علي طول بس بالذوق.. علشان ميقلش علينا شعب همجي....

المهم انا بحكيلكم الحوار ده ليه......

متنطقو ليه؟؟

علشان عاوز منكم طلب متيجو نعمل حاجة كده زي حملة .. نصور فيها المصريين... اه المصريين... كل المصريين...

الراجل بتاع العصير ال علي اول الشارع

الست ال في السوبر ماركت ال تحت بيتكم

سواق التاكسي –ال انت لسه متخانق معاه- دي مسارين البطن بتتخانق ياراجل

دكتورك في الجامعة – ال لسه ظبتك امتحان منيل- اديلوو عزروو مهو تعب هوا كمان علي ما بقي دكتور

المهم صورو اي حد وفي اي حتة

ومقصدش طبعا نصور الحاجات السلبية ... ولا الايجابية برضو

اقصد الحاجات الطبيعية ... الطبيعية اوي والعادية

وبعد متصورو عشرين صورة

اقعدو مع نفسكو واتفرجو.....وشوفو هتحسو ب ايه ساعتها

ووالله العظيم...

والله العظيم كمان مرة..

هتحسو قد ايه انتو بتحبو بعض اوي.. بتحبو اهل البلد دي اوي.... علشان انتو بتحبو البلد دي... او علي الاقل معظمكم

وساعتها هتعرفو الفرق بين حاجتين مهمين اوي: القومية و الوطنية

السبت، 16 يناير 2010

ذكريات ... وكلام قديم 1


ذكريات ... وكلام قديم 1

مش عارف ليه طالبة معايا بنكد وغم

يمكن علشان كذا حاجة حصلت فكرتني بحاجات ملهاش لازمة

يمكن علشان حاسس بحالة توهان عام

المهم اني قعدت ادعبس كده في فولدراتي القديمة

وقررت اغلس عليكم وانشر هنا الحاجات ال كنت بكتبها زمان

زمان اوي

اوي

اه وربنا زمان.. من ايام ثانوي

حاجات كنت فرحان بيها ساعتها... وباعتبرها من معلقات العامية

بس لما قريتها دلوقتي قعدت اضحك

ورغم اني قعدت اضحك حسيت بحاجة كده

يمكن انتو كمان هتحسوها لما تقرو

المهم مش هطول عليكم

واسيبكم مع اول حاجة هنشرها ليكم هنا

وربنا يسهل ونخليه مسلسل رخم كده .. كل محب اغتت عليكم

انشر حلقة منه

اسيبكم مع الحلقة الاولي

وهي بعنوان

الارنب والقطة.... بتضحك علي ايه يااد... وانتي كمان بتضحكي؟؟؟

منغير تريقة لحسن .........

الارنب والقطة

الأرنب شاف القطة

علي طول راح نط نطة

وكانت أول نطة

والقطة وخدة بالها

وعاملة ان هي في حالها

الأرنب قرب منها

وعينيه دابت في عينها

اصله مكنش يعرف

ان القطة شقية

عارفة ومستنية

وفجاءة جريت

وبعدت شوية

واهو كله رسم يا عنياه

الارنب قعد ينط ينط

ولما بطل نط

القطة عادت

ونار الارنب زادت

دي ناره بأديها اتأدت

ورجع تاني ينط

وفمرة القطة جريت

القطة بعدت

القطة هربت

بعد معرفت ان هي حياته

وخلاص زهقت من نطاته

مهي غدارة

وقوية

راحت تدور علي ارنب جديد

علي خوف جديد

وعذاب اكيد

للارنب

وياعيني علي الارنب

راحت وسبته في حيرة

راح ناطت نطة اخيرة

والارنب انكسر

زي مالامل جوايا انحسر

دا الارنب جوايا مات

كان عهد قديم وفات

عمره تاني مهينط

ومن بكره

راح يبقي قط

الأربعاء، 13 يناير 2010

الاثنين، 11 يناير 2010

هما نقلو البرج امتي؟؟

هما نقلو البرج امتي؟؟

مصيبة

ايوة الله مصيبة ووكسة كبيرة

بذمتكو مش تبقي مصيبة لما شباب البلد يبقو ميعرفوش بلدهم؟؟

طب ومش عاوزنهم يرمو نفسهم في البحر عشان يسافرو ايطاليا ولا اليونان؟!

واحد نجم كده منكم يسألني ميعرفوش البلد ازاي؟؟

يسيدي مش هقولك انهم ميعرفوش حاجة بسيطة زي مثلا اسم وزير الاتصالات ولا وزير الزراعة

ولا حتي اسم النايب بتاع دايرتهم

لأ دول ميعرفوش حاجة ابسط من كده

حاجة السياح والاجانب جايين وحافظنها

هتسألني وتقول الاثار يعني؟! وفيها ايه مهو محدش فيهم فاضي يتفسح ولو فاضي ممعوش فلوس

ده غبي ده ولا ايه؟؟ يا بني ادم بقول حاجات بسيطة مش بسألك مين هيا الاميرة بتاح حتب ولا فين اثارها

دناا بتكلم علي حاجات ابسط من كده بكتير

ده البرج والهرم يا ناااااااس ...

استنو هحكي لكم حوار حصل بيني وبين صديقة ليا

بعد رغي كتير ملكومش فيه وصلنا للنقطة دي:

الصديقة: محمد هوا انت ساكن فين بالظبط في الجيزة

العبدلله: في الميدان نفسه اشمعنا؟؟

الصديقة : اصلي عاوزة اعرف عنوان كده جنبك

العبدلله: أأمري فين؟

الصديقة : انت في الميدان نفسه.. يعني جنب البرج. صح؟

العبدلله (بسذاجة): تقصدي انهو برج فيهم... (تخيلت انها تقصد الابراج ال هي العمارات يعني)..

الصديقة (بدهشة عااااااااااااااارمة): ايه ده؟؟؟ معقولة؟؟ هوا احنا عندنا كذا برج؟

العبدلله: انتي هتشتغليني يبت انتي .. انجزي .. ايه العنوان البتسألي عليه؟

الصديقة: يبني انا بتكلم علي البرج... البرج الكبير ده الملولو..

العبدلله: يخرب بيتك.... انتي قصدك برج القاهرة

الصديقة: ايوووووووووووووووووووووووووووووووة

العبدلله : لا للأسف... نقلووه من ميدان الجيزة .. زي منقلو تمثال رمسيس من ميدان رمسيس....

الصديقة (بكل صدق وجدية): لا بجد.... نقلو البرج... امتي.. وودووه فين

طبعا انا مكملتش لان دمي كان وصل لمرحلة من الغليان لاتسمح الا بحاجة من اتنين.. اني اخبطها بحاجة علي دماغها... او اني افضل اضحك عليها لحد متخبطني هيا بحاجة علي دماغي...

معلش اني طولت عليكم ...

المصيبة بقي ان الاستاذة مش من محافظة تانية ولا اقليم بعيد دي من مدينة نصر... عايشة طول عمرها في قاهرة المعز..

خدو الالعن بقي... مرة واحدة بتسألني هوا ايه المبني الاحمر الكبير ال في ميدان التحرير ده..... بالله عليكم اقولها ايه....

ولا اصحابي ال اتولدو وعاشو حياتهم كلها في القاهرة .. وعمرهم مشافو الهرم.... غير وهما مسافرين اسكندرية... بيشوفوه من بعيد...

المصيبة انه بقي فيه المحور... يعني ممكن ميعدوش علي ميدان الرماية وبالتالي مش هيشوفو الهرم...

المصيبة ال بجد صدمتني... اقتناع كتييييييييييييييييييييييييييييييييييييييير جدا من اهالي القاهرة.. ان القاهرة والاسكندرية هما المدينتين الوحيدتين في القطر المصري.... والباقي يأما منتجعات زي شرم الشيخ.... وباقي المحافظات كلها قري....

والله عيب... اما تكون علاقتك بالمكان مقتصرة علي مكان سكنك وشغلك الغالبا بتعلمه بمحطات المترو..

فضيحة لما سايح يسأل واحد صاحبي -وهوا قدام تمثال طلعت حرب- فين ميدان طلعت حرب؟؟ يقولو علي طول في يمين... السايح قعد يبص في الخريطة المعاه... وكان ناقص يقولو: انتي حومارة....

تعالو كده نتفق اتفاق علشان محدش يضحك علينا... ولا عيل مؤذي زي كده يتريق ...

الاتفاق ببساطة اعرف المنطقة ال انت عايش فيها....اعرف ايه المشهور فيها... مش لازم يبقي اثر .. ممكن شارع مشهور بيت مشهور.. وبعد كده ابتدي وسع نشاطك... حبة حبة.... كل شهر انزل مكان جديدة ... بقولك كل شهر مش صعبة يعني.. والحتة الجديدة مقصدش بيها الاقصر ولا العريش... لا في نفس محافظتك... وكل متسمع عن مكان .. حاول تروح تشوفوو... وتعرف عنه... اصل اكيد اكيد فيه حاجة ما في مكان ما.. هتعجبك .. وهتسيب جواك علامة معينة.... حتي لو كانت عربية فول زي بتاعت (سعد الحرامي) في وسط البلد.. وساعتها صدقني هتعرف يعني ايه حنين... ويعني ايه مكان... ويعني ايه ارض...

يسيدي روح اتصور جنب الهرم

الأحد، 10 يناير 2010

بحبك غصب عنك وعن اهلك


اه بحبك

ومش بحبك بس

لا دنا بموت فيكي كمان

ايه؟؟؟ مش سامعك؟؟

انتي مش بتحبيني ….. كدابة ومليون كدابة

انا عارف انك بتحبيني

ولو مش بتحبيني

برضو هحبك

مهو مش بمزاجك بقي

هتبهدليني

هتمرمطيني

هتذلي الجايبني... وتمسحي بكرامة اهلي الارض

برضو هحبك

مهو مينفعش غير اني احبك

هتقولو عليا لازقة وعبيط

اه لو لازقة فيها …. فانا موافق

ولو حبها يعتبر عبط... اعتبروني صبي اسماعيل يس لما كان عامل حنوتي . وكان بيقول دي منباا منباا يمعنمي

اه عبيط يعني

ايه؟؟؟ بتقول ايه يعم الاموووور انت؟؟

ااااااااه

منا عارف

عارف انها مبقتش حلوة ولا بتاع

وعارف كمان انها بخيلة

وريحتها وحشة

و

و

و

ومحدش طايقها .. حتي اهلها

وو

وبتسمع كلام العن بني ادمين في الدنيا

وفيها كل العبر والبلاوي

ايوة انا عارف كل ده

بس برضو بحبها

اه هيا مبقتش حلوة

بس ده بسببي

ورحيتها بقت وحشة برضو بسببي

وعمرها مكانت بخيلة... انا المستني منها اكتر منا استحق

والعالم البتسمع كلمهم دول .. انا السبتها لوحدها يستفردوو بيها

بس علي مين

دنا بحبها يجدعان

بحبها

يعني مينفعش اسيبها كده
لازم اغيرها

حتي لو هيا مش عاوزة تتغير

هغيرها غصب عنها

وغصب عن عين اهلها كمان

هغيرها

ولو كانت دي اخر حاجة هعملها في حياتي

هغيرها

او بمعني اصح

هعدلها

بدل مهي معوجة بقلها كتير

هعدلها

غصب عنها وغصب عن عين التخين... وعين الطويل... وعين ابو منخير كبيرة

هغيرها عشان بحبها

هتقولولي البيحب حد يحبه بحلووه وعيوبه

منا فعلا بحب عيوبها قبل مميزتها

وهفضل احبها

حتي لو معرفتش اغيرها

اكيد مش هتفضل كده

اصلها مش وحشة اوي كده

دي مش حقيقتها

واكيد هيجي اليوم ال ترجع زي مكانت

وساعتها

هتلبسلي فستان ابيض

وتيجي تقولي بحبك

اه

هتقولي بحبك

مش بحلم

مهي دي الحقيقة ال هيا مش عاوزة تعترف بيها

بس انا عازرها

مهو من غلبها

مش لاقية نفس تحبني بيها

ويوم مهتلبسلي الابيض

مش هتبقي لابساه ليا انا بس

يمكن ساعتها مكنش عايش

يمكن ساعتها مكنش انا الغيرتها

بس علي الاقل ساعتها

هيبقي ليا بصمة في تغيرها ده

يمكن تكون بصمتي ال سبتها ساعتها

ورقة مرمية في ارضها شلتها وسيبت شارع من شوارعها نضيف

يمكن تكون بصمتي ساعتها.. ابن لسه مجاش يعمرها

يمكن تكون بصمتي ساعتها كلمة سبتها

يمكن تكون بصمتي ساعتها فكرة خليت غيري يكمل بيها

يمكن تكون بصمتي ساعتها بصمة صباع علي توكيل لتعديل قانون او دستور

يمكن تكون بصمتي نقطة دم علي ترابها افديها بيه … وساعتها فعلا هتبقي عروستي البحلم بيها