الثلاثاء، 9 مارس، 2010

الطريق للجواز...بيبدء بشقة


بقالي فترة مش صغيرة بدور علي شقة تمليك...
تقريبا كده بقالي سنة...
طبعا موصفات الشقة ال انا عاوزها... اختلفت كتير واتغيرت اكتر خلال سنة البحث دي...
بس بعد عناء قدرت ارتب اولوياتي... في موصفات الشقة...
وهيا علي الترتيب التالي:
اولا : السعر...
ثانيا: المكان (المنتكة ال هتبقي فيها الشقة)....
ثالثا: شكل العمارات وتشطيبتها..عرض الشارع وشكله....
واخيرا المساحة..

طبعا السعر هيبقي تقسيط... لأني مفلس... وطبعا قررت تقبل كل المساعدات الخارجية بصدر رحب... من السيد الوالد... ال كتر خيره وعدني ان موضوع الشقة ده هيكون اول واخر مرة يساعدني في حاجة.... وانا مش عاوز منه اكتر من كده بصراحة.....
المكان بقي وهوا المشكلة الكبري.... علشان انقي منطقة كويسة ... بسعر كويس... ده صعب جدا ....
ف كان الحل في المدن الجديدة.... وكانت مدينة الشيخ زايد الاختيار الامثل بالنسبة ليا... علشان اكتر من سبب..
اولا قريبة من الشغل... وفيها كومبوندات كتيييير كويسة... اسعرها غالية ... بس فيها اماكن شيك...
مدينة لسه جديدة والتلوث والزحمة مبهدلوهاش.... والدولة مهتمة بيها... وبتنقل فيها حاجات كتير مصالح وجامعة وكده....
والمكان وصلني للمساحة....
لقيت ان السعر الوحيد ال ممكن يناسبني ... في مكان كويس ... هيكون في اسكان الشباب ال تبع الشركات الخاصة... وده مش رخيص خالص علي فكرة....
بس المساحة بتكون صغيرة جدا وخصوصا لل واخدين ومتربين علي البراااااح...
مساحة شقق الشباب في المشاريع دي تقريبا 63 متر صافي.... يعني يدوب اوضتين وصالة... ومطبخ امريكاني....
وزي مقولتلكم المساحة عندي في اخر الاولويات...
بس فيه سؤال نط في دماغي وانا بزوور المواقع دي...
الشركات دي اخدت الاراضي دي تقريبا ببلاش... وبتبعها غالية جدا... رغم انها المفروض مدعومة من الدولة...
والاراضي دي في الصحرا... ليه الدولة مخلتش شقق الشباب اكبر من كده....
نط في دماغي سبب وجيه... ان ده مخطط من الحكومة لتنظيم النسل...
علشان الشب من دول لما يتجوز في شقة بالمساحة دي... عمره مهيفكر يخلف اكتر من اتنين... والا مش هيلاقي لهم مكان يعيشو فيه...
ثانيا مطول عمر الحكومة بخيلة علي الشباب... هتيجي في الشقق ال مبنية في الصحرا وهتبقي كريمة يعني؟؟!!

الحاجة التانية ال نرفزتني وضحكتني بجد...
ان فيه شركة من الشركات ال بتنفذ المشاريع دي عاملة نظام تقسيط يضحك...
القسط تقريبا 2000 جنيه في الشهر علي 4 سنين... بس مش ده ال يضحك..
ال يضحك ان من شروط الحصول علي شقة في المشاريع دي... ان المرتب لا يزيد عن 1700 جنيه... وده مكتوب في شروط التعاقد بتاع الشركة دي نفسها....
يعني المرتب اقل من 1700 ولازم يدفع 2000 قسط.... طب ازااااي؟؟؟
بالذمة مش حاجة تضحك...
ثم اليقدر يدفع 2000 جنيه قسط شقة بس... ازاي الدولة تديله دعم ؟؟؟ فيه ناس اكيد اولي بالدعم ده... 
بس بعد كده فهمت ان الدعم ده اصلا تقريبا 10000 جنيه وسعر الشقة ال 63 متر دي بيوصل 140000 .... يعني كده كده غالية اساسا... بدعم او منغير...
وهوا ده الاسكان المتطور ال ريسنا وعدنا بيه في البرنامج بتاعه......
ورغم كل ده... برضو شايفها احسن من غيرها.... يعني اكيد احسن من شقة مساحتها كبيرة في برج عشرين دور في فيصل مثلا... بس الابراج راكبة علي بعضها في شوارع ضيقة جدا... والابراج مبنية بطريقة عشوائية جدا...
لكن الميزة في المدن الجديدة التخطيط بتعها بيكون ظريف جدا....
لكن فيها عيب كمان... ان الاستلام بتاع الحاجات دي بيكون بعدها بسنتين علي الاقل.... ده غير عيب المواصلات... لكن زايد الطف من غيرها علشان المحور...
 بس خلاص...
ومازال البحث مستمرا..... ادعولي...

هناك 37 تعليقًا:

P A S H A يقول...

أبو علي يا غالي

مساء الفل يا ريس .. حلو الموضوع ده .. خلاص ندعيلك يا باشا ولا يهم معاليك :

إلهي ربنا يرزقك بشقة مؤدبة وعروسة سوبر لوكس . قول آميــــــــــن


:))))

تحياتي

سلام

سمع هوص (Abo 3li) يقول...

PASHA

معالي ال باشا...
موشششششكرين علي الدعوة ياكبـــير...
تسلم... بس العروسة تكون بحري دور تاني... والشقة بنت ناس كويسين...


نورتني ... تحياتي

Sarah Sobhi يقول...

D:D:D:
ربنا معاك يا ابو على

وعلى فكرة لو ركزت شوية هتلاقى ان الشرط منطقى جدا

اصل مدام المرتب 1700 لا اكثر تبقى اثبت انك من الشباب المطحون و تستحق الدعم الطاحن D:D:

نظرية المساحه و تحديد النسل دى حقيقة علمية انت عارف
لما عندنا فى الكلية بيدرسوا سمكة بيقيسوا الطول و الوزن و يعملوا بينهم علاقة بالاحصا عشان يعرفوا السمكه دى هتكبر و تنتج سمك صغير امتى
و يروحوا مصطادينها D: D:



انا قولتلك اهو وانت حر بقى

D:D:

sony2000 يقول...

يااااااااااااااااااااااارب
الهي يااااااااااارب
يرذقك بشقه حلوه علي مذاجك ووحده بجد تكون سند وعون ليك فايامك
بس اوعي تنسانا فالفرح
ههههه
ماشي؟؟؟؟؟؟؟؟؟

norahaty يقول...

بندعيلك والله
ياابو على وبدعى
لكل الشباب اللى زيكم
ومنهم ابن أختى اللى ياحبة
عينى فسحته الاسبوعية والشهرية
والسنوية اللف على اسكان الشباب
ومعارض الشقق والوعود والعهود
اللى ما تصدق ولا تنصان:(

norahaty يقول...

اخر حاجة شافها
(على الورق طبعاً)
شقق فى العبور على
مستويين!!المساحة 67متر
مربع تقريباً المستوى الاول
الريسبشن والحمام والمطبخ
والمستوى التانى حجرتين نوم.
والثمن 90الف تقريباً بالتقسيط
وفايدة 42%!! على 5او 6سنوات:(

سمع هوص (Abo 3li) يقول...

Sarah Sobhi

انا مش معترض علي موضوع ال 1700 جنيه... انا معترض علي التناقض بين الشروط والالتزامات... اصل بالعقل كده طالما هيتدفع 2000 قسط... يبقي مستحيل يكون المرتب اقل من 1700.... الا اذا بيان مفردات المرتب بيطلع بالرقم ال انت عاوزو زي عندي في الشركة... وساعتها يبقي العالم دي بتضحك علي نفسها قبل متضحك علي اي حد تاني,,,


سمكة؟؟ اخرتي سمكة؟؟؟ هههههههههه.... تفتكري هما ناويين يصتدونا امتي؟؟؟

نورتيني ياسارة .... صباحك زي الفل

سمع هوص (Abo 3li) يقول...

sony2000

يسمع من بؤك ربنا ياسوني....
ربنا يخليكي .. ويديكي... ويباركلك في صحتك قادر ياكريم... (وصلة شحاتة)...

وبالنسبة لموضوع الفرح ده... لسه بدري اووووووووي... مش لما الاقي العروسة ال هتستحملني الاول...

نورتيني يافندم

Wanda يقول...

ربنا يرزقك بكل حاجة حلوة :-)
من الاول للاخر

كفاية كده بلاش ننكد عليك النهاردة :-))
بتفصيص للبوست
توابع عيد المرأة :-)))))

سمع هوص (Abo 3li) يقول...

norahaty


احنا مش محتاجين اكتر من دعوتكم والله.. ربنا يخليكي يادكتورة...

العبوووووور... ياربنا... الله عليا لو مثلا سكنت هناك... هرجع كل يوم من طريق مصر اسكندرية الصحراوي- مكان شغلي- لحد العبور.... انا ابات في الشغل احسن- زي النهاردة- ههههههههههههههه...
ثم فوايد 42% كتييييييييير اوي...
قوليله يدور في الشيخ زايد هيلاقي حاجات اجمل بكتير وتقريبا نفس مستوي الاسعار... ده لو مكنتش زايد بعيدة عليه... اصل انا شفت في العبور وشفت في زايد.. وبصراحة زايد تكسب... من كذا جهة....

نورتيني يادكتورة نور... تحياتي

سمع هوص (Abo 3li) يقول...

Wanda 


ايه الدعوة الحلوة ال من الاخر دي... جبتي المفيد... ربنا يخليكي...

وبالمسبة للنكد ... هنكدي عليا امتي؟؟
علشان اعمل حسابي؟؟ هههههههه


صباحك ويومك جميل ان شاء الله

فتاه من الصعيد يقول...

ربنا يوفقك

اعرف قرايب ليا كتير تعبانين من موضوع البحث عن شقه بالقاهره

تحياتي

سمع هوص (Abo 3li) يقول...

فتاه من الصعيد

ربنا يكرمك.. ويوفق قرايبك... لو احتاجو اي مساعدة ... انا في الخدمة... بما اني بقيت خبرة في الموضوع ده....


نورتيني.... صباح الفل

Single Mummy يقول...

عزيزى ابو على

معنديش تعليق اقولهولك غير من خرج من دارة...وانت عارف الباقى
مالها البلد تبعولنا على رأى اخوانا اللبنانية
اقولك برضة ربنا معاك

سمع هوص (Abo 3li) يقول...

Single Mummy

والله متفق معاكي... ان من خرج من داره اتقل مقداره...

وانا خارج بره داري من زمان...
علشان للأسف مفيش فرص في مجال شغلي في البلد "تبعولنا".... هههههههه....

نورتيني يابنت بلدي

elmasryeffendi يقول...

الاجابة على كل اسئلتك هاتلاقيها عند مدمر مصر الحديثة المدعو عبدالناصر بس للاسف هو مات و سره معاه

تحياتى

سمع هوص (Abo 3li) يقول...

elmasryeffendi

ههههههههههه... واضح انك بتكرهه اووووي...
علي فكرة انا مبحبش ناصر انا كمان... بس مش بكرهه... لأن ليه انجازات برضووو... وليه اخطاء اينعم كانت كبيرة... بس موصلتنيش لأني اكرهه...
احترم رأيك... وفكرك... حتي لو اختلف معاه....

تحياتي

wasf_elahsas يقول...

طب يعني ليه تعب القلب ده كله
انت شوفلك عروسة ارملة ولا مطلقة ومعاها عيال
كدة تبقي وفرت الشقة والعفش والعيال هدية علي امهم
وما تفكرش كتير
اسهل طريق الخط المستقيم ليه تمشي في مشاوير كتير
اه
ما تنساش تخليها تكتب علي نفسها قايمة بالعفش والمؤخر والعيال
هو في حد لاقي رجاله
ده انت لقطة
انت شاور بس هتلاقيهم امم
تحياتي
اه
عشان طلبك يارب تلاقي ل انت عايزه

Tamer Nabil يقول...

هم يضحك وهم يبكى

هنقول اية بس ياصاحبى

ربنا يوعدك باللى بتحلم بية يارب

مع خالص تحياتى

ستيته حسب الله الحمش يقول...

انا لما دخلت شوجه من اللي انت قايل مساحتها دي قلت لأخويا
دي شقة تضامن اسري تاااااااااام
يعني الأب يبقى نايم في حجرة النوم
والعيال بيلعبوا في قفاه .. اللي هو الريسبشن
ومراته من المطبخ بتمد له ايديها يناولها التوم اللي متعلق في شباك اوضة النوم :)
وجاره بيعمل معاه شات شات وهو نايم في شقته هو راخر

لأ نيجي للجد
بس يا ستيتة يا كئيبة
الجد يا سيدي انها شقق كوزي جدا جدا ولو متأثثة مودرن وبطلنا فيها هطل كام اوضة ومين على العروسة ومين على العريس
والله ها تبقى تجنن
الشقق دي - وربنا ينتقم من الحكومة ساكنة الفيلات - اهم شيء فيها التصميم الداخلي
لو تم صح والإضاءة صح وعيل واحد زي الصين :) الناس ها تعيش عيشة هنية بإذن الله

ده غير شيء مهم قوي
كلنا بنبتدي وربك بصدق النوايا بيفرجها جدا وبيوسعها وطول ما الرزق في يد الله يبقى نبدأ ونتوكل على الله

ربنا يكرمك وطالما بتسعى ربنا ان شاء الله يكملها لك على خير

كيكى عوووووو يقول...

مالها ترب الغفير
منها واليها نعود
لنا الله

هراء لا داعى له ..... يقول...

أنا لحد دلوقت مش فاهم يعنى إيه بلد فى الدنيا كدا !!!

المفروض إن الجواز دا من الأساسيات فى الحياة

حاجة كدا زى الأكل و الشرب و حرية العقيدة

يعنى إيه يبقى فى بلد فى الدنيا الجواز فيها شيء صعب جداااا و معقد بالشكا دا

دا من أثار التحول الإجتماعى و الإحتلال الثقافى و الإقتصادى


يعنى إيه يبقى الشاب المصرى إللى وصل سن ال 30 أقل من أى قطة و لا كلب ماشيين فى الشارع

يعنى إيه تبقى بلد سكانها مسلمين و يتأخر سن الزواج فيها و العنوسة تعلى فى الجنسين للدرجة إللى شافينها و لامسينها

يعنى إيه تبقى الدولة الأعلى فى معدلات الطلاق على مستوى العالم كله سنة 2008

يعنى إيه يعنى كائن حى عاقل و عنده مشاعر و أحاسيس يكبت نفسه و يصاب بأمراض الإكتئاب و ضعف الجنسى علشان عايش فى بلد مقرفة حكومة و شعبا

يا جدعان و الله إحنا ضحايا و رغم ذلك بنكرس أسلوب حياة الجلاد و بنثبت دعائمه

مفيش بلد فى الدنيا الوضع فيها زينا كدا



لقد بغلت من الكبر عتيا ـ 23 سنة ــ و ما زالت مصر قادرة على إدهاشى و إثارة حيرتى




ربنا يكرمك و يكون معاك يأبو على و مع كل شاب كتب عليه القدر معايشة هذه الظروف المتصحرة ــ العجيبة على مقياس الأمم ــ

star in the sky يقول...

جيييييييييييييييييييييييييييييت :D

ربنا يكرمك بالعروسة والشقة

بس متنساش تعزمنى على الفرح

أحمد شريف يقول...

السلام عليكم
دعني أقول لك أنك تأخرت بعض الشيء في الحصول على العروض المميزة من إسكان مبارك للشباب
العروض المتاحة حالياً للشباب الأكثر قدرة
في بداية الدورة الرئاسة من 2005 وحتى 2008 تم طرح مشاريع عديدة وبأسعار مثالية للشباب وأهم هذه المشاريع من وجهة كان مشروع ابني بيتك

المشاريع الجديدة المماثلة لن تكون إلا في الدورة الرئاسية الجديدة

أتمنى لك كل التوفيق في الحصول على شقة جيدة وبسعر مقبول إن شاء الله

أحمد شريف يقول...

نسيت أن أقول شيء النمط الجديد للشق صغيرة المساحة مستمد من الثقافة الأوروبية خاصة دول مثل ألمانيا لأن الحياة الترفية التي اعتدنا عليها هنا في الشرق لن تستمر مع تعاظم الأعداد السكانية

سمع هوص (Abo 3li) يقول...

wasf_elahsas

طيب ايدي علي كتفك.. دوريلي علي العروسة الجاهزة دي ...
وزي منتي قلتي انا تحفة.. اقصد لقطة.. ههههههه


نورتيني ياوصف

سمع هوص (Abo 3li) يقول...

Tamer Nabil

لا في مصر كل الهموم بتضحك...
شكرا علي الدعوة .. والزيارة... ويارب تتكرر..


تحياتي يافندم

سمع هوص (Abo 3li) يقول...

ستيته حسب الله الحمش

والله كلامك زي الفل كالعادة...
وانا زي مقلتلك مش معترض اوي علي المساحة...لانها فعلا بتخطيط وعفش مناسب وبسيط.. بتكون لذيذة جدا...

وربنا يكرمك علي الدعوة والنصيحة.. وكله علي الله...


نورتيني يادكتورة

سمع هوص (Abo 3li) يقول...

كيكى عوووووو

منا رحت سألت علي ترب الغفير لقيتها محجوزة كلها... للأسف...


سيبك المهم البلوج نور بزيارتك... ويرب متكونش الاخيرة..

صباحك زي الفل

سمع هوص (Abo 3li) يقول...

هراء لا داعى له

والله البلد زي الفل... بس العيب فينا احنا... احنا الساكتين علي البيحصل فينا....


"علشان عايش فى بلد مقرفة حكومة و شعبا"
معترض تماما علي الجملة دي.. لان الحكومة هيا المقرفة وقرفها ده ... خلي الشعب يتصرف تصرفات مش بتاعته... مش هما دول المصريين... المصريين ال بجد ال بيبنو او علي الاقل شايفين شغلهم وحياتهم... وبيحولو يبتدو نفسهم والحاجات البسيطة الحوليهم... ويمكن...
الاختلاف في الراي لا يفسد "أي" قضية...

نورتني يافندم

سمع هوص (Abo 3li) يقول...

star in the sky


انتي جيتي... اتاخرتي ليه
:@
هههههههههه...

يسمع من بؤك ربنا...
وعييييييييييب انتي صاحبة فرح.. مش محتاجة عزموة.....

سمع هوص (Abo 3li) يقول...

أحمد شريف


انا فعلا اتأخرت... بس مش بأيدي...
ثانيا حاجات ابني بيتك بصراحة غير مشجعة خاااااااااالص....

لااااااااااا انا مش عاوزز شقق لو هيبقي فيها فترة رئاسية قادمة...

والنظام بتاع الشقق الصغيرة ظريف والله .. بس لليفهموو صح...

شكرا يفندم علي النصيحة والزيارة...


تحياتي

Wanda يقول...

انكد عليك دلوقتى و لا خليها اخر الاسبوع ؟؟؟ فى الرواقة كده ؟؟

:-))))

علشان بس متقولش بنتقم لموازتك لجدو هانى :-))) انا بستاذنك قبل ما اقولك الحقيقة المرة :-)))

سمع هوص (Abo 3li) يقول...

wanda

لا نكدي عليا دلوقتي... علشان كده كده.. ده اخر الاسبوع بالنسبة ليا... لاني برضو بايت في الشغل... ومزروووع قدام الجهاز منذ عدد مش فكره من الساعات...

قوليلي ايه ال هينكد عليا... انا مستعد للصدمة...

سؤال: هاني مين؟؟ لاني للاسف معرفش الاسماءالحقيقة لكل الناس في البلوجز

Wanda يقول...

بصى يا سيدى الفاضل
كويس انك تشتغل و تكون نفسك و تجهزها بشقة
بس خلى بالك مش نهاية المشوار للاسف
ده بداية مشوووووووووووووووووار
ربنا يعينك

من وحى صديقاتى المتزوجات
1- الى بتشرط شقة بموصفات احسن بكثير من الى انت مقدمها و بتزرنج لحد ماتبيع الى عندك و تشترى الى تعجبها و بعدين :-) من ايام الحمل الاولى بتقعد انت و هى عند بيت عيلتها :-)) و بعد ماربنا يفتحها عليك ثانى بتشترى شقة ثانية اكبر و احسن و لسه بتقعد عند حماتك علشان مين ياخذ باله من العيال؟؟

2- الى بتقبل بشقتك و بعد الجواز بتزن عليك بشكل متواصل انها عايزة شقة جانب مامتها و عليه تشتغل و تبدل الشقة و هى على الرغم من انها شارعين على بعد من مامتها الا بتشوفها فى المناسبات :-))

3- الى لو عرفت ان الشقة الى جابهالك ابوك بماله هو مكتوبه باسمه هو مش باسمك بتقفش على الجوازة لحد ما العقد بيتغير و بعدين برضه بتزن طول الوقت علشان تغير الشقة لانها فى بيت العيلة و هى مش عايزة تسكن مع اهل جوزها فى عمارة واحدة

4- الى رايحها بشقة جانب مامتها ، بس هى بتجيب عفش اكبر من مساحة الشقة علشان تحسس روحها و الكل انها فى شقة موقتة و حتعزل لشقة اوسع للضعف
و بعد زن و غربة و تجيب الشقة الاوسع بتشتكى انها بعيدة عن مامتها :-)

5- الى قبلت بالشقة الصغيرة بعد قصة حب ملتهبة و بتعيش كام سنة و الالتهاب بيخف :-)) بترجع تزن لحد ما يقبل بانه يعزل فى شقة بتاعه حماته علشان المدام عايزة تتونس بيعيلتها و العين ساعتها بتكون .. مكسورة :-(

6- الى بتقبل بالعريس و بالشقة و بعد زمن تزن بشقة احسن و تغربه عن بلده و عليه يرجع يشترى ارض علشان يبنيها و علشان يبنيها لازم يتغرب ثانى و الدائرة مبتخلصش

ايه رايك فى النكد
ابقى خلى بالك
و احسن اختيار العتبة
علشان تعرف تعيش حياتك بدون جرى الوحوش الى مبيخلصش

واندا متعددة البيوت :-)))

اه جدو هانى الى بينط فى الكوز و مستخبى فى غابات السافانا
عرفت مين :-)))

سمع هوص (Abo 3li) يقول...

wanda

احب اوضح كذا نقطة ..

1- علي رأي المطرب العالمي "ابوالليف": انا مش خرونج, انا كينج كونج...هههههه...
بمعني... والله ال مش عاجبها حالي علي كده.... متلزمنيش...
2- ال يعشرني هيعرف ويتأكد وهيكون موووقن بحقيقة مهمة... ان اخر طريقة ممكن يستخدمها معايا علشان اعمله ال هوا عاوزه هيا "الزن".... لان انا دماغي صرمة قديمة... ومبعملش حاجة غير لما اكون مقتنع بيها... ومن اسهل الحاجات البعملها اني اسيب ال قدامي يزن يزن يزن.. ويتعب نفسه... وانا بكون في عالم تاني خالص ساعتها.. مبكونش مركز معاه نوهائيا.... ولما يخلص ابصله ببروود... واقوله برضوو لأ...
3- انا اكيد من غير زن هكون زي اي انسان طبيعي بيدور ديما علي الاحسن.. وعايز يطور نفسه.. ويطور طريقة واسلوب ومستوي حياته.. بمعني اني انا بنفسي ال هكون عاوز بعد فترة ما اني اغير الشقة بشقة اكبر وفي مكان احسن... بس طبعا ده هيكون برضو في حدود التطور ال هوصلو علي المستوي المادي... غير كده .. كل برغووت علي قد دمه...
4- انا مقلتش ان ابويا هوا الهيجبلي الشقة... انا قلت انه هيساعدني... وانا شايف ان ده مش عيب "اوي"... لاني ب امكانياتي الحالية بصراحة هيبقي صعب جدا ان لم يكن مستحيل اشتري شقة.. علشان كده ابويا هيساعدني ب الاجزاء الهتكون صعبة عليا... وده مش معناه ان الشقة هتكون ب اسم ابويا... لسبب بسيط .. ان اتكلمت عن مشاريع الشباب.. وابويا عدي ال 50 سنة من زمان... ومينفعش تبقي بأسمه...
5- انا بحب اكون واضح مع الناس البتربطني بيهم علاقات انسانية ... زي الاصحاب وزملاء العمل .. واخيرا وخصوصا الانسانة الهرتبط بيها- علي اعتبار ما سيكون لما الاقيها- بمعني اني بحب الاستقلالية ... يعني حوار امها وابوها ده علي راسي.. بس دي هتبقي مراتي انا.. وانا بصراحة دكتاتور...


شكرا علي الامثلة ... بس صدقيني ... انا شفت امثلة العن من كده مليون مرة...
ثم ده حوار سابق لأوانه... لسه بدري...
وكده كده.. احنا مربوطين في ساقية.. والساقية دي عمرها مهتقف... مفيش وقت هنيجي ونقول خلاااااااااااص.. كده هرتاح اخيرا....

وبالنسبة لهاني نط في الكوز....هههههههههههههه.... اه انا مؤيد ليه... عندك اعتراض؟؟؟؟؟؟؟!!!!!

نورتيني... وبجد والله بحب اقري تعليقاتك عندي اوي...

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل