السبت، 22 مايو، 2010

احنا بقينا هفأات ولا ايه يا جدعااان!!



يعني لما المصريين ينضربو ويتسحلو ويطلع عينهم وعين الجابوهم في مصر...
نقول قشطة... حكومتنا وبتربينا... وبتعلمنا الادب...
ثم الداخلية دول ناس مننا وعلينا....
مصريين زينا.. يعني اخوات وبيتعتبو مع بعض....
بس بغباوة شوية...


لكن نبقي هفأات جوواه.. وبره كمان؟؟!!
يبقي كده كتير...

عندنا اجمد وزارة خارجية طالعة من اجمد وزارة في العالم...

الاول الجمهور ينضرب في السودان...
يقولولك شوية صيع ورد سجون هما الضربونا... ثم احنا كنا باعتين الممثلين والرقصات فلازم ينضربو... وعدينها...

بعد كده يكرشو ناس شغالين في الكويت .... قولنا ماشي .. هما البيتكلمو في السياسة... وده عيييييييييييييييييب....

بعدها يقتلو واحد مصري ويعلقوه زي الدبيحة ويعملو فيها قبائل أكلة لحوم البشر ويلفو حولين الجثة وهما بيخبطو علي بؤهم... قولنا شوية مجانين ... والبوليس هناك هوا السخنهم علي الولد....

وبعدها شاب صغير تاني ينقتل في ايطاليا ... قولنا وماله... مهو طفشان.. ورايح يتخانق مع شوية صيع من امريكا الجنوبية طفشانين هما كمان...

وكمان مهندس يتقتل في نيجيريا... مهو ياجدعان هناك فيه ميليشيات مسلحة كتيرة برضه يعني القتل ده طبيعي...

ومصري كمان يتقتل ... وجثته تتقطع في اليونان... وماله هيا جات علي اليونان يعني...

واخرها واحد يتقتل في الكويت ... علشان بيتخانق علي الركنة.... يعني هوا كان عارف يركن في مصر علشان يركن في الكويت....


كل الفات ده كوووووم..... والراجل رئيس وزراء اثيوبيا ده كووووم تاني...
الراجل البجح ابن البجح طالع يقولنا انتو هفأااات يامصر... وأعلي ما في خيلكم اركبوووه... واخبطو دماغكم في الحيط... وبعد متخبطوها مش هتلاقو ميه تغسلو بيها دماغكم...
طب يعم محنا عارفين ان وزارة الخارجية عندنا فاشلة في كل حاجة... ومخليه قيمتنا في الحضيض... ومش وزارة الخارجية بس... ولا وزارة الري البتعمل مفاوضات فاشلة بقلها سنين...  دي الحكومة كلها...
بس مش لازم تقولها في وشي كده...
راعي احساساتي يابأف ... مش كده.. مش تقولي اتفلأ في وشي..
ولا انت قاصد تسخني عليهم.... طب بالعند فيك بقي مش هسخن...
بس انت متعملهاش تاني...
اينعم يعني انت رئيس وزرا دولة نص كم...
واينعم شوية اشبال من اي حتة شعبية عندنا ممكن يروحو يحتلو البلد بتاعتك دي....
بس احنا حكومتنا حكومة ذوووق... واخلاااق...
والخيار والجزر الدبلوماسي هي السلطة الاستراتيجية ليها....
يعني متقلقش... حكومتنا الحبوبة ميهماش غير البيحصل في عهدها...
يعني احنا يمكن منعطش في عهد الحكومة ولا الريس دوول...
يمكن نعطش قدااام شوية...

وده ال يهمهم..
ميهمهومش ان الجايين هيعطشو...
ينحرقو بجاز وسخ..
مش مهم...
الحكومة علي ايامهم بقي تبقي تتصرف...
المهم دلوقتي...
اصل احنا عندنا الجزم غالية...
ف بنحب نبص عليها...


انا قرفان...

وبمناسبة القرف ده افتكرت قصيدة لعمنا احمد فؤاد نجم هقرفكم بيها معايا:

عشان انت مصرى لازم تعانى 
وتفقد كرامتك بكل المعانى 
وتحرق فى دمك سنين مش ثوانى 
واوعى تصدق كلام الاغانى 
بتاع الحضاره وكانى ومانى 
ده كله هجايص مايدخل ودانى 


عشان انت مصرى العذاب بيناديك 
بتبدا فى يومك حاجات بترازيك 
فى نومك فى قومك تعكنن عليك 
تضايقك ولسه العماص فى عينيك 
مافيش ميه تشطف صابونه فى ايديك 
وجسمك ملزق وريحتك عاديك 
فتلبس وتنزل وفيك اللى فيك 


ورايح لشغلك حتحتاج مواصله 
ادى المترو واقف وكهربته فاصله 
وفى الميكروباص خناقه وحاصله 
اوتوبيس فرامله عايزالها وصله 
وتوك توك ده تايه ومحتاج لبوصله 

بتوصل لشغلك بدم اتحرق 
فى زحمه وكتمه وحر وعرق 
رئيسك سايبلك كومه ورق 
ده غير دمغه ضايعه وملف اتسرق 
وفى كام مواطن عامللك قلق 
بيشكى تقول له روح اندعق 
وعركه وهوجه وشاى اندلق 
ومخك خلاص من الصداع اتفلق 

هترجع لبيتك ده لو كان فى بيت 
هتوصل هتندم ياريتك ماجيت 
مراتك بتصرخ خلاص استويت 
عيالك بتطلب وهات كيت وكيت 
تزعق تهاتى ياناس اتهريت 
ولاحد سامعك مهما هاتيت 


عشان انت مصرى وده للاسف 
فلازم تاسى تعيش تتقرف 
وكل الاساسى فى حياتك ترف 
فتنسى الكرامه وتنسى الشرف 
وتسرق وتنصب او تنحرف 
ودمعك بيجرى وجرحك نزف 
مش انت اللى مصرى؟؟؟ جتك القرف

هناك 66 تعليقًا:

مصطفى أبوزيد يقول...



شوف يا ابو علي

الشعب المصري بقى عنده برود لا نهائي

انا لم يستفزني اي حادث للمصريين بالخارج بقدر ما استفزتني تصريحات اللوح بتاع اثيوبيا ده

ده احنا لو بعتنا 3 طيارات و دبابتين و احمد السقا هنحتل بلده
هههههههه

بس برضه احنا هنقضيها دبلوماسية و كلام ميجبش همه


موضوعك جميل و اجمل ما فيه
" يعنى هو كان عارف يركن في مصر لما هيركن في الكويت "

هههههه

تقبل مروري

فاتيما يقول...

صباح النكد ع الصبح

يعنى تختمها بالفاجومى يا شيخ
حراااااام عليك

و لأ مش حرام عليك و لا حاجة

حرام ع اللى قلوبها غم كدا
و خلونا ملطشة

و اهداف متحركة و ثابتة لأى حد عاوز يتعلم النشان فينا

دا آخر الزمان يا ابو على
بتاعهم و بتاعنا

و ربنا يستر وقت الإنفجار هيبقى عامل ازاى ..يا رب يكون بأقل الخساير

اسلوبك ساخر و جميل كالعادة
بس سخرية مصرية اصيلة

يتوجع القلب


تحياتى ليك يا فندم

آه استنى صحيح


جاى لقاء اسكندرية ان شاء الله
و لاهتنفضلنا ؟

لـــولا وزهراء يقول...

ابوعلى

مش عارفه ابدا كلامى من فين
المصرى ليس له كرامه فى الخارج لانه هو السبب تعال اتفرج على اى واحد مصرى لسه مسافر بره جديد مافيش واحد من ابناء البلد هيعبره او يكلمه او يقول له على حاجه ..........
فى مثل او قول بيقول لا كرامه لنبى فى وطنه كل شويه تلاقى حد يطلع يقول الجمله دى انا ضدها على طوووووووووووول الطريق


ااذ كان الانسان هنا ليس له كرامه ومتهان يبقى ازى الحال فى الخارج كل ما يحدث هنا ينقله العالم فى ثوانى يعنى كانك بالضبط قاعد وفاتح الشباك علشان الجيران تتفرج

ان الله لا يغير ما بقوم حتى يغيروا ما بانفسهم

ربنا سبحانه وتعالى هو اللى عنده الحل والامل وكل حاجه ونحن لا نملك سوى اللجوء الى الله والدعاء كثيرا كثيرا

بصراحه كان نفسى اكتب حاجات كتير اوى وازاى نظرة بعض الاجانب لنا لكن نفسى اتسدت ...........

زهــــــراء

samy يقول...

اية دة انتو لسة حاسيين يا جماعة

المعلومة وصلت متاخر قوى

و لولا قالت معلومة حقيقية ان مفيش مصرى بيساعد حد مصرى برة

احنا هنا لو فية مشكلة بينك وبين سايح اجنبى او عربى

انت اللى بتاخد على قفاك

فخلاص هما اتعودا يدونا على قفانا هنا فالبالتالى هتبقى سهلة فى بلادهم

وبعدين احنا زعلانين قوى من بتاع اثيوبيا

طب بالذمة مش دى الحقيقة

الراجل بيتكلم من منطق صحيح

طب احنا ردنا قولنا حاجة

خدنا القفا وسكتنا

خلاص يبقى كلامة صح


معلش يا ابو على

بس دى الحقيقة من وجهة نظرى

شكرا

emymony يقول...

مش عارفه اعلق
غير اننا تعبنا من الكلام
وبنتعب اكتر من اللى بيحصل كل يوم
مش هقول غير حسبى الله ونعم الوكيل
استهترنا وضيعنا حقنا من البدايه
مستنين ايه فى الاخر غير قله قيمه وعدم استعناء لكرامه شعب قبل الانسان
تحياتى

ستيتة حسب الله الحمش يقول...

بيجولك
طالما اتلطشت جوا
وضاع حقك جوا
وخدت لمؤاخذة على قفاك جوا

يبقى طبيعي تتلطش برا
وتندبح
وتتسلخ
وتتشفى
ويطلع الأقرع بتاع اثيوبيا يقول لك كاتك نيلة
وتعطش
وتموت

وكل ده وشر البقر لسه على قلبنا رابض

انا كمان قرفت قوي قوي قوي

Ms Venus يقول...

بعد كلام احمد فؤاد نجم مش هعرف اقول حاجة يا ابو على

هسكت واكتم فى نفسى واقوول


لنا الله

resalatye يقول...

انا هقولك كلمتين بس
كبر دماغك تكبر انتا

سمع هوص (Abo 3li) يقول...

مصطفى أبوزيد

علي رأيك السقا وكريم عبدالعزيز كفاية... بس خلي بالك ان فعلا الموضوع له ابعاد تانية...
بس مش لدرجة اننا نعمل عبط ومش واخدين بالنا للعالم دي......


نورتني ياباشا...
تحياتي..

Haytham Alsayes يقول...

مش لوحدك كلنا قرفنا
بس انت عارف ايه اللي عيحصل انفجاااااااااااااااااااااااااااااااااااااااااااااااااااااااار عام
قول يارب

سمع هوص (Abo 3li) يقول...

فاتيما

عجبتني اوي فكرة الاهداف الثابتة والمتحركة للعاوز يتعلم النشان... ههههههههههههههه...

شكرا ليكي ياتيما.. ربنا يكرمك...

اسكندرية؟؟؟ اسكندرية؟؟ انا اول مرة اسمع موضوع اسكندرية ده؟؟؟ فين التفاصيل.؟؟؟ انا شكلي تايه ولا ايه؟؟؟

سمع هوص (Abo 3li) يقول...

لـــولا وزهراء

طب منتي قولتيها "ان الله لا يغير ما بقوم حتى يغيروا ما بانفسهم"...
يعني ناخد بالاسباب.. ونصلح في نفسنا... وافتكر ان من اهم الحاجات لازم تتصلح .. اننا نبقي عندنا الرغبة والقدرة في اختيار ولاة امورنا...

انا معاكي ان فيه كتير من المصريين بيبقو اندال مع بعض في الغربة... بس فيه برضه ال بيكونو اكتر من الاخوات... بس يمكن الاندال بيبانو اكتر لانهم القاعدة الشاذة...

ومش نفسك بس المسدودة والله يازهرا... ربنا يصلح الحال..

منوراني كعادتك...

سمع هوص (Abo 3li) يقول...

samy

ياسامي انا مش معترض معاك... منا نفسي زيك وزي اي حد عاقل ان الحال ده يتغيير... والموازين تتعدل...
علشان قفانا خلاص .. داااااااب...


تحياتي..

سمع هوص (Abo 3li) يقول...

emymony

اهو .. ادينا بنفضفض علشان منفرقعش...

بجد.. حسبى الله ونعم الوكيل في اولياء الامر الهدرو حقنا .. قبل مغيرهم ينكل بيه..

تحياتي..

سمع هوص (Abo 3li) يقول...

ستيتة حسب الله الحمش

شر البقر لسه على قلبنا رابض...
يسلااااااااااااااااااااام... انتي جبتي من الاخر يادكتور...

من الواضح ان فيه حالة قرف عامة ابتدت من 30 ووصلت زروتها خلاااااااااااص..

تحياتي يادكتورة..

سمع هوص (Abo 3li) يقول...

Ms Venus

لنا الله...
بس تفتكري المفروض نعمل ايه علشان الابتلاء ده يترفع من علينا؟؟!!

منوراني..

سمع هوص (Abo 3li) يقول...

resalatye

هفضل اكبرها.. اكبرها.. لحد مهبقي مش عارف اخلع ال تي شيرت!!
نكتة سخيفة بس معبرة..

تحياتي...

سمع هوص (Abo 3li) يقول...

Haytham Alsayes


ربنا يستر والانفجار ده ميشلش في وشه الاخضر واليابس..
انا خايف من اليوم ده...

تحياتي..

افروديت يقول...

لما نكون بنتقتل ونتعلق علني مستغرب ليه أن واحدزي ده أوغيره يقول كده أحنا بقينا "ملطشه" لكل من هب ودب.تقبل مروري سلام

فتاه من الصعيد يقول...

ايه السؤال العجيب ده

طبعا احنا هفأاااات ..

لو لم يكن لك كرامه بوطنك... فلا تطلبها بوطن غريب

تحياتي

فكرة من الزمن ده يقول...

انت لسة بتسأل ولا ايه ياجدع
طبعا هل عندك شك؟
اه والف اه على الكرامة اللي ضاعت وانداست

قلبنا حزين وبيحزن يوم بعد يوم ولافيش كلام يتقال بعد كلامك وكلام نجم

سمع هوص (Abo 3li) يقول...

افروديت

المصيبة اني المفرووض استغرب .. وانا مش مستغرب...

نورتي البلوج... يارب الزيارة تتكرر ان شاء الله.. تحياتي..

سمع هوص (Abo 3li) يقول...

فتاه من الصعيد

متفق معاكي جدا..

تحياتي..

سمع هوص (Abo 3li) يقول...

فكرة من الزمن ده


لسه بسأل!!
يمكن حد يكدبني...
ااااااااه يامصر...


تحياتي..

sweet angel يقول...

السلام عليكم

أولا حمدالله على سلامتي
وأحب أقول بس اني رجعت علشان أنور بلوجر من تاني

(متواضعه متواضعه)

المهم
ازي حضرتك يا أستاذ محمد؟ (وش بيغمز بعينه) هههههههه

sweet angel يقول...

عارف يا أبوعلي
مع كل الي بيحصل ده
أنا تقريبا عاشرت ناس من كل الجنسيات انما عمري ما اتمنيت يكون معايا جنسية غير مصر

برغم كل الي بيحصل ده
انما تحس ان بتوع الخليج دول ناس مش بتفهم هما فعلا الحفاه العراة رعاه الشاه الي تطاولو في البنيان

أما الناس بتوع أوربا والدول المتجدمه فدول ناس مقرفه

علشان كده الواحد فخور انه مصري
ده أولا

الحاجه التانية بالنسبه لصورتنا جوة وبره
جوة : أنا اتفق معاك حكومتنا وبتربينا عاتي عاتي
وبعدين ده احنا احسن ناس بس بنخزي العين
‏):
اما بره ده بقا فإحنا الي عملنا كده
المصري بره بيعامل معامله الشحات الي رايح يتسول هناك
والكلمه دي قالتها واحده سعودية أدامي
ضيف لكده ان المصريين في الخارج شبه بياكلو ف بعض
وقليل القوي المخلصين
يعني تلاقي واحد عمل البدع علشان يسفر صاحبه أو قريبه
والتاني أول ما يسافر يروح يوشي بيه وياخد مكانة في الشغل
والحاجات دي كتير وبتنتشر بسرعه
علشان كده كرامتنا راحت

بس مصر ملهاش دعوة
العيب فينا احنا
لكي الله يا مصر

سمع هوص (Abo 3li) يقول...

sweet angel

اولا حمدالله علي السلامة...
ثانيا انا متفق معاكي برضه .. ان احنا العملنا كده في نفسنا... ولازم نتغير بقي..
ثالثا.. انا مش عارف ادخل عندك البلوج علشان عليها malware ... ياريت تشوفي ايه الحكاية...
رابعا حضرتي كويس الحمدلله.. وش متغاظ... هههههههههههه

غير معرف يقول...

مش عارف تدخل البلوج بتاعي لية؟؟

sweet angel

غير معرف يقول...

مش عارف تدخل البلوج بتاعي لية؟؟

sweet angel

القمرالباكي يقول...

السلام عليكم ورحمه الله وبركاته
مساء الخير ياابو علي

مالك شغال فالسياسه ليه مش ناوي تجيبها لبر
تعرف الشعب المصري ولا عاد ليه قيمه ولا جوه مصر ولا براها
بقينا زي مبيقولو مسخره
اي مصيبه من الي بتحصل للمصريين بره حكومتهم بتتحرك وتاخد حقهم انما احنا وكاننا حيوانات اتخلصوا منهم
بس ده الطبيعي هو في اهتمام ولا اداميه واحنا جواها لما يكون واحنا بره
الامل فالتغير ان الايام دي تروح وننساها ونعمل لينا كرامه من اول وجديد
شكلك هتودينا فداهيه لان انا هعمل انقلاب ع الحكم دلوقت

دومت بخير

Just waiting يقول...

في بيدج على الفيس اسمها
لو لم اكن مصريا كان هيبقى قشطه قوي
انا بقى مؤمنة بالجملة دي
وكمان الجملة دي لا يأس مع الحياة ولا حياة لمن تنادي
والله يرحمك يادرش

صمت المشاعر يقول...

انا الصراحه معنديش اي كلام اقوله غير اللي انت قلته حاجه تحرق الدم

قال يعني احنا عارفين نجيب كرامتنا في بلدنا

ربنا يستر علي الايام الجايه

وسمعني اغنيه يبقي انت اكيد من مصر

خواطر شابة يقول...

تعرف انا سأكون صريحة معك وارجوا ان يتسع صدرك لكلامي هناك مشكلة عند المصريين لخصتها SWEEY ANGEL في تعليقها عندما قالت "انما تحس ان بتوع الخليج دول ناس مش بتفهم هما فعلا الحفاه العراة رعاه الشاه الي تطاولو في البنيان‏ أما الناس بتوع أوربا والدول المتجدمه فدول ناس مقرفةعلشان كده الواحد فخور انه مصري" انه احساس الفوقية على باقي الشعوب وهذه مشكلة كبيرة
بالنسبة لمشكلة المياه لابد من تصحيح العلاقات مع افريقيا ومن اعادة الاهتمام بها افريقيا لم تعد هي تلك الصورة الذهنية التي كانت عن شعوب تلبس الريش وترقص بغرابة بل هي دول تبحث عن مصالحها كما تفعل مصر لذا لابد من وقفة واعادة الحسابات ومراجعة السياسات للوصول الى حلول اما الامور الاخرى التي ذكرتها فهي جرائم فردية لم تكن موجهة لمصريين بالخصوص ولم يكن السبب فيها الجنسية هي جرائم حق عام سيأخذ فيها القانون مجراه وايضا نعود ونقول هنا يأتي دور وزارة الخارجية في المتابعة والضغط لتطبيق القانون
دمت بكل ود

мαησηα يقول...

قولى انت بس السبب ف اننا بقينا ملطشة وانا ودينى احل لك المشكلة

لو لقينا السبب بجد اللى خلانا بقينا كده هنعرف يبقالنا كرامة

بس ارجع واقولك احنا اللى عملنا ف روحنا كده

وان كنت انت وانا واحنا كمدونيين طلعنا او نزلنا هنطلع كام يعنى بنعترض ع اللى بيحصل

ف غيرنا عشرميت مليون مصرى بيقولك يا عم احنا مالنا


ياعم احنا اللى هنعدل الكووووون

يا عم ماتولع البلد واللى براها وجواها اهم حاجة قلبك ابيض ونيتك صافية

ابو على انا كماااااااااااااان قرفت اوى اوى اوووووووى

هنعمل ايه يا سكرة ؟؟

MONTY يقول...

انا اتقرفت واتختقت واكتأبت

مافيش حاجه تسر ابداا ولا حاجه تدينا امل ف حاجه


يعنى هيا جت ع الكرامه والقتل يابنى احنا ارخص دم على مستوى العالم


مساء الفل

elmasryeffendi يقول...

شوف يا عزيزى فى مخطط خارجى لتقزيم مصر و انكفاءها على نفسها و هذا المخطط سعودى ايرانى و لان ما عندناش وزارة خارجية محترمة او اى قيادات محترمة تخطط و تستكشف و حتى الجهات السيادية فهى سيادية علينا فى الداخل فقط انكشفت الامور و اى مخطط اهبل ينجح فى مصرنا دولة الصفر الكبير لان ما فيش حد محترم

تحياتى

احاسيس آيوشه يقول...

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

بس خلاص هو قال المفيد :(

يلا ربنا يسامحك نكدت عليا اكتر ماانا متنكدة

سمع هوص (Abo 3li) يقول...

sweet angel


ايون يابنتي... تقريبا عندك فيرس...

سمع هوص (Abo 3li) يقول...

القمرالباكي

وعليكم السلام ورحمة الله وبركاته...

هتعملي انقلاب... طب انا معاكي...
مش الانقلاب ده اكله جديدة بالرز واللحمة؟؟ لحسن حد يفهمنا غلط ولا حاجة ... ههههههههه...
يارب التغيير ده يبقي قريب... يارب..

سمع هوص (Abo 3li) يقول...

Just waiting


بصي انا مش معترض او مش فخور بكوني مصري.. بلعكس... انا فعلا مبسوط اني مصري.. رغم كل حاجة..
تقولي تخلف تقولي موهوم.. بس بحبها.. ونفسي حالها يتعدل...
ادعي وقولي يارب..
والله يرحمك يادرش... وربنا يسمحه هوا ال عمل الحزب الوطني... اينعم ذودو عليه ديمقراطي بس برضه...

سمع هوص (Abo 3li) يقول...

صمت المشاعر


ويبقي انت اكيد اكيد في مصر...
ولا بلاش .. صوتي وحش... هههههههههههههه...

منوراني.. تحياتي..

سمع هوص (Abo 3li) يقول...

خواطر شابة

علي فكرة انا مش معترض علي كلامك.. انا عارف ان حتة "احساس الفوقية" ده موجود عندنا كمصريين... وعارف ان ده عيب من عيوب الشخصية المصرية... وانا كنت ناوي اكتب بوست عن الموضوع ده تحديدا...
بس العيب ده ممكن يستغل كعامل حفاز زي ما النازيين استغلو الموضوع ده في الالمان وكانو هيحكمو العالم لولا سوء التخطيط والمبالغة...
بس برضه خلينا نتكلم بصراحة... زي مأحساس الفوقية موجود لدي المصريين - كنا علي حق او لأ - ففي كتير من الشعوب عندهم عقدة نقص وخصوصا تجاه كل ماهو مصري... افتكر انك متفقة معايا في دي...
وعارف كمان ان الدول الافريقية دلوقتي مبقتش زي زمان... انا ال كان مضيقني اسلوبهم في التعبير السياسي الدبلوماسي بيقول انهم مسنودين ومتكلين علي قواي عظمي او قواي اقليمية زي امريكا او الصين او اسرائيل... حتي لو لهم حق انهم يعيدو توزيع النيل الاسلوب مكنش هيبقي كده...

علي كلً الشعوب هيا البتدفع التمن ديما... والشعوب العربية كلها مشتركة في شئ واحد ان حُكمهم مش من اختيارهم ولا بيعملو علي مصلحتهم... بل بالعكس بيحولو يشغلوهم بعدئات متخلفة مع بعض...
ربنا يصلح حال الامة العربية كلها..

تحياتي..

سمع هوص (Abo 3li) يقول...

мαησηα

والله انتي عسل يامنونة...
يعني هنعمل ايه... ادينا بنفضفض يمكن حالة القرف العندنا وعند باقي الناس تبقي شرارة لتغير ما...
ولحد ماالشرارة تولع... كل واحد يشتغل علي نفسه... بمعني انك تعملي العليكي.. ال تقدري تغيريه غيريه... اشتغلي بضمير.. حبي ال حواليكي وساعديهم.. حاولي تخلي المكان ال انتي فيه احسن بأي طريقة...
وربنا معانا...

ولنا الله..

سمع هوص (Abo 3li) يقول...

MONTY

مش لازم يبقي فيه حاجة تدينا الامل..
ممكن نبقي احنا الامل ده...


ومساءك فل الفل..

سمع هوص (Abo 3li) يقول...

elmasryeffendi

سعودي ايراني بس؟؟؟
مفتكرش.... افتكر ان تقزيم دور مصر من مصلحة انظمة كتير مش دوول بس...
النظام عندنا فاشل علي كل الاصعدة .. الداخلية والخارجية... والحمدلله..

سمع هوص (Abo 3li) يقول...

احاسيس آيوشه

معلش ... بس كلنا متنكدين..
خدي الموضوع بصدر رحب...
متنكديش علي نفسك..

ربنا يفك ضيقك وضيقنا... اللهم امين..

تحياتي..

Wanda يقول...

one ministr is just a part of whole
why should any country care if we will be angry or upset?? do we provide them with any thing important??

سمع هوص (Abo 3li) يقول...

Wanda

ايه يابنت عمي... فين العربي.. شكلك قاعدة علي جهاز مفهوش عربي... بتردي عليا عندك بالعنجليزي .. وهنا كمان عنجليزي!! ؟
انتي عندك حق هما ليه هيخافو منا ولا علينا... كنا فدناهم بأيه... من بعد عبدالناصر واحنا فقدنا اهميتنا الاقليمية في افريقيا... يمكن دي من الحسنات القليلة لناصر...

صباحك رز بلبن.. ولو مش بتحبيه.. يبقي صباحك مهلبية

Ana keda يقول...

فوعلن فوعلن
والله يا ابو على انا حزينة فعلا والله
الوضع بقى زى الزفت
دى بقت حجاجة تشل وتعل
متهانين جوه وبره وكاننا خلاص بقينا ملطشة
حسبى الله ونعم الوكيل

سمع هوص (Abo 3li) يقول...

Ana keda

متحزنيش... ادعي بالخلاص...
وحسبي الله ونعم الوكيل...

منوراني ياأم بيدووو... هههههههه...

عايشه لنفسي يقول...

ههههههههههههههههههههههههه
ابو علي والله والله قبل ماادخل مدونتك كنت بظبط في قصيده جتك القرف دى بتاعه نجم اجى عندك الالقيك حاطتها

اما بخصوص موضوعك بص اخويا قالى حكمه "الولد اللى ميحترمهوش ابوةقدام الناس ،عمر الناس ماهتحترمه "
يعنى يديلوا برستيجه قدام الناس وياخده بينهم وبين بعض عادى ابوة بقي ؛)

هى دى مصر يارأفت قصدى يابوعلي
بلدنا مبتحترمناش يبقي اللى بره هيحترمونه منين؟؟؟؟

انا موافقه تحترمنا قدام الغرب ونبهدل بعض في الخباثه بينا وبين بعض مفيش مشاكل

موضوع هايل كالعاده

سمع هوص (Abo 3li) يقول...

عايشه لنفسي

ده تخاطر افكار ولا ايه؟؟!! هههههه...
والله الحاج ابوكي ده راجل زي الفل.. وعنده حق...

وشكرا ليكي ياقمر ربنا يكرمك...
منوراني كالعادة

سمع هوص (Abo 3li) يقول...

عايشه لنفسي

ده تخاطر افكار ولا ايه؟؟!! هههههه...
والله الحاج ابوكي ده راجل زي الفل.. وعنده حق...

وشكرا ليكي ياقمر ربنا يكرمك...
منوراني كالعادة

ghada mOhsen يقول...

هلا أبو علي ...

عارف .. أنا الفتره إللي كنت عايشه فيها في اليمن .. كنت وقتها أعرف مصر من الظاهر بس - القشره الخارجيه لها فقط - دايما كنت أفكر إن المصريين عايشين أحلى عيشه وشبه مرفهيين كمان ...
كنت أحس إن الأخبار فيها شيء من المبالغه لا أكثر ...

والمصريين عندنا في اليمن بيتعاملوا احسن معامله ...
ده بس لما كنا نعرف إن في مدرس أو مدرسه من مصر راح يدرسنا .. كنا نفرح كتير ...

بس لما أجيت هنا من 5 سنوات تقريبا وعاشرتكم ... بجد حسيت فعلا بمعاناة معظم شعبها ..
وبسبب مجالي كمان عرفت أكتر وأكتر ...

بس بجد بجد كل ده راح ينتهي بإيد شعب مصر نفسهم بإذن الله ...

أنا معاك إن كل المشاكل إللي حصلت مؤخرا وبالذات الأخيره بجد تحبط أي حد ... بس ضرووووري نتحرك لأنها بجد ماتعتبرش مشكله مصريه دي مشكله عربيه ... لأن كلنا ممكن ننحط في نفس الموقف ...

وإضافه إلى الرغي ده كله أوافق نوجه " خواطر شابه " في كلامها :) ...

وجتهم القرف - يالي في بالي - زي مابيقرفونا .. قووول أميين :)))

تحيات ملونه بقوس قزح
... ;) ,,, ;) ...

سمع هوص (Abo 3li) يقول...

ghada mOhsen

المسلسلات هي السبب منها لله...
مخليانا من بره اوبا اوبا ومن جوااه إعا إعا.....

الشعوب العربية كلها مطحوووونة... ومن مصلحة جميع الانظمة الفاسدة في عالمنا العربي ان الشعوب تفضل مطحونة وخصوصا الشعب المصري... لان التاريخ بيقول ان التغيير للاحسن بيبدأ من مصر... والتغيير للأسوأ برضه...

ربنا ياخدهم .. مش يقرفهم...

منوراني..

سمسم/سما يقول...

اعتذر عن التعليق خارج الموضوع
إعلان عن بدء دورة فوتوشوب للمبتدئين
- تعلن مدونة امتـــــــــــــــي عن بدء دورة فوتوشوب للمبتدئين
- ،فعلى الراغبين فالمشاركة متابعة الدروس على المدونة
- الهدف: تعلم اساسيات الفوتوشوب وصناعة التصاميم
- الفئة المستهدفة : المبتدئين فالبرنامج وخاصة الذين لم يسبق لهم التعامل مع البرنامج
- الدروس :
- - التعرف على شاشة البرنامج والادوات وكيفية استخدامها
- - استعمال الفلاتر والتحديد على الصور
- - التعامل مع الطبقات
- - الكتابة على الفوتوشوب
- - دمج الصور
-
- آلية عمل الدورة :
- - سيتم شرح كل درس بطريقة مبسطة وسهلة ويعقبها تعليق ومناقشة من قبل المشاركين
- - سيكون هناك تدريب للمشاركين كتطبيق عملي على الدرس الذي تم شرحه,ويتم ارسال التطبيقات عن طريق الايميل لنشرها فالمرة المقبلة

سمسم/سما يقول...

السلام عليكم
بخصوص الموضوع فالبوست جميل
وهادا مش للمصريين
هادا لكل العرب الي ما عندهم كرامة
وبيصير كتير هيك
مع اني ما فهمت شو يعني هفأات بس اكيد شغلة مو منيحة

سمع هوص (Abo 3li) يقول...

سمسم/سما


فعلا هيا حاجة مش منيحة خاااااااااالص...


تحياتي

baby يقول...

هقول انا مش خايفه انا بس حبيت اقول عندك حق لا بقى فى كرامه ولا بقى فى احساس والكل ماشى يلطش ... ويدوس ما احنا ملطشه فى بلدنا مش هنتلطش برة طبعااااااااااا لازم برة وجوة علشان يبقى فى عدل ومساؤاه ههههههه وسلملى على الشفافيه ههههههه تقبل مرورى

سمع هوص (Abo 3li) يقول...

baby

انا كمان بحب الشفافية العربية اوي ... وبحب اهم روادها.. الرائدة هيفا والرائدة روبي... والرائدة مدام عوض ابو شئفة... هههههههههههه...

البلوج نووور.. وزيرتك علي راسي... ويارب تتكرر....

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل

rana يقول...

الكثير منا يعانى من مشاكل تسربات المياه ولكنة لم يجد الحل الامثل الذى يخلصة من هذا العناء ولكن من الان لا تبحثوا كثيرا عن شركات متخصصة فى مجال تسرب المياه لان شركتنا شركة كشف تسربات المياه بالدمام سوف تخلصكم من حل تلك المشاكل نهائيا وذلك يكون على ايدى مهندسون متخصصون فى الكشق على اماكن تسرب المياه وذلك باستخدام جهاز كشف تسربات المياه بدون تكسير الجدران او الارضيات وبعد ما تتواج اماكن التسرب تقوم بمعالجتها فى الحال ونحن يوجد لدينا فروع فى جميع انحاء المملكة واليكم بعض تلك الافرع شركة كشف تسربات المياه بالخبرشركة كشف تسربات المياه بالاحساء وذلك لمن يرغب فى التواصل مع الشركة ومعرفة ما تقدمة الشركة من خدمات وسوف نطرح عليكم بعض الخدمات التى تقدمها الشركة تقدم الشركة خدمات التنظيف وخدمات تسليك المجارى
شركة تنظيف بالاحساء
شركة تنظيف بالجبيل
شركة تسليك مجارى بالدمام
شركة تسليك مجارى بالخبر
فاذا اردتم التواصل مع الشركة اليكم ارقام الشركة
جوال رقم0558973863

شركة تنظيف منازل0550171619 ضي الرحمن يقول...

شركة عزل اسطح بالقطيف
شركة عزل اسطح بالجبيل
شركة عزل اسطح بالخبر
شركة عزل اسطح بالدمام
شركة تسليك مجارى براس تنورة


شركة تسليك مجارى بسيهات وعنك

حاتم النجار يقول...

شركة فارس الفرسان للخدمات المنزلية
تنظيف بالخبر

حاتم النجار يقول...


تسليك مجاري بالقطيف

حاتم النجار يقول...

شركة انوار الجنة للخدمات المنزلية

نظيف بالقطيف
تنظيف بالجبيل