الاثنين، 8 فبراير، 2010

هو وهي ... (مكالمات حصلت وبتحصل وهتحصل)

هو : وحشتيني

هي : وانت كمان وحشتني

هو : خلصتي مزاكرة ولا لسه

هي : تؤتؤ.. مش عارفة اذاكر اصلا..

هو (بأنزعاج): ليييه؟؟ مالك؟؟؟

هي (بدلع) : اصلي بفكر...

هو : المفروض تركزي سيدتك... بتفكري في ايه طيب؟؟

هي : بفكر في واحد..

هو (بفرحة الواثق) : مين يتري؟؟

هي : انتااا..

هو : بحبك

هي (بدلع) : انتا مش هتزاكر انت كمان بقي ولا ايه...

هو : ماشي ياعقلي .. يلا روحي كملي مزاكرة... مش عاوزين نضيع وقت... خلي اخر سنة تعدي علي خير..

هي : هشوفك بكرة..

هو : ان شاء الله.. سلام ياروحي..

....................................................

هي : هاااه .. احكيلي عملت ايه؟

هو : طيب سلمي عليا الاول؟؟

هي : حبيبي طمني بقي قولي عملت ايه؟؟

هو : الحمدلله... هبتدي شغل معاهم من الاسبوع الجاي...

هي (بفرحة) : مبروووووووووووك ياحبيبي... الف مبروك...

هو : مبروك علينا احنا الاتنين... اخيرا كل الظروف بقت معانا..

هي (بسرحان) : اه اخيرا...

هو : كده الخطوة الجاية انتي..

هي : انا؟؟

هو : اه يحبيبتي اقصد ... اجي بقي واتقدملك رسمي...

هي (بكسوف) : بقلنا اربع سنين مستنين اليوم ده...

هو : طيب تحبي انتي التحدديلي معاد عندك في البيت... ولا اكلم انا مامتك و ...

هي (تقاطعه) : لا انا هقولهم ..

هو : وليه ما مامتك عارفاني كويس... وعادي ممكن اكلمها...

هي : حبيبي متحرمنيش من اللحظة دي... لحظة اني اعلن انتصار حبنا.. لما هقولهم انك عاوز تيجي تتقدملي...

هو : خلاص قوليلهم... وبلغيني بالميعاد...

هي : اوكي... يلا بقي علشان هدخل اساعد ماما... سلام

هو : سلام ياقلبي..

........................................

هو : اخيرااا .. رديتي... ازيك؟؟ وحشاني ... مالك يبنتي فيه ايه...

هي (بصوت خافت) : مفيش عادي... انا كويسة...

هو : ممممممممم.. قوليلي هاجي امتي عندكم البيت؟؟
هي : مش هينفع دلوقتي..

هو (بخضة) : ليه؟؟؟؟؟؟؟؟

هي : صدقني مش هينفع دلوقتي؟؟

هو : مالك فيه ايه؟؟ الاول مترديش عليا بقالك اسبوع .. ودلوقتي بتق...

هي (تقاطعه) : انا فاتحتي يوم الجمعة الجاية..

هو (بدهشة) : فاتحتك؟؟؟ مش فاهم ؟؟ ازاي ؟؟ وعلي مين؟؟

هي : واحد معرفة بابا... انسان كويس... و..

هو (صارخا) : انتي بتقولي ايه؟؟؟ وانتي موافقة؟؟

هي : أه

هو : وانا؟؟؟ ايه الحصل؟؟؟ وحبنا؟؟؟

هي : ممكن ننسي ال كان بينا... ونخلينا اصحاب و ..

هو (بجنون) : اصحاب؟؟؟؟ انا وانتي اصحابي؟؟؟ فهميني؟؟ انا مش مستوعب لييييييييييييييه؟؟

هي : طيب ممكن متتصلش بيا هنا تاني... عموما انا هغير الرقم... سلام دلوقتي علشان ماما بتندهلي...

هو : استني هنا

******************************

هو : صباح الخير

هي 2 : صباح النور ياحبيبي.. عامل ايه

هو : كويس..

هي2 : متصلتش بيا امبارح لما زي مقلتي قلقتني عليك ؟؟

هو : معلش نسيت...

هي2 : ولا يهمك ياقلبي .. بس متعملهاش تاني..

هو : حاضر

هي2 : مالك ياروحي صوتك متغير؟؟

هو : انا بقالي فترة عاوز اكلمك في موضوع..

هي2 : قول... انا سمعاك..

هو : احنا مش هينفع نكمل سوا..

هي2 : ايه؟؟؟ ليه؟؟ انا عملت حاجة زعلتك؟؟؟

هو : لا مش انتي... صدقيني انت بني ادمة جميلة جدا بس...

هي2 (بصوت مخنوق) : بس ايه؟؟

هو : انا حولت كتير اني احبك زي منتي بتحبيني.. وساعات كتير كنت بقنع نفسي بده... بس مش قادر خلاص.. مش عاوز اظلمك...

هي2 (بعياط) : بس انا بحبك... وممكن يحصلي حاجة منغير..

هو : صدقيني ده لمصلحتك... انا منفعكيش... بكرة تلاقي الانسان الهيحبك بجد... سلام

**********************************

هي3 : حبيبي... ازيك؟؟

هو : وحشتيني ...

هي3 : انت اكتر...

هو : احكيلي بقي عملتي ايه امبارح بعد موصلتك؟؟

هي3 : امبارح ده كان احلي يوم في حياتي... بعد موصلتني حكيت ل ماما عنك...

هو (بخضة) : ايه؟؟؟ ماما؟؟ حكيتيلها ايه بالظبط؟؟

هي3 : حكتلها عننا.... وانك ناوي تيجي وتتقدملي..

هو (بغضب) : وانا امتي قلت الكلام ده؟؟؟

هي3 : احنا بقلنا قد ايه بنتقابل .. بقلنا قد ايه بنحب بعض؟!!!

هو : مش معني كده انك تروحي تقولي لمامتك حاجة زي كده من نفسك كده...

هي3 : انت مش بتحبني... يبقي اكيد هنتجوز ...

هو : جواز ... جواز لأ.. دلوقتي

هي3 (بغضب) : يبقي كلام اصحابي صح... وانك مبتحبنيش.. وبتتسلي بيا..

هو : صدقي ال انتي عاوزاها انتي حرة... بصي بقي بصراحة انا مش مستعد اتجوز حاليا وخصوصا اني اصلا مش بحبك للدرجة دي....

هي3 : للدرجة دي.. هوا فيه درجات للحب؟؟

هو : اه طبعا... في الحب البجد... والحب بتاعنا ده خروجات وفسح وكلام حلو وخلاص...

هي3 (بعياط) : مكنتش متخيلة انك كده...

هو : انا موعدتكيش بحاجة... فياريت منغير تجريح... خلينا ننهي علاقتنا دي بشكل شيك.. منغير غلط في بعض..

*****************************

هو : ايوة مين؟؟

هي4 و هي5 و هي6 : ايه ده... مش عارف مين؟؟

هو : معلش اصلي مبصتش في الرقم رديت علي طول ازيك؟؟

هي4 و هي5 و هي6 : الحمدلله مبسوطة جدا.. وانت......

هو : انا كويس..

هي4 و هي5 و هي6 : انا اتبسط اوي امبارح.... مكنتش اعرف انك لذيذ اوي كده...

هو : كتير بيقوولو كده..

هي4 و هي5 و هي6 : ده غرور..

هو : لا والله عادي..

هي4 و هي5 و هي6 : وانت؟؟؟ متبسطش امبارح واحنا مع بعض؟؟

هو : عادي...

هي4 و هي5 و هي6 (بدهشة): عادي؟؟ طيب هنتقابل امتي تاني... علشان نشوف موضوع ال عادي ده؟؟

هو : مش هنتقابل تاني..

هي4 و هي5 و هي6 : ليه؟؟

هو : كفاية عليكي كده... خرجت معاكي مرتين تلاتة... وخلاص ... زهقت...

هي4 و هي5 و هي6 : انت مش محترم و......

هو (بيقاطعها) : هشششششششششششششششش انا هقفل السكة اصلا..

**********************************

هو : ايه يبت متصلة بدري كده ليه...

هي7 (بميوعة) : وحشتني... ايه متوحشنيش؟؟

هو : وحشتك ايه يبت... منتي كنتي معايا لحد الفجر امبارح... انجزي عاوزة ايه.... انا لسه مصحيتش ومش فايقلك..

هي7 : اصلي نسيت الولاعة بتاعتي عندك.. شوفها كده علشان تبقي تخليهالي علي جنب بدل متضيع..

هو : انتي سيبتيها فين؟؟

هي7 : هتلاقيها عندك انا نسيتها تحت المخدة..

هو : اه اه اه ... لقيتها.... ثم انا مش قلت متتنيليش تشربي سجاير زفت تاني علي سريري ...

هي7 (بضحكة مش ولابد) : معلش اصلو سرير طاهر اوي..

هو : ماعلينا... محكتلكيش... ان امي بتدوري علي عروسة...

هي7 (باستعباط): منا اهو ...

هو : انتي ايه ياسفلة... وانتي بتاعة جواز برضو... ثم انا اصلا مش هتجوز ... جواز ايه وبتاع ايه بلا قرف... انتي هتيجيلي تاني امتي؟؟

هي7 : بعد بكرة ... واهلي مسافرين عند عمتي يومين... يعني ممكن بدل مسهر عندك .... انا ابات عندك في الشقة احسن....

هو : اشطة جدا....

***************************

هي7 : بتتصل ليه؟؟ عاوز ايه؟؟

هو2 : انتي لسه زعلانة مني؟؟

هي7 (بغضب مصتنع): اه طبعا... انت عاوز ايه بقي؟

هو2 : خلاص بقي حقك عليا... انا اسف..

هي7 : برضو زعلانة...

هو2 : انتي مكبرة الموضوع اوي... كل ده علشان مسكت ايدك؟؟؟

هي7 : الموضوع كبير بالنسبة ليا... انا بحبك .. متخلنيش اغير فكرتي عنك...

هو2 : خلاص ياحبيبتي انا اسف... مش هعمل كده تاني..

هي7 (بدلع) : خلاص سماح المرة دي.... انت مش ناوي بقي تيجي وتتقدملي زي مقولتلي؟؟

هو2 : حدديلي انتي معاد ... وانا هاجي .. علي طول... خلاص مش قادر ابعد عنك...

هي7 : السبت الجاي... هخلي بابا يستناك..

هو2 : اوك السبت الجاي .......................................................

هناك 15 تعليقًا:

اقصوصه يقول...

مكالمه ممتعه

استمتعت بمتابعتها :)

سمع هوص (Abo 3li) يقول...

مرورك شرفني...
بس سؤال انه مكالمة فيهم بالظبط ال عجبتك؟؟ههههههههه

صباحك جميل... نورتيني

تقبلي تحياتي

wasf_elahsas يقول...

وااااااااااااو كان الواحد بيتفرج علي فيلم عربي
عارف يا اسمك ايه
ساعات بنحب لمجرد اننا عايزين تغيير
مش مهم ايه ال هيحصل بعدد كده
الحب احساس جميل اوي
بس صعب انه يكون وقت وبيعدي
لانه الحب في القلب ايوة زي عضة الكلب
بس مش ده قصدي
قصدي انه كل قلب وليه مقدار معين من الحب
يعني لو فضل طول الوقت تضييع وقت
بيخلص ومش بيرجع تاني حتي لو قابل حد بيحب بجد ووقت مناسب ينفع فيه انه ياخد مسواه الاخير الزواج
موضوع لذيذ
تحياتي

سمع هوص (Abo 3li) يقول...

"قصدي انه كل قلب وليه مقدار معين من الحب
يعني لو فضل طول الوقت تضييع وقت "

مش متفق معاكي في الكلام ده يا اسمك ايه.... لان الحب ملهوش حدود.... بس ده لما يبقي حب اصلا من الاول...
يعني في حاجات تانية كتير ممكن نفتكرها حب بس هيا في الحقيقة مش كده...

نورتيني
وصباحك جميل..
تحياتي

فتاه من الصعيد يقول...

الضربه التي لا تقتلني .... تعقدني :)

مكالمات حلوه ... مدونتك جميله كمان

تحياتي

سمع هوص (Abo 3li) يقول...

فتاة من الصعيد

عندك حق .. الضربة التي لا تقتلني تعقدني.... متفق معاكي تماما..

وشكرا علي زوقك ... وكلامك الحلو..
المدونة بقت احلي لما شرفتيها بزيرتك..

ويرب متكونش اخر زيارة...


نورتيني بجد..

تحياتي

star in the sky يقول...

معقوووووووووووووول

بجد مش بفهم الشخصيات دى
ومش فى حياتى حد كده الحمد لله ولا اتمنى فى يوم اعرف حد كده لا بنات يبقوا صحابى وبدعى ربنا انه ميوكنش نصيبى مع انسان كده
ربنا يهدى الكل

سمع هوص (Abo 3li) يقول...

star in the sky

اه معقولة ... فيه كده واكتر من كده كمان..
ربنا يستجيبلك ويهدي الجميع


نورتيني....
تحياتي

sookra يقول...

هههههههههه
ضحكت على شر البليه
ايه دا بجد انت سجلت المكالمات دى امتى ؟
وياترى انت حد من دول ولاايه
مساك شيكولاته

سمع هوص (Abo 3li) يقول...

sookra
يوووووووووووه... مش محتاج اسجلها ... بسمعها كل يوم...
كلنا هتلاقيه حد من دول... او جزء منه علي الاقل خالص...


نورتيني بجد... ومساءك شيكولاتة بالبندق

ghada mOhsen يقول...

ههههههههههههه
ايه الحواديت دى

بس تصدق هو ده الواقع بعينه ...

بجد استمتعت اوى وانا بقراه ... ده يدل على اسلوبك السلس ماشاء الله عليك ...

ربنا يهدينا يااااااااارب

تسلم
... ;) ,,, ;) ...

سمع هوص (Abo 3li) يقول...

غادة
بجد كلامك فرحني...
ربنا يكرمك علي زوقك ده..

نورتيني والله...

تحياتي

سمو الأميرة سارة يقول...

للأسف بتحصل كتير أوي :(

بس الموضوع مكتوب حلو اوي جد تسلم ايدك يا ابو علي

سمع هوص (Abo 3li) يقول...

سمو الاميرة سارة
يامرحبا يامرحبا.. نورك غطي علي الكهربا...
تسلم ايدك انتي علي تعليقك الحلو ده...
رغم اني زعلان منك... بقالك كتير مبتزورنيش...
ومش هتنازل عن انك تقري كل الفاتك...


نورتيني بجد ياملهمتي...هعهعههعهعهعهعهعه

تحياتي

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل