الجمعة، 26 مارس، 2010

حملة الحزب الوثني... وفضيحة قديمة



كنت راجع من الشغل شفت اعلان كبير في شارع الهرم ...
اعلان عن حملة جديدة بينظمها الحزب الوثني..
اسم الحملة "حملة عطاء الشباب"..
طبعا بما اني بحب الحزب الوثني زي مرات ابويا.. رحت داخل علي الموقع بتاعهم....
اتفرج علي الحملة دي...
اصل اسمها غاظني اوي...
عطاء الشباب...
هما الشباب حيلتهوم حاجة علشان يعطوها...
كانو خالو اسم الحملة " حملة اعطاء الشباب"..
كانت بقي ليه فايدة...
بس الظاهر ان ده نتاج العقل الباطن للكبار بتوع الحزب..
انهم مش عاوزين يدوو... ديما عاوزين ياخدووو....
فكروني بتغيير شعار اقسام الشرطة من "الشرطة في خدمة الشعب" الي "الشعب والشرطة في خدمة الوطن"...
وكأنه عيب لما يعطو الشباب... او عيب لما الشرطة تخدم الشعب...
المهند...
اني لما دخلت علي موقع الحزب الوثني كنت متوقع ان الحملة يبقي ليها علاقة بالتوعية السياسية- من وجهة نظر النظام...
وخصوصا ان اليومين دول عم البرادعي شامم نفسه  شويتين..
بس لقيت ان اهداف الحملة عاملة زي اهدف عيل بيرشح نفسه في انتخابات اتحاد الطلاب...
خدو عندكم اهداف الحملة خمس اهداف اهما:
1  تنظيم عدد من الأنشطة والفاعليات الشبابية في المجالات الاجتماعي
والرياضية والفنية والفكرية.
مش بقولكم اتحاد طلبة مش حزب...
2 زيادة مشاركة الفتيات في الأنشطة التي ينظمها الحزب إيمانًا بدورهن في
المجتمع.
طبعا علشان الشباب يجوو الحملة لازم يكون فيه مزز تفتح النفس..
3 تنمية روح المنافسة بين الشباب والكشف عن المواهب الشبابية.
اومال ايه... الناس دي بتفهم وخايفين علي مصلحة الشباب... علشان هما عارفين ان الحاجة الوحيدة التأكل عيييش دلوقت ان الشاب يطلع لعيب كورة او مغني.. والشابة ممثلة او رقاصة... فبيكتشفو مواهبهم اهووو... دنتو شعب مفتري..
4 التعاون مع الجمعيات الأهلية المهتمة بقضايا الشباب.
طبعا ميقصدوش حركة شباب 6 ابريل... مش عاوز ذكاء
5 إحياء الذاكرة الوطنية للشباب من خلال الاحتفال ببعض ا لمناسبات التي تقع
خلال هذه الفترة.
يعني هيشغلو اغاني حرب اكتوبر علي لقطات من فوز المنتخب .... وفي الاخر يحتفلو ب.. ووالله وعملوها الرجالة ورفعو راس مصر بلدنا...
بس كده.... شفتو سذاجة اكتر من كده؟؟؟


ال موتني من الضحك علي نفسي .. اني افتكرت موقف حصلي وانا في اجازة تالتة ثانوي...
هحكيهولكم بس يفضل سر م بينا.. علشان لما اوصل للحكم... محدش يذلني بتاريخي الاسود...

المهند...
كنت في الاجازة بتاعة تالتة ثانوي ولقيت واحد صاحبي ابووه في امانة الحزب بتاعة مدينتي.. بيتصل بيا... وبيقولي "تطلع شرم يامعلم وببلاش؟؟"
انا "اطلع يابرنز... طالما ببلاش.. انا رااااشق"
هوا "بييييس.. بص الرحلة دي تبع الحزب... وعلشان تطلعها لازم تحضر ندوة كده ومسيرة للحزب في كايروو.. وهيبقي فيه بنات.. وهتبقي ليلة"
طبعا انا كان عندي استعداد ساعتها ابيع مبادئي كلها علشان اطلع الرحلة ال ببلاش ... وكمان شجعني اكتر موضوع البنات ده... ف وافقت..
وروحت انا واتنين اصحابي... وحضرنا المسيرة والندوة..
الكارثة بقي كانت تاني يوم...
لقيت واحد صاحبي تاني -غير الاولاني يعني.. ركزو شوية- بيتصل بيا بيقولي "ايه ياواد... انت مش بتكره الحزب الوطني... ايه ال وداك المسيرة بتاعته؟"
انا "ايه ده؟؟ انت كنت هناك ولا ايه؟؟ شفتني ازاي"
هوا "يابني دي مصر كلها شافتك"
واستفسرت منه علي الحكاية ...
واكتشفت اكتشاف
تا
تا
تا
تانننننننننننننننننننن
اكتشفت اني طلعت علي الصفحة الاولي في جريدة الاهرام...
وانا حاطط ايدي علي كتف واحد صاحبي وبنضحك... ولابس كاب...
وتحت الصورة الصحفي السمج كاتب: مسيرة شباب مصر...
شباب ايه؟؟ الله يفضحك يابعيد...
طبعا صاحبي ده فضل محتفظ بالعدد ده علشان يذلني... بس انا ولا يهمني...
طبعا السؤال ال بيدور في دماغكم حاليا ... وروحت الرحلة ولا لأ...
للأسف بعد التضحية الكبيرة العملتها...
تقريبا ربنا عاقبني علي اني اتخليت عن مبادئي .... والرحلة اتلغت...
يعني موت وخراب ديار...

هناك 45 تعليقًا:

norahaty يقول...

أحسن
هههههه

norahaty يقول...

برحلة لكايووو
وغدوة ومش عارفة
ايه تغير مبادئك
ياشوووبابى ....
كلمة بقى ماقدرش
اقولها علشان انا
مؤؤؤؤؤؤؤؤؤؤؤؤدبة:)

norahaty يقول...

بس الحمد لله
اهو كده بردون
يعنى اتفضحت ببلاش
فهم ملهوش عندك
حاجة :)

TIMMY !! يقول...

أنا لو منك تمشي في مسيرة للمعارضة قصاد المسيرة اللي طلعت على فاشوش من غير رحلة دي :)

A32L MaGNoNa يقول...

هههههههههههه

شوف ربنا ؟

عشان متتخلاش علي مبادئك تاني وتجري ورا رحلات ومسيرات عشان فيها موزز :D

تتعوض المسيرة الجاية مع فضيحة جديدة :P

sony2000 يقول...

هاههااهاهههاااااااااااااااااااااااااااااي
بلاشي انا اتكلم احسن
هتقولي بردك عن تغير المبادئ
ياابني كلنا عرفنها الحركه دي:)
وانت بردك اللي سيحت لنفسك موش حد تاني
ههههههه
ربنا يكون فالعون
تقبل مروري وتحياتي

سمع هوص (Abo 3li) يقول...

norahaty

لا رحلة ل شرم... ههههههههه...
ايون احلي حاجة اني اتفضحت... علشان اتعلم.. واتعظ..

وكده كده محدش ليه عندي حاجة... نيهاهانيهاها..

نورتيني

سمع هوص (Abo 3li) يقول...

TIMMY

لا منا عملت كتييير... قصاد الموضوع ده... متقلقش واخد حقي تالت ومتلت.. ههههههه..


نورتني ياباشا

سمع هوص (Abo 3li) يقول...

A32L MaGNoNa

ههههههه.. دي شماته بقي؟؟؟
ماشي ماشي
لا خلاص الواحد كبر وعقل...
مفيش الكلام ده تاني..

تحياتي يافندم

سمع هوص (Abo 3li) يقول...

sony2000

ممممممممم.. لا اتكلمي برحتك.. مبزعلش متخافيش...
بس انا بصراحة وبجد مفهمتش الكومنت بتاعك... ممكن الترجمة؟؟؟

هراء لا داعى له ..... يقول...

هههههههههههههه

دا إنت حظك جامد قوى




بس فعلا الواحد بيبقى خارج من الثانوية العامة دى عنده تغيير شامل فى طبوغرافية مخه بسبب إللى حصله و ساعتها فعلا مفيش مانع تبيع كل مبادءك علشان رحلة لكفرالشيخ حتى مش شرم الشيخ



بس الولاد بيقولوهم تعالوا علشان الوقفة فيها مزز

يا ترى بقى المزز نفسهم بيقلولهم تعالوا علشان فى إيه ؟

سمع هوص (Abo 3li) يقول...

هراء لا داعى له

ههههههههههه... منحوس ياصاحبي.. منحوس... يوم ماتطلع صورتي في الاهرام تطلع علي الخبر المعفن ده...

الثانوية العامة دي دمرت كتير في عقل الواحد...

بيقوللهم تعالو فيه شوية عيال موووز- علي رأي ياسمين عبدالعزيز- الواضح ان الفاكهة دي مهمة للطرفين..

Wanda يقول...

:-))))))))))))))))))

فطستنى من الضحك
طيب يا راجل انك لما طلعت و شوفتهم على حقيقتهم طلقتهم بالثلاثة :-))
مش انك كنت حتطلع رحلة و فى الاخر اشتغلوك فى صورة بتعبر عن الشباب الضاحك المبتسم المتفائل بالحياة :-)))

طيب على كده كل ما اشوف صورة من شعارتهم حضحك و افتكرك و اقول طلعين فين دول ؟؟؟؟

الا صحيح طيب و النبى اشتركلنا فى الحملة العطائة ديه
نعرف بيعملوا ايه فى الاخر
اصل اكيد مش حتوزع ورق دروس لان مفيش طلبة :-))

انت اكيد اجازة النهاردة :-)
يوم عطاء جميل ليك :-))))

ستيتة حسب الله الحمش يقول...

طب مش مهم الرحلة
البنات كان اخبارهم ايه؟ :)

اما انا ضحكت ضحك

تصدق يا ابو علي
عندي احساس دفين ان اللي بيروحوا ندوات الحزن الدولي حاجة من اتنين

يا وصولي عارف من اين تأكل الكتف

يا واحد زيك كده يا عاوز بنات يا عاوز لحمة يا عاوز رحلة المهم عاوز سبوبة وخلاص

بس عليا اللي عليا بقى
لأفضحك انترناشونال مجرد ما تتبوء سدة الحكم :)

Ana keda يقول...

هههههههه
دى جزاة خيانة مصر
هههههههههههههههههه
يبنى الشباب غلبان غلبان دول لو يطولوا ياخدوا اى حاجة منه هياخدوها تقول ايه بقى والله الواحد ما عارف يضحك ولا يزعل عالحال الى احنا فيه دلوقتى
حزب وطنى ايه ده حزب كوش ولا حزب اسرقنى شكرا متفهمش
فكرتنى باول ما نزلوا شبابا الجيل اوام بينا والناس المستحمية دى :)
بس مصلحة يا عم ان مفيش رحلة

سمع هوص (Abo 3li) يقول...

Wanda

هههههه.. ايوون كل متشوفي شوية شباب في اعلانتهم افتكري ابن عمك!!.. مهو ده ال ناقص.. لااااااااا انا مش عاوز حد يفتكر الواقعة دي.. هههههه

لا منا قريت ال هما عملووه لحد دلوقتي في الحملة دي... خدو الشباب والشابات علي القناطر.. والله لو دخلتي علي السيت بتاعهم هتموتي من الضحك فعلا علي انشطة الحملة.. ههههههه...

ااااااااااااه انا النهاردة اجازة اخيراااااا.. الحمدلله.. ونمت النهاردة 7 ساعات كاملين... وصاحي كلي نشاط لاسبوع جديد منغير نوم...

يومك جميييييييييييل... ويبقي طمنيني علي الصبارة

سمع هوص (Abo 3li) يقول...

ستيتة حسب الله الحمش

البنات كانو زي الفل... تقريبا كانو من دايرة الزمالك... هههههه...

اه عندك حق.. اصل مين عاقل هيقتنع بكلامهم.. ولا حتي هيقدر يستحملو منغير ميكون ليه مصلحة..

وليه بس الفضايح يادكتور... ده كان طيش شباب من زمان.. وعفا الله عما سلف..

تحياتي

سمع هوص (Abo 3li) يقول...

Ana keda

صح.. الجزاء من جنس العمل...
وانا اخدت علي دماغي ساعتها.. علشان احرم ابقي انتهازي... واتعلمت الدرس..

ربنا معانا ومع كل الشباب الغلبان..

لاااا العيال بتوع شباب الجيل دول واخدنهم اعارة من خدمة العملا بتوع فودافون وام نبيل..


نورتيني

خواطر شابة يقول...

هههه ضحكتني والله يعني من كل المسيرة مينزلوش غير صورتك في الاهرام صحيح قليل البخث يلاقي العظم في الكرشة هههه

سمع هوص (Abo 3li) يقول...

خواطر شابة

شفتي النحس... ده قليل البخت يعضه الكلب في المولد.. كمان..

نورتيني..
تحياتي

wasf_elahsas يقول...

الحزب الوثني
هما من الكفار ولا ايه
احسن يكونو من قريش وانت مش واخد بالك
اتاكد كده تاني هما من اي قبيله
لا حول ولا قوة الا بالله

والله هم يضحك وهم يبكي
سيبك المهم
الرحلة اتلغت وانت مشيت مع الاعداء
والله تستاهل
شكلك من طنطا ولا ايه
المهم ربنا يعوضك بالحلال
سلامات

سمع هوص (Abo 3li) يقول...

wasf_elahsas

ياريتهم كانو من قريش.. كنا ساعتها عرفنا هما بيعذبو الناس ليه... لكن دول بيعذبوهم وخلاص...

وبلاش شماتة... انا غلطان اني حكتلكم...ههههه..

اشمعنا طنطا؟؟

wasf_elahsas يقول...

الا هو صحيح نسيت اسالك
انت ايه ال وداك شارع الهرم
مش عيب تروح الاماكن دي
ربنا يستر علي عبيده
وبالنسبه لطنطا
فاكيد كل ال من طنطا بيقول
بلدي طنطا وانا احب اعيش اونطة
اه
اونطة
هههههههههههههه

سمع هوص (Abo 3li) يقول...

wasf_elahsas

الوداني شارع الهرم اني ساكن هناك حاليا.... اوعي تغلطي في الهرم لحسن خوفو يزعل ابوالهول يزعل منك...

ياريت... حتي الاونطة مش عارفين نعيشها..

فشكووول يقول...

سمعت وهسيت
اصل الجماعه دول عندهم ناس بتخترع شعارات وكل سنه ... لاااا دا كل يوم تلاقى فيه شعار محترم ..واللى بيعملوه عكس الشعار دا تماما

طب ما دام فيه مزز كنت بلغنى وقول لى يا عم فشكول الموضوع فيه مزز وانا تلاقينى ناطط فى وسط الموضوع

بس ربنا ما بيعملش حاجه وحشه .. تستاهل اللى يجرى عليك لانك غيرت مبادئك فى لحظه

سمع هوص (Abo 3li) يقول...

فشكووول

بس للاسف برضو مبيعرفوش يختارو صح.. اختيارتهم بتيجي من خلفيتهم القذرة عن الناس...

بس كده.. اي حوار فيه مزز.. هاجي وابلغك علي طول...

كانت لحظة طيش والله ياعم فشكول...

البلوج نور بوجودك..

تحياتي

شريهان يقول...

ههههههههههههه
يا جامد

سمع هوص (Abo 3li) يقول...

شريهان

جامد اووووي... مش كده؟!... ههههههههههههه

صيدلانيه طالعه نازله يقول...

ههههههههههههههههههه
ادى اخره بيع المبادىء يا عم الحاج
فضيحه و جرسه و طلع عليك سمعه انك تبع الحزن الوثنى
تعيش و تتخوزق
بس بصراحه تستاااااااهل
p:p:

سمع هوص (Abo 3li) يقول...

صيدلانيه طالعه نازله

لالالالالا.. مكنتش اتوقعها منك...
ايه الشماتة دي كلها؟! يساتر يساتر علي الستات... لما بيفرحو في حد غلبان زي حلاتي... هههههههه

star in the sky يقول...

هههههههههههههههههههههههههههههه

يالهوووووووووى هووووووووووووووت من الضحك عليك

بقولك ممكن طلب يا ابو على
الا صحيح ايه علاقة ابو على دى بمحمد

المهند بقى
عاوزة عنوان صحبك بعد اذنك يعنى
عشان بس ابقى اصور منه العدد و اذلك انا كمان
هع هع هع هع هع هع هع هع

بنااااات ياااااااااه طلعت غير ما اتوقعتك خااااالث الصوراحة يعنى

بص بقى هتفلسف شوية ويارب متفلسفش غلط حكم انا عارفة نفسى دايما بعك
الحزب الوطنى ده حاجة زى العيال بالضبط متاخدش عليها وسيبها تعمل اللى هى عاوزاه وكلنا عارفين هما مين وهما ايه واللى بيدخل فى حاجة تصهم بيبقى مصلحة مش اكتر
ايه رايك بقى فى شوية الفلفسة دى

يلا وتستاااااااااااااااااهل
فلحاااااااااااااانة فيك بصراحة

الشماته وحشة بس ممكن نعمل استثناء المرة دى

سمع هوص (Abo 3li) يقول...

star in the sky

هههههههههه... ايه الشر ده ياسومة.. اصلا اصلا تم التحفظ علي الجريدة دي من زمن..

"بنااااات ياااااااااه طلعت غير ما اتوقعتك خااااالث الصوراحة يعنى"... احم احم.. اومال كنتي متوقعة ايه؟؟ هههههههه..

ماشي يشمتانة هانم... مسيرك تقعي تحت ايدي واشمت فيكي انا كمان.. هههههه..

هقولك ايه علاقة ابو علي ب محمد... بس قوليلي الاول .. انتي عرفتي محمد دي منين؟؟

star in the sky يقول...

كنت متوقعاك ايه ههههههههههههه اكيد عكس كده ههههههههههههههههههههههههههه

لا تشمت ايه دى مش اخلاق المبرمجين بتاتا

عرفت محمد مين اكيد مش من البطاقة يعنى بس انت مرة قلت فى رد على تعليك ليا انك من كتر كرمك بيقولوا لك كريم بدل محمد شفت بقى

يابنى احنا اعلام يعنى نركز على الحاجات اللى زى كده عشان نعرف نجمع معلومات استفيد من خبرتى يلا
وش بيطلع لسانه

سمع هوص (Abo 3li) يقول...

star in the sky

انا مش هشمت فيكي بس اسمحيلي احسدك... انتي زاكرتك هيا ال كويسة مش قوة ملاحظتك...
انا والله يبنتي الزهايمر هوا ال موديني في داهية... بنسي الحاجة بعد م بعملها بتلت دقايق.. يعني احتمال انسي اني كتبت ال كومنت ده كمان شوية... وتلاقيني داخل ارد عليكي تاني... ههههههههه

ومنكم نستفيد.. عقبال كده منشوفك صحفية طويلة.. اقصد كبيرة..

star in the sky يقول...

تحسدنى ايه يابنى
ما هو اللى ميعرفش يقول عدس
انا اخر توهان والتركيز عندى ضايع من لما كنت صغنطوطة فى ابتدائى كده
بس ربك بيعوض حاجات بحاجات هههههههههههههه

تصدق انك اثبت بتجربة عملية انك فعلا بتنسى

يابنى انت مقلتش ايه علاقة ابو على بمحمد
وش بيشد شعره من ........ لا دى مش حاجة وحشة يا فندم بس اقصد من الزهايمر
هههههههههههههههه

ghada mOhsen يقول...

هههههههههههههههههه
حبكت يعني من وسط الناس دوووول كلهم يطلعوك إنت وصاحبك ...
يلا مش مشكله بص للناحيه الإيجابيه ... إنك بقيت من المشاهير ههههههههههه ...

وكله يهوووووون مدام شوفتوا البنات هناك ( إخص ) ... :)))

أما عن الحمله .. فاهعمل نفسي ماسمعتش عنها .. عشان بس الواحد مايفكرش كتير ويتقهر فى كلام مالوش لزمه ...

تسلم ياابو علي ...
... ;) ,,, ;) ...

سمع هوص (Abo 3li) يقول...

star in the sky

ههههههههه... يارب افتكر ارد في اخر الكومنت علي سؤالك..

مرحبا بكي في نادي التوهان الاقليمي الدولي البحري النهري الجوي...

بصي ياستي انا اسمي في اخره "علي" ومن زمان كل اصحابي مبيندوليش غير ب "أبوعلي"... بس كده...

يومك جميل

سمع هوص (Abo 3li) يقول...

ghada mOhsen

منحوووووس ياغادة اعمل ايه.. الفضيحة مكتوبالي...

ههههههههه... صح دي اهم حاجة فعلا.. واخص اخص عليا....هههههههه
وفعلا عندك حق متقريش عنهم علشان ضغطك ميعلاش...

نورتيني ياغدغود.. وكل سنة وانتي طيبة

Bent Men ElZaman Da !! يقول...

يعنى بعد بيع مبادئك والتنازلات اللى قدمتها دى بردو ماتطلعش
المفروض كانوا يكتبوا على صورتك مسيره الشباب المصرى ابو كاب ههههههههههه
ضحكتنى والله
انا اول مره اسمع عن الحزب الوثنى ده
تفتكر ده جهل منى والا جهل منى هههههههه

تقبل مرورى

صمت المشاعر يقول...

ههههههههههه هي دي اخرة اللي يتخلي عن مبادئه

بس كويس دا انت تفتخر ان صورتك طلعت في الجرنال حد طايل ههههه


اما حملة الحزب الوثني علي رئيك المفروض يعملوها حملة اعطاء الشباب

دمت بكل خير

سمع هوص (Abo 3li) يقول...

Bent Men ElZaman Da !!

الشباب المصري ابو كاب.... شامم ريحة تريقة.. هههههههه..

ومتقلقيش ده مش جهل منك... دي طيبة...
الاشرار ال زي حلاتي هما البشتمو الحزن الوطني... ههههههه..

البلوج نور بأول زيارة ليكي عندي... ومستني زيارات قادمة... متبقاش الاولي والاخير... اتفقنا؟؟

تحياتي

سمع هوص (Abo 3li) يقول...

صمت المشاعر

انتو كده هتخلوني اندم... ومش هحكلك علي فضايحي تاني... انتي كمان شمتانة فيا؟؟؟ ماشي ماشي....

يعني يوم مطلع في الجرنال اطلع بفضيحة... المرة الجاية هتشفوني في التلفزيون... في برنامج خلف الاسوار... ههههههههه...

ويريت يكون اسمها "اعطاء الشباب شقق" .... ههههههه..

نورتيني .. تحياتي.. ويومك جميل ان شاء الله

عايشه لنفسي يقول...

هههههههههههههههههههههههههههه
انت بجد كارثه
اقولك حاجه كليه الاثار المحترمه بتاعتنا احتفلت بعطاء الشباب دة وجابت دى جى واشتغلت وسط الكليه ابو اليف انا مش خرونج تخيل!!!!!!!!
واغنيه للى بتغنى الحنطور
دا كان ناقص يشغلوا سجارة بنى((بحبها اوى انا وريمو)) كل دة داخل الحرم الجامعى دا كان ناقص تيجى رقاصه وينقطوها الدكاترة

كله نحو مستقبل افضل لاولدنا

سيبك انت
انت بجد دمك شربات يامعلم

سمع هوص (Abo 3li) يقول...

عايشه لنفسي

شايفة وجه التشابه بين عطاء الشباب وانا مش خرونج!! العالم دي عاوزين يودونا فين؟؟!!

بس انا زعلان منك... مش تعزمينا علي الحفلة... دول شغلو مطربي المفضل ابوالليف ... ههههههه...

علي فكرة انا كمان بحب سيجارة بني.. بني بني... هههههههههههههه..

تعرفي .. واحد صاحبي بيشتغل معيد... كان في مؤتمر فيه اكتر من كليه... في حفلة نهاية المؤتمر الجامعة ال كانو فيها جابت فرقة رقص ايطالي... صاحبي بيقولي كانت ليلة مسخرة....

شكرا ليكي ياقمر... انتي ال روحك حلوة...

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل