مرهم تسلخات...

بصو بقي مش عاوز اسمع نفس...

ايوووووووون....

لا تقولولي غزة ولا تقولولي عزة...

ولا هياكل معايا اسطول حرية.. ولا طبق مهلبية...

لأن ريسنا الحبوب... امر بفتح المعبر...

شوف ازااااي يامؤمن... المعبر انفتح اهو... ولأجل غير مسمي..

بتهيألي بقي ملكوووش حِجة؟؟؟!!

يعني ال هيفتح بؤه هحط صوباعي في عينه...

يعني ولا الجزيرة تشتم فينا...

ولا العربية تكدرنا...

ثم جزيرة ايه... دووول نظامهم خونة عملاء اوغاااد... النظام بتاعهم الخاين... استقبل وزير الصناعة الاسرائيلي بعد الحادثة... عادي يعني... مش جديدة... نظااام عميل ومنافق...

يافرحتكو بنظامنا... العميل برضه ... بس مش منافق... بجح...

الفارسني ان احنا عندنا في وزارة الخارجية شوية يهووووود بكل ما تحمله الكلمة من معاني... ايوه الله يهوود فكراً وعملً... بس تفكيرهم اليهودي ده مش بيطلع غير علشان يمرهمونا... ويسكتونا... بمرهم للتسلخات القومية العربية الانسانية.... مش يفلحو مثلاً مع دول حوض النيل...

لا يمتصوووو الغضب بصياعة...

قرار سيادي من سيادة الرئيس بفتح المعبر.. زغردتي يالي مش غرمانة .. وبخط صغير كده وتحته امضاء يهودي من وزارة الخارجية للحالات الانسانية والحرجة.... ااااه ياولاد التييييت...

هوا لازم تحطو مَهرب ؟؟؟

طبعا عندنا الحالات الانسانية والحرجة هي الحالات ال كده كده كانت بتدخل قبل ما القرار ده يطلع...

يعني هيا هيا..

بس هيا صياعة وخلاص.... ومرهمة للرأي العام...

من امتي؟؟؟

من امتي بيفرق معاكم الرأي العام ولا حتي الخاص؟؟؟

كتكو القرف...

من وجهة نظرهم:

استمرار وجود الانظمة العربية القذرة ... معتمد علي بقاء النظام المصري القذر...

لان الكل بيخبي قذرته وراء قذارة النظام المصري...

وبقاء النظام المصري القذر ... معتمد علي صهينة امريكا وطناش عم اوباما...

وصهينة امريكا وطناش عم اوباما معتمد علي صهينة وطناش النظام عن كل البيحصل في فلسطين... ومحايلة اسرائيل وأخدها بالاحضان بالاحضان بالاحضان... بالاحضان ياأسرائيل ياحلوة بالاحضان.... ومحايلة اسرائيل معتمدة علي نفخ وسلخ – قولا وفعلا - كل ماله صلة بأعداء الدولة العبرية... يعني خد عندك حماس علي حزب الله علي ايران... وميضرش برضه الاخوان.. امريكا مبتحبهومش...

طب دي وجهة نظرهم....

من وجهة نظرنا بقي... بقاء النظام بكل قذاراته... معتمد علي ايه؟؟؟

وهنخلص منه امتي؟؟؟

ولا احنا لازم نستني السر الالهي يطلع؟؟؟

تفتكرو ده الحل؟؟

صفوت الشريف قالها... مصر مش دولة رجل واحد ... مصر دولة اجهزة...

يعني الراجل الواحد لو مش موجود...

العصابة كلها موجودة اقصد اجهزة النظام كلها موجودة... وهتقوم بالواجب وزيادة...

يبقي الحل اننا نودي الاجهزة دي بكل قيادتها عند بتاع البيكيا.. ونشتري اجهزة جديدة من جولدي بالتقسيط المريح...

وسلملي علي جوزك ياأسماعيل بيه...

______________________

بعيد عن كل الغم ده.... عندنا 3 اعياد ميلاد علي بلوجر... 

عيد ميلاد علا صيدلانية طالعة نازلة

وعيد ميلاد سارة سينجل مامي

وعيد ميلاد مونتي monty

واحب اقولهم.... كل سنة وانتو طيبين... وربنا يسعدكم...

جوزوني البت دي وخدوو خمسين بجرة!!!

جوزوني البت نانسي دي وخدوو خمسين بجرة....

يخرب بيت كده.... البت دي قمر قمر قمر... هههههههههه...

الغريب في االاغنية دي انهم مجبوش علم الجزاير خاااااااااااالص!! 

مع انها الدولة العربية الوحيدة الصعدت كاس العالم!!

تفتكروو ليه؟؟!!

انا عارف ان نانسي مقطعاهم الي حد ما.... بس تفتكرو بيحايلو السوق الاكبر في الشرق الاوسط ال هوا السوق المصري مثلا!!

مش عارف...

سؤال لكل بنت وست....  هيا ازاي نانسي بتتنطط وترقص كده بالكعب النص متر, ده؟؟؟؟؟؟؟؟؟؟؟؟؟؟؟؟؟؟؟؟؟

كلمات الاغنية حلوة اوي..... 

بحب الجملة دي منها : When I get older I will be stronger

كلمات الاغنية:

Ooooooh Wooooooh, Ooooooh Wooooooh

Give me freedom, give me fire,

give me reason, take me higher

See the champions, take the field now,

you define us, make us feel proud

قل للعالم كلّو سمع 

دي احلى فرصة عشان نتجمع

وبقوتنا بلمتنا بنبحب بعض اوي وبنشجع

تشجيع مليان بالحب 

حاسين اننا احباب

سوا حنشجع من قلب

حبـيـبـــي

تعرف لعلمك حتلاقي حلمك

قم مد ايدك شجع بعلمك

بعلمك ده بعلمك ده بعلمك ده

When I get older I will be stronger

They’ll call me freedom,just like a wavin’ flag

Ooooooh Wooooooh, Ooooooh Wooooooh

احلى فرحة السنة دي

كلو يهلل كلو ينادي

كلو يفتح قلبو يحلم

ده مافيش اجمل من اللحظة دي

In the streets our heads are lifting,

as we lose our inhibition,

Celebration, its around us,

every nations, all around us

تعرف لعلمك حتلاقي حلمك

قم مد ايدك شجع بعلمك

بعلمك ده بعلمك ده بعلمك ده

When I get older I will be stronger

They’ll call me freedom,just like a wavin’ flag

Ooooooh Wooooooh, Ooooooh Wooooooh

حبـيـبـــي

تعرف لعلمك حتلاقي حلمك

قم مد ايدك شجع بعلمك

When I get older I will be stronger

They’ll call me freedom,just like a wavin’ flag

Ooooooh Wooooooh, Ooooooh Wooooooh

احنا بقينا هفأات ولا ايه يا جدعااان!!

يعني لما المصريين ينضربو ويتسحلو ويطلع عينهم وعين الجابوهم في مصر...

نقول قشطة... حكومتنا وبتربينا... وبتعلمنا الادب...

ثم الداخلية دول ناس مننا وعلينا....

مصريين زينا.. يعني اخوات وبيتعتبو مع بعض....

بس بغباوة شوية...

لكن نبقي هفأات جوواه.. وبره كمان؟؟!!

يبقي كده كتير...

عندنا اجمد وزارة خارجية طالعة من اجمد وزارة في العالم...

الاول الجمهور ينضرب في السودان...

يقولولك شوية صيع ورد سجون هما الضربونا... ثم احنا كنا باعتين الممثلين والرقصات فلازم ينضربو... وعدينها...

بعد كده يكرشو ناس شغالين في الكويت .... قولنا ماشي .. هما البيتكلمو في السياسة... وده عيييييييييييييييييب....

بعدها يقتلو واحد مصري ويعلقوه زي الدبيحة ويعملو فيها قبائل أكلة لحوم البشر ويلفو حولين الجثة وهما بيخبطو علي بؤهم... قولنا شوية مجانين ... والبوليس هناك هوا السخنهم علي الولد....

وبعدها شاب صغير تاني ينقتل في ايطاليا ... قولنا وماله... مهو طفشان.. ورايح يتخانق مع شوية صيع من امريكا الجنوبية طفشانين هما كمان...

وكمان مهندس يتقتل في نيجيريا... مهو ياجدعان هناك فيه ميليشيات مسلحة كتيرة برضه يعني القتل ده طبيعي...

ومصري كمان يتقتل ... وجثته تتقطع في اليونان... وماله هيا جات علي اليونان يعني...

واخرها واحد يتقتل في الكويت ... علشان بيتخانق علي الركنة.... يعني هوا كان عارف يركن في مصر علشان يركن في الكويت....

كل الفات ده كوووووم..... والراجل رئيس وزراء اثيوبيا ده كووووم تاني...

الراجل البجح ابن البجح طالع يقولنا انتو هفأااات يامصر... وأعلي ما في خيلكم اركبوووه... واخبطو دماغكم في الحيط... وبعد متخبطوها مش هتلاقو ميه تغسلو بيها دماغكم...

طب يعم محنا عارفين ان وزارة الخارجية عندنا فاشلة في كل حاجة... ومخليه قيمتنا في الحضيض... ومش وزارة الخارجية بس... ولا وزارة الري البتعمل مفاوضات فاشلة بقلها سنين...  دي الحكومة كلها...

بس مش لازم تقولها في وشي كده...

راعي احساساتي يابأف ... مش كده.. مش تقولي اتفلأ في وشي..

ولا انت قاصد تسخني عليهم.... طب بالعند فيك بقي مش هسخن...

بس انت متعملهاش تاني...

اينعم يعني انت رئيس وزرا دولة نص كم...

واينعم شوية اشبال من اي حتة شعبية عندنا ممكن يروحو يحتلو البلد بتاعتك دي....

بس احنا حكومتنا حكومة ذوووق... واخلاااق...

والخيار والجزر الدبلوماسي هي السلطة الاستراتيجية ليها....

يعني متقلقش... حكومتنا الحبوبة ميهماش غير البيحصل في عهدها...

يعني احنا يمكن منعطش في عهد الحكومة ولا الريس دوول...

يمكن نعطش قدااام شوية...

وده ال يهمهم..

ميهمهومش ان الجايين هيعطشو...

ينحرقو بجاز وسخ..

مش مهم...

الحكومة علي ايامهم بقي تبقي تتصرف...

المهم دلوقتي...

اصل احنا عندنا الجزم غالية...

ف بنحب نبص عليها...

انا قرفان...

وبمناسبة القرف ده افتكرت قصيدة لعمنا احمد فؤاد نجم هقرفكم بيها معايا:

عشان انت مصرى لازم تعانى 
وتفقد كرامتك بكل المعانى 
وتحرق فى دمك سنين مش ثوانى 
واوعى تصدق كلام الاغانى 
بتاع الحضاره وكانى ومانى 
ده كله هجايص مايدخل ودانى 


عشان انت مصرى العذاب بيناديك 
بتبدا فى يومك حاجات بترازيك 
فى نومك فى قومك تعكنن عليك 
تضايقك ولسه العماص فى عينيك 
مافيش ميه تشطف صابونه فى ايديك 
وجسمك ملزق وريحتك عاديك 
فتلبس وتنزل وفيك اللى فيك 


ورايح لشغلك حتحتاج مواصله 
ادى المترو واقف وكهربته فاصله 
وفى الميكروباص خناقه وحاصله 
اوتوبيس فرامله عايزالها وصله 
وتوك توك ده تايه ومحتاج لبوصله 

بتوصل لشغلك بدم اتحرق 
فى زحمه وكتمه وحر وعرق 
رئيسك سايبلك كومه ورق 
ده غير دمغه ضايعه وملف اتسرق 
وفى كام مواطن عامللك قلق 
بيشكى تقول له روح اندعق 
وعركه وهوجه وشاى اندلق 
ومخك خلاص من الصداع اتفلق 

هترجع لبيتك ده لو كان فى بيت 
هتوصل هتندم ياريتك ماجيت 
مراتك بتصرخ خلاص استويت 
عيالك بتطلب وهات كيت وكيت 
تزعق تهاتى ياناس اتهريت 
ولاحد سامعك مهما هاتيت 


عشان انت مصرى وده للاسف 
فلازم تاسى تعيش تتقرف 
وكل الاساسى فى حياتك ترف 
فتنسى الكرامه وتنسى الشرف 
وتسرق وتنصب او تنحرف 
ودمعك بيجرى وجرحك نزف 
مش انت اللى مصرى؟؟؟ جتك القرف

انا بكره ام الشمس...

بأعتباري كائن خفاشي... يعشق الظلام... البرد... الهدوء...

حاليا بعيش اسوء فترات السنة...

والمصيبة اننا لسه في اول الصيف...

ينهار اسوود... اومال شهر تمانية هيبقي عامل ازاي!!!

بصو .. انا عارف ان معظمك بيحب الشمس...

معظمكم بيحبو الصيف...

بس انا لا وكلا ولن...  وكل ادوات الاعتراض ال في اللغة العربية واللغات الشقيقة كمان...

انا مش بكره في حياتي اكتر من الشمس...

بكرهك ياشمس...

بكره الصيف...

بكره الصيف حتي والجو معقول...

بكره النموس ال بينشط في الجو المنيل ده...

بكره الشمس حتي في الشتا...

مبطقش اشوفها...

تقولو فامبير بقي ... تقولو عدو النهار... مش مهم...

بس انا فعلا بكرهها...

بكره الاحساس بالدفئ او بالحرارة....

مبعرفش اعيش بشكل طبيعي غير والجو فيه نسمة سقوعة...

 ودي مبتحصلش غير قليل جدا علي مدار السنة...

علشان كده معظم ايام السنة مش طبيعي...

الهيعترض علي كلامي ... ويقولي انه برضه بيحب الشمس... ومبيحبش البرد... ولا الشتا...

هنط في كرشه....

ايون...

ال خايف علي كرشه مينرفزنيش....

طب استني بلاش انط في كرشك... انا هقنعك...

ببساطة...

لما تبقي راكب اتوبيس ومزنوق في شارع الهرم وعرق الشعوب بينساب عليك... بتبقي مبسوووط؟؟؟؟

طب بلاش دي...

لما بتبقي راكب ميكروباص ...  وبرضه مزنوق بس المرة دي علي المحوور – الواقف خمسة كيلو – وتبقي راكبة معاك واحدة ست ضاربة "افترشيف" وفاكرة انه كالونيا خمس خمسات... ومع العوامل الحفازة المتمثلة في الحرارة بيحصل تفاعلات... بذمتك مش بتبقي – بردون يعني- عاوز ترجع....

بلاش دي خليك ياسيدي وصلت ميدان رمسيس...

الشمس مش بتسيح نفوخك... وتخليك عامل زي الفرخة السكرانة...

طب بذمتك لو عرفت بنت علي النت واديتك ميعاد فشنك علي كوبري قصر النيل..  تحب الموضوع ده يحصل في الصيف... علشان كل السوائل ال في جسمك تتصفي؟؟ ولما ترووح البيت تغني حلو وكداب ليه صدقتك؟؟؟...

بصو بصو.... انا مليش دعوة بيكم انتو احرار... خليني في نفسي...

انا رواحت النهاردة في ساعتين واربعين دقيقة في زحمة غير طبيعية... في عز الحر...

طبعا اول موصلت البيت .... جريت علي الدش حبيبي... وفضلت واخده في حضني لحد ما درجة حرارة الدماء في نفوخي نزلت من درجة الغليان....

ولما خرجت اكتشفت الصدمة الكبري...

بما انكم عارفين اني عايش لوحدي... يعني شقة عٌزاب...

واقصي درجات الترفيه في الشقق ال من النوع ده... هوا المروحة البوكس ....

الصدمة بقي كانت ان المروحة  - الله يخرب بيتها – بااااااااااااااااااااااااظت... حبكت تبوظ النهاردة...

طبعا انا ولعت شعلة وعملت مظاهرة في البيت.. زي اعلان شيفورليه الدبابة وقعدت اقول : المروحة ال حيلتي بااااظت... باااااااااااااااااااااااااظت... بااااااااااااااااااظت...

طبعا مش هحكيلكم علي شكلي عامل ازاي دلوقتي... انتو ممكن تكونو متخيلين الحالة ال انا فيها...

انا عامل دلوقتي زي الملاكم ال اِطحن ضرب وقاعد في ركن الحلبة والمدرب بتاعه بيفوقو... وبيرش عليه ميه بالجردل.. ويلطش فيه علشان يفوق... ده غير اني شبه الملاكم -  بردووون يعني - في اللبس كمان حاليا... احم احم...

انا اعرف ان لو درجة الحرارة وصلت 50 من حق كل الموظفين ميروحوش الشغل... والطلاب مينزلووش الجامعات ولا والمدارس... حسب القانون...

بتهيألي حتي لو وصلت 60 هيقولولنا 46 زي النهاردة كده... علشان ننزل ونفرهد اكتر...

لسه حد بيحب الشمس او بيطقها؟؟؟

كفاية ان الحكمة المصرية بتقول... ان القمر مفيد اكتر... لان القمر بينورلنا بليل والدنيا ضلمة... انما الشمس ملهاش لازمة علشان بتطلع بالنهار والدنيا نوووور.... هعهعهعهعهعهعهعهعهعهعه....

من تحت الحنفية كان معكم... الملاكم الفامبير ابوعلي...