واهو فلانتين وهيعدي...(خمسة نفسنة)

يادي النيلة

عيد حب ايه بس وبتاع ايه...

هيا ناقصة غم...

لازم يعني عيد تقليب المواجع ده كل سنة؟؟

طب ميخلووه سنة اه وسنة لأ...

......................

امبارح كان كتب كتاب واحد من اصحابي.... (اسمع زغرودة)...

وده تاني واحد يعملها من الشلة الفائدة بتاعتي..

طبعا كعادتنا في الافراح والمناسبات ... يظهر التساؤل الابدي مبينا وبين بعض...

"طب واحنا يامواكيس.... محدش ناوي فيكم يعملها؟؟؟......"..

"بذمتكم مش نفسك بتتفتح لما تشوفو عريس وعروسة كده قدامكم؟؟"... (شوية نفسنة).....
ونفضل سرحانين كده شوية لحد مانفوق.. علي الواقع المظلم... اه وربنا المظلم....

فمعظمنا- انا واصحابي يعني- حاجة من تلاتة.... النوع الاول: ظروفه النفسية متسمحلوش بالارتباط ومن ثم الجواز- ودي غالبا بتكون عقدة بسبب قصة حب فاشلة- ودول قليلين نسبيا.... والنوع التاني: ظروفه المادية هيا العائق الابدي بالنسبة ليه...ودول بقي اغلبية.... اما النوع التالت: فبتبقي ظروفه النفسية والمادية في نفس ذات الوقت –اانا شخصيا من النوع ده- بتخلي الارتباط (الجد) صعب الي ابعد الحدووووووووووووود......

علشان كده انا مبحبش الفلنتين.... لأنه بيفكرني بفيلم هنيدي وهوا بيقول ل احمد صيام هابي نيو يير... فالتاني بيقولو اربعين سنة ومفيش ست... مع اختلاف نوع العيد...

انا حاسس ان كلامي ملهوش علاقة ببعضه... بس مش مهم...

المهم... اني في الفلنتين... مش هقول كل سنة وانت طيب لحد....

مش هعمل زي دعوات (السنجلز) ال زي حالاتي .. البيقولو ... ممكن نقول هابي فلنتين لاصحابنا واقاربنا... والكلام ده....

لا....

انا هقول هابي فلنتين للانسان الوحيد اليستاهل اني اقولها له....

العبدلله بين قوسين.... أنا.... (حبة بارانويا بقي)....

ايوة .. هقف في المرايا وهقول.... هابي فلنتين يا احلي أنا في الدنيا...

فهرد علي نفسي وهقول... وانا طيب... واحتمال اخد نفسي بالحضن كمان...

تصدقو بقي... انا بفكر اجيب لنفسي هدية...

بس تفتكرو.. أنا هفتكر اجيبلي هدية انا كمان... ولا هنساني....

محدش يتصل بالخانكة.... انا متجننتش اوي كده...

اهو فلانتين وهيعدي.....

هو وهي ... (مكالمات حصلت وبتحصل وهتحصل)

هو : وحشتيني

هي : وانت كمان وحشتني

هو : خلصتي مزاكرة ولا لسه

هي : تؤتؤ.. مش عارفة اذاكر اصلا..

هو (بأنزعاج): ليييه؟؟ مالك؟؟؟

هي (بدلع) : اصلي بفكر...

هو : المفروض تركزي سيدتك... بتفكري في ايه طيب؟؟

هي : بفكر في واحد..

هو (بفرحة الواثق) : مين يتري؟؟

هي : انتااا..

هو : بحبك

هي (بدلع) : انتا مش هتزاكر انت كمان بقي ولا ايه...

هو : ماشي ياعقلي .. يلا روحي كملي مزاكرة... مش عاوزين نضيع وقت... خلي اخر سنة تعدي علي خير..

هي : هشوفك بكرة..

هو : ان شاء الله.. سلام ياروحي..

....................................................

هي : هاااه .. احكيلي عملت ايه؟

هو : طيب سلمي عليا الاول؟؟

هي : حبيبي طمني بقي قولي عملت ايه؟؟

هو : الحمدلله... هبتدي شغل معاهم من الاسبوع الجاي...

هي (بفرحة) : مبروووووووووووك ياحبيبي... الف مبروك...

هو : مبروك علينا احنا الاتنين... اخيرا كل الظروف بقت معانا..

هي (بسرحان) : اه اخيرا...

هو : كده الخطوة الجاية انتي..

هي : انا؟؟

هو : اه يحبيبتي اقصد ... اجي بقي واتقدملك رسمي...

هي (بكسوف) : بقلنا اربع سنين مستنين اليوم ده...

هو : طيب تحبي انتي التحدديلي معاد عندك في البيت... ولا اكلم انا مامتك و ...

هي (تقاطعه) : لا انا هقولهم ..

هو : وليه ما مامتك عارفاني كويس... وعادي ممكن اكلمها...

هي : حبيبي متحرمنيش من اللحظة دي... لحظة اني اعلن انتصار حبنا.. لما هقولهم انك عاوز تيجي تتقدملي...

هو : خلاص قوليلهم... وبلغيني بالميعاد...

هي : اوكي... يلا بقي علشان هدخل اساعد ماما... سلام

هو : سلام ياقلبي..

........................................

هو : اخيرااا .. رديتي... ازيك؟؟ وحشاني ... مالك يبنتي فيه ايه...

هي (بصوت خافت) : مفيش عادي... انا كويسة...

هو : ممممممممم.. قوليلي هاجي امتي عندكم البيت؟؟
هي : مش هينفع دلوقتي..

هو (بخضة) : ليه؟؟؟؟؟؟؟؟

هي : صدقني مش هينفع دلوقتي؟؟

هو : مالك فيه ايه؟؟ الاول مترديش عليا بقالك اسبوع .. ودلوقتي بتق...

هي (تقاطعه) : انا فاتحتي يوم الجمعة الجاية..

هو (بدهشة) : فاتحتك؟؟؟ مش فاهم ؟؟ ازاي ؟؟ وعلي مين؟؟

هي : واحد معرفة بابا... انسان كويس... و..

هو (صارخا) : انتي بتقولي ايه؟؟؟ وانتي موافقة؟؟

هي : أه

هو : وانا؟؟؟ ايه الحصل؟؟؟ وحبنا؟؟؟

هي : ممكن ننسي ال كان بينا... ونخلينا اصحاب و ..

هو (بجنون) : اصحاب؟؟؟؟ انا وانتي اصحابي؟؟؟ فهميني؟؟ انا مش مستوعب لييييييييييييييه؟؟

هي : طيب ممكن متتصلش بيا هنا تاني... عموما انا هغير الرقم... سلام دلوقتي علشان ماما بتندهلي...

هو : استني هنا

******************************

هو : صباح الخير

هي 2 : صباح النور ياحبيبي.. عامل ايه

هو : كويس..

هي2 : متصلتش بيا امبارح لما زي مقلتي قلقتني عليك ؟؟

هو : معلش نسيت...

هي2 : ولا يهمك ياقلبي .. بس متعملهاش تاني..

هو : حاضر

هي2 : مالك ياروحي صوتك متغير؟؟

هو : انا بقالي فترة عاوز اكلمك في موضوع..

هي2 : قول... انا سمعاك..

هو : احنا مش هينفع نكمل سوا..

هي2 : ايه؟؟؟ ليه؟؟ انا عملت حاجة زعلتك؟؟؟

هو : لا مش انتي... صدقيني انت بني ادمة جميلة جدا بس...

هي2 (بصوت مخنوق) : بس ايه؟؟

هو : انا حولت كتير اني احبك زي منتي بتحبيني.. وساعات كتير كنت بقنع نفسي بده... بس مش قادر خلاص.. مش عاوز اظلمك...

هي2 (بعياط) : بس انا بحبك... وممكن يحصلي حاجة منغير..

هو : صدقيني ده لمصلحتك... انا منفعكيش... بكرة تلاقي الانسان الهيحبك بجد... سلام

**********************************

هي3 : حبيبي... ازيك؟؟

هو : وحشتيني ...

هي3 : انت اكتر...

هو : احكيلي بقي عملتي ايه امبارح بعد موصلتك؟؟

هي3 : امبارح ده كان احلي يوم في حياتي... بعد موصلتني حكيت ل ماما عنك...

هو (بخضة) : ايه؟؟؟ ماما؟؟ حكيتيلها ايه بالظبط؟؟

هي3 : حكتلها عننا.... وانك ناوي تيجي وتتقدملي..

هو (بغضب) : وانا امتي قلت الكلام ده؟؟؟

هي3 : احنا بقلنا قد ايه بنتقابل .. بقلنا قد ايه بنحب بعض؟!!!

هو : مش معني كده انك تروحي تقولي لمامتك حاجة زي كده من نفسك كده...

هي3 : انت مش بتحبني... يبقي اكيد هنتجوز ...

هو : جواز ... جواز لأ.. دلوقتي

هي3 (بغضب) : يبقي كلام اصحابي صح... وانك مبتحبنيش.. وبتتسلي بيا..

هو : صدقي ال انتي عاوزاها انتي حرة... بصي بقي بصراحة انا مش مستعد اتجوز حاليا وخصوصا اني اصلا مش بحبك للدرجة دي....

هي3 : للدرجة دي.. هوا فيه درجات للحب؟؟

هو : اه طبعا... في الحب البجد... والحب بتاعنا ده خروجات وفسح وكلام حلو وخلاص...

هي3 (بعياط) : مكنتش متخيلة انك كده...

هو : انا موعدتكيش بحاجة... فياريت منغير تجريح... خلينا ننهي علاقتنا دي بشكل شيك.. منغير غلط في بعض..

*****************************

هو : ايوة مين؟؟

هي4 و هي5 و هي6 : ايه ده... مش عارف مين؟؟

هو : معلش اصلي مبصتش في الرقم رديت علي طول ازيك؟؟

هي4 و هي5 و هي6 : الحمدلله مبسوطة جدا.. وانت......

هو : انا كويس..

هي4 و هي5 و هي6 : انا اتبسط اوي امبارح.... مكنتش اعرف انك لذيذ اوي كده...

هو : كتير بيقوولو كده..

هي4 و هي5 و هي6 : ده غرور..

هو : لا والله عادي..

هي4 و هي5 و هي6 : وانت؟؟؟ متبسطش امبارح واحنا مع بعض؟؟

هو : عادي...

هي4 و هي5 و هي6 (بدهشة): عادي؟؟ طيب هنتقابل امتي تاني... علشان نشوف موضوع ال عادي ده؟؟

هو : مش هنتقابل تاني..

هي4 و هي5 و هي6 : ليه؟؟

هو : كفاية عليكي كده... خرجت معاكي مرتين تلاتة... وخلاص ... زهقت...

هي4 و هي5 و هي6 : انت مش محترم و......

هو (بيقاطعها) : هشششششششششششششششش انا هقفل السكة اصلا..

**********************************

هو : ايه يبت متصلة بدري كده ليه...

هي7 (بميوعة) : وحشتني... ايه متوحشنيش؟؟

هو : وحشتك ايه يبت... منتي كنتي معايا لحد الفجر امبارح... انجزي عاوزة ايه.... انا لسه مصحيتش ومش فايقلك..

هي7 : اصلي نسيت الولاعة بتاعتي عندك.. شوفها كده علشان تبقي تخليهالي علي جنب بدل متضيع..

هو : انتي سيبتيها فين؟؟

هي7 : هتلاقيها عندك انا نسيتها تحت المخدة..

هو : اه اه اه ... لقيتها.... ثم انا مش قلت متتنيليش تشربي سجاير زفت تاني علي سريري ...

هي7 (بضحكة مش ولابد) : معلش اصلو سرير طاهر اوي..

هو : ماعلينا... محكتلكيش... ان امي بتدوري علي عروسة...

هي7 (باستعباط): منا اهو ...

هو : انتي ايه ياسفلة... وانتي بتاعة جواز برضو... ثم انا اصلا مش هتجوز ... جواز ايه وبتاع ايه بلا قرف... انتي هتيجيلي تاني امتي؟؟

هي7 : بعد بكرة ... واهلي مسافرين عند عمتي يومين... يعني ممكن بدل مسهر عندك .... انا ابات عندك في الشقة احسن....

هو : اشطة جدا....

***************************

هي7 : بتتصل ليه؟؟ عاوز ايه؟؟

هو2 : انتي لسه زعلانة مني؟؟

هي7 (بغضب مصتنع): اه طبعا... انت عاوز ايه بقي؟

هو2 : خلاص بقي حقك عليا... انا اسف..

هي7 : برضو زعلانة...

هو2 : انتي مكبرة الموضوع اوي... كل ده علشان مسكت ايدك؟؟؟

هي7 : الموضوع كبير بالنسبة ليا... انا بحبك .. متخلنيش اغير فكرتي عنك...

هو2 : خلاص ياحبيبتي انا اسف... مش هعمل كده تاني..

هي7 (بدلع) : خلاص سماح المرة دي.... انت مش ناوي بقي تيجي وتتقدملي زي مقولتلي؟؟

هو2 : حدديلي انتي معاد ... وانا هاجي .. علي طول... خلاص مش قادر ابعد عنك...

هي7 : السبت الجاي... هخلي بابا يستناك..

هو2 : اوك السبت الجاي .......................................................

خالد يوسف... لما تبقي.. فنان.. وزكي.. وسافل

انا اعترف ان خالد يوسف مخرج عنده مخ..

بيعرف يفكر..

وبيعرف يوصل الهوا عاوزوووو بطريقته...

من الاخر اعترف انه فنان...

بس

سافل...

مبيحترمش تقاليدنا.. ولا عادتنا... او علي الاقل بيوصل رسالته ديما بطريقة شاذة.. بالنسبة لينا كامصريين او عرب اوشرقيين او مسلمين....

تركيزه علي فكرة الشره الجنسي.. كتير بتخلي افلامه مثيرة للقرف...

فيلم كلمني شكرا... طبعا اول مشوفت اعلانته قررت ادخله... رغم اني بصراحة مبحبش الافلام العربي اوي...

المهم اني دخلت الفيلم ده بسبب كذا حاجة..

اولا: اني معترف ان خالد يوسف- بكل عيوبه- مخرج زكي و فنان...

ثانيا: اعلان الفيلم جرئ جدا (سافل)... وانا زي زاي اي شب مصري بحب السفالة... (احم احم)...

ثالثا: كنت مكتئب انا واصحابي ... ولقيناه فيلم كوميدي... قلنا ميضرش...

ال لفت نظري بقي في الفيلم ده حاجة تانية خااااااااااااااااااااااااااااااااااااااالص... غير بذاءة عمرو عبدالجليل... وغير قمصان نوم غادة عبدالرازق... ولا حتي الشيخ البايظ...

ال لفت انتباهي... ان الفيلم ده انا شايف انه صفقة...

ايوة صفقة بين خالد يوسف ... والرقابة المصرية (معلومة: الرقابة معترضتش علي اي مشهد او جملة او كلمة من احداث الفيلم)...

الصفقة ان الرقابة تعدي الفيلم بكل (الأباحة) الفيه..... قصاد رشوة قدمها خالد يوسف للدولة...

الرشوة كانت انه لأول مرة في افلامه يطلع كل رجال الشرطة في منتهي الرجولة والاخلاص والعطف علي الموااطنين والتفهم والحنان والتعاون والجمال والحلاوة..... واسمع سلام مصر هيا مامتي... ورقصني ياجدع.....

الاغرب انه طلع البوليس المصري كمان مظلومين... والناس هيا البتفتري عليهم!!!!!

وده كان غريب جدا ومريب جدا جدا جدا... من واحد زي خالد يوسف.. ديما بيطلع الشرطة وجهها القبيح (زي شخصية حاتم ففيلم هي فوضي.. ال اخرجه مع استاذه)...

تقريبا هيا دي الصفقة: اباحة وسفالة برحتك (علشان الفيلم يكسب فلوس) قصاد انك طلعت الشرطة ملايكة وكان شوية وهيطلعلهم ريش ويطيرو...

في النهاية.... الفيلم مش حلو اوي... ومش بيضحك اوي... البيضحك في الفيلم انه

اول مرة نشوف الاباحة بتاعت الشارع علي الشاشة بالمنظر ده.....

يا أم نيازي.... صحي نيازي... وقوليلوو ان انا حرامي...

ياناس, ياهووووو.... انا حرامي ياناس...

يا أم نيازي.... صاحي نيازي وقوليلوو ان انا حرامي...

ومش انا بس ال حرامي...

كل البيقري ال كلام ده دلوقتي سرق... وبيسرق ... وهيسرق..

اسف علي تطاولي...

بس اصل دي الحقيقة مهما حاولت ازوقها.. او اجملها...

طبعا الكلام البيدور في دماغك دلوقتي لو انت مؤدب... "اهو انت الحرامي ازاي يعني اكون بسرق يا اهبل انت؟؟"

ولو مؤدب برضو بس مش قوي...."تييييييييييييييييت.... حرامي ايه ياض يابن التيييييييييييييييييت"

هفهمك بس براحة عليا....

طبعا انت عارف يعني ايه "حقوق ملكية" ؟؟؟

طب بزمتك احنا بنعترف بيها هنا في مصر... ولا بنطبقها...

خد عندك..

ال operating system ال(غالبا هيكون ويندوز) سيادتك شغال عليه دلوقتي... شاريه بفلوسك... يعني ملكك؟؟؟ ....

ماسي يسيدي.... عارف انك ممكن تكون غني وشاري لاب توب جديد وجي مع اللاب اسطونة سيستم اصلية....

بلاش دي....

ال (office) ال بتستخدمه في الكتابة والجداول والبرزنتيشس (word, excel, powrpoint).... مش واخده من واحد صاحبك... ولا منزله من علي النت ببلاش؟؟؟

خد دي كمان....

الالعاب ال سيدتك بتلعبها علي الجهاز وكل البرامج ال بتستخدمها يوميا.... رحت مثلا واشتريتها من فيرجن؟؟؟ ولا نزلتها من النت وجبتلها كراك....

حاجة كمان...

الاغاني والافلام والصور.... اه والصور كمان..

اخر حاجة وكفاية كده دلوقتي.... ال كتب والمراجع والقصص والرويات ال عمال تحمل فيها ليل نهار... ملهاش صاحب تعب وكتبها؟؟؟

شفت ان انا وانت عمالين نسرق ليل نهار....

ليا واحد زميلي في الشغل ملتزم دينيا ومربي دقنه كمان... ديما انا وهوا نتخانق ونتجادل بالساعات في الموضوع ده...

هوا مقتنع تماما بأن تحميل الحاجات -القلتها فوق دي كلها- واستخدمها من الناحية الدينية مش حرام... ومن الناحية الاخلاقية مش غلط....

طبعا هوا طلعلي عشرين فتوي في الموضوع ده –ممكن تدورو عليهم بنفسكم- بس مفيش ولا فتوي منهم صريحة او محددة... لأن ديما البيسأل وبيطلب الفتوي دي بيصيغ السؤال بشكل وبطريقة تخلي عالم الدين- ال غالبا بيبقي مش فاهم الموضوع اصلا صح- يفتيلو الفتوي ال عاوز يسمعها...... بس طبعا معظم الفتوي حرمت استخدام الحاجات -ال مفروض نشتريها... بس بنجيبها ببلاش- حرمت استخدمها في التجارة بمعني منخدهاش طريقة للكسب...

وفتاوي تانية كانت طالعة من ناس فاهمة اكتر شوية- بس برضو مش اوي- ان كل التحميلات الغير شرعية دي حرام.... فيماعدا الكتب والمراجع والمواد التعليمية ... بس حطو شرط ان يكون الغرض من انك تحمل الكتاب ده هوا العلم ثم العلم ثم العلم... مش علشان تستخدم الكلام الهتقرا بطريقة ما انك تكسب فلوس....

طبعا كلنا بندور ليل نهار علي كتب تعليم مليون حاجة... حاجة من المليون دول بنستخدمها في شغلنا بطريقة مباشرة او غير مباشرة.....

المهم ان انا مش مقتنع بالكلام ده خااااااااااااااااااااااااااااااااااالص

لان الحاجة دي مش بتاعتي .... وانا اخدتها من ورا صاحبها...

مثال توضيحي:

صاحبي البحكيلكم عليه ده... بيشتغل ديزينر...

قلتله في مرة: لنفرض انك عملت ديزين ما لشركة ما ب الف جنيه....

شركة تانية شافت الديزين ده وعجبها.... راحو قايلنلك عاوزين واحد شبه تمام ... وشوية تغيرات بسيطة... رحت عملهولهم واخدت منهم الف جنيه برضو..... ده تمن شغلك وتعبك ومجهودك وابداعك... صح؟؟

رد: طبعا...

قلتله: لنفرض بقي ان شركة تالتة شافت الديزين عاجبها... راحو واخدينو منغير ميقولولك... ولا يدوك تمنه... ولا ياخدو موافقة منك... ساعتها هيبقو ضروك..

رد : طبعاااااا...

طبعا ساعتها اتلخبط في الكلام ومبقاش عارف يكمل جدال....

بتهيألي لو قيسنا الفكرة دي علي كل الحاجات ال بنجبها ببلاش دي...

هنلاقي واحد تعب واشتغل شهوووور وطلع عينه علشان يعملنا برنامج ولا يألفلنا كتاب....

واحنا بنيجي علي الجاهز وناخد الحاجة دي منغير مندفع تمنها ..حق العملها....

طبعا هتقولولي: انت بتعمل دعايا لميكروسوفت والشركات دي ولا ايه وعاوزنا نشتري كل الحاجات دي... علي اساس اننا علي تل فلوس؟؟

هرد رد يمكن يصدمكم وميخليكمش تيجو تقرو حاجة ليا تاني....

كل الكلام الفات ده كان مقدمة..... (صرييييييييييييييخ....... لأاااااااااااااااااااا ... مقدمة ايه دي كلها يامجنون يابن ال ..... واحد تاني هيروح قافل ومش مكمل)....

انا عارف اني طولت.... بس سامحوني....

والجاي اقل متقلقوش...

انا اصلا مبحترمش شركات زي ميكروسوفت او ادوبي وزيها كتير... لاسباب اخلاقية ونفسوية كتيرة مش وقتها دلوقتي....

فبالتالي اكيد كلامي الفات ده كله مش دعاية ليهم....

انا هدفي حاجة تانية خالص....

فيه حاجة اسمها (open source) –يريت تقرو عنها اكتر في ويكيبيديا- ببساطة دي حاجات شبه ال حاجات ال اتكلمنا عنها فوق بس فيها مميزات كتييييييييييير... اهمها انها ببلاش... ومتاحة للجميع..... يحملوها وينزلوها مليون مرة منغير فلوس ولا تأنيب ضمير....

والميزة كمان ان الحاجات دي اصلها موجود... يعني اليعرف يعدل فيها ... يعدل... العاوز يغير فيها ... برحتووو... دا اصحابها هيسعدوك كمان....

طبعا المنتجات التندرج تحت بند (open source) كتير... وكلها بدائل للمنتجات -ال حقوق الملكية بتعتها بتمنع استخدمها المجاني- وبدايل ساعات بتكون بكفاءة اعلي بكتير...

انا عارف ان الموضوع دمه تقيل وانا طولت... لكن والله مهم.. وانا اختصرته علي قد ماقدر...

مثال بسيط علي بدائل ال (open source) الموجودة ...

مثلا بديل الويندوز ... فيه خمسميت حاجة... اسهلهم واقربهم واظرفهم واقواهم(اقوي من الويندوووز بمرااااااااااااااحل) ..سيستم اسمه (ubuntu) وده بديل عملاق يضرب الويندووز بالجزمة القديمة....

مثلا بدل مجموعة ال (office) فيه حاجة اسمها ال (open office) ...

والبدايل كتيييير ... فيه موقع www.osalt.com هتلاقو عليه كل ال بتستخدمه حاليا والبديل بتاعه من ال (open source) ...

يعني لو الكلام ال فات ده اقتنعت ب خمسين في المية منه.... جرب تستغني واحدة واحدة عن عادتنا السيئة جدا دي- البنعملها واحنا مش حاسين ولا حاولنا نفكر فيها...

يعني ممكن نجرب البدايل المتاحة دي... واحدة واحدة كده...

لحد منستغي عن ابو فلوس خالص ان شاء الله....

اعتراف : علي فكرة انا بحاول اعمل كده ... بس برضه لسه مش بنسبة 100 % ... بحاول علي قد ما أقدر.. او لحد ما ضميري بينام بمعني اصح.....

فياريت نحاول نشجع بعض كلنا... ونجرب..