الخميس، 26 مايو 2011

محدش يقولي كفارة....



تحذير: البوست ده فيه شتايم قذرة هنقلها زي م هي....


البوست ده كنت ناوي اكتبه اول مخرج من النيابة العسكرية بما اني كنت واحد من المعتقلين في احداث السفارة الصهيونية... بس أتأخرت اوي في كتبته ﻷني خارج حاسس بحالة من التوهان وعدم الاتزان ولسه مستمرة....
المهم... هحكيلكم ال حصل...
انا اصلا مكنتش مقتنع بفكرة الاعتصام امام السفارة للمطالبة بانزال العلم وطرد السفير في الظروف المنيلة ال البلد فيها دي... بس في نفس الوقت مصدرتش حق ال عاوز يعتصم او يتظاهر, لانه ليه رؤيته وحريته....
المهم, انا كنت راجع من السفر الساعة 11 ونص تقريبا انا وواحد صاحبي... وأول مدخلت الشارع - بالمناسبة انا بيني وبين السفارة 3 دقايق مشي علي الاقدام - لقيت واحد صاحبي تاني خارج من الشارع جري وبيقولي الناس بتموت عند السفارة والشرطة رجعت تقل ادبها... فقررت اني اروح معاه علشان اصور وانقل الاخبار ليف علي تويتر وغيره اعمالا لقناعة اخدتها من بعد الثورة وهي " انصر اخاك المتظاهر ظالما او مظلوما"...
وصلت عند تمثال نهضة مصر... الامن المركزي كتير فشخ وبيضرب غاز.... الشباب بيرد علي الاعتداءات بالطوب من شارع الجامعة.... طبعا بما اني مليش في موضوع الطوب ده ومعترض عليه حتي من ايام الثورة فكنت مكتفي بتصوير اعتداءت الامن وخطفهم كل شوية لواحد من الشباب...
شوية والموضوع هدي... الشباب بطل يضرب طوب والامن بطل يضرب غاز وخرطوش....
اتكلمنا مع ظابط امن مركزي رتبته ملازم اول وواحد تاني رائد.... اتفقنا معاه انهم يبطلوا ضرب للمتظاهرين مقابل انهم يعتصموا اعتصام سلمي عند التمثال وميقربوش اكتر من كده.... الشباب وافقوا وابتدوا ينظموا نفسهم بشكل متحضر....
بعد 5 دقايق وبدون اسباب جديدة... الامن ابتدي يضرب تاني بكثافة والكل اتفرق....
وصلنا عند الفورسيزون لقينا شاب ملتحي - لما قابلته في السجن الحربي عرفت واتأكدت انه عقله خفيف شويتين - مسك طوبة وحاول يكسر بيتزا هت ال هناك علي اعتبار انه امريكاني... لحقناه ومسكناه واتنين شباب ملتحيين تانين مكنوش معاه اصلا هدوووه وفهموه ان المطاعم دي بتاعتنا احنا ومينفعش نكسرها....
طبعا ال كل كان ناوي يرووح بيتهم خلاص لان الليلة اتفضت خلاص...
فجاءة لقينا عساكر امن مركزي جاية بتجري علينا من ناحية السفارة.... وقدامنا عساكر شرطة عسكرية جايين يجروا من ناحية ميدان الجيزة...
جرينا في شارع جانبي كان فيه جراج - لو سألت هتلاقي معظم ال اتقبض عليه اتقبض عليه في شارع الجراج او في الجراج نفسه - لقينا شرطة عسكرية قافلة اخر الشارع... وراحوا ضاربين نار في الهوا....
تحذير تاني: من هنا هتبتدي الالفاظ الخارجة ال مكنتش عاوز انشرها بس قررت انقلها زي م هي...
ارقد... ارقد يابن الوسخة انت وهوا....  دي بداية القصيدة, الكل نزل علي ركبه مع ضرب النار التهديدي...
اجبرونا اننا ننام علي بطننا وايدينا ورا ضهرنا....
شاب رفض وقال: مش هتهيني ومش هتعاملني ك اسير.... راح ظابط شرطة بزي مدني راح قايله: مش ههين مين يا ** امك... وراح نازل عليه اقلام وشلاليت....
الظباط كانوا حريصين اننا منرفعش راسنا علشان منشوفش اشكالهم او نحفظها ﻷنهم رغم كل ده كانوا خايفين مننا....
عسكري شرطة عسكرية راح قايل: كله يقف انتباه... كلكم وقفتوا... طيب... ارقد تاني يابن الشرمو** منك له... دحنا هنزل ال خلفوكم النهاردة... طبعا مع ضرب شوية رصاص في الهوا استعراضا للقوة...
ال نايم جنبي رفع راسه علشان يشوف ال بيحصل راح عسكري امن مركزي ضربه بالبيادة في وشه وهوا علي الارض... وراح ضربني انا كمان بالبيادة في كتفي - للامانة دي الضربة الوحيدة ال انضربتها شخصيا يمكن علشان حظي حلو - عسكري تاني بتوجيهات من ظباط الامن المركزي راح ماشي علي ضهرنا واحد واحد والظابط بيقول: عاوزين تنزلوا العلم! اهوا انتو النزلتوا اهو ياولاد المتن*** ....
نقلونا من الشارع ده لشارع النيل تحت كوبري الجامعة... كل عسكري امن مركزي مسك واحد ومشي بيه... انا كان حظي حلو ان العسكري ال معايا كان خانقني بس... 
صاحبي وهوا ماشي مع العسكري بص علي الظابط راح ال ظابط ضاربوا بونية في عينه.. والعساكر اشتغلت بالعصيان علي ضهره وصدره...
الظابط ده عوور نص المقبوض عليهم بال بونيات ده غير الضرب بخزنة المسدس علي الرأس والشد من الدقون للشباب الملتحي... هوا كان لابس ملكي.. تيشرت ابيض تحديدا.... الظابط ده كان مطلب شعبي لكل المعتقلين بعد كده في السجن الحربي... 
طبعا باقي الشباب عمالين يطلطشوا اقلام وشلاليت وعصيان وهما ماشين...
اي شاب ملتحي اتعامل معاملة خاصة من سب دين و ياسلفي يابن المتنا**...
شاب صغير وشكله ابن ناس اوي دقنه خفيفة - عرفت بعد كده انه من مصر الجديدة وبيدرس اعلام - عسكري مسكه وقاله انت فلسطيني ياااض... الشاب قاله ﻷ... العسكري: طب اسم الكوبري ده ايه.... الشاب من الرعب واللخبطة قاله: كوبري النيل... العسكري: تبقي فلسطيني ابن وسخة... ونزل فيه ضرب!!!!
وصلنا عند عربيات الترحيلات... لقينا عقيد شرطة عمال يسبلنا الدين ويقولنا: انتوا بقي شباب الثورة يشوية خولات... ثورة ايه يامتنا*** ... دي بلدنا احنا... مش بلدكم....
لواء دفاع مدني تاني: فاكرينا خلصنا يوم 28 يامعر*** ... رجعنالكم اهوا... قال ثورة قال... دي ثورة خولات... دي بلدنا ومضيين عليها... يشباب الفيس بوك ياشواذ....
بلدنا وماضيين عليها... جملة عجبت معظم الظباط فبقوا يكرروها مع كل شتيمة او سب دين لينا...
لموا البطايق واخدوا الموبيلات - موبيلات كتيرة عساكر وامناء الشرطة سرقوها - وكلبشونا وركبنا عربية الترحيلات مع شوية ضرب وشتيمة كمان...
ظابط شفناه بيجري علي كوبري الجامعة مخصوص علشان يشتمنا ويقول: مسكناكم ياولاد الوسخة يبتوع الثورة يوم 28 مش هيتكرر تاني يامعر*** ....
فضلنا في عربية الترحيلات ساعة قبل منتحرك....
شاب هرب الموبيل بتاعه منهم وطلع بيه... كل واحد كل اهله يعرفهم...
انا اتصلت بواحد صاحبي علشان يستخدم ال لاب توب بتاعي ويعرف النشطاء علي التويتر اننا اتقبض علينا...
بعد شوية اتحركنا علي س 28 نيابات عسكرية... اخدوا اسمائنا منغير مننزل...
وبعدها نقلونا السجن الحربي... كنا حوالي 130 واحد...
فضلنا في عربية الترحيلات 40 بني ادم 8 ساعات كاملين...
في السجن الحربي للامانة المعاملة كانت مختلفة... كانوا بيحترمونا... وعقيد اسمه العقيد خالد مدير السجن وصي علينا العساكر انهم يتعملوا باحترام معانا... وحطونا في مكان لوحدنا اسمه "الكراكون" بعيد عن باقي المساجين علشان يبقي لينا معاملة خاصة محترمة - افتكر انهم عاملونا بأحترام علشان عندهم توجيهات اننا خارجين بعد فترة ومش عاوزين شوشرة - معظم المقبوض عليهم طلبة وموظفين محترمين.. 
الشرطة قبضت علي كل كائن حي متواجد في شارع الجامعة او النيل او مراد من الاتجاهين.... لدرجة انهم قبضوا علي عامل ديلفري... واحد واخوه كانوا بيركنوا تحت البيت... شاب نزل من التاكسي يشوف فيه ايه.... ده غير طلبة الثانوي الكتير ال مسكوهم وهما راجعين من دروسهم...
بعد يومين تم الافراج عن حديثي السن - تحت 18 سنة - وكانوا تقريبا عشرين واحد....
بعد اسبوع تمت محاكمة عسكرية مسرحية... عرفنا ان الاحكام اصلا جاية للقاضي في ظرف متشمع بالشمع الاحمر بسنة مع ايقاف التنفيذ....


يتبع......

هناك 53 تعليقًا:

غير معرف يقول...

معلش ....

وصف الاحساس يقول...

يعني انت بقيت سوابق
مش عارفه اقولك ايه والله
بس ال اعرفه ان مفيش حاجه ولا حد قذر هيتغير من يوم وليله ده لو اتغير اصلا
وهي بلدنا غصب عنهم
طال الوقت او قصر
لسه المشوار طويل عشان تنضف
يلا يا عم كفاره

FAW يقول...

مش عارف أقولك إيه والله !!
حمدلله عالسلامة

من كل بستان زهرة يقول...

ارفع راسك فووووووق انت معتقل
يلا ميجبها الا معتقلينها
بينا وبينهم التحرير بكره ان شاء الله

وغلاسه بقى كفاره ياعم الحج :))

ستيتة يقول...

حزينة
بس حزينة
ومش ها اقول لك شيء
ويقولوا مننزلش بكرة
نصف ثورة
علشان يعملوا لنا حبس بطول طريق مصر اسكندرية الصحراوي
مفيش اصلاح
فيه شعب عنده كرامة ومحدش يدوس علينا
سنقتلع قاموس وساختهم رغم انف اللي مربوهومش
معلش متحزنش
انت رحت لتكون شاهد وتنصر اخيك
وقد نصرت أخيك
تحياتي

الفقيرة إلى الله أم البنات يقول...

طيب ..انا بعيط دلوقت على اللى انت كتبته
طيب يعنى ايه
شوف من الآخر اللى نصركم أول مرة مش هيخذلكم والل بيسبوا دينه مش هينصرهم ابدا"
وتأكد
والله غالب على امره ولكن اكثر الناس لا يعلمون


ان الله لا يغير ما بقوم حتى يغيروا ما بأنفسهم
واحنا بدأنا نغير وربنا مش هيسيبنا لشويى بلطجيه آكلى مال حرام..وسفاكين دماء

فى ميزان حسناتك يابطل انت وكل إللى معاكم


شكرا يا ستوته انك خليتنى اعرف ان مصر ولادها نفسهم طويل

Unknown يقول...

مش لاقي حاجة اقولهالك , حمدالله على سلامتك , واضح ان عمل وزارة داخلية جديدة هوه الحل

ويكا يقول...

ما عنديش تعليق

الا

فصبر جميل والله المستعان على ما تصفون


احنا فعلا ساكتين كتير اوى عن وزارة الكلاب دى

abir_habba يقول...

الحمد لله على سلامتكم جميعا انتوا قطعتوا قلبنا عليكوا وانتوا سبب جمعة 27 لانه تم الدعوة يومها واحنا بنتابع الاحداث ...ربنا ان شاء الله قادر على الانتقام من هؤلاء الطغاة وان يقر اعيننا برؤية نهايتهم ...وان شاء الله حتحكى لاولادك بطولاتك انت واصحابك فى تغيير وحه التاريخ ليس فى بلدنا فقط ولا فى امتنا العربية فقط ولكن فى العالم كله ...بالصبر والاستعانة بالله سنقدر على كل ظالم وطاغى وفاسد ومفسد ...ربنا ينتقم منهم اجمعين

داليا يقول...

هو طلب صغنن بس: ممكن تنشروا اسم الضابط الأمور اللي بتقول انه كان مطلب لكل اللي اتقبض عليهم, وياريت لو نازل الميدان النهارده توزعوا نشره بأوصافه مع نبذه عن تاريخه المهبب, مش علشان حاجه والله بس متهيألي العهده اللي هو ماضي عليها دي بتاعتنا ولازم نستلمها بقى وللا ايه؟

Unknown يقول...

ياااااااااااخبر
اثوس ومنيل بنيله
كل دا ليه؟علشان...؟
حمدلله على سلامتك أهم حاجة

آيوشه يقول...

حمدلله على سلامتك اولا
اما بالنسبة للبوست لا تعليق :(

حازم طة يقول...

دة شئ طبيعى انهم يتصرفوا معكم كدة الخايف يعمل اكتر من كدة

أنا - الريس يقول...

قهرتني وحسستني بعجزي

Haytham Kilany يقول...

حمدا لله على السلامة --
وكفاره

وأكيد البلد دى مش هتنضف
وأكيد ولاد التييييييت دول
مستنيين يقوى شوكتهم علشان يرجعوا يركبونا تانى

Ramy يقول...

حمد الله ع السلامة الأول

طب مادة متوقع جداً انه يحصل

هو فى ناس مُعقدة نفسياً هتخف من يوم و ليلة

م. حجاز يقول...

حمدلله على سلامتك اولا

وثانيا واضح جدا ان العملية اصبحت عملية طاير بايت من يوم 28 واذا كانوا هما ماضيين عليها فهى بتاعتنا اصلا وممكن نعفيهم من امضتهم ويهوونا بأه

just waiting يقول...

7amdela 3la slamtk ya 2bo 3li

هبه حازم يقول...

مش هاقولك كفارة
بس هقولك كل حاجة بتحصل علشان سبب
وواكيد ربنا هيعمل الخير ليك
قول يارب
:)

غير معرف يقول...

في الاول انا كنت عايز قهوة مضبوط لاكن شكرا علشاي
حمداَ لله على السلامة وعايزك تتأكد انك ما كنتش هناك بالصدفة زي ما قلت في بدايه التدوينة و ملكش في حاجه انما انتا كنت هناك عشان تكون شاهد على المهزلة وتروي اللى حصل من زاويه تانيه وهي الرصد لا اكثر لا اقل.
شوف يا حبيبي واسمحلى اني اناديك من غير تعارف بحبيبي.
المشكلة مش في الثورة ولا في الظباط ولا القيادات ولا في الرئيس السابق واولاده،
المشكله باختصار فينا احنا البني ادميين اللى عايشين في البلد الشعب يعني
الناس اتربت على ثقافة عدم تقبل الاخر اياَ كان سواء يختلف معك في الديانه او لون البشرة او حتى طريفة التفكير.
وقبل ما تتهمني انني من الفلول او المناهضين للثورة او حتى يهودي بيدافع عن السفارة بتاعته
انا الحمد لله مسلم واحترم جميع الاديان السماويه، ولا انتمي لأي مذهب سياسي ولله الحمد تقدر تقول انني من المعتدلين.
لاكن لازم نفكر بطريقه مختلفه خالص عن اللى اتعلمناها
القبول بالاخر و احترام رأيه المعارض يحتاج الى اجيال من الاطفال الاسوياء نفسياَ عشان نقدر نقول اننا نعيش في دوله محترمه محتاجين 30 سنه على الاقل من التربيه الصحيحه للاطفال وتعويدهم على حريه الرأي وعدم الخوف من الاختلاف لازم نبتدي من دلوقتي اننا نغير المفاهيم الخاطئة المتبلدة في نفوس الاطفال.
على جانب اخر هناك من يحتاج للمساعدة والعلاج النفسي للخروج من سطوة السيطرة وكبت الانفاس
اجيال كامله متربيه على ان اللى دخل كليه الشرطه خلاص وصل للنخبه المجتمعيه
من الصغر تلاقي الام او الجدة بتدعي يا رب اشوفك ضابط وهي مش عارفة ان الدعوه دي في اي بلد متحضر هي دعوة عليه مش العكس لانه هيتعامل مع المجرميين وشايل روحه على كفه زي ما بنقول مش العكس عندنا في مصر هو مسخر للتعامل مع الناس ولاد الناس اللى بفكروا يبصوا او يطالبوا بحقوقهم من ولاد الناس الاكابر.
وزي ما المشكلة فينا احنا الحل برضوا عندنا مش حد تاني.
وفي الختام سلام وشكرا لاعتبار رأيي وقراءته

حفيدة عرابى يقول...

احنا عايزين نقول لمصر كفارة لما ربنا يفك اسرها
ربنا يهون ونخلص من القرف ده

صبرني يارب يقول...
أزال المؤلف هذا التعليق.
shimaa elkholy يقول...

حقكم عليا يا ابنى واحد واحد
ويارب يقدرنا وناخد حقنا من كل كلب فيهم

عندي شعور باقلي كام يوم فظيع بان عدونا الوحيد هما جهاز الشرطه
وان شاء الله نقدر نربيهم ونعلمهم الادب كلهم

مهما يعملوا انتم روسكم فوق ولا حدش يقدر يذلكم تاني بعد النهارده الكلاب دول


حقكم علينا كلنا

مهندس مصري بيحب مصر يقول...

كله في ميزان حسناتك
و لازم الجيش و الشرطة يتحاسبوا على انتهاكاتهم دي

سمع هوص (Abo 3li) يقول...

فتاه من الصعيد

لحد امتي هنقول معلش!

تحياتي...

سمع هوص (Abo 3li) يقول...

wasf_elahsas

ايون بقيت سوابق ياام حودة... عجبك كده؟؟
لازم تنضف علشان حودة لما يكبر ميحصلوش ال بيحصلنا...

تحياتي..

سمع هوص (Abo 3li) يقول...

FAW
الله يسلمك

سمع هوص (Abo 3li) يقول...

من كل بستان زهرة

مبلاش ارفع راسك دي لحسن الواحد يلبس بيادة تانية في وشه... هههههههه...

وغلاسة بقي منوراني كالعادة...

سمع هوص (Abo 3li) يقول...

ستيتة حسب الله الحمش

دكتورة مش هقولك غير: شكراً

تحياتي..

سمع هوص (Abo 3li) يقول...

الفقيرة إلى الله أم البنات

انتي جبتي المفيد والله غالب على امره ولكن اكثر الناس لا يعلمون..

شكرا لمرورك.. تحياتي...

سمع هوص (Abo 3li) يقول...

واحد من الناس

تفجيرها الاول هيبقي احسن...

سمع هوص (Abo 3li) يقول...

ويكا

وسكوتنا ده لحد امتي؟؟؟

تحياتي..

سمع هوص (Abo 3li) يقول...

abir_habba
خايف لما اجي احكي لاولادي اقولهم اننا عملنا ثورة وفشلت علشان الناس زهقت وقالت كفاية كده!!
تحياتي

سمع هوص (Abo 3li) يقول...

داليا
اسم الظابط الامور اكيد منعرفهوش... الداخلية مكتبتش اسماء فرقة القبض ... خفت كل اسماء الظباط والعساكر ورفضت حتي تجيب شهود من فرق الضبط والمحاضر كلها باسم ظابط واحد برتبة رائد... عموما الباشا بيكون موجود عند الاشارة ال قبل السفارة واحد شافه امبارح وكان لابس ميري...

سمع هوص (Abo 3li) يقول...

norahaty
الله يسلمك... كل ده علشان صوتنا بقي عالي...
تحياتي...

سمع هوص (Abo 3li) يقول...

ايوشه
الله يسلمك...

سمع هوص (Abo 3li) يقول...

حازم طة
خوف ممزوج بخسة ووضاعة...
تحياتي...

سمع هوص (Abo 3li) يقول...

MR.PRESIDENT
انا مش ساعة مخرجت مش حاسس غير بالقهر والعجز عن اني اشيل الظلم ده...

سمع هوص (Abo 3li) يقول...

مهاترات عاقل
الله يسلمك... مش هنسيبهم يركبونا... علي جثثنا ان شاء الله...

سمع هوص (Abo 3li) يقول...

Ramy
الله يسلمك...
المريض النفسي يقعد في بيتهم او يتعالج... كفاية بقي مصر مش مستحملة...
تحياتي...

سمع هوص (Abo 3li) يقول...

م.حجاز
الله يسلمك... التار كل يوم بيكبر.... ربنا يستر...

سمع هوص (Abo 3li) يقول...

just waiting
الله يسلمك... يااااااااااااااااه بقالي كتير مشوفتكيش هنا ولا عندك...

سمع هوص (Abo 3li) يقول...

هبه الخولي
يارب...
نورتيني ياهبة في اول زيارة للبلوج... تويتر وبلوج... انا كده هعيط... :D

سمع هوص (Abo 3li) يقول...

غير معرف
وجهة نظر محترمة...
تحياتي..

سمع هوص (Abo 3li) يقول...

حفيدة عرابي
امتي هنقولها!
منوراني... تحياتي...

سمع هوص (Abo 3li) يقول...

ندي الياسمين
يارب كل ده يبقي ب فايدة...
كله يهون لو النتيجة زي م كلنا نفسنا...

بالمناسبة: متبقيش تنسي وتعلقي بالاكونت القديم لتتقفشي... ;) :P
تحياتي...

سمع هوص (Abo 3li) يقول...

مهندس مصري
اكيد هيتحاسبوا بس امتي وفين ازاي والناس كفرت بالثورة!
تحياتي...

hhamdi يقول...

انا مش فاهمه هما عاوزين ايه مننا وليييييه بيعملوا فينا كده هو احنا اتكتب علينا الذل من يوم ماتولدنا لحد مانموت والثوره والناس اللى ماتت الورد اللى فتح فى جناين مصر والناس اللى اتصابت كل ده راح اونطه واتكتب علينا نفضل كده حسبي الله ونعم الوكيل معلش ماتزعلش بس لازم يفهموا ان الوضع اتغير ودى معركتنا معاهم يا احنا يا هما يايعاملونا باحترام يا يمشوا واحنا نتصرف

Emtiaz Zourob يقول...

بصراحة انا مصدومة من اللي قرأته .. لهالدرجة .. يبدو انه مافيش ثورة قامت ولا شيء ،، الوضع زي ماهو والشرطة زي ماهي والادهى من هيك انه ضرب الشاب بزيادة وشك فيه علشان شبه الفلسطينية .. ويشتم فينا .. ربنا ياخده ان شاء الله هو والسفارة اللي دافع عنها .. بتدافع عن سفارة اسرائيل وبتشتم في الفلسطينيين .. لكن حسبي الله ونعم الوكيل فيك ..

::::
انا مش ح اقول كفارة .. بس ح اقول حمدلله على السلامة وياريت تكون حفظت وجوه اللي اسأووا لك علشان يوم الحساب قرب ..

سمع هوص (Abo 3li) يقول...

حنان حمدى
مش هنفرط في حقنا ولا كرامتنا الثورنا علشانها.. دي بلدنا مهما عملوا...
شكرا لمرورك..

سمع هوص (Abo 3li) يقول...

وجع البنفسج

يوم الحساب قرب... وحسابهم تقل اووووووووي... ربنا بيمهل ولا يهمل...

شكرا ليكي.. تحياتي...

koko يقول...
أزال المؤلف هذا التعليق.
غير معرف يقول...


افضل شركة نقل اثاث بخميس مشيط
يعد الانتقال إلى منزل أو مكان عمل جديد أمرًا مثيرًا دائمًا ، ولكنه قد يعني أيضًا الكثير من التوتر والعمل ويتطلب التخطيط الجيد لإنجاز المهمة. نحن خدمة نقل احترافية في خميس مشيط تقدم خدمة كاملة يمكن أن تعفيك من بعض المهام الثقيلة والأكثر استهلاكا للوقت.
الانتقال عمل شاق يتطلب لياقة بدنية قوية ومعرفة برفع الأثقال بطريقة آمنة. يمكن لأي شخص غير معتاد على ذلك أن يؤذي نفسه أو يرفع الأشياء ، خاصة عند الانتقال من أو إلى المباني التي بها الكثير من السلالم. عادة ما يتعين على شخص غير معتاد على هذا العمل أن يعمل لعدة ساعات أكثر من موظفينا المعتادين على التخطيط والتعبئة والتحميل يوميًا. حجتان قويتان لتوظيف محترف بدلاً من محاولة نقل الأثاث بنفسك.

شركة نقل اثاث بالباحة

شركة نقل اثاث بمحايل عسير

شركة نقل اثاث بالدرب

شركة نقل اثاث باحد رفيدة