دستور ايه ولامؤخذة؟؟
اه اه الدستور ده ال احنا اسقطناه لما عملنا الثورة ولا دي تعديلات لحاجة تانية؟؟
الدستور ده ال بقاله 41 سنة بيتشخرم وبيتلون وبيتظبط وبيتربط؟؟
هوا اايوة والنبي هوا..
هوا بغباوته وشكله العكر...
ليه مش "نعم"؟؟؟
نعم يعني انا بعترف ان كل العملناه سوا ده كان لعب عيال.. أسقط دستور ومعترفش بيه وبعد كده اوافق علي تعديلات في نفس ذات الدستور!!!!
نعم يعني انا موافق علي سياسة الاخوان -الاحترم ذكاءهم لكني محترمش اساليبهم- في تخويف الناس .. انا شفت بنفسي منشورات للاخوان بتحرم التصويت ب لا ... ده غير حملتهم الشرسة ال بتوهم البسطاء ان التصويت ب لا هيخلي المجلس العسكري يفرض الاحكام العرفية.. والمسيحين - علي حد تعبيرهم- هيلغوا المادة التانية.. والاستقرار والاقتصاد و الخ الخ...
سياسة الترهيب دي بجد حاجة وسخة...
نعم يعني انا موافق علي كل التناقضات الموجودة في الدستور لحد ميتعمل واحد جديد..
نعم يعني انا موافق علي ان رئيس الجمهورية يمسك الحكم بكل الصلاحيات المهووووولة ال في ايده دي...
نعم يبقي مش هدي اي فرصة لأي حركة سياسية تنظم نفسها علشان تشارك بشكل فعال في الحياة السياسية في مصر الخمس سنين الجاية..
نعم يبقي انا اقتنعت بالفكرة الغبية بتاعة الاستقرار.. طب م كده كده هنعمل دستور جديد ... طب منعمله دلوقتي ونخلص... علي رأي المثل الشعبي: يبقي ابني في حجري وأدور عليه؟؟؟
علشان كده انا هقول لأ
وبمناسبة الارهاب الفكري ال الأخوان والسلفين عملينه للناس علشان ميصوتوش ب لأ خوفا وحرصا علي المادة التانية...
المادة التانية..
«الإسلام دين الدولة واللغة العربية لغتها الرسمية ومبادئ الشريعة الإسلامية المصدر الرئيسي للتشريع»..
هكتبلكم رأي واحد صاحبي مسيحي لما سألته علي رأيه في الموضوع ده...
قال: انا مش معترض خالص علي المادة دي.. لانها بتقول المصدر الرئيسي مش الوحيد للتشريع..
ثم مصر مش زي السعودية .. يعني مش بتطبق الشريعة بشكل كامل .. بتطبق القانون المصري .. وفي الحاجات البتطبق فيها الشريعة علي المسلمين مش بتطبق علي المسيحين زي الجواز والطلاق وخلافه..
ف ليه هخاف من المادة دي وهحاول اغيرها!!؟؟ وانا عارف ان ده هيعمل مشاكل وحساسية في المجتمع المصري...
اه الاسلام الدين الرسمي للدولة بسبب ان الاغلبية مسلمة وده طبيعي... تبقي فين المشكلة!؟!؟
ده كلامه ال انا متفق معاه فيه... يبقي مينفعش حد يستغل فطرة الناس المتدينة ويخوفهم علي المادة دي او يحرم ويحلل التصويت بنعم او لأ علي حسب هوااااه...
يبقي ببساطة كده .. كل واحد يفكر ويشوف ايه مميزات وعيوب نعم او لأ... ويختار...
المهم انه يشارك ... ويحاول يقنع غيره انه يشارك...
ويفتح عقله ويتقبل الرأي الأخر ويناقشه.. ويبقي عنده استعداد للاقتناع... يعني ميتربسش دماغه وخلاص..
وتاني انا هنزل يوم السبت ان شاء الله وهقول لأ لتعديلات الدستور لأ لترقيع الدستور لأ لاننا نستحق بعد العملناه دستور جديد دلوقتي مش بعدين لأ علشان مش عاوز: ابني يبقي في حجري وادور عليه..
هناك 11 تعليقًا:
انا كمان هقول لا
ياعنى لا
وفعلا الدستور سقط من زمان
ولا ايه
بيلعبوا بينا شكلهم كده
لأ طبعا
لآ لترقيع الدستور
خلاص زمن تأليه الحاكم انتهى
وعايزه اقول لشوية الأرجوزات الي طالعين يتكلموا عن الماده الثانيه
من انتم.... من انتم
ستندمون حيث لا ينفع الندم
إللي بيته من زجاج لا يرمي الآخرين بالحجارة
معي الملايين
أوجه نداء
إلى كل ملايين
فالتزحف الملايين
فالتهتف الملايين
بسرعة بسرعة
دقت ساعة العمل
دقت ساعة الزحف
دقت ساعة الانتصار
لا رجوع
ناس فاضيه ولو أكدتلهم ان الماده الثانيه مش هيتم المساس بها
وسألتهم هتقولوا نعم ولا لأ
والله متأكده ان ردهم هيكون على ايه هو يعني ايه دستور أصلا
بالنسبة للمادة التانية كده كده هتبقي مجال للنقاش سواء كانت النتيجه نعم أو لا
و ده برضو ميخليش حد يخاف
( لا ) عشان عشان مش عايز أي ريس ييجي يبقي رئيس القضاء و الجيش و الشرطه
( لا ) عشان مش عايز الريس يبقي ممكن يعين (إبنه) كنائب ليه
( لا ) عشان هحس إن الشريط سف و رجع من الأول
طبعا لا والف لا
وانا هقول لا
وكمسيحية كمان يا ابو على معنديش مشكلة مع المادة التانية
الامور اللى خاصة بالتشريع الدينى معروف ان المسيحين هيتم الحكم بينهم بشريعة الانجيل
علشان كده انا معنديش مشكلة
لاااااااااع
انا والصعايده تبعي:)
لأ ..
لإن مَفِيشْ حُـلول مُتوَفِره غيرهَـآ .. !! :)
قولت وخلصت
يارب يكون ما
قلته صح :يـارب
BNT ELISLAM
قلنا لأ والاغلبية اختارت نعم.. يبقي نشتغل علي الاساس ده..
من كل بستان زهرة
ال حصل حصل... عاوزين نشوف وننظم خطوتنا الجاية..
FAW
ازاي هننزل في الشارع علشان نبقي مؤثريين احنا كمان!؟
Ms Venus
التوعية لازم تبقي من الناحيتين.. ونخرج الدين بره الموضوع خااالص.. ورجال الدين كمان من النحيتين علشان محدش يستغل ده تاني علي انه صراع بين دينين..
وانا بحترم رأيك جدا جدا جدا..
sony2000
فين الصعايدة دول؟؟ كسفتونا :P
حَـبآيـۃْ.بـטּـدۉڷ
ونعم بقت امر واقع.. لازم نتعامل معاها اكنها كانت اختيارنا..
norahaty
يارب يكون ماأختارته الاغلبية صح...
زغرتي يا ام منصور 77% قالوا نعم لتعديل الدستور
زغرتي يا أم مروه ... راحت كل إنجازات الثوره
زغرتي يا أم حمدان ... بكرة هيمسكوها الإخوان
... زغرتي يا أم حبيب ... شبابنا من بكره هيلبس جلاليب
... زغرتي يا ام آيات ... بناتنا من بكره هيلبسوا عبايات ...
...زغرتي يا أم ريمون ... اللي قالوا لأ طلعوا 4 ملي
السلام عليكم
انا عارفه اني مقصره معاك في التعليق والمتابعه الفتره اللي فاتت ولكن ده كان لظروف :)
عندي بوست وطلب مهم ارجو المساعده فيه :)
http://mal2atlhash3noan.blogspot.com/2011/03/blog-post_24.html
NEBHOTEP
الزغرطة مش عيب برضه!! :P:P:P
فتاه من الصعيد
حصل يافندم...
ولا يهمك.. انا نفسي مقصر مع الكل ومع مدونتي كمان... :(
إرسال تعليق