الاثنين، 17 مايو 2010

انا بكره ام الشمس...


بأعتباري كائن خفاشي... يعشق الظلام... البرد... الهدوء...
حاليا بعيش اسوء فترات السنة...
والمصيبة اننا لسه في اول الصيف...
ينهار اسوود... اومال شهر تمانية هيبقي عامل ازاي!!!
بصو .. انا عارف ان معظمك بيحب الشمس...
معظمكم بيحبو الصيف...
بس انا لا وكلا ولن...  وكل ادوات الاعتراض ال في اللغة العربية واللغات الشقيقة كمان...
انا مش بكره في حياتي اكتر من الشمس...
بكرهك ياشمس...
بكره الصيف...
بكره الصيف حتي والجو معقول...
بكره النموس ال بينشط في الجو المنيل ده...
بكره الشمس حتي في الشتا...
مبطقش اشوفها...
تقولو فامبير بقي ... تقولو عدو النهار... مش مهم...
بس انا فعلا بكرهها...
بكره الاحساس بالدفئ او بالحرارة....
مبعرفش اعيش بشكل طبيعي غير والجو فيه نسمة سقوعة...
 ودي مبتحصلش غير قليل جدا علي مدار السنة...
علشان كده معظم ايام السنة مش طبيعي...

الهيعترض علي كلامي ... ويقولي انه برضه بيحب الشمس... ومبيحبش البرد... ولا الشتا...
هنط في كرشه....
ايون...
ال خايف علي كرشه مينرفزنيش....
طب استني بلاش انط في كرشك... انا هقنعك...
ببساطة...
لما تبقي راكب اتوبيس ومزنوق في شارع الهرم وعرق الشعوب بينساب عليك... بتبقي مبسوووط؟؟؟؟
طب بلاش دي...
لما بتبقي راكب ميكروباص ...  وبرضه مزنوق بس المرة دي علي المحوور – الواقف خمسة كيلو – وتبقي راكبة معاك واحدة ست ضاربة "افترشيف" وفاكرة انه كالونيا خمس خمسات... ومع العوامل الحفازة المتمثلة في الحرارة بيحصل تفاعلات... بذمتك مش بتبقي – بردون يعني- عاوز ترجع....
بلاش دي خليك ياسيدي وصلت ميدان رمسيس...
الشمس مش بتسيح نفوخك... وتخليك عامل زي الفرخة السكرانة...
طب بذمتك لو عرفت بنت علي النت واديتك ميعاد فشنك علي كوبري قصر النيل..  تحب الموضوع ده يحصل في الصيف... علشان كل السوائل ال في جسمك تتصفي؟؟ ولما ترووح البيت تغني حلو وكداب ليه صدقتك؟؟؟...

بصو بصو.... انا مليش دعوة بيكم انتو احرار... خليني في نفسي...
انا رواحت النهاردة في ساعتين واربعين دقيقة في زحمة غير طبيعية... في عز الحر...
طبعا اول موصلت البيت .... جريت علي الدش حبيبي... وفضلت واخده في حضني لحد ما درجة حرارة الدماء في نفوخي نزلت من درجة الغليان....
ولما خرجت اكتشفت الصدمة الكبري...
بما انكم عارفين اني عايش لوحدي... يعني شقة عٌزاب...
واقصي درجات الترفيه في الشقق ال من النوع ده... هوا المروحة البوكس ....
الصدمة بقي كانت ان المروحة  - الله يخرب بيتها – بااااااااااااااااااااااااظت... حبكت تبوظ النهاردة...
طبعا انا ولعت شعلة وعملت مظاهرة في البيت.. زي اعلان شيفورليه الدبابة وقعدت اقول : المروحة ال حيلتي بااااظت... باااااااااااااااااااااااااظت... بااااااااااااااااااظت...
طبعا مش هحكيلكم علي شكلي عامل ازاي دلوقتي... انتو ممكن تكونو متخيلين الحالة ال انا فيها...
انا عامل دلوقتي زي الملاكم ال اِطحن ضرب وقاعد في ركن الحلبة والمدرب بتاعه بيفوقو... وبيرش عليه ميه بالجردل.. ويلطش فيه علشان يفوق... ده غير اني شبه الملاكم -  بردووون يعني - في اللبس كمان حاليا... احم احم...

انا اعرف ان لو درجة الحرارة وصلت 50 من حق كل الموظفين ميروحوش الشغل... والطلاب مينزلووش الجامعات ولا والمدارس... حسب القانون...
بتهيألي حتي لو وصلت 60 هيقولولنا 46 زي النهاردة كده... علشان ننزل ونفرهد اكتر...

لسه حد بيحب الشمس او بيطقها؟؟؟
كفاية ان الحكمة المصرية بتقول... ان القمر مفيد اكتر... لان القمر بينورلنا بليل والدنيا ضلمة... انما الشمس ملهاش لازمة علشان بتطلع بالنهار والدنيا نوووور.... هعهعهعهعهعهعهعهعهعهعه....


من تحت الحنفية كان معكم... الملاكم الفامبير ابوعلي...

هناك 61 تعليقًا:

Ramy يقول...

ازيك يا ابو على

بالرغم انى فى حالة نفسية منيلة

بس ميهنش عليا الكلام اللى كلة عرق دة محدش يا خد بأيدة

بص يا سيدى

انا بحب الشتا مووووووت علشان بحب اخرج فى السقعة

واقعد عندنا فى الكورنيش اة عندنا الأقصر

اللى احيانا بتوصل بالليل درجة الحرارة فيها لصفر انا مش بغيظك انا بقولك حقيقة علميةههههههههه

يا عم سامى كل دة وانت حالتك النسية منيلة اة واللة زفت

بس انا ممكن اهرج فى اشد المواقف حرارة

مش هطول عليك

بس فى المدينة الخرى اللى بعيش فيها اقدر اقولك انت بحالتك دى ممكن بعد الشر تتحمر من الشمس

انا بتكلم عن شرم

الشمس بشعة يا صحبى

تحرق بجد


فانت عندك حق القمر افبد بينور بالليل و الدنيا ضلمة

انما الشمس ملهاش لزمة


لنا اللة يا ابو على


شكرا طولت انا عارف معلش استحملنى المرة دى


يالا تصبح على خير

سمع هوص (Abo 3li) يقول...

samy

سلامة حالتك النفسية.. يارب تتعدل...

صفر... ياااااااااااااااااااااااااه... نفسي فيه... الصفر الوحيد ال بحلم بيه...

لنا الله ياسامي.. في الجو الربيعي ده...
تصبح علي خير...
تحياتي..

رحلتنا في الحياة يقول...

وانا كمان بكره الصيف والشمس
واكتر حاجة بكرها انفلونزا فى الصيف عاااااااا :(

Lady E يقول...

اخيرا في حد بيكره الشمس وكائن ليلي :)

بس انا مش بكره الشمس أوي كده يعني بحبها في الشتا أحيانا

وبحب القمر جداااااااااا

سمع هوص (Abo 3li) يقول...

احاسيس آيوشه

دي بتبقي رخمة رخامة... انفلونزا الصيف دي...
ربنا يبعدك عنها.. ويعدها عنك...

صباحك بيضحك...

سمع هوص (Abo 3li) يقول...

Lady E

انا عدو الشمس الاول في الشرق الاوسط وافريقيا...
الظاهر ان كل الكائنات الليلية ال زي حلتنا بيحبو الشتا والقمر...

نورتيني...

صباح الفل...

لــــ زهــــــراء ــــولا يقول...

ابوعلى


انا لسه راجعه من بره ومش عاوزه اقولك نزلت الصبح علشان اخلص مصلحه ومش تنفع غير بالنهار الجو بقى تيييييت
انا من اسكندريه يعنى الرطوبه عندنا تحفه بصراحه فله شمعه منوره ....


بكل صراحه اعلنها انى لا اطيق الشمس ولا اطيق النزول فيهااااااا خالص مالص
ابعت المروحه اصلحها وممكن اقلبها تكييف ايه رايك بقى ؟؟؟

زهــراء

من كل بستان زهرة يقول...

أبو علي

أنا حسيت بالحر من كلامك
مش قادره أشوف الشمس

حراااااااااااااااام عليك
لازم يعني كنت تقلب علينا المواجع
الواحد بيحاول ينسى الحر شويه

بس سيبك انت لما تروح البيت كده وتلاقي المروحه والتكييف شغلين الأتنين
يااااااااااااااااااه مقولكش على المتعه
تروح تاخد الدش الي هو
وتيجي تقعد في الهواء البارد
ياسلاااااااااااااااااام

سمع هوص (Abo 3li) يقول...

لـــولا وزهراء

ياااااااااااه علي غلاسة المشاوير بتاعة الصبح وخصوصا لو مشاوير لمصالح حكومية...

وفعلا الرطوبة شئ صعب مع الحر ده....
ربنا يكون في عونا...

والمروحة هبعتهالك عاوزها ترجع عربية مش تكييف... هههههههه...

منوراني يازهرا...

سمع هوص (Abo 3li) يقول...

من كل بستان زهرة


مش عارف ليه حاسس انك بتغيظيني!!!
لالالالالا مش هظلمك...

بس انتي شكلك فعلا بتغيظيني... لاااااااااااااا...
انا ميهمنيش... انا بحب الحر... بموت في الحر ... روح قلبي الحر .. لو كان الحر انثي كنت اتجوزته اصلا....

هعهعهعهعهعهعهععه.... متغظتش...


منوراني...
تحياتي

سارة درويش يقول...

واناااااااااااااااااااااااااااااااا

انا بحب اوووووي الدنيا تبقى مغيمة والله

بكره الشمس جداً جداً جداً

تيجي نعمل حملة كارهي الشمس ؟؟؟؟؟



ع فكرة :)

شكراااااااااااااااااااااااااااااااااااااااااااً بجد على الشير في السايد بار تسلم لي يا ابو علي :)

سمع هوص (Abo 3li) يقول...

سمو الأميرة سارة


الله علي الدنيا وهيا مغيمة... بجد اجمل جو بستمتع بيه...

انا موافق جدا... ومستعد ابقي العضو المنتدب للجمعية دي ياسارة...

ولا شكر علي واجب ... مش مستاهلة شكر خالص.... اكيد فرحتنا بيكي ... زي فرحتك برضه...

الف مبروووك كمان مرة ياسارة,,, وقوليلنا بقي بالنسبة لل زي حلاتي ال مش هتساعدهم ظروفهم يحضرو التوقيع... قوليلنا نقدر نشتريه منين في القاهرة؟؟؟

MONTY يقول...

بااااااااظت ....باااااااظت هههههه مع انى زعلا نه منك علشان مش بتدخلى لكن معلش مقدرش ما عديش (انا كنت معديه قولت اخد الجمعيه )ههههههههههههه


على فكره انا كمان كائن ليلى ومبحبش النهار خاااااالص وبكره ام الشمس حتى الناس بيبقوا شكلهم غريب ماتفهمش ليه؟؟؟؟

ولو هموت استحاله اخرج قبل الساعه 7


معلش يا بو على استحمل شويه وحاول تصلح المروحه او تقضى اليوم تحت الدش اهوه طراوه برده

سواحة يقول...

انا بقى بحب الشمس جداااااااااااااااااا
:-)))))))))))))))))))))))))))))))))))))))))))))))))))))))))))))))))))

ورينى حتعمل فيا ايه
ددا انت عقبال ما توصلى حتكون ثلجت و وقفت مكانك :-)))))

و بعدين على راى واحد بيعزنى قوى
اه تدريب على النار :-) علشان اخرتنا معروفه :-)

خواطر شابة يقول...

ياسيدي العمر مش بعزقة فمش حأرد وأقول لك ان أنا اليوم اللي مفيهوش شمس بأحس فيه بكأبة ابدا ولا حأقول ان أحسن سماء بالنسبة لي هي السماء الصافية التي تتوسطها شمس دون غيوم لا يأخويا انا مش حمل حد ينط في كرشي انا لسه مشبعتش من الدنيا
تحياتي وودي

لــــ زهــــــراء ــــولا يقول...

ماشى يا ابوعلى
المروحه ترجع عربيه بى ام دبليو بالسواق والتكييف هديه

وفعلا المشوار كان لمصلحه حكوميه وصباح الحر بجد والله حاسه انى تعبانه اوى ومرهقه جدا جدا

فى انتظار المروحه

زهراء

غير معرف يقول...

انا بموت فى الشتا
وبما انى من البرنسيسات المدلا لات اللاتى يصحون من النوم الساعه 6 المغرب
تقريبا كده مااعرفش حاجه عن الشمس
الا من خلال تظلمات سيدتك
فا ياسيدى لو دى فعلا الشمس
يخرب بيتها وانا ناقصه
ال عرق الشعوب ال ده انا مابستحملش ينساب عليا ماء الصنبور من غير داعى
مابالك عرق الشعوب المركز بااصلته وكل فوايده خام لسه طالع من البريمه
لالالالالا انا بضم صوتى لصوتك
كل سنه وانت مش حران

وخاليك كول

فراشة يقول...

استاذ استاذ انا رافعة ايدي من بدري وبقول انا كائن ليلي انت مش شايفني ولا عشان قصيره يعني ..
مش عايزة أتكلم ع زنقة الاتوبيس دي وانا قصيره ف ببقى يدوب عند اكتاف الناس ومش واصلني لا نور ولا هوا :)
مؤيداك جدا بس مش لدرجه الكره بحبها وقت الغروب وانا بقولها مع السلامه عايزة أبدأ اليوم بتاعي بقى
الظاهر الشمس زعلت مني فمبقتش تدخل ف بيتنا الجديد
انا اصلا عيني مش بتفتح ف الشمس بمشي تقريبا مغمضة
سلامة مروحتك روح صلحها لتفطس م الحر يابني ولا أقولك هات مروحة صغيره م اللي فيها اوبشن رزاز المية (بتاع اعلان النت دي)

غير معرف يقول...

انا بكره الشمس لاسباب صحيه بحته

وانا بحب الشتاء برضو لاسباب صحيه بحته وهي ان بشرتي لا تتحمل الحر والصيف وخلافه

لكن مابحبش الليل ابداااا

عموما احمد ربنا ان عندكم ميه... الميه عندنا مقطوعه :(

تحياتي

سمع هوص (Abo 3li) يقول...

MONTY

لالالالا.. ده اتهام خطير... انا فاتني بس اخر بوست... ال قبله كنت بايت علي البلوج وكنت صاحب اول تحليق... هههههههههه...

الناس فعلا شكلها بيتغير الصبح... تحسي بتكشيرة و111 في راسها...

منوراني.. تحياتي..

سمع هوص (Abo 3li) يقول...

Wanda

للاسف مقدرش اعمل حاجة... دنتي بنت عمي الغالية... ههههههههه..

يااااااااااااااريت اتلج... انا بموووت في البرد بحبه جدا... وعلي فكرة انا من النوع الممكن البس صيفي جدا في اسقع درجات الحرارة والمطر.. علي الاقل عندنا هنا...

تدريب؟؟ اعوز بالله... ربنا يحسن اخرتنا ويغفرلنا يستي...

سمع هوص (Abo 3li) يقول...

خواطر شابة

هههههههههههههههههههههههههههههههه.... ايوة كده... الواحد لازم يحافظ علي كرشه.. ههههه...

يمكن جو المغرب مش زي الجو هنا... مش بالرطوبة والحرارة دي...

فكري تاني ... عيدي نظر... الشمس دي متستهلش حبك ده...


تحياتي..

سمع هوص (Abo 3li) يقول...

لـــولا وزهراء

ايوة مهي المشاوير دي بتخلي الواحد يفهرد...

يسلاااااااااااام... بالسواق كمان!! ده ايه الدلع ده... هما كده الاسكندرانية ... اهل كرم.... لو مفهاش غتاتتة . ياريت تبعتي مع العربية كيلو سمك... وكيلو هريسة من احمد حسنين...

والمروحة في الطريق..

سمع هوص (Abo 3li) يقول...

الشـوكة الــنـاعـمـة

هههههههه... يعني البوست كان مفيد ليكي من الناحية العلمية المعرفية المعملية الفذة, لانك تعرفتي علي كينونة الشمس...

وكل سنة وانتي بتصحي الساعة 6.. وكوووووووول ديما...

سمع هوص (Abo 3li) يقول...

فراشة

تعرفي فعلا القصيرين بيصعبو عليا في المواصلات جدااااا... لاسباب كتيرة ده من ضمنها...

مممممممممم... بتحبي وداعها؟؟ لاااا علشان تنضمي للنادي بتاعنا لازم تكرهيها في كل الاوقات... ممكن تعتبري كرهها بيديلك سعادة وانتي شايفاها بتغرب وبتغوووور...

ههههههههههههههههههههههههههههههههههههههههههههههههههههههههههههههههههههه
تصدقي فكرة حلوة .. متعرفيش الاقي فين المروحة دي؟؟؟

سمع هوص (Abo 3li) يقول...

فتاه من الصعيد

لاااااااااااا.... ربنا يكووون في عونك... حر وانقطاع ميه؟؟؟
انا في ظروف مشابهة ممكن يحصلي حاجة مش ظريفة...
الحمدلله...
ربنا يرجع الميه بالسلامة...

تحياتي..

لــــ زهــــــراء ــــولا يقول...

ابوعلى

حاضر وحضرتك عاوز نوع السمك ايه وياترى مش عاوز جمبرى او كابوريا

انت كمان عارف احمد حسنين
ماشى عيونى تحت امرك

زهراء

سمع هوص (Abo 3li) يقول...

لـــولا وزهراء

ممكن بوري وبلطي كفاية... وطبعا الجمبري والحركات دي اساسي.. والسلطات برضه اكيد...

احمد حسنين مشهوور علي مستوي الجمهورية... سيبك من دي... انا اعرف اماكن ومزانق في الاسكندرية يمكن انتي متعرفهاش... هعهعهعهعهعهعهعهعهعه...

وتسلملي عيونك..

هراء لا داعى له ..... يقول...

مروح فى ساعتين و أربعين دقيقة !!!!!


دا الواحد بيسافر من أول المحافظة لأخرها فى وقت أقل من كدا



عامة أعتقد سوف يكون صيفا حارا سعيدا بالنسبة ليك ....

سمع هوص (Abo 3li) يقول...

هراء لا داعى له .....

والله انا برووح محافظتي من القاهرة اسرع من كده بكتييير كمان... بس نعمل ايه بقي!!



فعلا شكله صيف مش هيعدي علي خير.. ربنا يستر..

لــــ زهــــــراء ــــولا يقول...

السلام عليكم ورحمة الله وبركاته

انت موتني من الضحك على يومياتك في الشمس دي على فكرة مفجأة... انا بموووت في الشتا وبحب الجو يكون فيه لسعة برد خفيفة مش صقيع وكدة ومسميني في الشغل الكائن الذي يعيش في الظلام لاني بمووووت في الهدووووووء والضلمة ولما ضيوف يجوا يناموا عندنا بعيشهم في كوابيس لاني مبعرفش انام غير لما الدنيا تبقى كحل ان الستارة بس مش مقفولة وبصيص من نور الصباح صحاني بيكون يوممش فايت بحس ان الضيوف هيبوسو ايدي عشان افتح نور المطبخ طب وناسة اسفة معنديناش وناسات ..طب الباب ..نوو ههههههه..سعدت بقرأة البوست يافندم وتأكد ان هناك كائنات غريبة الاطوار يعيشون في الظلام ..ههههه

لـــولا

Sarah Sobhi يقول...

اي نو اكسزاكتلى وات يو تاكين اباوت

احنا معندناش زحمه وزنقة موصلات الحمدلله و غالبا كمان موضوع الروايح ده مفيش

بس عندنا مناخ صحراوى صميييم

سعات بتعمد انى اروح متأخر عشان الجو يكون اهدى شوية
بس ابداااا الشمس حارقة لحد الساعه 5
والأدهى ااننا فى شهر 5 :(

القطب الجنوبى هو الحللل
6 شهور غروب
زي الفل ده الصيف بتاعهم
بس لما ترجع بقى مش هتستحمل حد يكلمك عن شاعرية منظر الغروب او عن قد ايه البطريق كائن كيوت

P A S H A يقول...

أبـــو علي

لو لسه الدش شغال .. خدني جنبك

D:

تحياتي

سمع هوص (Abo 3li) يقول...

لـــولا وزهراء

يااااااااااااه كأنك بتتكلمي عني يا لولا... انا زي حلاتك كده لازم الدنيا تبقي كحل...

ايه ده ؟؟ احنا نعتبر كائنات غريبة الاطوار.... وانا اقول برضه الناس بتستغرب ليه!! هههههههههه

منوراني يالولا..

سمع هوص (Abo 3li) يقول...

Sarah Sobhi


ويلكام سارة ... ياالف وييت مورننينج... ويلكام ويلكام...

5؟؟ دي الشمس مستمرة ل 7 بالتوقيت الصيفي اللعين....

انا موافق علي موضوع القطب الجنوبي ده...

هوا البطريق كائن كييوت؟؟؟ بالعكس ده كائن اهبل... مبيعرفش يطير... ولا حتي عارف يمشي عدل...


صباحك زي الفل ياسارة...

سمع هوص (Abo 3li) يقول...

P A S H A

فيه نافورة قدام شارع العريش... ممكن تاخدنا كلنا .... ههههههه...

Ms Venus يقول...

انا كمان بحب الشتاء جدا وبكره الصيف

وعدوتى اللدودة هى الشمس

الحكاية مش بس الحر منها

لا انا اصلا مش بعرف افتح عينى نهائى فى الشمس


الظاهر انى زيك يا ابو على من عائلة الفامبير ههههههههههههههههه

سمع هوص (Abo 3li) يقول...

Ms Venus

الشمس دي رخمة اوووي اصلا.... بكرهها اوووي...

مرحبا بأختي الفامبير... خالي بالك بقي من "بلايد" ... هههههههههه....

منوراني...

د. ياسر عمر عبد الفتاح يقول...

البيه دراكولي الجنسية زيي
اللي زينا كثروا أوي في البلد على فكرة

أنا بكره الشمس

لــــ زهــــــراء ــــولا يقول...

سمع هوص (Abo 3li) يقول...
لـــولا وزهراء

يااااااااااااه كأنك بتتكلمي عني يا لولا... انا زي حلاتك كده لازم الدنيا تبقي كحل...

ايه ده ؟؟ احنا نعتبر كائنات غريبة الاطوار.... وانا اقول برضه الناس بتستغرب ليه!! هههههههههه

منوراني يالولا..

" ربنا يعزك يافندم المدونة منورة بأبدعاتك ... احنا فعلاَ كائنات غريبة الاطوار هههههههه لان كل حاجة في حياتنا بقت صاخبة والهدوء معدش ليه وجود والضلمة بقت معناها التواري وليس طلباَ للهدوء وفي الوقت اللي العالم فيه مفتوح على بعضة والدنيا بقت قارة صغيرة احنا بنقفل علينا حياتنا ونعلق يافطة ممنوع للمتطفلين ووسط الدوشة بنقول اسفة مرفوع مؤقتاَ من الخدمة.

لـــولا

мαησηα يقول...

يا عينى يا ابو على

انا كنت بحبها كرهتا بسببك يا راجل ههههههههههههه بينى وبينك انا مابحبهاش ف الصيف بس ف الشتا بتخرج الطورة من الجسم ههههههههههه انا عجوزة عنك بقه حكم السن يا ابنى

انا بحب الصيف ليلا لانه ف لمة وبنعرف نخرج فيه واجازة بقه وكده
لكن ساعة الناموس ما يقرصنى بلعن الصيف وايامه

Sarah Sobhi يقول...

abo 3ali matza3alneesh mennak :D el batreek ka2en cute yateer fel ma2 :D:D wa zkor el batreek toda7reg el bayd 3labal ma mama tgeeb el akl
7waly 6 months keda :D

fe ilm esmo happy feet w wa7d tany esmo surf's up ta2reeban :D recommended gedan :D

E73 يقول...

بسم الله الرحمن الرحيم
السلام عليكم ورحمة الله وبركاته

فلتذهب إلى روما إذًا
العاصمة التي تغيب فيها الشمس

ولكن وقتها لا تسأل عن سبب حالة الإكتئاب التي تصيب البشر هناك

أعتقد أن هذا الجو الخانق لم أصادفه إلى هذه الدرجة إلا في القاهرة ولذلك أكره "أم اليوم" الذي فكرت فيه في السفر للقاهرة سواء صيفًا أو شتاءً فدرجة الحرارة تكون 40 في الظل فما بالك تحت الشمس؟!

ووقتها لا تفرق أكنت تحت الظل أم في نقحة الشمس ففي الحالتين ستأتيك ضربة الشمس وتشعر أن الهواء قد تحول من حالته الغازية إلى حالة لزجة لا تمكنك من التنفس

لكن عمومًا ولله الحمد لم أواجه هذا الشعور إلا في القاهرة فما أكرره في الصيف في مدينتي هو لسعة الشمس وليس تثاقل الهواء

سمع هوص (Abo 3li) يقول...

د. ياسر عمر عبد الفتاح


ال يضحك ان زمان في المدارس كانو يضحكو علينا ويقولولنا جو مصر معتدل... ودي من اهم مميزتها...


البلوج نور بيك يادكتور...

سمع هوص (Abo 3li) يقول...

لـــولا وزهراء

شفتي اعلان اتصالات بتاع "نظام yes" ... نفسي يبقي فيه فعلا زراير في حياتنا علشان نعمل الناس المزعجين فيبريشن بس...

البلوج بينور بزيارة الناس الحلوة ال زيك....

سمع هوص (Abo 3li) يقول...

мαησηα

الصيف حلو علشان اجازة!!؟؟ ده كان ايام المدارس .... الله لا يرجعها دي ايام... هههههه...

ممكن الحسنة الوحيدة ال في الصيف اللمة فعلا...
بس انا بحب السهر في الليالي الشتوية كمان...

منوراني يامون مون ياسكر...

سمع هوص (Abo 3li) يقول...

Sarah Sobhi

هههههههههههه.... يطير في الماء!! ماشي نعديها... بس انتي متفقة معايا برضه انه كائن كيوت مبيعرفش يمشي كويس ... وبيمشي يتدنجل يمين شمال....
طبعا انتي مبسوطة ان انثي البطريق هيا البتقوم بالشغل كله.. مجتمع انثوي .... علشان كده شايفاهم كيوووت... هههههههههه...

الافلام دي انا حافظها... انا بعشق افلام الانيميشن جداااااااااا.... ومولود فيها....

شفتي بقي عصابة البطاريق ال كانت في فيلم مدغشقر بأجزاءه؟؟ كانووو مصيبة...

سمع هوص (Abo 3li) يقول...

E73

وعليكم السلام ورحمة الله وبركاته...

40 دي بيكون الجو طبيعي... المشكلة في كسر ال 40 بخمس او ستة درجات...
عندك حق... القاهرة بقت لا تطااااااق... صيفا وشتاءا...
بس القاهرة بتبقي جميلة اووووي بليل... والناس نايمين.. والجو حلو... والشوارع فاضية...

اااااااااااااه من لزوجة الهواء... الرطوبة بتخلي التنفس فعلا صعب ومقزز...


منوراني...

just waiting يقول...

انا عن نفسي جدو الله يرحمه كان مسميني الوطواط وعماتي بيقولولي يا وطوط
اصل مبظهرش غير بليل
اما بالنسبه بقى للحر فانا بكره مووووووت ولما بمشي في الشمس من غير صن بلوك وشي بيلتهب وبيحمر وببقى شبه دراكولا دا غير بقى لو وقفت في مكان زحمة بجد ببقى هرجع
نيجي بقى للشتا والمطر بحبه جدا وببقى فرحانة ان الدنيا بتشتي وبحب قوي منظر الزرع بعد المطر
وبحب قوي الهوا الساقع لما يخبط في وشي كدا ببقى مستمتعه ومبسووووووووطه

أع ـقل مـ ج ـنـونــة يقول...

ههههههههههههههههههههههههههه

انا كمان زيك والله يا ابو علي

Haaaaaaaaaaaaaaaate Summer







عن جد بتعب جدا من الصيف وبحس اني شبه ميتة سواء ف البيت او برة البيت

والسنة دي الصيف بتاعي ممتلئ للغاية :(

هتخرج بئة وهاضطر الف ف تدريبات و البحث عن وظيفة :(


دا غير اني بعشق الليل والضلمة جدااااااااا

بفكر اخدها من قاصرها واقعد ف البيت تحت الدش من دلوقتي :D :D

اصلي مش هلاقي شغل باليل بتاتان :D :D

كان معكم الفامبير " ريمو اعقل مجنونة " :D

عايشه لنفسي يقول...

اهو انا الفرخه السكرانه في الحر دة

بس الجو الحمد لله متظبط بقالو يومين دا للى قاعد في البيت

اما اللى بينزل شغل او جامعه الشمس بتوجع من كتر شدتها والله لكن الهوا حلو

جبلك مروحه محموله بالبطاريه وحط فيها اوبشن بخاخه هتعمل شغل تحفه

سمع هوص (Abo 3li) يقول...

Just waiting

كمان ريحة الهوا والجو بعد المطر لا يقارن... تحفة...
انا معاكي في كل حرف..



منوراني.. تحياتي.

سمع هوص (Abo 3li) يقول...

أع ـقل مـ ج ـنـونــة

انا شايف انك فعلا تقعدي في البيت.. اتجوزي واقعدي في البيت... وش بيطلع لسانه...

بجد: ربنا يوفقك...

كان معكي زعيم الفمبيرز ابوعلي..

سمع هوص (Abo 3li) يقول...

عايشه لنفسي

وانتي مش بتنزلي الجامعة ليه؟؟؟؟
اه الجو فعلا كويس النهاردة شوية...
يارب يفضل كده...

منوراني ياجميل..

قناه ايما يقول...

عايز تشتغل واكيد عايز تكسب فلوس
طيب عايز تعرف الفكره بيقى تعالى عندى فى المدونه وانا هقولك

عايشه لنفسي يقول...

انا بنزل مرة واحده في الاسبوع
يكفى اوى كليه الاثار فيها شويه ناس تحف عاوزين الحرق

وكمان الامتحانات قربت ادعيلي ياخويا انجح انا ريمو وسما "موشن متشحتف"
السنه دى اخر سنه ربنا يعديها علي خير

الجواز و سنينه يقول...

تخيل انا بحب الليل مش النهار سواء شتا او صيف
بس بكره الشتا برضوا
يمكن علشان مش بركب مواصلات فى عز الزحمه كده زيك
بس عندك حق جدا فى حكايه الافتر شف دى
مره جربتها بجد كنت ساعتها فى محاضره و من ساعتها ما قعدتش فى النص ابدااا فى الطرف دايما علشان لما احب اخلع اعرف اخلع بس كان موقف لن ينسى فعلا

غير معرف يقول...

وانا

وانا

وانا

وانا

وانا

بكرررررررررررررره الشمس ومش بحبها ومش بحب النهار برده

كل يوم اصحى الصبح اقفل البلوكة واشغل النور اختى تفتحها وشغالين كده كل يوم

مش بعرف انام اللى قرب الصبح
غصب عنى مش بحبه ولا بحب اذاكر فيه ولا بحب الفطار ولا اى حاجة تخص الصبح والشمس

انا معااااااااااااااااااااااك
بكررررررررررررره الشمس

سمع هوص (Abo 3li) يقول...

عايشه لنفسي

ربنا ينجحكم كلكم... بس مين سما؟؟ ههههههههههه...
وهتعدي متقلقيش ان شاء الله..

سمع هوص (Abo 3li) يقول...

الجواز و سنينه

لاااااااااااا... متفكرنيش بالحر ايام الجامعة...
وربنا بيحبك علشان مش بتشوفي حر الموصلات عامل ازاي...

تحياتي

سمع هوص (Abo 3li) يقول...

star in the sky

سووووووووووومة ازيك؟؟؟

ههههههههههههههه... بتكرهيه بكل متعلقاته!! حتي الفطار!!

جدعة ياسومة.. انضمي للحزب يلا..