اشمعنا يعني بتحبو تتصورو مع الخوجات .... ليه متتصوروش مع اي واحد مصري عادي في الشارع؟؟ يعني دي هتبقي ذكري حلوة والتانية ذكري نص نص؟؟
النهاردة كنت بحضر محاضرة كده عن ال open source في شركة ميكروسوفت - رغم اني مبحبهومش بس قلت اهو اشوف هيقولو ايه- المهم الراجل ال كان بيدي المحاضرة راجل امريكاني اتنين متر في تلاتة متر.. ولابس برنيطة ال كاو بويز... وكان نقصو حصان ومسدسين.. المهم الراجل خلص المحاضرة بتاعتو... والناس كلهم قامت وراحو يتصورو معاه -رغم انه مش بيل جيتس مثلا- بس مش ده الضيقني .. الضيقني لسه جاي في السكة... المهم بعد مرجعت شركتنا.... قلت ادعبس ورا الراجل ده شوية علي النت.... المهم قفشتو علي ال تويتر... ولقيته لسه كاتب حالا من 9 دقايق (تويتة) كده... قلت اقراها... لقيتو بيتريق علي المصريين في موضوع التصوير ده .. وبقول انه لسه مخلص محاضرة في مصر والناس هناك خنقووووه بالموضوع ده.... طبعا انا شفت كده .. قلت ابدا.. وانا هسكتلو كده.. رحت مديهملوو علي طول بس بالذوق.. علشان ميقلش علينا شعب همجي....
المهم انا بحكيلكم الحوار ده ليه......
متنطقو ليه؟؟
علشان عاوز منكم طلب متيجو نعمل حاجة كده زي حملة .. نصور فيها المصريين... اه المصريين... كل المصريين...
الراجل بتاع العصير ال علي اول الشارع
الست ال في السوبر ماركت ال تحت بيتكم
سواق التاكسي –ال انت لسه متخانق معاه- دي مسارين البطن بتتخانق ياراجل
دكتورك في الجامعة – ال لسه ظبتك امتحان منيل- اديلوو عزروو مهو تعب هوا كمان علي ما بقي دكتور
المهم صورو اي حد وفي اي حتة
ومقصدش طبعا نصور الحاجات السلبية ... ولا الايجابية برضو
اقصد الحاجات الطبيعية ... الطبيعية اوي والعادية
وبعد متصورو عشرين صورة
اقعدو مع نفسكو واتفرجو.....وشوفو هتحسو ب ايه ساعتها
ووالله العظيم...
والله العظيم كمان مرة..
هتحسو قد ايه انتو بتحبو بعض اوي.. بتحبو اهل البلد دي اوي.... علشان انتو بتحبو البلد دي... او علي الاقل معظمكم
وساعتها هتعرفو الفرق بين حاجتين مهمين اوي: القومية و الوطنية
هناك 7 تعليقات:
انا قلت اسلم الاول و اروح اشوف النظام ايه
الله يسلمك يادكتورة علا
نورتيني
وبلاش كلام علي النظام... لحسن النظام بيزعل ويتقمص.. وبيقول اننا بنتكلم في السياسة وجايبين البلد ورا
تحياتي
احنا ناس عندنا عقده الخواجه و للاسف ملهاش حل
لانها ادمان فى الدم
الناس اللى قلت عليهم هما اللى يستاهلوا التصوير بجد و نغنيلهم
صوره صوره صوره
كلنا كده عايزين صوره
صوره للشعب الفرحان تحت الرايه المنصوره
هههههههههههههههههههههه
تصدقي حلوة موضوع الاغنية دي.. رغم انه طالع بتريقة.. بس عجبني
لا و الله مش تريقه بس انا حسيت ان الاغنيه دى منطبقه على البوست خالص
طب غمض عنيك كده حتلاقيك سامعها
تحياتى
بس بجد البوست فكرته حلوه
ياخسارة
:(
كنت فاكرها تريقة... كنت هبقي مبسوط اكتر اني اثرت روح الدعابة عندك
هعهعهعهعهعهعههعهعهعهه
وفعلا الاغنية لايقة.. منغير مغمض سامعها ... تشكورات لخيالك العالي
وبجد مبسوط انه عجبك.. وخصوصا اني بحب اتوه البيقرا.. فالناس بتتخنق من الموضوع ده.. بس عادة عندي بقي.. ربنا ميقطعلك عادة
i0u87o6z26 b6f41y2x81 a5g33b3w91 u2n25z7l50 x1i08s8n74 w3g92g6q25
إرسال تعليق