الأحد، 10 يناير، 2010

ملهمتي..... ورجعنا تاني


بعد مرور اكتر من سنتين علي اخر علاقه ليا بالمدونات قراءة وكتابه ..

قررت اني ارجع تاني .. مش عارف ليه كنت بعدت عنها .... يمكن انشغال يمكن زهق ..

يمكن قرف من كتير من المدونات ال كنت ابتديت اتابعها واجادل اصحابها- مدونات الملحدين- يمكن ده مكنش انسحاب اكتر منه قرف وزهق من عالم مش عاوزه تقتنع غير بالغلط..

المهم ماعلينا اهي كانت فترة وراحت لحالها... المهم اني رجعت اقري مدونات تاني...

والسبب اني لاقيت في وشي لينك لجروب كده علي الفيس بوك مش فاكر لاقيته فين.. بس المهم انه كان جروب لمدونة بنوتة لاسعه...

عجبتني بساطة وتعبير اللوجو ... اهو نصيب انه يعجبني ساعتهاالمهم قررت اني ادخل علي البلوج ده...

وفعلا دخلت... ومخرجتش..

مش عارف ايه الشدني اوي كده في البلوج ده...

البتكتبه- بنوتة صغيرة في السن لكن كبيرة في العقل- علي عكس قناعتي ال برضو متغيرتش ولا هتتغير

ان معظم البنات عقلهم علي قدهم

مقصدش طبعا مستوي ذكاءهم

اقصد في طريقة ادارتهم للمكنه ال في الجمجمه دي.... ماعلينا مش موضوعنا ده برضو...

نرجع لمرجوعنا .. المهند اني قعدت

اقري

واقري

واقري

كنت عاوز اقري المدونة كلها

بس عنيا ابتديت تدي فلاش.... وما تبقي من عقلي لقيته بيصوت ويقولي الساعة اربعة يامجنون

هتصحي بكرة ازاي الساعة ستة عشان تتنيل وتروح الشغل

وكان بها قفلت الشاشة وسافرت

تاني يوم قررت قرارين

اولا اعمل بلوج جديد وارجع اكتب..... وخصوصا اني خلاص هطق

ويمكن ده حل عشان منفجرش

ثانيا اني ادي لقب شرفي لصاحبة المدونة الواجع دماغكم عنها من الصبح دي

اه علي فكرة نسيت اقول انها اسمها سارة درويش

واللقب ده لقب مجازي ياريت محدش يفهمه غلط

قررت اسميها( ملهمتي) ايون … حد عنده اعتراض؟؟

مش عارف ليه اغنية حسام حبيب ورجعنا تاني حاسس انها شغالة كا خلفية موسيقية دلوقتي

امممممممممممممممممممممممممم

وايه كمان وايه كمان

مفيش

بس خلاص

هناك 5 تعليقات:

سمو الأميرة سارة يقول...

الله
بجد مش عارفة اقولك ايه
مش عارفة بجد اقولك قد ايه انت فرحتني ورفعت معنوياتي
البوست دا بجد بعتبره حاجة من اروع البوستات اللي قريتها في حياتي
فرحت اوووووووووووووووي علشان رأيك وفرحت علشان خليتك ترجع تاني لعالم انا بحبه جداً

بجد يا ابو علي شكراً والف مليووووووووون شكراً ع زيارتك و ع البوست دا
دا بعتبره شهادة تقدير في حقي :)

Abo 3li يقول...

الحمدلله ان ساهمت في رفع معنويتك... هههههه.... وشكرا اوووووي علي تعليقك.. ومبسوط انك نورتيني هنا.. وهبقي مبسوط اكتر لو قبلتيني صديق (للبرنامج) ... مش هطول عليكي علشان وراكي مزكرة.. ربنا معايك

E73 يقول...

سمو الأميرة سارة فعلا بحب مدوناتها كتير

مع اني مجربتش أعلق عندها قبل كدة أو فكرت أبقى متابعة لها

لكن ردت عليا مرة زمان ولما دخلت عندها لقيتها عاملة حركات جامدة قوي ربنا يحميها

انا برضه حصل معايا حاجة زي كدة لما قريت آخر بوست هنا ولقتني عوزة أجيب المدونة من أولها لآخرها وقد كان

ورحت فتحت واحدة من مدوناتي اللي كنت مسكرتاهم وربنا بفك كرب الباقيين

سمع هوص (Abo 3li) يقول...

E73

يااااااااااه.. دنتي جبتي اولها فعلا.. وان كان مش بعيد..
وقرار حلو.. انك ترجعي مدوناتك ال قفلتيهم..
انا كان قراري مدونة جديدة خاااالص..

البلوج يتشرف بمرورك علي بوستاته..

منوراني يفندم... ويارب البوستات ال فيها تعجبك...

تحياتي

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل