العزوبية ورمضان (من شقق العزوبية 3 او 4 مش فاكر)

الحياة كعازب وعايش لوحدك بتبقي زي الفل ومحتملة جدا لحد م رمضان يجييي....

كلنا واخدين اننا في رمضان بنتلم علي الفطار وعلي السحور... والعزايم بقي والحركات ال من دي...

وكمان واخدين ان الاكل في رمضان حاجة تانية...

لان من العادات المصرية القديمة ان الاسرة المصرية تفضل تحوش تحوش... وتستلف كمان قبل رمضان علشان "تسرف" -  بالسين -  كل ده في رمضان علي الاكل.... يعني الاكل في رمضان محمر ومشمر –نفسي اعرف ايه المشمر ده  - ومحاشي و.. و...و... و...

احنا بقي يامعشر العزاب العايشين بطولهم بنعاني في رمضان جدا....

ليه؟؟؟

اولا

 تخيل نفسك صحيت الصبح نزلت, اتمرمطت المرمطة اليومية الطبيعية ورجعت قبل المغرب بساعة مدروووخ من الحر.... مفرهد من الزحمة.... بتشحر من العطش.... هتموووووت وتنام...

اكيد طبعا مش هتسيب نفسك تموت.... طبعا هتنام...

المغرب يأذن.... تفتكر هتصحي – ده لو سمعته اصلا – مفتكرش.. هتفضل نايم لحد العشا... هتقوم تاكل بسرعة وتصلي ... اصلك هتقوم علي المغرب بالظبط ليه....  خليك نايم احسن... واصحي افطر برحتك بعدين... كده كده محدش مستنيك علي الفطار....

ولنفرض انك صحيت...

طبعا سيدتك مبتعرفش تطبخ ولو فكرت تدخل المطبخ بتتشنكل وبتتكفي علي وشك.... فأكيد برضه سيدتك وانت راجع جبت معاك أكل جاهز... او طلبته ديليجري (ديلفري يعني) – ربنا يكرم ال اخترعه – ونستنتج من هنا ان ميزة "المحمر والمشمر" وقعت خلاااااص.... حتي لو هتفطر كباب وكفتة... برضه اسمه اكل جاهز... مش مشمر خاالص...

وطبعا سيدتك هتاخد الاكل وتقعد لامؤخذة زي ال "تييييييييت" لوحدك تاكل.... وهنا بقي مربط الفرس....

ارخم احساس انك تلاقي نفسك بتفطر لوحدك في رمضان... هتحس انك مقطوع بكل معني الكلمة... حتي لو واخد علي العيشة لوحدك... واهلك مش بيوحشوك اوووي.... هيوحشوك ساعتها... وهتحس يعني ايه عيلة ولمة...

نيجي للسحور...

طبعا بتوع شيبسي قالو في الاعلان ان "الفول السوداني مش هيتبهدل تاني"... بس معانا كل انواع الفول بتتبهدل...

في رمضان واخدين علي طشت الفول - الاكلة الرسمية الاولي للسحور-  البيتحط قدامك انت واهلك...

طبعا لو لوحدك هتبقي مضطر تشتري وتاكل الفول سندوتشات – للاسف – قولي ليه؟؟

علشان لو جبت فول وحطيته في طبق هتبقي مضطر تغسل الطبق...

وعلشان تغسل الطبق .. يبقي لازم تدخل المطبخ....

وعلشان تدخل المطبخ يبقي هتتشنكل وتتكفي علي وشك زي مقولتلك فوووق...

فالسندوتشات بتكون حل ... علي الرغم من ان الفول في السندوتشات بيفتقد لكل انواع الحميمية والاصالة المصرية الفولية...

حاجة كمان بالنسبة للسحور.... هتكون مُجبر انك تتسحر الساعة 12 ولا 1 بالكتير.. حتي لو مش جعان ولا ليك نفس.... هتاكل بالاكره... علشان تلحق تنام علشان تصحي تتمرمط تاني يوم.. اصلك لو حبيت تتسحر متأخر مين هيصحيك؟؟ المنبه!!! لاااااا انســـــــــي.... المنبه اخره يصحيك علشان تلحق المرمطة بدري... لكن لو ضرب علشان تصحي تاكل... ساعتها هتعمل نفسك مش سامعه...

طبعا انا اختصرت رمضان من جانب واحد ... ال هوا الاكل...

فيه جوانب تانية اكتر... متكلمتش فيها... ومش هعرف اتكلم فيها...

علشان كده الاجازات الاسبوعية – الويك ايند يعني – بتبقي عيد لينا.... لانك ممكن تروح تقعد مع اهلك يوم ولا اتنين ... ولو فكرت تطنش ومتروحش, اولا هتبقي انت الخسران, ثانيا احتمال اهلك يأجرو قاتل محترف يجي ويخلص عليك علشان غايب عنهم طووول رمضان....

بس خلاص..

في النهاية انا بعتزر لكل الناس ال كانت عايزاني اجي الفطار الجماعي بتاع المدونين... بس للاسف انه كان يوم سبت... وانا كنت عايز اقضي الاجازة – الويك ايند... اتعلمو انجليزي بقي – مع اهلي خارج نطاق القاهرة الكبري...

بجد كان نفسي ابقي معاكم وكان نفسي اقابل كل الناس الراحوو الفطار ... كان نفسي اقابل الناس الشفتهم وقبلتهم قبل كده تاني... وكان نفسي اشوف الناس لسه محصليش شرف اني اشوفهم... كان نفسي اقابل منونة وبنت عمي واندا.... وباقي المدونين ال ربنا هيجزيهم خير علي الخير البيعملووه...

بس الحمدلله برضه.... وتتعوض في خير تاني ان شاء الله....

تقريبا...

اولا كل سنة وانتو طيبين...
وحشني جدا جدا جدا...
بقالي كتيييييييييييير اوي مكتبتش هنا .. ولا علقت عندكم...
اختفيت فترة مش قليلة...
انا مش عارف انا اختفيتها ليه!!
استنو اجرب اقول زي مالناس بتقول: "كنت برتب اوراقي واولياتي"...
لالالالا ...
متنفعش... منا مش عارف هي ايه اوراقي اصلا...
طيب نجرب حاجة تانية: "كنت في فترة اعادة حسابات وازالة شك"...
لا برضوو حسابات ايه ... مش ناقصة ارقام واصفار ووجع دماغ....
أأممممممممممممممممم...
طيب نجرب: "كنت في فترة نقاهة فكرية وخلوة غير شرعية مع نفسي"...
لااااااااااااا... بذمتي انا مفاهم يعني ايه...


بصو بصو بجد... انا مش عارف انا اختفيت ليه...
يمكن كنت محتاج نوع من انواع التغيير...
يمكن...
يمكن نوع من انواع الهروب من حاجة انا مش عارفها... 
يمكن برضووو....


بس ماعلينا....


المهم .. انا عايز اشكر كل الناس السألت عليا وقلقو عليا...
وبعتزر عن اني مكنتش برد علي التعليقات ولا الرسايل علي الفيس بووك بتاع المدونة...
وبشكر كل الناس السألو وأطمنو عليا علي الاكونت الشخصي علي الفيس... او علي التليفون...
بجد شكرا...


وكل سنة وانتو كلكم بخير وصحة وسعادة..
رمضان كريم...


كان معكم من ارض الوطن ابوعلي...

جواز بالعافية.... يــــــــــــــــاريت....

قريت مقال ل عمر طاهر... بصراحة انا مش عارف اعلق عليه... زي ما الكاتب نفسه معرفش يعلق عليه....
ياريت تقروووه وقولولي رأيكم ايه:




الزواج على الطريقة التركية:

سألت الحاج عفيفي عن ورق أبيض فارغ لأكتب مقال اليوم، ولأن (الحاجة بتنادي علي صاحبها) أخرج لي الحاج عفيفي الورق ومعه المقال، كان بين أوراقه صورة من نصوص القانون في الدولة العثمانية في بداية العشرينيات «صدر تحديدًا في أكتوبر 1922» كنت متأكدًا أنني المقصود بهذه الهدية لأنني أولاً لست معتادًا دائمًا علي الكتابة علي الورق، وثانيًا لأن الحاج عفيفي فشل في أن يتذكر الظرف الذي قاد نسخة هذا القانون إلي حقيبته، وثالثًا لأن النسخة لم تكن كاملة، كان الموجود منها الجزء الخاص بتنظيم مسألة الزواج فقط.

إليك نصوص القانون الذي احترت في تقييمه بشكل مطلق، إعجاب تام أو رفض نهائي، لكنني في النهاية كنت معجبًا به لأنني رأيت فيه رغبة جادة في تنظيم المجتمع وحمايته و...و... ماتيجوا نشوف.

1- تبدأ مدة الزواج الاختياري من سن 18 وتنتهي في سن 25 ومن لم يتزوج في الـ25 يجبر علي الزواج.

2- إذا امتنع الشخص عن الزواج بعد هذه السن بحجة أنه مريض يكشف عليه، إذا كان مرضه قابلا للشفاء يؤجل إجباره إلي أن يبرأ، وإن كان المرض غير قابل للشفاء يمنع من الزواج.

3- إذا امتنع الشخص عن الزواج بعد الـ25 بلا عذر شرعي يؤخذ منه بالقوة ربع دخله سواء كان ربع ملكه أو ربح تجارته أو أجرة صناعته، ويوضع في البنك الزراعي ليصرف منه علي من يريد الزواج من الفقراء إكرامًا لهم.

4- كل من لم يتزوج بعد الـ25 لا يقبل بوظيفة مطلقًا في مصالح الحكومة ولا ينتخب في هيئة من الهيئات ولا يعهد إليه بمنصب أو أمر من الأمور وإذا كان موظفا يتم إعفاؤه.

5- كل من تجاوز الـ50 ويكون متزوجًا بامرأة واحدة وفي استطاعته ماديًا وصحيًا أن يتزوج بأخري يتم تكليفه بذلك ليكون شريكًا في سد حاجة من الحاجات الاجتماعية فإذا اعتذر بأسباب معقولة يكلف بمساعدة أولاد الفقراء والأيتام من واحد إلي ثلاثة حسب استطاعته.

6- من يتزوج في سن الـ18-25 وكان فقيرًا لا يملك شيئًا يقطع له من أرض الحكومة من 150 إلي 300 دونم مجانًا (الدونم 900متر) من أقرب مكان له.

7- وإذا كان من أرباب المصانع أو المتاجر يعطي له رأس مال قرضًا 100جنيه عثمانلي يسدد علي ثلاث سنوات.

8- من يتزوج قبل الـ25 وليس لديه أخ راشد يخدم أبويه يعفي من التجنيد، وكذلك البنت إذا تزوجت وليس لها أخ راشد يخدم أبويها يعفي زوجها من التجنيد.

9- كل شخص تزوج قبل الـ25 ورزق بثلاثة أطفال يتم تعليمهم مجانًا في مدارس الحكومة الليلية، وإذا كانوا أكثر يتم تعليم ثلاثة مجانًا ويصرف لكل واحد من الباقين عشرة جنيهات من الأموال العمومية إلي أن يصبح عمره 13 عامًا .. وإذا كانت امرأة لديها 4 ذكور فصاعدًا تمنح إعانة قدرها 20 جنيهًا.

10- كل طالب يشتغل بطلب العلم في الداخل أو الخارج يؤجل جبره علي الزواج إلي أن يتم دراسته.

11- من يضطر إلي السفر والإقامة في الخارج لبضع سنين لأي سبب وجب عليه اصطحاب زوجته أو تقديم عذر مانع من أخذ زوجته معه، وإن كان قادرًا علي الزواج في البلد الآخر يجبر عليه، ثم يتوجب عليه بعد العودة أن يجمع زوجتيه في مكان واحد.

هذا ملخص بنود القانون الذي أود أن أعرف رأيك فيه يا صديقي، هل تعتقد أنه صالح للتطبيق في عصرنا هذا؟

إنه قانون بلا شك يضمن للمجتمع قوامًا سليمًا متماسك خاليًا من العنوسة والتحرش الجنسي والزواج العرفي والعلاقات غير السليمة، ويمنحه قدرًا من الاستقرار النفسي ويضع الشاب علي أول طريق الحياة في الوقت المناسب فلا يضطر لأن يبدأ حياته السليمة بعد الخامسة والثلاثين، إنه أيضًا قانون به مساحة للتكافل الاجتماعي، يعاقب المقصر باقتطاع جزء من دخله لصالح المحتاجين، إنه أيضًا قانون يحترم العلم وطالبه هو الشخص الوحيد المستثني من الإجبار إلي أن ينهي تعليمه. ربما تري أنه قانون سيؤدي إلي زيادة عدد السكان، وهذا موضوع محل نقاش لأن المشكلة ليست في زيادة السكان ولكن المشكلة في إدارة النظام لهذه الزيادة وحسن استفادته منها وعندك الصين نموذج.

لكن أين حرية الناس؟ أين حريتك إذا اقتنعت بأنك شخص لا يصلح للزواج لأسباب غير مقنعة للحكومة؟، أين احترامك لفكرة أن الزواج قدر مكتوب لا يصلح معه الغصب أو الإجبار؟، أين ضماناتك حتي لا يتحول الموضوع إلي بيزنس تكسب منه قطعة أرض أو تمويلاً لمشروعك التجاري؟، وهل يستحق الإضراب عن الزواج أو تأجيله كل هذا الكم من العقوبات التي تكاد تصبح نفيًا داخل وطنك؟

حيرني القانون لكن حماس الحاج عفيفي له كان بلا حدود، سألته عن السبب فقال: كفاية إن القانون بيدلع الرجل بعد الخمسين ويمنحه الحق في الزواج مرة أخري، قلت له: أهي النقطة دي تحديدًا واقفة في زوري، فقال لي إشمعني فقلت له: لأن الدلع من وجهة نظري هو أن يحصل الرجل بعد الخمسين علي الحق في الطلاق.

منقول من جريدة الدستور....

ايه رأيكم ؟؟؟؟ .... بصراحة انا كان نفسي اكوووون في الزمن ده... كان زماني فاضلي سنة ونص ويعقبوني!!!!!! ده ايه الدلع ده ياخوااااتي.... جواز بالعافية... يااااااااااااريت... بدل عدمه ال بالعافية...

تاج من Silver Eyes.....

عندي تاج من Silver Eyes  صاحبة مدونة wanna touch the moon....
سريعا ندخل علي التاج:

انت مين بقى ؟

محسوبك ابوعلي

  
عندك كام سنة؟

هلعب في ال 24

هل انت متزوج ؟
ياريت

دراستك ايه؟
كنت كلية سياحة.. تقريبا 

كم طولك وما لون بشرتك؟
ده كشف هيئة ده ولا ايه!!! بس عموما 180 باين ولوني ازرق...

هل تمارس عملا بشهادتك او عمل حر وما هو؟
ولا بشهدتي ولا عمل حر....  بشتغل بالتعلمته بعد الجامعة...
ماذا تفعل بوقت فراغك؟
فراغ....  لو موجود ... يبقي لازم انام... لاني مبنمش تقريبا
هل لديك هوايات وهل تمارسها؟
كان عندي... وكنت بمرسها.. حاليا مليش نفس

هل تشعر برضا ربنا عنك؟
الحمدلله... 
 
عندما تكون فى موقف اتخاذ القرار..تخالف الجماعه.. ام تشرك معك الاخرين؟
بكون دكتاتور مقنع بالديموقراطية... بناقش الاخرين في قراري... وبهدم  اعترضاتهم وبستغل نقط الضعف فيها... بكسب تأيدهم بالعافية... نيهاهاهانيهاهاها...
ماهو الشىء الذى فعلته وندمت عليه طول عمرك؟

مبندمش... الحمدلله

هل تصارح غيرك بالحقيقة ام تقول له ما يحب سماعه؟
مع الناس ال بحبهم .... بكون صادم ساعات كتير,,,, لاني بكون صريح لدرجة مخيفة.... مع الباقي.... حسب الموقف والشخص... 

متى يقسو قلبك؟
لما احس بالظلم.

من هو اول من قلت له احبك ؟

راندا..... وانا في كي جي تو... هههههههههه...

هل يمكن ان تحب احد من المدونين؟
ولا غير المدونين اصلا...

ماذا تعنى لك المرأة والرجل؟
المرأة .. مجنونة بنت مجانين

الرجل .. ابو المجنونة ... وللاسف جوزها...

فى زمن البحث عن المادة ماذا تبحث انت؟
بدور علي دماااااااااااااااغي... وسلامتك يادماغي... ههههههههههه...

متى تعرف انك تحب؟
لما انساها...

الشخصية التى اثرت بحياتك؟

هتلر

هل يوجد من تراه سعيدا فى الدنيا ولماذا؟
كل الناس ال راضية بقضاء الله.... وفي نفس الوقت بيطورو حياتهم بنفسهم... كلهم سعداء.... عقبالنا...

ماهى درجة صراحتك؟

ساعات بكون غبي في صرحتي...

ماهى المواقف التى يمكن ان تكذب فيها؟
مفيش حاجة تستاهل اني اكدب علشانها...

هل يتغير الحب بعد الزواج؟

اكيد

فيما تفكر الان ؟

بفكر فاضل كام سؤال....

لو لم تعش بمدينتك ..فأى مدينة تفضل ان تعيش بها؟

الاسكندرية

من اول من يأتى ببالك لتحكى له اسرارك؟
علي حسب نوع السر...

من هو الد اعدائك ؟

عقلي..

من هو صديقك؟
برضه عقلي....

ماذا تكره فى الحياة؟
االعند والاصرار علي الخطأ والدفاع عنه...

ماذا تحب؟
وبحب الناس الرايقة .. البتضحك علي طووول...

كيف تواجه ما يضايقك وكيف تتصرف فى المفاجأت ؟

بطلع اتسنكح علي النيل لوحدي...

في المفاجأت مش بتخض... عادي يعني...

شكرا يا Silver Eyes

علي التاج الظريف ده... ومعلش اني اتأخرت فيه....

التجربة اليونانية

خبر من اليونان ولا تعليق:

اثينا: اعلنت الشرطة اليونانية مقتل مساعد وزير الأمن العام واصابة ضابط اخر بجروح بليغة في انفجار قنبلة بمقر وزارة الامن العام في العاصمة اثينا.


وافادت الشرطة بان القنبلة كانت عبارة عن طرد مفخخ انفجر في الطابق السابع الذي يضم مكتب مساعد وزير الامن العام ميخاليس خريسويديس وتسبب في اضرار مادية هائلة.
واشارت تقارير الى ان الوزير كان داخل المبنى وقت الانفجار لكن لم يصب باذى.


وقالت الشرطة ان الضابط وهو مساعد مقرب من الوزير فتح الظرف المشبوه الذي كان يحوي القنبلة.


وتسبب الانفجار في تحطيم النوافذ الزجاجية بمبنى الوزارة الواقعة بالقرب من وسط اثينا وسمع دوي الانفجار على بعد عدة كيلومترات.


وشهدت اليونان سلسلة من التفجيرات التي تشنها مجموعات يسارية مسلحة منذ وقوع اسوا اعمال شغب في البلاد عقب مقتل شاب صغير على يد الشرطة عام 2008 .

هذا الاعلان مدفوع الأجر

هذا الاعلان مدفوع الأجر


لظروف شخصية لولبية ملوخية قامت صيدلانية طالعة نازلة الشهيرة بدكتورة علا بالعزال من مدونتها صيدلانية طالعة نازلة الي بيتها الجديد حالة ملل
ونرجو السادة الزائرين عدم مسح المدونة القديمة ....  يمكن ترجع في كلامها...
ونرجو ايضا اضافة المدونة الجديدة.... ينوبكم ثواب...
طلب اخير.... نظرا لأن العزال كان بسبب بعض الشخصيات الغير محببة البتدخل مخصوص وبس عندها في المدونة القديمة علشان تغلس عليها...
ف محدش يدخل عندها في بلوج "صيدلانية طالعة نازلة" ويقول مبروووك البلوج الجديد والحركات دي... علشان الشخصيات المزكورة متوصلش للبلوج الجديد...
وشكرا لحسن تعاونكم معاً....
_____________________________


انا بقي مكسوف جدا منكم كلكم لأني غايب بقالي كتيير... عن التعليق...
وكمان مش متابع بشكل كامل ليكم... 
ادعولي...

ودعاؤكم علينا لا يُسمع...

"بسم إله السماء الواجب حقه، الذي ملكنا أرضه، وسلّطنا على خلقه..الذي يعلم به الملك المظفر الذي هو من جنس "المماليك"..صاحب مصر وأعمالها، وسائر أمرائها وجندها وكتابها وعمالها، وباديها وحاضرها، وأكابرها وأصاغرها..أنّا جند الله في أرضه، خلقنا من سخطه، وسلّطنا على من حل به غيظه..فلكم بجميع الأمصار معتبر، وعن عزمنا مزدجر..فاتعظوا بغيركم، وسلّموا إلينا أمركم..قبل أن ينكشف الغطاء، ويعود عليكم الخطأ..فنحن ما نرحم من بكى، ولا نرق لمن اشتكى..فتحنا البلاد، وطهرنا الأرض من الفساد..فعليكم بالهرب، وعلينا بالطلب.. فأي أرض تأويكم؟ وأي بلاد تحميكم؟وأي ذلك ترى؟ ولنا الماء والثرى؟ فما لكم من سيوفنا خلاص، ولا من أيدينا مناص فخيولنا سوابق، وسيوفنا صواعق، ورماحنا خوارق، وسهامنا لواحق، وقلوبنا كالجبال، وعديدنا كالرمال. فالحصون لدينا لا تمنع، والجيوش لقتالنا لا تنفع، ودعاؤكم علينا لا يسمع، لأنكم أكلتم الحرام، وتعاظمتم عن رد السلام، وخنتم الأيمان، وفشا فيكم العقوق والعصيان..فأبشروا بالمذلة والهوان (فاليوم تجزون عذاب الهون بما كنتم تعملون) (وسيعلم الذين ظلموا أي منقلب ينقلبون)..وقد ثبت أن نحن الكفرة وأنتم الفجرة..وقد سلطنا عليكم من بيده الأمور المدبرة، والأحكام المقدرة..فكثيركم عندنا قليل، وعزيزكم لدينا ذليل، وبغير المذلة ما لملوككم عينا من سبيل..فلا تطيلوا الخطاب، وأسرعوا رد الجواب..قبل أن تضرم الحرب نارها، وتوري شرارها.. فلا تجدون منا جاهاً ولا عزاً، ولا كتاباً ولا حرزاً، إذ أزتكم رماحنا أزاً..وتدهون منا بأعظم داهية، وتصبح بلادكم منكم خالية، وعلى عروشها خاوية..فقد أنصفناكم، إذ أرسلنا إليكم، ومننا برسلنا عليكم"


دي كانت رسالة التتار لقطز سنة 1260.... بتهيألي التاريخ بيعيد نفسه... بس بشكل مختلف....
تعالو كده نتخيل اليهود لو حبو يبعتولنا رسالة تهديد لو الحاكم بأمره حب يلعب بديله ولا حاجة...
بتهيألي هيبعتووو نفس الكلام... اينعم هيبعتوهلنا علي الفيسبوووك...
وساعتها مش هنعلق روووس الرسل في ميدان التحرير.... واخرنا هنعمل " ريبورت " علي الفيس...

زمان كان فيه حاكم قوووي... حاكم بجد... رد عليهم... 
دلوقتي معندناش اليرد بالنيابة عننا... معندناش اليخلينا نراجع نفسنا وافعلنا...
معندناش روووح علشان نتحكم في مصيرنا....
احنا العملنا كده في نفسنا... اقروو الرسالة تاني وركزو في الحاجات ال لونتها احمر... هتلاقوها حاولينا... وممكن تكون فعلا سبب في ال احنا فيه... لان ربنا مش هيغير ما بقوم حتي يغيرو ما بأنفسهم... 
بس ده مش هيستمر... علي الاقل انا متمناش انه يستمر...
اتمني نغير نفسنا... نغير تفكيرنا ... نغير حياتنا...
ونبقي عارفين اننا نقدر نغير الواقع - علي رأي احمد حلمي - .... نقدر نغير النظام....
نغير النظام...


------------------------------------
اسف اني مكنتش متابع معظم المدونات ال متعود اتبعها... بس كان عندي شوية ظرووف كده ملخبطة الدنيا معايا...