السبت، 30 أكتوبر 2010

هستحملكم....



انا النهاردة قررت قرار مهم...
انا قررت ابقي رئيس جمهورية...
ايووون ... انا قررت اكون رئيس جمهورية ...
بصراحة انا شايف نفسي اصلح واحد للمنصب ده...
ايوة انا اصلح واحد للمنصب ده...
صدقوني...
او متصدقونيش.. مش مهم...
ده لمصلحتي.... ولمصلحتكم...
متقلقوش مش لمصلحتي بس...

والنهاردة هو يوم تنصيبي لنفسي علي كرسي الحكم...
تا
تا
تا
تن

بسم الامة
احب ارحب بيكم ياشعبي..
واحب ابركلكم عليا..
واهنيكم اني اخترتكم انتو دونا عن باقي شعوب العالم علشان احكمك...
مش عايز هتافات... انا لو عايز هتافات دي اسهل حاجة ممكن احصل عليها...
انا رئيس واقعي...
عارف انكم هتكرهوني بعد فترة...
والهتاف ده هيبقي مجاملة...
انا عارف كل ده...
ندخل علي المهم علشان مش فاضيلكم..
اما انكم شعب رغاي صحيح...
بس هستحملكم...
مهي علاقة متبادلة..
هستحملكم وهتستحملوني...
هتستحملو دكتاتورتي...
هتستحملو اتباعي..
هتستحملو شطحاتي..
وهتستحملو نرفزتي عليكم (وانا نرفزتي وحشة.. انا بحزركم)...
وانا بالمقابل هستحملكم..
هستحمل قرفكم..
وشكوتكم علي الفاضي والمليان..
وهستحمل انكم مش عاوزين تشتغلو... وفي نفس الوقت عاوزني ازودلكم اجوركم...
هستحمل بلاويكم... ودي كتير...
هستحمل انكم راضين بواقعكم ومش عاوزين تغيرووه... رغم انكم ساخطين عليه...
هستحمل مزحمتكم لبعض في الموصلات...
هستحمل نصبكم علي بعض... وسرقتكم لبعض.. هستحمل كدبكم ونفاقكم...
هستحمل لما هتفترو علي بعض... وتدوسو علي بعض...
هستحمل...
بصو بصو... علشان انا ورايا مراسم تنصيب...
من الاخر كده انا شاريكم علي عيبكم...
وانتو طبعا ملكوش حق الرفض او القبول....
مش كفاية اني هرضي بيكم...

هناك 34 تعليقًا:

Ramy يقول...

أولا أزيك يا عم

فينك يا سيدى

و لا سيدى أيه بقة

أزيك يا ريس

بس دة فى ريس فى بلوجر

و كدة ممكن تتنشنوا مع بعض


انتوا اعملوا برامج انتخابية و نشوف مين فيكوا ينفع (:

اهو حتى نجرب الموضوع دة

(:

ستيتة يقول...

بلدنا فيها 90 مليون ريس
بحساب العيال اللي لسه في بطون امهاتهم
مين ها يتحكم؟
مش عارفة :)
فعلا شعب وحش آخر كل الحاجات
انت فين يا عم واخبارك ايه

سمع هوص (Abo 3li) يقول...

ramy

الحمدلله تمام..
انا اهوووووووووووون...

انتخابات؟!؟!؟!؟ يعني ايه انتخابات!! لاا مفيش الدلع ده في دستوري..

تحياتي..

سمع هوص (Abo 3li) يقول...

ستيتة حسب الله الحمش...


ممكن نبقي نستورد شعب علشان نحكمه...

انا موجود اهووو... ولسه عايش الحمدلله... شكرا علي السؤال :D

منوراني يادكتورة..

خواطر شابة يقول...

ههه لكن تعرف بوست رغم انه خفيف وكوميدي لكن فيه كلام كبير للي عايز يفهمه لانه ليس دوما العيب في من يحكمنا اوقات كثيرة العيب الكبير يكون فينا نحن وعلى رأي المثل عندكم " قالوا يافرعون مين فرعنك قال ملقيتش حد يلمني"
دمت بكل الود

سمع هوص (Abo 3li) يقول...

خواطر شابة

العيب ديما فينا مش ساعات... وزي مقولتي يافرعون ايه فرعنك!!!!


تحياتي...

sony2000 يقول...

يجاااامد يارييييس:))))))
بس ربنا يستر علييييك

غير معرف يقول...

(من الاخر كده انا شاريكم علي عيبكم...
وانتو طبعا ملكوش حق الرفض او القبول....
مش كفاية اني هرضي بيكم...)

لا ما شاء الله عليك واثق من نفسك، ولا ومتفضل كمان، روح يا بني صلّح نفسك وتعال.

من كل بستان زهرة يقول...

ابو علي

انا عرفت انت مختفي ليه دلوقتي
كنت ناوي على النيه دي وبتستعد

الله يكون في عون سيادتك ياريس
يا مأكلنا يا ملبسنا يا مدلعنا
يلي محقق لنا كل الي نفسنا فيه

معلش استحملنا الله يخليك أرجوك
بجد انت ربنا يكون في عونك على الي شعبك هيعملوا فيك
بس يلا كله عند ربنا

ربنا ميحرمناش منك

رحاب صالح يقول...

حمد الله بالسلامة يا ابو علي
فينك يا راجل...؟
يعني احنا نستحملك وانت تستحملنا وكدة يعني....
تعرف
انا قررت اهاجر مع اخويا برغم اني كنت بقنعه انه ميهاجرش

Ms Venus يقول...

ابو على


حمدلله على السلامة


فينك كل دى غيبة ؟


وبعدين هو انت تغيب تغيب وترجع رئيس ؟ ههههههههه


متغيبش كتير


تحية ليك

Elmasryeffendi يقول...

و الله عندك حق ، احنا بقينا حاجة تقرف فى سخطنا و عدم رغبتنا فى التغيير ، لكن اعتقد ان ده ناتج التغير الايديولجى اللى عمله انقلاب يوليو و نتيجته بدات تظهر دلوقتى لان مدمر مصر الحديثة او عبد الناصر لعب و نخرب فى ايديولوجيات و اقتصاديات الدولة حتى يحصل على الزعامة

فكرة من الزمن ده يقول...

شوف ياريس ابو علي
سمع خوص بقى عشان كده شكلنا مش ح نعمر مع بعض من الاخر شوفلك شعب غيرنا بدل ما نخسر بعض ونبقى حبايب من بعيد على ايميلات بقى
تحياتي

just dream يقول...

ههههههههههه ايوه ايوه الشعب هو اللى نصاب وحرامى ووحش وراضى بحاله المؤرف وحابب الفساد والبطاله والفقر
طب ماانا اقولك استورد من الصين شعب تانى اهو هيبقى شعب صينى تمام اجود وارخص وكمان بيفكر بالصينى ههههه
تحياتى ياريس

كلمات من نور يقول...

نازل الانتخابات؟

طبعا حنستحملك طبعا فوق راسنا من فوق يا ريس ........بوست خفيف تقيل

Ms Venus يقول...

ابو على

كل سنة وانت طيب دايما ياارب وبكل خير

وعيد سعيد عليك

عايشه لنفسي يقول...

اولا كل سنه وانت طيب

ثانيا انا اسفه لانى مقصرةغصب عنى والله

ثالثا ياريس مش ملاحظ ان اللى انت هتستحملوا كلوا مش هيمسك بحاجه يعنى كله حاجات بين الشعب مع بعضه لكن اللى هنستحمله احنا ........ :(
واخيرا هشتكنا وبشتكنا ياريس

Unknown يقول...

وينفع برضه
رئيس جمهورية
يغيب المدة دى
كلها عن الشعب
البلوجرى بتاعه:!!

Unknown يقول...

عد ياابووووعلى
الشعب يناديكككك

Unknown يقول...

كل سنةو انت طيب
وبلاش كسل وارجع بقى:)

سمع هوص (Abo 3li) يقول...

sony2000

ربنا يستر علي الجميع... كل سنة وانتي طيبة..

سمع هوص (Abo 3li) يقول...

غير معرف

مش فاهم حاجة ... بس واضح انك يأما مقرتش البوست كله... يأما فهمك للعربي علي قدك...

سمع هوص (Abo 3li) يقول...

من كل بستان زهرة

هههههههههههههه.... هحاول..

كل سنة وانتي طيبة..

سمع هوص (Abo 3li) يقول...

re7ab.sale7

انا اهوووو انا اهوو انا اهوووو...
ازيك يارحاب.. عيد سعيد عليكي..

سمع هوص (Abo 3li) يقول...

Ms Venus

ههههههههههههه... اه لازم لما ارجع ارجع علي منصب...

عيد سعيد..

سمع هوص (Abo 3li) يقول...

elmasryeffendi

لا تعليق علي تعليقاتك ال ديما في شتيمة عبدالناصر,,,

سمع هوص (Abo 3li) يقول...

فكرة من الزمن ده

حسيت اني الريس متقال.. ههههههههه..
كل سنة وانتي طيبة..

سمع هوص (Abo 3li) يقول...

قول ياااارب

بس بيقولو الصيني بيتكسر... وانا مش فاضي كل شوية استورد شوية..

عيد سعيد..

سمع هوص (Abo 3li) يقول...

عايشه لنفسي

من عنيا ... هخليكم اخر هشتكة واحلي بشتكة...

كل سنة وانتي طيبة ياقمر,,, ومعلش لاني انا المقصر,,,

سمع هوص (Abo 3li) يقول...

norahaty

هوا مينفعش... بس انتو عارفين حجم مسئولياتي.. كنت بتفقلكم علي صفقة فتة علشان العيد من بلاد برة...

كل سنة وانتي بخير وصحة وسعادة..

Ramy يقول...

كل سنة و انت طيب


عيد أضحى سعيد (:

Ramy يقول...

كل سنة و انت طيب

سنة سعيدة عليك

موديل يقول...

كلام كبير جوي جوي يا بوي

اياكش بس لما تتنصب علينا تبقى ساعتها ترد علي تعليقاتنا و ما تنساناش لحسن كلهم بعد ما بيتريسوا بينسوا يردوا على تعليقات البوجرز
موديل
كاتبة مدونة عايزة اخس

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us