السبت، 16 يناير 2010

ذكريات ... وكلام قديم 1


ذكريات ... وكلام قديم 1

مش عارف ليه طالبة معايا بنكد وغم

يمكن علشان كذا حاجة حصلت فكرتني بحاجات ملهاش لازمة

يمكن علشان حاسس بحالة توهان عام

المهم اني قعدت ادعبس كده في فولدراتي القديمة

وقررت اغلس عليكم وانشر هنا الحاجات ال كنت بكتبها زمان

زمان اوي

اوي

اه وربنا زمان.. من ايام ثانوي

حاجات كنت فرحان بيها ساعتها... وباعتبرها من معلقات العامية

بس لما قريتها دلوقتي قعدت اضحك

ورغم اني قعدت اضحك حسيت بحاجة كده

يمكن انتو كمان هتحسوها لما تقرو

المهم مش هطول عليكم

واسيبكم مع اول حاجة هنشرها ليكم هنا

وربنا يسهل ونخليه مسلسل رخم كده .. كل محب اغتت عليكم

انشر حلقة منه

اسيبكم مع الحلقة الاولي

وهي بعنوان

الارنب والقطة.... بتضحك علي ايه يااد... وانتي كمان بتضحكي؟؟؟

منغير تريقة لحسن .........

الارنب والقطة

الأرنب شاف القطة

علي طول راح نط نطة

وكانت أول نطة

والقطة وخدة بالها

وعاملة ان هي في حالها

الأرنب قرب منها

وعينيه دابت في عينها

اصله مكنش يعرف

ان القطة شقية

عارفة ومستنية

وفجاءة جريت

وبعدت شوية

واهو كله رسم يا عنياه

الارنب قعد ينط ينط

ولما بطل نط

القطة عادت

ونار الارنب زادت

دي ناره بأديها اتأدت

ورجع تاني ينط

وفمرة القطة جريت

القطة بعدت

القطة هربت

بعد معرفت ان هي حياته

وخلاص زهقت من نطاته

مهي غدارة

وقوية

راحت تدور علي ارنب جديد

علي خوف جديد

وعذاب اكيد

للارنب

وياعيني علي الارنب

راحت وسبته في حيرة

راح ناطت نطة اخيرة

والارنب انكسر

زي مالامل جوايا انحسر

دا الارنب جوايا مات

كان عهد قديم وفات

عمره تاني مهينط

ومن بكره

راح يبقي قط

هناك 4 تعليقات:

اقصوصه يقول...

مع اني مقاطعه النكد

بس قلت يلا بعلق عشان اواسيك :)

الخاطره حلوه

دايما كتاباتنا الاولى

تعنيلنا الكثير

وتمثل لنا الشيء الكبير :)

سمع هوص (Abo 3li) يقول...

شكرا يا اقصوصة علي مواساتك دي
ربنا يحفظك
ويبعد عنك وعني وعننا كلنا النكد
قولي امين
:)

كلام عيب يقول...

طيب بجد حلوه
هيه فيها برائه الشباب و مشكلتهم مع الحب الاول
خصوصا لو كان بيحب بجد
بس ما تظلمش الجنس كله بغلطه واحده

سمع هوص (Abo 3li) يقول...

ليت الشباب يعود يوما........ههههههههههههه
بس انا مكنتش ظالم الجنس الاخر كله ساعتها(ايام المراهقة)... بالعكس دنا ظالمهم دلوقتي اكتر ... ;)

شكرا ليكي علي مرورك .. وعلي تعليقك الجميل.. ديما الحاجات القديمة بيكون ليها (معزة) خاصة..

ويجعله عامر