السبت، 3 أبريل، 2010

عين الحسوووود


الحسد
انا طول عمري مبحبش الناس ال بتستخدم الحسد ك شماعة لفشلها..
يعني لما الواد يجيب ملحق.. امه تقنع نفسها ان الواد اتحسد...
او لما البنت تطلق.. يقولو دوول اتحسدوو...
طبعا انا مؤمن بوجود الحسد ... لان ده مذكور في القرأن والسنة...
بس مش مؤمن انه السبب في اي مشكلة او مصيبة بتقع فوق نفوخنا..
وبصراحة مبعملش حساب للحسد اوالحساد مبركزش في الحاجات دي...
بس ال خلاني اتكلم النهاردة عن الحسد .. موقف حصل قدامي...
الموقف ده من المواقف القليلة ال بعتبر الحسد هوا السبب فيها..
وقلت في نفسي بالمرة طالما هحكيلكم علي الموقف ده...
افتكر معاكم اقوي اربع مواقف حسد قبلتها في حياتي..

الموقف صاحب المركز الرابع:
الحصل من يومين... وخلاني اكتب البوست ده...
عندنا في الشركة بنعمل اجتماع اسبوعي بيحضره كل البيشتغلو في الشركة.. المهم واحنا في الاجتماع ده... واحد زميلتنا لقيناها جايبة معاها جاتوه وحركات من دي...
وبتوزعوو علينا... ولما سألنا علي المناسبة السعيدة..
عرفنا ان ابنها الصغير كسب مسابقة اجمل طفل في مصر –محدش يضحك ولا يتريق زي منا عملت-  طبعا لما سمعنا السبب الناس انقسمو فريقين... فريق قعد يضحك ويتتريق... والفريق التاني المكون من كل ستات الشركة عوجو بؤهم...
المهم ان الاجتماع قبل ميخلص بخمس دقايق.. جه تليفون لزميلتنا دي من مدرسة الولد...
الواد وقع علي ودنه... وودنه فيها نزيف ....
طبعا لا تعليق................

الموقف صاحب المركز التالت:
انا واصحابي رايحين بنشرب عصير في محل قصب...
طلبنا تلت كوبيات...
الراجل ملي الكوبيات... وادهلنا...
المهم اتنين تانين كانو بيجيبو عصير برضو.... الراجل بتاع القصب ادلهم كوباية ناقصة شوية...
فراحو بهزار.. بيغلسو علي الراجل... وبيشورو علي كوباية في ايد زميلي وبيقولو "اشمعني الكوباية دي مليانة لأخرها"....
طبعا انتو متوقعين ال حصل....
مظبوووووووووووط الكوباية وقعت دشششششششششششششششششش علي الارض قبل ميخلصو الجملة...
الغريب ان الكوباية مش اتزحلقت من ايده ولا حاجة...
لاااااااااا.... زي م كل شاربي القصب المحترفين عارفين ان كوبيات القصب بتبقي ليها يد..  الكوباية انفصلت عن اليد في مشهد غريب عمره مهيتكرر قدامي... يعني ممكن الكوباية تنكسر بس ال يد تتفك بالمنظر ده وفي التوقيت ده بالذات!!!! ده الغريب..

المركز التاني:
وانا صغير كنت ديماا اسمع امي وخالتي بيتكلمو علي واحدة قريبتنا ويقولو عليها ان عينها مدورة وتفلق الحجر...
وانا كنت بستغرب ... لاني قليل لما كنت اسمع امي بتتكلم في الموضوع ده....
بس اقتنعت بكلامها من الموقف الجاي ده بالذات...
امي اشترت سجادة جديدة وغالية.. وكانت فرحانة بيها اوي.. وكانت فرشاها في الرسبشن.. مكان سجادة تانية قديمة...
بعد يومين بالظبط... قريبتنا ال بحكيلكم عليها دي جاتلنا زيارة...
وابدت اعجابها الشديد بالسجادة...
امي طبعا كانت عمالة تقول المعوزتين طول ما قريبتنا دي موجودة...
المهم الضيفة خلصت زيارتها وامي قامت توصلها لباب الشقة.... وشوية رغي من بتاع المصريين ال علي السلم ....
امي رجعت ال رسبشن وراحت مصووتة....
اخويا الصغير- وكان صغير اوي ساعتها- جايب المكوة وبيكوي ورق مبلول علي السجادة....
طاااااااااااااااااااااااااااااااااااااخ...
الورق لزق والسجادة باظت.....

الموقف صاحب المركز الاول بجدارة:
واحد صاحبي مستنيني علي اول الشارع....
نزلتله...  لقي بنت عادية جدا معدية قدمنا حب يشتغلها...
راح ضاحك بهيسترية وهوا بيشاور عليها ويقولي "بص بص جزمة البت دي.. ههههههههههههههههه"...
طبعا الجزمة مكنش فيها حاجة... هوا كان بيشتغلها بس...
بس البنت شكت في نفسها وقعدت تبص علي الجزمة بتاعتها بأستغراب...
فراح قايلي "دي بنت مش واثقة في نفسها.... اي حد يهزها بسهولة"..
في نفس الوقت عدت بنت تانية اقل حاجة تتقال عنها انها صااااروووووخ.....
ف صاحبي راح قالي "اهي دي بقي البنت الواثقة في نفسها... شوف ماشية ازاي ولا هممها حد ... واثقة واثقة يعني... اهو هوا ده الكلام"....
بيييييييييييييييييييييييييييييييييييييب.... طاااااااااااااااخ.... بووووم...
البنت بتعدي الشارع... موتسيكل ماشي بسرعة جدا.... طير البنت من علي الارض... ونزلت طرخ علي ضهرها... والموتسيكل سبها وجري...
انا فتحت بؤي مزبهل.... وببص علي صاحبي لقيته فاتح بؤوو هوا كمان...
بعد مرور 20 ثانية ابتديت افوق من الصدمة... وانا بجري علي البنت وبشد صاحبي ال لسه مزبهل وبقولو "ماوت البت.. الله يخرب بيتك"....
المهم الناس طبعا اتلمو ونقلناها المستشفي....
بس الحمدلله البنت لسه عايشة...  شوية كدمات ورضوض بس...
طبعا انا فضحته في كل الاوساط ....


انتو بقي احكولي علي مواقف قبلتوها من النوع ده....

هناك 68 تعليقًا:

Silver Eyes يقول...

مساء الخير
اول مرة اعلق ف بلوجايتك بس مش اول زيارة :)

دى كوارث مش بس حسد .. اول موقف دا ضحكنى اوى
كل دا ومكنتش بتاخد بالك م الحسد او اى موقف بيحصل قدامك

بالنسبالى انا بردو مش بركز او حاجات صغيرة بتحصل بس مش باخد بالى

بس سمعت مواقف كتيرة زى مثلا واحدة صحبتى لابسة دهب زى اى حد عادى يعنى .. واحدة قريبتها مسكتتش طبعا ونزلت قر وحسد .. هى مشت من هنا وايد البنت كانت بتولع ههههههههه حاجة غريبة حاصلة ف ايدها حبوب ووجع فظيع مش مستحملاه .. وحاجات زى كدا , البنت كرهت الدهب كله :)

ربنا يبعد عنك اى حسد ويحفظك يارب

البلوجاية جميلة وليا عندك واحد شاى :)
تحياتى

سمع هوص (Abo 3li) يقول...

Silver Eyes

هيا كوارث فعلا... هههههه..
اول موقف ال هوا اول موقف قلته.. ولا الموقف صاحب المركز الاول؟؟
يعيني علي صاحبتك... علشان تحرم تلبس دهب... مخاطر الدهب: التعرض للحسد.. والتعرض للسرقة... ههههه..

شكرا يافندم علي الدعوة...
وشكرا كمان علي المجاملة الحلوة دي...

نورتيني ب أول تعليق... وبعد كده يبقي نفعيني بتعليق.. هههههه.. اومال انا فاتحها ليه؟؟ .. متعديش علي البلوج بس كده وخلاص...

تحياتي

ستيتة حسب الله الحمش يقول...

رسالة من صديق البرنامج الحاج عبد المعتمد ونقول ألو
ايوة يا حاج ايه قصصك اللي شبه كده؟
عبد المعتمد يقول لحضرتك انا من عائلة عجيبة فوق المريبة تحت المريعة لو كعب جزمة اتكسر بيعزوا هذا مباشرة للحسد والعين
وعليه فبصفتي الحاج عبد المعتمد ماشية من غير ما أبص على القصص دي خالص

لو حد حسدني يبقى اذكار الصباح والمساء ربنا جعلها لنا حائط سد
ولو حتى حاجة أصابتني فبقول قدر من الله وما أصابني لم يكن ليخطئني رفعت الأقلام وجفت الصحف

تعرف يا ابو علي باشا ان اللي بيخافوا قوي اكتر ناس بينضروا قوي
واكتر ناس تنحة مش بيحصل لهم حاجة
طب ما قدامك واحد ابن ناس طيبين كلنا مدينه 80 مليون عين
شفته جاله حاجة ولا بيأثر فيه حاجة؟ :)

بس قصة السجادة دي تحفةةةةةةةةةةة
روعة مش ممكن
اخوك ولد ولد حقيقي
ربنا يسترها من عفرتو بتاعي لحسن ضحكي ده اخرته وحشة :)

خواطر شابة يقول...

انا بقرأ كل يوم " اللهم انت ربي لااله الا انت عليك توكلت وانت ارحم الراحمين ماشاء الله كان وماشاء لم يكن ولاحول ولاقوة الا بالله العلي العظيم" وساعتها مبخافش لا من حسد ولا قر لاني الحامي هو الله
بس المواقف اللي زي دي بنسمع عنها كثير بل واحيانا بنشوفها رأي العين كرة صور في البيت متعلقة بقالها مدة كبيرة وفي مرة قريبة لي في زيارة قالت لي الصورة دي حلوة اوي تعرف لسه هي مخلصة جملتها والصورة نزلت على الارض هي الحمد لله محصلهاش حجة لانها كأنها تزحلقت ونزلت على الفراش الموجود انما الموقف كان غريب وعجيب
مع تحياتي

فراشة يقول...

السلام عليكم ..اهلا ابو علي

صحيح مؤمنه بوجود الحسد بس مكنتش بصدق انه ممكن يكون ف وقتها زي المواقف اللي انت كاتبها دي غير لما حصلت قدامي..

موقف حصلنا .. كنابنبيض شقتنا والعامل عطشان جبتله شفشق مياه هو الشفشق يتحب بصراحة جميل قوي كان من ليبيا وماما بتحبه قوي
المهم حطيت له المياه ف كوبايه شرب وبيقول الشفشق دا جميل قوي بووووووووم
والله والله الشفشق كان محطوط على الترابيزه والله انشق لنصفين بالضبط تنحنا كلنا والراجل قعد يقول والله مش قصدي احسدوانحرج جدا

موقف تاني كنت لابسه جيبه جديدة كل ماحد يشوفها يقولي دي حلوه قوي نفس اليوم ييجي اكتر من 5 قالولي حلوة رجعت البيت لقيتها مقطوعه حتى معرفش ازاي اتقطعت

بس كدا كفايه دول ههههه مع انه بيحصل مواقف من دي كتيييير قوي
والمفروض قبل اى حاجه نعملها بنسمي والاذكار طبعا الصبح وبليل بتحمينا من اي شر

وربنا يحميك واهلك من الحسد يارب

Sad Angel يقول...

هههههههههههههههههههه
فظييييييييييع

الموقف حصل مع خالى
كان فى سوبر ماركت وبعدين دخل واحد لصاحب الماركت وقالو ايه الحلاوة دى يا محمود راح فجاة لتر بيبسى بوم فرقعت
شويه وقالو تانى بس ايه الحلاوة دى يا محمود راح لتر كمان فرقع
لسه بيقول تالت ايه الحلاوة دى راح الراجل قالو امشى اطلع برة مش عايز اشوفك تانى
ههههههههههههههههههههههه

Tamer Nabil يقول...

ههههههههههه

دى قنابل نووية يا ابنى

واخطر منها كمان

ربنا يحمينا من عين الحسود

ربنا يوفقك ويكرمك

مع خالص تحياتى

سمع هوص (Abo 3li) يقول...

ستيتة حسب الله الحمش

عائلات كتييير اوي فعلا بيكون الحسد عندهم السبب في كل حاجة تحصلهم... مش عائلتك بس...

وعلي رأيك 80 مليون عين وبرضه مفيش فايدة...
ده اسطورة يادكتورة ستيتة.. ولا مرض نافع معاه ولا حسد نافع... حتي الدعي ربنا غضبان علينا ومبيستجيبلناش...


نورت البرنامج ياستاذ عبدالمعتمد

سمع هوص (Abo 3li) يقول...

خواطر شابة

الحمدلله ان الصورة محصلهاش حاجة..
وطبعا ربنا هوا الحامي من كل شر...
شكرا علي كتابتك للدعاء هنا..

نورتيني... تحياتي

سمع هوص (Abo 3li) يقول...

فراشة

هههههههههه... فعلا لما الموقف بيحصل في ساعتها المتهم بالحسد بيتكسف كسفة وحشة اووووي...

شكرا ياجميلة علي الدعوة .. اللهم امين... ربنا يكرمك..


وتصبحي علي خير

سمع هوص (Abo 3li) يقول...

Sad Angel

ههههههههههههههههههه... ايه الحلاوة دي يامحمود... موتيني من الضحك... انا لو مكانه كنت كسرت لتر علي ماغه... هههههههه...


البلوج نوووووووووور..
تحياتي

سمع هوص (Abo 3li) يقول...

Tamer Nabil

اخطر من النووي... احنا ممكن نجيب اشرس الحسيدة ونوجههم ناحية امريكا ونسفرهم هناك... هيرجعوها عالم تالت... ههههههههه...

شكرا يفند علي الدعوة ... ربنا يكرمك

تحياتي

Ms Venus يقول...

مش عارفة بس بردو مش بصدق فى الحسد


اكيد فى سبب لاى شىء بيحصل

اول تعليق ليا وزيارة لمدونتك


تحية ليك

سمع هوص (Abo 3li) يقول...

Ms Venus

انا تقريبا زيك... بس دي حاجة موجودة... وان كنت بحاول كتلفتش ليها...
لان القدر بتاع ربنا...
واكيد فيه سبب لكل حاجة...

نورتيني في اول زيارة وتعليق... ,ربنا يديم التواصل...

تحياتي

القمرالباكي يقول...

السلام عليكم

الحسد موجود ولازم نتحصن منه
وفي ناس بتحسد من غير قصد لان جربت الحسد من ناس قريبين مني ومعتقدش ان ده يسعدهم او ممكن كانت بتبقي صدفه
لان مبشغلش بالي بالموضوع ده الا لو حصل بعد محد علق علي حاجه وباظت بعدها او موقف زي ابن زميلتكم تعبت حصلتلي كارثه مرتبطه بكلام حد

ربنا يحفظنا ويبعد عنا الشر كله

وبعديم مانت ممكن تكون بتحسد ههههههههههه
شئ وارد برضه طيب حصلت مره معايا عيني جات فحاجه وقعت اتكسرت لكن غصب عني وكانت هايفه ب 5 جنيه فمتستهلش حسد اكيد معايا 5 جنيه اجيب زيها
في ممكن تيجي صدف مش معقول تكون عيني وحشه ويوم متحصل تبقي كده طيب لو 5 الالاف ماشي

خلي بالك من مدونتك لحسن عيني فيها
دومت بخير

لولا وزهراء يقول...

ابو على

-*-*-*

صباح الخير
البوست تحفه بجد
تسلم الايادى بصراحه انا مش مندهشه من اللى قرأته الحسد بيعمل اكتر من كده لو قعدت احكى لك على المواقف اللى بتحصل لى من الحسد ممكن بقى اعمل مدونه جديده واطلق عليها عين الحسووووووووود وطبعا حقوق الملكيه الفكريه لك انت وحدك ...
المهم انا هاحكى لك على موقف حصل من حوالى سنه او يمكن اقل بدون الدخول فى تفاصيل ممله جه لى عرض للعمل فى قناة دبى وكنت هاطير من الفرح المهم قولت لماما واخويا واقرب اصدقائى وخلاص ماشيه فى الاجراءات وكله تماموز فجاه اتصلوا بيا واحنا اسفين ونأجل السفر المهم م الاخر راح الموضوع طبعا انا كنت هاتجنن هو ايه اللى حصل وزعلت جدا جدا بعد الموضوع ده بحوالى اسبوع كنت فى مناسبه عند احد اصدقائى وهناك قابلت واحد انا عارفه ان عينه وحشه اوى وهو صديق شخصى لاخويا فوجئت بهذا الشخص يقولى دبى والناس اللى مسافره دبى بصيت له كده وقولت له الله يحرقك يا .... قولت له اسمه انت السبب الواد اندهش من الكلمه وعرفت ان اخويا فرحانه انى مسافره فقال لكل اصحابه ومن ضمنهم هذا الفقرى ابو عين تفلق الحجر نصين
على فكره عندى مواقف كتير اوى اوى عن الحسد بس بلاش بقى كفايه رغى كده

ربنا يكفينا شر ما يكون قبل ان يكون

زهراء

سمع هوص (Abo 3li) يقول...

القمرالباكي

عندك حق ساعات بتكون صدفة... وااحنا ال بعتبرها حسد... ساعات من باب الريبة وساعات من باب التهريج...
وممكن فعلا اكون حسد وانا مش واخد بالي... بس افتكر ان الحسد بيكون سببه ان الواحد يتمني زوال نعمة معينة من حد او علي الاقل يتمناها ل نفسه... وانا الحمدلله مبحبش ابص لحاجة مع غيري ب أي شكل...

وبالنسبة للمدونة انا هعلق عليها خرزة زرقة بقي... هههههههههه...

نورتيني... صباحك جميل

سمع هوص (Abo 3li) يقول...

لولا وزهراء

الجميلة زهراء.. اه الحسد موجود كتييييييير... بس اهم حاجة منركزش معاه علي قد منقدر...

ومعلش ياستي ربنا يعوضك خير بمكان احلي من قناة دبي ان شاء الله... ربنا يوفقك ويكرمك...

ورغيك بيفرحني... ف بلاش الاختصار.. خدي راحتك.. البلوج بلوجك...

ربنا يكفينا شر ما يكون قبل ان يكون.. امين..


نورتيني يا زهرا... صباحك بيضحك ويومك زي الفل ان شاء الله

star in the sky يقول...

ههههههههههههههههههههههههههههه
مواقف جاااامدة جاااامدة يعنى
وصحبك ده انت لسة مصاحبه مش خايف على نفسك هع هع هع هع هع هع


الحسد ايوة مؤمنة بيييييه جدااا حتى لو مش حصلى
مع ان كان فى كذا حاجة كده بيقولوا انى اتحسدت

بس بيتهيالى الواحد اتحسد او لا ده فى الار نصيبه يحصل له كده ولازم يرضى بس فى نفص الوقت مش يستسلم زى
يعنى الحسد بالنسبة لى زى القدر حاجة لازم تحصل لنا
بس مش عارفة لو الكلام ده صح ولا غلط


فى واحد اعرفه قريبنا كان دماغ يعنى من الاخر وذكاء وكده ما شاء الله عليه ودخل هندسة وفى الكلية معرفش يكمل حصلن معاه شوية مشاكل ومكانش قادر لا يذاكر ولا اى حاجة وتقريبا ساب الكلية الكل بيقول انه اتحسد


يارب ميكونش فى حسد من الانترنت
ههههههههههههههههههههههههههههههههههههههههههههههههههههههه

سمع هوص (Abo 3li) يقول...

star in the sky

للأسف لسه مصاحبه... وربنا يستر بقي... هههههههه...

مضمنلكيش ان مفيش حسد الكتروني من علي النت...
انا هعلق خرزة زرقا في البلوج.... علقي انتي عندك كف او شبشب اطفال... نيهاهاهانيهاها.. وش بيطلع لسانه...

نورتيني ياسومة... يارب تكوني بخير

من كل بستان زهرة يقول...

هههههههههههههههه

مش ممكن كل الي انت قولته في كوم
وموضوع البنت الصاروخ دي في كوم تاني

ده صحبك ده عينه مدوره ومئوره
عايزين تموته البنت يا مفتريين

فكرتني بحورية في مسرحية محمد صبحي

شوفت الموضوع ده مع ابن عمتي
الولد بجد زي القمر طول بعرض ودكتور
واحده شفيته وقالت لعمتي ابنك ده كامل من كله
أخر الأسبوع عمل حادث بالعربيه
بس ربنا يحفظه حصله كسر في الرجل وارتجاج في المخ
وشويه رضوض وبس
بس الحمد لله قام سليم ربنا يحفظه واحنا جميعا من الحسد

سمع هوص (Abo 3li) يقول...

من كل بستان زهرة

يااااااااااااااه... تصدقي كان دورها جامد اوي حوووورية...

"حصله كسر في الرجل وارتجاج في المخ
وشويه رضوض وبس"
بس؟؟؟؟؟؟ انتي كنتي عاوزة يحصله ايه تاني... حرام عليكي... حمدالله علي سلامته... ربنا يحفظنا جميعا...


شرفتيني بجد.... تحياتي..

wasf_elahsas يقول...

سبحان الله
ال انا فاكراه انه حد مرة جه عندي في الاوضة في المدينه وكنت مع واحدة صاحبتي معرفش ال جات دي قالك ايه
بعد اما مشت وقتع كوبايه كانت واقفه علي المكتب لوحدها مش فاكرة بالظبط علي ايه
بس وقعت علي 3 مراحل وقفت مزهوله من ال حصل
بس اللهم احفظنا من الحسد وسنينه
تحياتي

فكرة من الزمن ده يقول...

ربنا يسامحك على المقلب يا بتاع كدبة ابريل انا لازم ابلغ عنك يقبضو عليك انك من شباب كدبة ابريل

ربنا يرزقك الحب والاستقرار ان شاء الله وتبطل كدب واحلام يقظة

البوست فعلا يستدعي الرغي لان الحسد ده مالي حياتنا صحيح مش لازم نعمله علاقة لكل حاجة لكن ساعات مهما حاولت تنفي انها حسد مش هتقدر

انا اقول على موقفين
اول موقف كنا عند البحار وفي سباق عجل وكلنا بنتفرج وجانبي ست بتشاور على البت اللي ماشية في المقدة بالعجلة
ولسة الست بتشاور قبل ما تنطق لقينا البنت طايرة من العجلة والجميل اني ما شكيت في الست الا لما لقيتها دورت نفسها الجهة التانية وهي بتضحك ضحكة مكسوفة

الموقف التاني

اني اشتريت تحفة خزف لمرات اخويا ولمعناها ووقفت بعيد وهي رفعتها باديها كده وانا بابعد واقول لها ايوووووة كده جميلة وقبل ما اكمل الكلمة كانت وقعت في الارض 36 حتة طبعا اكيد انا موش ندمانة اني جبتها لها لكن لان ذكر كلمة ماشاء الله بيحمي من الحسد حتى اذا من غير قصد
تحياتي

мαησηα يقول...

هههههههههههههههه
اول ما تشوفنى تقول
بسم الله ماشاء الله
وماتجيبش صاحبك الاخرانى ده معاك ف اى مكان انا متواجدة فيييييييه

ههههههه يخرب بيت كده ده جبار بجد

الحسد يا ابو على عندى يتفتحله مجلدات

عايزة اقولك اننا بيتنا جديد لسه الحمد لله فى حيطة كاملة ف اوضتنا جاية نصيين

لدرجة اننا بقينا نشوف الشارع اللى ورا منها


وف الاخر حطينا وراها الدولاب

الحمد لله الله اكبر يعنى بطول وعرض

الحيطة علشان لو وقعت

واحنا نايمين محدش يكشفنا

احنا جبنا مهندسين يكشفوا على البيت قالولنا مافيهوش اى حاجة كل حاجة مظبوط بس اخيرا لجأنا لشيخ قالنا كل ده حسد :((

والله العظيم حقيقى اللى بقوله كل ده علشان طلعنا بالبيت خمس ادوار مرة واحدة :) واخد بالك انت خمسة هههههههه


لا بس بجد الموقف اللى بجد خلانى
مقدرتش امسك نفسى من الضحك والغيظ

واحد صاحب بابا اول مرة يجيلنا من بعد ماجينا من السفر

المهم اتفرج ع بيتنا حتة حتة ( ودى حتة فشخرة من دادى مش عارفة ابطلهاله ازاى ) كان محدش عنده بيت غيرنا

المهم يدوبك قعد فقلنا نحط الغدا

بابا كل ماياخد منى طبق يحطه
على السفرة الطبق طق هههههههههه ويقوم مكسور هههههههه
خلصلنا على طقم الصينى هههههههههههههه بتاع الضيوف
اللى مابيطلعش الا نادرا ده

انا بقه جيت على اخر طبق
وقلت لا بقه دى عييييييين بعلو حسى

الراجل قام بالواجب مقدرش يقاوم الاكل طبعا عمايل ايدى

دخل الصالون جيت افتح النور اللمبة حلفت ماهى شغالة عايزة اقولكم كنت هاولع فيه

لسه لسه .. زهقنا فقلت افتح التليفزيون والله العظيم راح مفرقع
هههههههههههههههههههههههههههه

هو طبعا حس قال انا مروح بابا قاله اه روح علشان تلحق المواصلات هههههههههههههههه

احنا تخيلنا انه لو بات البيت كان هيبقى بسوا الارض على اللى فيه

وتوابع اسبوع بحاله كل حاجة
ف البيت بتولع

كل مايتصل ماحدش بيرد عليه لدرجة انه بقه بيتصل من ارقام غريبة بس احنا فاقسين الحركات دى هههههههه

اظن بقه محدش عنده حد كده

قلــ"بـــلال"ــــــب فارس يقول...

طبعا
اكتر موقف شدنى
بتاع العصير ده
ياساتر يارب

الجواز و سنينه يقول...

يانهار ضحك
بص يا سيدى انا ليه مواقف كتير اوى فى العين و توابعها
مش فاكره حاجه اوى دلوقت
بس فاكره قصه مره حكاهالى اخويا كان ليه واحد زميله مره شاف واحد من بيشتغل بنا
بيبنى يعنى
و كان واقف على سقاله فى دور مرتفع
قال بص ده واقف ازاى على كل الارتفاع ده
مع الاسف السقاله اتكسرت
و الراجل مات

ربنا يكفينا شر العين و اللى بيحصل منها

سمع هوص (Abo 3li) يقول...

wasf_elahsas

كويس انها جات في كوباية... الحمدلله...
ربنا يحفظك.. من العين.. ومن الشرور..

تحياتي

سمع هوص (Abo 3li) يقول...

فكرة من الزمن ده

انتي لسه فكرالي كدبتي دي؟؟ هههههههههه... قلبك ابيض بقي..

وشكرا جدا علي الدعوة...

وعندك حق ممكن نحسد حاجتنا منغير منقصد...

تحياتي

سمع هوص (Abo 3li) يقول...

мαησηα

بسم الله مشاء الله ولا حول ولا قوة الا بالله... نبتدي الرد علي احلي مون مون في البلوجر..

طيب وعملتو ايه ؟؟؟ سيبين الشرخ كده؟؟؟

وبصراحة بقي ومتزعليش السيد الوالد يستاهل... هههههههههه..

بس ربنا يكون في عنكم في موجهة العين...

نورتيني ياقمر.. تصبحي علي خير

سمع هوص (Abo 3li) يقول...

قلــ"بـــلال"ــــــب فارس

شكلك محترف قصب زي حلاتي... ههههههههه...
نورتني يافندم
تحياتي

سمع هوص (Abo 3li) يقول...

الجواز و سنينه

يساتر... لا الحمدلله مشوفتش موقف اتسبب في موت قبل كده الحمدلله... اخرهم حوادث بس...

ربنا يستر علينا جميعا...

البلوج نووورر... تحياتي

E73 يقول...

بسم الله الرحمن الرحيم
السلام عليكم ورحمة الله وبركاته

لا حول ولا قوة إلا بالله

ربنا يعافينا يا رب

بس بصراحة أنا مش معاك في موقف السجادة
الولد كان بيلعب مال قريبتكم بقى وماله؟

المهم بالنسبالي الحمد لله مش متذكرة حاجة زي كدة

وربنا ميجعلنيش أتحسد أبدًا يا رب

ويحيمنا جميعا من الحسد

سمع هوص (Abo 3li) يقول...

E73

والله احتمال برضو تكون بريئة... هههههه..
ربنا يعافينا.. والحمدلله انك مش فاكرة مواقف رخمة زي دي...
ربنا يبعد عنك الحسد والحساااد...

ليكي وحشة...
تحياتي

sony2000 يقول...

اهلاااااااااااااااا ياابو علي
معلشي علي التشريده الل عملتها عندي
بس هعمل ايه بقي
طااااااااااااار بايت:)
انا عندي حد قريبي طول الوقت فيه الحاجه دي لدرجه انه بقي مشهور بيها اوي
مره كان بيقر علي صحه حد من قرايبنا قدامنا ودا كان هذار
قوم ايييييييييه؟لقيناالناي قعد يكح يكح
وربنا ستر انها وصلت للكح بس
ياااااااااه في فكره فدماغي اجيبو لحد شورير هنا فالقعده دي
ولا بلاشي...الحد دا غلباااااااااااان:)
ههههههههههه

norahaty يقول...

الواد صاحبك دا
ما تمشيش معاه
تانى خاف على نفسك
انا بقولك اهوه
ياريت تشوفله
سفرية ايطاليا
على مركب من
أياهم وادفعله
الفلوس....اسمع كلامى

Boky يقول...

ههههههههههههههه انت عارف أنا ضحكت ضحك
أنا عمرى ما افتكرت موقف فيه حسد فى حياتى أو مبفكرش فى الموضوع دة أصلا فمبخدش بالى

بس البوست بتاعك انت حاكى باسلوب جميل جدا مخلينى مستمتعة أوى
ولو ان الولد الصغنن اللى بودن متعورة صعب عليا فى أول موقف

والموقف بتاع احبك كمان
يا عم حرام سيبو البنات فى حالها شوية
:D
بجد موضوع البوست دة جميل وجامد جدا
بس صورة العين دى غلسة أوى بتخوف كدة يا أبو على

وصباحك قرنفل :)

eman mohamed يقول...

مدونتك جميله اوى وربنا يوفقك
واتمنى زياره مدونتى الجديده
مش عايزين نتجوز
http://entoeah.blogspot.com/

سمع هوص (Abo 3li) يقول...

sony2000

اهلا بيكي يا سونــــــي...
مش عارف ليه حاسس انك تقصديني انا بالشورير... مع اني مش كده خاااالص... وش برئ... هعهعهعهعهعهعه...
وايوة كده اعترفي اني غلبان... ههههههه...

منوراني كالعادة

سمع هوص (Abo 3li) يقول...

norahaty

طب مالاسهل اسافر انا ايطاليا... بس هاخد معايا عوامة علشان مبعرفش اعوم...


تحياتي يادكتورة نوراااا.. D:

سمع هوص (Abo 3li) يقول...

Boky

بوكي يا بوكي... يامرحبا يامرحبا...

منا حاطط الصورة دي علشان اخوفكم بيها نيهاهاانيهاهاها... وش شرير.. هههه..

سمع هوص (Abo 3li) يقول...

eman mohamed

شكرا ياقمر ده من زوقك...
وحاضر يفندم هنزوور البلوجاية الجديدة...
ربنا يديم التواصل...



تحياتي

Manar يقول...

هههههههههههههه

بجد بجد أكتر موقفين ضحكونى موقف البنت وموقف عصير القصب بالذات
لانه تقريبا حصل معايا بس فى كوبايه شاى
اللى حصل لكوبايتى بقى انها اتقسمت نصين بالظبط ، لا واللى زاد وغطى بقى ان كوبايه الشاى كانت سوووووووخنه ووقعت على رجلى ..
تخيل بقى

ربنايسترها معانا

_________________

دى أول زيارة لمدونتك وآلاقى النصايب دى كلها طيب لما أزورك تانى الاقى ايه بقى؟؟! .. :):)

تحياتى

سمع هوص (Abo 3li) يقول...

Manar

اهلا اهلا يامنار,,,

المرة الجاية هتلاقي كوارث مش مصايب .. هههههههههههه...

نورتيني... ومستني الزيارة الجاية..

هراء لا داعى له ..... يقول...

مسابقة أجمل طفل فى مصر !!!!

********

بس الموقف إللى عاجبنى جدا بتاع صاحبك دا

سمع هوص (Abo 3li) يقول...

هراء لا داعى له .....

انا كمان كنت مستغرب زيك... ال اجمل طفل ال .... هههههههههههههه...
قوي اوي صاحبي ده.... مش بيعاكس... بيمووت علي طووول... ههههههههه

نورتني يباشا

صمت المشاعر يقول...

هههههههههههههههههههههه كل مواقف فظييييعه كل موقف ابشع من التاني

بصراحه موقف البنت ضحكني علي الرغم انه موقف مؤسف بس الظاهر ان صاحبك دا مبروك

وموقف الكوبايه غريب خالص

فعلا العين تفلق الحجر

شكرااا علي البوست

جارة القمر يقول...

ازيك يا ابو على ؟؟ ايه اخبارك؟

ايه المواقف الصعبة دى يا بنى لا بجد تفوقت على كل حاجه ههههههههههههههه

خاصة اخر واحد دا ايييييييه التمكن دا لالالا فظيع

Bent Men ElZaman Da !! يقول...

ضحكنى اوى الموقف الاخير
انا من الناس اللى بتقتنع بالحسد جداااا
واحده صاحبتى شافت دراعى قالتلى ايه ده انتى بيضا كده ليه وراحت مصوره دراعى جنب دراعها
وحياتك تانى يوم اتحرقت فى نفس الدراع واثار الجريمه موجوده لحد دلوقتى

وواحده صاحبتى تانيه عينيها مأوره ومدوره
دى كانت متخصصه تحسد اى بنت تتخطب قبل ما هى تتخطب
حسدت واحده فى نفس الاسبوع فسخت خطوبتها ومواقف كتير من كده
وحسدت مامتى كانت واقفه على السلم بتعلق حاجه فى الشقه
بتقولها ايه ده انتى قادره تطلعى فوق كده يا طنط
الحمد الله ماما بقدره قادر راحت ضاربه شقلباظ ولاقتها على الارض
بركاتها هايله صراحه :D

سمع هوص (Abo 3li) يقول...

صمت المشاعر

العين تفلق الحجر والكوباية... ههههه..

بس مقولتلناش علي موقف عندك؟؟؟

نورتيني... ربنا يديم التواصل...
تحياتي

سمع هوص (Abo 3li) يقول...

جارة القمر

انا الحمدلله... مازلت اتنفس... وانتي عاملة ايه؟؟؟ يرب تكوني بخير...

انا اصحابي كلهم متمكنين... كل واحد متكمن في اختصاصه.. مش مجرد هواه... هههههه..

تحياتي... تصبحي علي خير

سمع هوص (Abo 3li) يقول...

Bent Men ElZaman Da

اهلا اهلا اهلا بيكي...

يعيني يبنتي والله صعبتي عليا... اسوء حاجة فعلا الحسد ال بيسبب مرض او جريمة زي ال حصلتلك.. معلش ...
بس حاسيتك فرحانة في مامتك وانتي بتحكي الموقف بتاعها وهيا بتضرب الشألباظ... هههههه... سلامتها وسلامتك الف سلامة...

اللهم احفظك وبارك فيكي..
سلااااام

احاسيس ايوشة يقول...

الحسد مذكور فى القران وبيحصل فعلا
بس مش مبرر لكل افعالنا طبعا
كان بودى احكى قصص كتير بس معلش مرت تانية
متشكرة للزيارتك للمدونة

سمع هوص (Abo 3li) يقول...

احاسيس ايوشة


خلاص مستني الحكايات في ووقت تاني ان شاء الله... الزيارة دي متتحسبش... مستني ال بعدها....

نورتيني..
تحياتي

ريمان يقول...

السلام عليكم




بالنسبه بقى لموضوع الحسد والله فى حاجات كتير بتحصل بيكون فعلا الحسد ليه دور كبير فيها وبيكون هو السبب


والله المواقف كتير ههههههههههههههههه

هقولك موقف صغير اوى حصل معايا

واحده صاحبتى وانا فى الكليه شافت شعرى فقدت تسرح شعرى فى صمت رهيب

تانى يوم لاقيت بنات الكليه جايين يقولوا عايزين شنوف شعرك دى فلانه بتقول انه حلو يخرب بيته

والله من ساعتها لحد الوقتى انا بعانى من سقوط شعرى

بقالى سنتين اهو وشويه وروحت كشفت كتير على شعرى وباخد علاج شعان يرجع زى الاول


وفى مواقف كتير من دى بس والله مش بعلق الحاجات دى على شماعه الحسد

تحياتى لك

سعيده بمرروى هنا

سمع هوص (Abo 3li) يقول...

ريمان

يساتر... ايه البنات دي... انتي الغلطانة منتي عارفة انكم بتغيرو من بعض في الحاجات دي.. وبتحسدو بعض...
سلامة شعرك... وربنا يوقف تساقطه...

نورتيني ياريمان يقمر

Wanda يقول...

صباح الخير
ايه المواضيع الربيعيه ديه :-)

الحسد
مبركز فيه
انا بركز فى حالى انا
انى محسدش حد و لو حسيت انى حايز اكون حسدت بقراء الموعذتين فى سرى انا على الشئ الى شد انتباهى قوى كده

بس موضوع الجزم ده حصل معايا
:-)))
اول سنة فى الكلية اشتريت جزمة لونها احمر :-) مش احمر فاقع نبيتى يعنى
و كنت مبسوطة بيها جزمة لون و كعب و مريحة
و اهو اتعتقت من لبس الجزم السوداء
و مرة ماشية فى الجامعة (اول سنة بنبقى فى الجامعة )
و سمعت حد بيقول لصاحبة ياعينى على الجزم الحمراء يا سيدى
انا بصراحة انبسطت :-) انى بتعاكس (صحيح هى الجزمة هى الى اتعكست بس انا منكرش انبسطت :-)
و بعد خطوتين لاقيت نفسى دب فى الارض معرفش اتكعبلت فى الهواء ؟؟
:-))))))))))))))))))))))))))))
مقولكش على الكسفة الى كنت فيها و قمت انبفض التراب من هدومى و عينى بتحود على نحاية الصوت و لاقيت واحد بيبص فى الارض و الثانى جانبه فطسان من الضحك و بيخبط على ظهره و يقوله عينك يا عم براحة البنت كانت رجلها حتتكسر :-)))
بصراحة بعدها دهنت الجزمة على بنى خفيف علشان لونها ميشدش الناس قوى كده
و بصراحة مفسرتهاش على انه حسد ، الاغلب انى انا الى اتخذت مع الكلام و مركزتش فى الطريق :-))
و بطلت اركز مع الكلام (معاكسة كانت او تريقة او اى كلام و خلينى فى حالى و امشى بدون حوادث :-)

سمع هوص (Abo 3li) يقول...

Wanda

بنت عمي جات.. بنت عمي جات..
جزمة حمرا ومش عايزة تتعكسي... هههههههههه... كويس ان ربنا ستر واتكعبلتي بس....

نورتني ياون ون....
صباح الفل عليكي

TIMMY !! يقول...

ههههههههه

و الله ما أنا لاقي حاجة أقولها يا عم الباشمهندس !!

سمع هوص (Abo 3li) يقول...

سمو الأميرة سارة

اااااه مون مون حكتلي... انتي كمان عنيتي منه ولا ايه!!!

كويس علشان تجيبي لبس جديد كل يومين... ههههههههههه...

نورتيني ياسمو الاميرة.... بقالك كتير مش بتزوريني...

تحياتي

سمع هوص (Abo 3li) يقول...

TIMMY !!


كفاية انك شرفتني.... يارب تكون بخير ياكبيييير

اقصوصه يقول...

loooooooooooool

بصراحه المواقف تحفه

عن نفسي مثلك ما اؤمن وايد بهالحسن

الا انه كما قلت حقيقه لايمكن انكارها

حاليا لا يحضرني شيئ من المواقف :)

مصعب صلاح يقول...

السلام عليكم
انا عارف ان الحسد موجود لكن فيه حاجات للوقاية من الحسد ...
لاننا احيانا بنمنع نفسنا من النجاح بسبب الحسد !!
يعني أنا مثلا بحب اتكلم مع مدرسيني ف المدرسة وبيعجبوا بأسلوبي ف الحوار وخصوصا اني ليا برنامج اذاعي اسمه حوار الاجيال
واحد صاحبي لما سمع حديث الطلبة وشكرهم للبرنامج قالي بلاش تكمل عشان ما تتحسدش
--
أما بالنسبة لموضوع الحسد دا حصل معايا لما طلعت الاول ف سنة سادسة ابتدائي على مستوي الإدارة تعبت وظهرت أورام في كل جسمي بدون سبب واضح
عموما انا لسه عايش وكل واحد اتحسد لسه عايش
الحسد مش بيموت

سمع هوص (Abo 3li) يقول...

اقصوصه

احسن حاجة انك فعلا متركزيش مع الموضوع ده....

نورتيني ..
تحياتي..

سمع هوص (Abo 3li) يقول...

مصعب صلاح

وعليكم السلام...
الحسد ممكن يسبب حاجات اسوء من الموت...
ربنا يحفظنا جميعا...

تحياتي

MONTY يقول...

العين فلقت الحجر
انا كان عندى خاتم بلولايه كبيره
جت واحده انا مجرباها قبل كتييييير
شافت الخاتم وهو كان على الطرابيزه وخدته وقالت وااااااااااااو تحفه
وبعدين وانا بخده منها وقع من ايدى معرفش ازاى واقسم بالله اللولايه اتقسمت نصين بقدرة قادر
فعلا سرها با تع لا واللى يغيطك انها معلقتش
عارف دول بتوع
very very beautiful

سمع هوص (Abo 3li) يقول...

MONTY

يساتر... والخاتم كان غالي؟؟؟ هههههههه..

يلا تعيشي وتكسري...
ربنا يحفظك... ويبارك فيكي..


نورتيني.. تحياتي..

مريم مر العمراوى يقول...

شركة تنظيف بالجبيل

شركة كشف تسربات المياه بالجبيل

شركة تسليك مجارى بالجبيل

شركة تنظيف مجالس بالجبيل

شركة نظافة بالجبيل

شركة تنظيف شقق بالجبيل

شركة رش مبيدات بالجبيل

شركة تنظيف خزانات بالجبيل

شركة تنظيف منازل بالجبيل

شركة مكافحة النمل الابيض بالجبيل

شركة تنظيف بيوت بالجبيل