الثلاثاء، 11 مايو، 2010

دليلك السريع علشان تبقي بارد, تنح, او سخيف..




النهاردة بقي جايبلكم حاجة هتفيدكم جدا جدا جدا...
شوية نصايح متواضعة.. ازي تبقي بارد... ازاي تبقي تنح.... ازاي تبقي سخيف...
وللمتألقين ازاي تبقي التلاتة مع بعض...
خد نصايحي دي زي مهيا ومش هتندم...
هتحس بسعادة ملهاااااااااش حدووود... ف انك ثقيل..

الحلقة الاولي النهاردة ازي تبقي كده في المواصلات العامة...
وكل حلقة هنتكلم عن طريقة وظروف جديدة... علشان االاستفادة تعٌم..

الحلقة الاولي في المواصلات العامة:
لو كنت من ال بيركبو تاكسي ...
اعمل  الاتي..
خلي التاكسي معدي من جنبك ونادي عليه فجأة هيقف قدام شوية:-
لو عاوز تبقي بادر اتحرك براحة وبهدووء وامشي اتمخطر وانت رايحله وخصوصا لو الطريق كان اتقفل بسبب التاكسي وكل العربيات بتزمرله...
لو عاوز تبقي تنح... خليك واقف مكانك و شاورله علشان يرجعلك بضهره... حتي لو كان بينك وبينه خطوتين...
لو عاوز تتساخف... امشيله براحة زي الحالة الاولي... واول متوصل... شاورله بأيدك واعتزرله بأبتسامة صفرا انك خلاص رجعت في كلامك.. ومش هتركب...

لو سيدتك بتركب ميكروباصات...
بارد: تخلي السواق وقف لحد علشان يركب او ينزل... وبعدها باتنين متر تقولو علي جنب يااسطي لو سمحت...
او تشاور لعربية زحمة جدا... ولما تقف تبص علي الركاب بهدوء وقرف.. وتهز راسك... وتسيب الميكروباص وتمشي.. منغير ولا كلمة..
تنح: تركب وتسأل السواق خمستاشر مرة بهدوء عن الاجرة... وميضرش انك تسأل كل الراكبين معاك...
سخيف: تخلي السواق ماشي بسرعة .. وفجأة تزعق بعلو صوتك علي جنب ياسطي.. واول ميتخض ويقف... تقولوه "لألأ قدام شوية.. الناصية الجاية دي"...


لو سيدتك بتركب المترو:
علشان تبقي بارد: تقف علي وش الباب وتعيق حركة الداخل والخارج في الخمستاشر محطة ال انت راكبهم... ولو حد سألك "نازل الجاية".. بصله بهدوء وهز راسك..
تنح: اعمل الموضوع بالعكس... يعني خليك واقف ورا ال واقف مباشرة علي الباب... واقعد خبطله علي كتفه واسأله "نازل الجاية.. هه... نازل الجاية؟؟"... حتي لو انت مش نازل... المهم تفضل واقف في نفس المكان... والقدامك هما البيتغيرو.. ولو بايع القضية... يبقي خبط علي كتفه بغشم شوية...
سخيف: يسلام عليك لو معاك موبيلين.. واحد فيهم صيني من ال عامل زي الكاسيت ده... تشغل واحد فيهم علي اغاني تامر حسني بأعلي صوت... وتتصل بأصحابك من التاني في نفس ذات الوقت... وتضحك بغباء في المكالمة وتفشخ بؤك علي الاخر وانت بتضحك... ومتنساش تعلي صوتك علي الاخر علشان تقدر تركز في المكالمة يعني صوتك يبقي اعلي من صوت تامر حسني.. فاهمني ... ولو صاحبك معاك ... انت شغل تامر وخليه يشغل عبدالباسط حمودة... واتنفسو مين صوت موبيله اعلي.... وياريت تتكلمو مع بعض كمان وتتخانقو علي ماتش الاهلي الاخراني...  والموبيلين شغالين...


وانت بتعدي الشارع:
علشان تبقي بارد: اوعي ... سامعني اوعي.. واياك تمشي علي الرصيف... ديما امشي جنبه...
تنح: قبل متعدي اقف في نص الطريق ادرس الموقف... ومتخفش محدش هيخبطك.. هما يعني هيودو نفسهم في داهية علشانك... وبعد متدرسه كويس... عدي برحتك خالص...
ولو حد زمرلك بقوووة... اقف مرة واحدة قدامه... هوا هيفرمل ... واسأله بكل هدوء والابتسامة علي وشك "حضرتك بتزمرلي ؟؟"....
سخيف: قبل متعدي وقف العربيات بأيدك الاول... وبعد م العربية تقف... شاورلها انها تعدي... وارجع في كلامك.. وارجع للرصيف... وهكذا مع باقي العربيات...

لوسيدتك بقي معاك عربية وبتسوق:
علشان تتبارد علي خلق الله: اي عربية تقف او تهدي او تكسر قدامك... حط ايدك علي الكلاكس... ومتشيللهاش...
لو انت ماشي بالراحة وبشويش و حسيت ان فيه حد بيفكر يعدي الشارع قدامك... برضه دوووس كلاكس جامد... وزود بنزين... احتمال يخاف ويرجع في كلامه...
تنح: لو حد قدامك واداك اشارة يمين مثلا علشان يدخل الشارع الجاي.. او شمال علشان يلف... دوووس بنزين مرة واحدة واكبس عليه... ومتخلهوش يعرف يلف... وافضل زنق بغباء وبلاهة ولا كأنك سامع كلاكساته او شايف اشارته.. بحيث يفوتوه ال ملف ويريت تبص عليه وتبتسمله... ويسلام بقي لو الملف ده علي طريق سريع... مش هيعرف يهدي كويس فيه... وهيتسحل لحد ميلاقي ملف تاني...
سخيف: اقف مرة واحدة في اي حتة تعجبك من الشارع...  ونزل صاحبك الراكب جنبك... ومفيش اي مانع ان تقف في نص كوبري اكتوبر الساعة واحدة بليل وتفتح الباب وتنزل تتطمن علي الهوا في الكوتش... بس اهم حاجة متنساش تدي انتظااار...

الي اللقاء في الحلقة الجاية من الدرس..

هناك 58 تعليقًا:

جارة القمر يقول...

دا بجد ؟؟؟؟؟

دا انا اتنرفزت وانا بقرأ تخيل بقى لو حد عمل معايا كدا

لا بجد شغل جامد يا بنى هههههههههههههههههه

هو انت بتعمل ؟؟؟ اوعى احسن اغير نظرتى فيك

لـــولا وزهراء يقول...

ابو على
-*-*-*

طبعا كل النصايح دى للمتواجدين داخل مصر لان لو حضرتك خارجها مش ممكن تقدر تعمل اى حاجه من الحاجات دى

بس بجد انت نرفزتنى من التناحه واحب اقول لحضرتك ان فى ناس كتير بتعمل كده واكتر
احكى لك على موقف كنت راكبه تاكسى مشوار طويل وكنت فى الكنبه اللى ورا
المهم واحد شاور له على نفس الطريق هينزل الرجل ركب بتاع نص ساعه وقال للوساق على جنب ونزل وبعد ما قفل الباب راح ادى للسواق الاجره وجرى بسرعه كانه متاخر على ميعاد لاقيت السواق عمال يبص فى ايده قولت مالك قال الرجل اعطى لى الاجره جنيه فقط لا غير طبعا ضحكت قولت له عادى كأن مافيش حد ركب معايا ...
الرجل ده رمز للتناحه والغلاسه ....

ربنا يستر من الناس اللى هتطبق كلامك

زهراء

سمع هوص (Abo 3li) يقول...

جارة القمر

المهم التطبيق... جربي التطبيق العملي... وهتدعيلي علي السعادة والاستمتاع بالتبارد علي الناس...

انا بعمل كده؟؟
انا اكاديمي بس...
بس ده ميمنعش اني ساعات بطبق بعض الحالات علي حسب المواقف... هههههههههه...
ومتغيريش نظرتك ولا حاجة... دي حاجة حلوة خااالص... يريت اعرف اعمل كده فعلا...

سمع هوص (Abo 3li) يقول...

لولا وزهراء

هههههههههههه... جنيه؟؟؟ وجاي علي نفسه ليه... مكنش أداله اجرة خالص احسن...

انا بس اديت حاجات سريعة كده علشان الواحد يبقي تنح علي صغير... الكورس الجاي... علشان مرحلة الاحتراف ان شاء الله... هههههههههه...

منوراني يازهراء...
تصبحي علي خير...

ستيتة حسب الله الحمش يقول...

طب اقول لك سر
علشان تعرف ان نفوخي منتهي الصلاحية ولله الحمد من كتر البرود والتناحة والسخف
انا عيل تنح في كلية التجارة وانا عمالة ازمر له وهو راسم التت على البت اللي جنبه رحت خبطااااااااااااااااه
بس بحنية والله :))
علشان كده ياريت التنح ويا سلام لو السخيف
يقف في نص الشارع
الأووووووووووول
امضاء حسن الهلالي

صيدلانيه طالعه نازله يقول...

ايه يا مستر المواهب دى كلها
و الله مش عارفين من غيرك كنا عملنا ايه
انت بصراحه عرضت الخطوات الاساسيه عشان يا نبقى رخمين يا نبقى تنحين

و من هذا المزنق احب اقدملك عظيم شكرى و امتنانى بالنصايح الغاليه دى

سمع هوص (Abo 3li) يقول...

ستيتة حسب الله الحمش


ههههههههههههههههه.... ايه العنف ده...

تعرفي انا مرة حصل معايا كده... وواحدة خبطتني وانا فووق الرصيف..... كنت ماشي علي الرصيف زي الناس الطبيعية... وسامع حد بيزمر ورايا... وانا مش مهتم... لاني المفروض علي الرصيف..
ومرة واحدة سمعت امريكاني... وواحدة راحت خبطاني بالعربية...
طبعا مسكت في خناقها... وهيا بتقولي منا عمالة ازمرلك علشان عاوزة اركن هنا... شفتي الجبرووت... بتزمرلي وانا علي الرصيف... المهم البت كانت حلوة بصراحة فمسكت في خناقها اكتر... راحت معيطة... علشان طلع عندها امتحان ومستعجلة وانا معطلها بخناقي معاها...
طبعا الناس بعد مكانو في صفي اتقلبو عليا... اول ما البونية أوأت... هههههههههههه...


طمنيني بس مين التاني...

سمع هوص (Abo 3li) يقول...

صيدلانيه طالعه نازله

اي خودعة... دي حاجة بسيطة.. ومجرد بداية... معايا هوصلكم لاعلي مستويات التناحة ...


تصبحي علي خير

ghada mOhsen يقول...

لالالالالالالالالالالالا
أنا جالي الضغط والسكر ياأبو علي ...

يخرب بيت التناحه على البرود وفوقيهم السخافه ...

أنا إتنفط وأنا قاعده ياراجل ههههههههه

المشكله مش عارفه أختار أي صفه تكون أحسن من التانيه عشان أبلعها ... لا يمكن :))) ...


...........
بس بجد حلقه تحفه ...
أنا بتمنى تعمل حلقه إزاي تكون تنح وبارد وسخيف مع رئيس التحرير أو بالأصح مع رئيس العمل بشكل عام ...
أهو تكسب فيا ثواب وأتعلم حاجه عدله في الزمن ده
هههههههههههههههه ...

تسلم ياأبو الأفكار ..
... ;) ,,, ;) ...

Sarah Sobhi يقول...

هههههههههههههههههه
صعب قوى الكلام ده
بالراحه كده الواحد كل يوم يجرب حاجة عشاان تثبت
ده غير ان الموضوع محتاج روقان و ذهن صاافى على شوية بلاهه

هنوصل و هناخد االلقب بس مش دلوقتى :D

re7ab.sale7 يقول...

حرام عليك بجد
انا بقي مش ممكن ابدا خالص اعمل كدة مع اني في مرة كنت عايزة ابقي كدة وقلت لاخويا يعلمني بس طلعت فاشلة ومعرفتش اتعلم كل الدروس دي, اقولك الحقيقة المرة اننا بجد عايشين ف الجو ده ولابد اننا نعمل كل ده للأسف مش غصب لكن عشان هو ده الواقع , بس قوللي بقي لو حد زي حالاتي وبنوته كدة خجولة متعرفش تعمل اي حاجة من دي تعمل اييييييية...؟

Wanda يقول...

ممكن والنبى تقفل المدرسة
كفاية الناس الى عندهم موهبة ربانى مش عايز الى كمان يتعلموها
:-))
حرام بجد يا بو على انت عايز الناس تمت بجلطات فى المخ و اللب و الاعضاء ؟؟

سمع هوص (Abo 3li) يقول...

ghada mOhsen

تصدقي انا فعلا كنت ناوية الحلقة الجاية تبقي ازاي تتنح علي مديرك... ههههههههه....
استنيها بقي....

نورتيني ياغادة... صباح الفل..

سمع هوص (Abo 3li) يقول...

Sarah Sobhi

هيا دي الرووح ال انا عاوزها... واحدة واحدة وخطوة خطوة... علشان نقدر ندرب نفسنا صح... واكيد هنوصل... ههههههههه...

ايه الغيبة دي ... البلوج نور تاني بزيارتك...

صباح الورد ياسارة

سمع هوص (Abo 3li) يقول...

re7ab.sale7

ممممممممممم... لا انتي حالتك صعبة محتاجة كورس مكثف...

بصي هقولك علي نصيحة بسيطة... اكتمي كل انفعالاتك ومتظهريهاش... وخلي وشك بدون اي تعبيرات... واي حد يكلمك في اي مكان.. وعاوزة تبقي باردة معاه ... بصي في عنيه بصة سريعة وبصي الناحية التانية بهدوء وبدون ولا كلمة ... مترديش عليه...
جربي... وهتدعيلي... او هتدعي عليا...

منوراني...

سمع هوص (Abo 3li) يقول...

Wanda

يادي النور يادي الهنا... واندا بنت عمي عندنا... يامرحبا يامرحبا....

الموهبة الفطرية مش كفاية... لازم الواحد يثقل مواهبه بالدراسة الاكاديمية ... ولازم كمان نساعد الغلابة ال مش بيتمتعو بالمواهب دي...

بصي لو قدرتي تجمعي اتنين مليون توقيع بيطالبني بقفل المدرسة ... هرضخ لمطالبك...
وبما انك بنت عمي الغالية هعتبر توقيعك بمليون... يعني فاضلك مليون واحد بس....


صباحك شيكولاتة بالبندق...

samy يقول...

لسة عنيف يا ابو على

بس اقدر اقولك انت شرحت الموقف بكل جوانبة

كيف تعيش حياة كل البشر تدعى عليك فيها

على فكرة انا بعد دراسة مستفيضة زيك كدة اكتشفت

ان الأنسان المصرى


يلد ويفقص


عمار يا مصر

بوست جامد جامد

الواحد يصتبح بية يفوق


شكرا يا باشا

امال فين الشاى يا عم

لاديني يقول...

هههههههههههههههه
يخرب بيت السخافة والتناحة
وبالمناسبة أنا مرة حصل في بلدي موقف مشابه ل (حضرتك بتزمرلي)

وكانت إمرأة تحوز مساحة من الكون أكبر مما تستحق كفرد واحد..وكانت تقطع الطريق أمامي بهدوء وأنا متوقف..وعندما أصبحت أمام منتصف مقدم سيارتي بالضبط توقفت وأخذت تنظر يمنة ويسرة وخلفها..
يبدو أنها تريد التأكد من صحة طريقها وهل عليها أصلاً أن تقطع الطريق أم ترجع..
أنا أكره أن أستعمل منبه السيارة إلا عند الضرورة القصوى..لكن هذه المرة استعملته للتناحة القصوى...فنظرت نحوي وسألتني مثل ذلك السؤال (انت تبيب عليا؟) قلت لها وأنا أكز على أسناني (طبعا) فسألتني (ليش؟)


بصراحة مدونة خفيفة الظل تدخل القلب من أول سطر ، ونقدها ساخر وفي الصميم..وممتع أيضاً

تحياتي لك

من كل بستان زهرة يقول...

ايه ده حرااااااااااااااام عليك
ياربييييييييييي
وكمان دي الحلقه الأولى
ولسه المسلسل هيتواصل

بس انت نسيت أهم حاجه
تقولناالي هيطبق الكلام ده شكله ايه وهو راجع بيته
زرقان حول العين
سنانه مكسوره
منخيرو جايبه دم
هدومه مقطعه

أنا لو بسوق وقبلت واحد واقفلي في نص الشارع ولسه بيفكر يعدي
والله لخبطه وأريح الناس من غلسته

funky girl يقول...

لااا حرااااام
:)
بجد دروس جامدة اخر حاجة يا ريت محدشينفذها حفاظا على الارواح بس
:D:D

sony2000 يقول...

يراااااااااااااجل
اييييه دا كلو اييييه دا كلو
لو بتعمل كدا موش هعرفك تاني:)
لاني بجد بتخنق من الناس دس
بهذر طبعا:)
معرفتك كنذذذذذذذذذذذذذ ياابو علي

Ana keda يقول...

ههههههههههههههههههه
انا اتحرق دمى
بجد بشوف المناظر دى
انا ممكن ارخم ع حد اعرفه فى موضوع العربية ده
بس بالشكل ده تو ماتش يا مان
ههههههههههههههه
لسعت يا بوعلى
بس البوست حلو

Ms Venus يقول...

هههههههههههههههه ياربى


ده انا جالى الضغط


وانت عاوزنا نعمل كده يا ابو على ؟؟


ده انت بتعزناا اووووووى هههههههههههههههههههه

غير معرف يقول...

يا اسفاه على الاخلاق

عايشه لنفسي يقول...

اولا نورت يابيه طولت ليه لغايه مانزلت بوست انا كل مابص علي مدونتك الاقي موضوع الريس اتغم اسكت
يابنى احنا من غيرك ولا حاجه ونقاضنا كام مليون حاجه ياغالي عندنا متغبش عننا اياك تعملها تانى وتنشف دمنا

بجد ايه النصايح دى كلها بجد تحفه

مرة وانا مروحه سواق الباص عمال ينادى هيم((اصله الدغ)) طيبيه يمايه هضبه هضبه ركبت
العربيه فضيت في اخر فيصل كده قبل الرمايه بشويه راح لقيتوا بيزعق (( الاخي ياحضيات ))
اقوله انت مش قولت حدايق هضبه
ابتسملي ابتسامه صفرا لونا ومعنويا وقالى هطيع الهضبه بتنين بس ياانسه

انا كتمت ونزلت لان لو كترت انى عارفه انهه هيرجعنى من مكان ماركبت

من ساعتها بركب واى مكان ينزلونى فيه بنزل وانا ساكته خاااالص واكمل تانى
ادعيلي اجيب حتى توكتوك مش عربيه فارهه افسح بيها ريمو ذهابا وايابا

ثانيا انت اكاديمى هايل هايل هايل
بجد تسلم ايدك وتحفه كالعاده

أع ـقل مـ ج ـنـونــة يقول...

ههههههههههه

انت عاوز تقضي علينا بئة ؟

تعالي طيب مطلوب محاكمتك محاكمة سريعة جدا

http://a32l-magnona.blogspot.com/2010/05/6.html

" معمولك تاج يخويا واستحمل بئة ^_^ "

نحن السابقون وانتم اللاحقون

мαησηα يقول...

ههههههههههههههه يا نهارى

انت عرفت ده كله منين يا ابو على ؟؟

ده انت اروووب

بس انا للاسف مش هينفع حتى اجرب

انا عاااااااااااااااااا محدش اصلا بيرضى يقف لى لما بشاورله ولا تاكسى ولاميكروباص عااااااااااا بيتباردو وبيتنحوا وبيسخفوا عليا انا

يرضيك يا ابو على كده عاااااااا

سمع هوص (Abo 3li) يقول...

samy

انا عنيف انا؟؟ طب ده البوست ده بالذات دليل علي رقتي ورومنسيتي المفرطة... هههههههههههه...

منتا عارف المصري مكار ممكن يعمل كل حاجة...


الشاي لسه علي النار من الصبح... اصلي بسخن الميه بولاعة...

تحياتي

سمع هوص (Abo 3li) يقول...

من كل بستان زهرة

لا بالعكس ال بيعمل كده بيروح بيتهم مبسووك وسعيد وفي قمة الانشكاااح النفسي...
جربي وهتدعيلي...

منوراني..

سمع هوص (Abo 3li) يقول...

funky girl

هههههههههه... ارواح مين بالظبط... ال هينفذها ولا ال هينفذها عليه؟؟؟؟


منورة البلوج..
تحياتي..

سمع هوص (Abo 3li) يقول...

sony2000

ربنا يخليكي ياسوني... انتي ال كنز ياقمر...


تسلمي..

سمع هوص (Abo 3li) يقول...

Ana keda

ياأم بيدو انا لاسع من زماااان .... والسلوك كلها ملمسة عندي للاسف..
ولا تو ماتش ولا حاجة...
بصي انتي اول ما حلبسة يجي ويكمل تلت سنين سيبهولي شهر... هعلمه اصول الموضوع ده... وهرجعهولك زي الفل ان شاء الله....

ربنا يديم التواصل... تحياتي..

سمع هوص (Abo 3li) يقول...

Ms Venus

طب بزمتك مش انتي تعملي كده في الناس .. احسن مهما ال يعملو فيكي كده!!؟؟
يبقي بعزوكم ولا لأ؟؟؟!!! هه؟؟
ههههههههههه

منوراني...
مساءك بنفسج..

سمع هوص (Abo 3li) يقول...

الغير معرف...

معلش بقي .. الاخلاق خلصت وبعتنا نجيب... تحب نعمل حسابك معانا؟؟!!!

سمع هوص (Abo 3li) يقول...

عايشه لنفسي

معلش بس انا فعلا مكنتش عارف اكتب اي حاجة... حتي مكنتش عارف اهيس زي المرة دي...

بمناسبة اللدغ... فكرتيني مرة كنت مروح... ولقيت ميني باص بينادي "فييسه فييسه فييسه"... انا قلت في عقل بالي يمكن يقصد جيزة علشان ساعات بيقولوها "كيسه"... وركبت... وطلع بينادي "فيصل"... هههههههههههههه....

ياااارب انا مش عاوز توكتوك فاره زي ده... انا عاوز عجلة واحدة منه بس,,,
ويلا من هنا بقي لحسن انادي للحكومة تيجي تشيلك... هههههههههههههه...

وربنا يخليكي ياقمر... تسلميلي...
تصبحي علي خير..

سمع هوص (Abo 3li) يقول...

أع ـقل مـ ج ـنـونــة

بعد الشر...
وحاضر يفندم... هرووح علي هناك فورا...

سمع هوص (Abo 3li) يقول...

мαησηα

عرفت ده كله بالتطبيق السليم للنظرية العلمية المعملية الفذة... اولا ملاحظة ثم دراسة ثم تجرب ثم استنتاج... هههههههههههه....


اخص ... بيعملو كده معاكي وانا عايش؟؟؟ انا لامومكن اقبل بكده ابدا... هاتيلي اسمأهم...


ومتزعليش يامنونة ياسكر... انتي علشان طيبة بس ... بس متقلقيش امثالي بينتقمولك اول بأول... هههههههه...

MONTY يقول...

ههههههههههههههاى


وربنا دنا لو حد عمل معايا ربع ده لاروح فيه ف داهيه

بارد وتنح وسخيف

كوكتيل بشع دحنا بستحمل الرخم بالعافيه ياراجل

ممكن نصايحك تفيدنى لو قابلت حد حاول يتساخف عليه ودينى لاطبق عليه التلاته

همتك معايا ياابو على ايوه كده خلى الواحد يا خد فرصته


تسلم لانى فعلا ضحكت كتييييييييييييير اوى كل ما اتخيل المواقف دى

تصبح على خير

star in the sky يقول...

يخربيت الغلاسة

لا لا لا دى مش غلاسة دى غتاتة

طيب ما فى حل احسن من ده كله

كل واحد يقعد فى بيته احسن ولا تقولى ميكروباص ولا توك توك

هع هع هع هع هع

عاشقة الحب يقول...

يبدو ان من كتر
البرود والتناحة والسخافة
اللي في المواصلات
اني هعمل بهذا الدليل الرائع

دليل مفيد !

كيكى عوووووو يقول...

ااااااااااايش اخبارك
حاسه بقالى قرن مجتش هنا
الفيس غيرنى والله
ام هند
انت عايزنى اعمل كدة مع سؤاقين المكروباصات وانت عارف العشرة والمودة والرحمه الى بينى وبينهم من ساعه ماعييت!!
انا اعمل كدة برضه
اخص عليك اخص يابو على
عايزنى ابيع العشره كدة بالساهل
انا مكنتش اعرف انك كدة ع فكرة
عمتا انكشفت والى كان كان والحق استخبى
هجبلك كل السواقين اصحابى يقروا البوست دة
هنفتقدك

سمع هوص (Abo 3li) يقول...

MONTY

انا واثق في انك هتستوعبي االدروس بسرعة... والناس ساعتها هتعملك حساب... هههههههههه....

شكرا علي كلامك... نورتيني بجد...

تحياتي..

سمع هوص (Abo 3li) يقول...

star in the sky

عاوزة تقعدي في البيت!! انتي حرة... بس ساعتها هتضطري تمارسي الغلاسة دي علي بابا وماما... ومضمنش ساعتها هيعملو فيكي ايه... هههههههههههه.....

منوراني ياسومة... يبقي طمنينا عليكي...

سمع هوص (Abo 3li) يقول...

عاشقة الحب

اي خودعة.... احنا في الخدمة... واضح انك كنتي محتاجة دليل زي ده من ال بتشوفيه في الموصلات زي اغلبنا...

الحمدلله انك استفدتي... هههههههههه....

زيارتك اسعدتني...
تحياتي..

سمع هوص (Abo 3li) يقول...

كيكى عوووووو

لااااااااااااا... سواقين ايه ال هخاف منهم... انا كينج كونج... ههههههههه....

فين امضائك الشهير "عووووووو"... شكل الفيس تووك غيرك فعلا....

وعوووووووووووووووو

فراشة يقول...

ليه كدا يا ابني بتحرضنا ع الشر افرض بقى قلت اجرب وداستني عربيه بجد هيبقى ذنبي ف رقبتك :)

دا ان بعدي الشارع ف خمس دقايق وف الآخر بجري وانا بعدي
ومعندناش رصيف الناس عاملينه جزء من المحلات فبضطر امشى ع الارض وبفرح جدا لما بلاقي رصيف فاضي

ولما مرة اتجرأت وقلت بلطف لو سمحت هنزل هنا السواق بصلي خفت منه بصراحه فقلت خلاص المشي رياضه

بس شكلك مضايق م المواقف البارده والتنحه والسخيفه قوي فقلت تجربها ولا ايه ..

الشـوكة الــنـاعـمـة يقول...

فى حد كده والله العظيم نا لو حد عمل معايا كده ها كسره خالص واعلمه درس جديد اسمه الفتنونه
ايه ده انا اتشليت مش اتفرست
ده مش برود ولا تناحه لا ده اختراع جديد
قال يمشى لى جنب الرصيف قال
دى بلوه
نرفزتنى خااااااااالص
يالهوى
!!!!!!!!!
وتحياتى

الشـوكة الــنـاعـمـة يقول...

بعد ماتمالكت اعصابى
البوست والله هايل بس حرام عليك هو احنا ناقصين حرق دم
خصوصا انى اكتر حد بيحصل له كده
كاااااان الناس مستضعفنى
فا تلاقينى معقده من امواضيع دى
وياما العربيات خبطتنى لحد ماجات لى حاله نفسيه من صوت الكلاكسات مع انى بمشى ع الرصيف والله
بالله عليك يابو على بلاش تعلمهم التناحه
دومت بخير
تحياتى

سمع هوص (Abo 3li) يقول...

فراشة

خلاص بلاش انتي تعملي كده... خوفا عليكي... ههههههه...

اجمدي شوية مع السواقين... دول صنف يخاف مختشيش....

منوراني يامون مون...

سمع هوص (Abo 3li) يقول...

الشـوكة الــنـاعـمـة

وانتي سايباهم يخبطوكي ليه؟؟!!!
وحاضر هنظر في طلبك... وهحاول معلمهمش التناحة... هههههه...
منوراني ... تصبحي علي خير...

القمرالباكي يقول...

السلام عليكم ورحمه الله وبركاته

مساء الخير ياابو علي

عامل ايه

مع اني بتعامل ببرود مع الناس الي بتتنك فالمواصلات ومع العربيات
بس مش للدرجه دي مقدرش اكون كده ابدا
دروسك دي تودي في داهيه يابني
انت عايز تعمل فينا ايه طيب عرفنا انت نتيجه الحاجات دي معاك

شكرا لدروسك

Haytham Alsayes يقول...

هههههههههههههههه

لا نصايح في الجون ولازم نتبع النصايح دي عشان مسحصلش انفجار

تحياتي ويدوم التواصل

سمع هوص (Abo 3li) يقول...

القمرالباكي

لا انا مش بطبقها كلها بصراحة... مش معترف ب" طباخ السم" ... كفاية عليا الجانب النظري... هههههههههه...

منوراني..

سمع هوص (Abo 3li) يقول...

Haytham Alsayes

اهلا اهلا... البلوج نور يافندم....
طبعا لازم الواحد ينفس ... علشان ميفرقعش...

تحياتي..

Noha Saleh يقول...

على فكرة اى واحد بيعمل حاجة من الحاجات دى ممكن يكون مش واخد باله
انما لو حد عمل معاه حاجة من دى هياخد باله ويتكلم عن نفسه بمنتهى الفخر كأنه المثالى الوحيد اللى فى البلد
بس بوست حلو اوى بجد

سمع هوص (Abo 3li) يقول...

Noha Saleh

ده طبيعي محدش بيحس انه تنح.. ولا بيعترف بكده.. والغريب انه بيستغرب الناس التنحة... حتي لو اقل منه تناحة...

شكرا ليكي انتي علي زيارتك ال اتمني تتكرر ان شاء الله...

تحياتي..

غير معرف يقول...

بجد بجد ربنا يخلى الناس التنحة الى زيكو

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل