الجمعة، 5 مارس 2010

النظافة مش ديما من الايمان.. ساعات من الفضا + الكسل (من شقق العزوبية)



فيه اعتقاد خاطئ ان شقق العزاب ديما معفنة وريحتها وحشة..

بس احب اعرفكم ان ده مش صحيح... او للدقة مش صحيح اوي...

اديلكم مثال ..

الشقة ال انا مقيم فيها حاليا مع اتنين اصحابي...

هيا شقة من بتوع زمان ... ورث عن جدة واحد من اصحابي الاتنين ... ال السقف اربعة متر... الشقق والعمارات ال اتبنت من ايام الانجليز... وواخدة الاستايل بتاع الاربعينيات...

المهم ان الشقة واسعة جدا زيادة عن اللزوم...

خمس اووض كبااار... ورسبشن كبير جدا...

ورغم كده مبنعنيش من مشكلة نظافة اطلاقا....

لان الشقة تقريبا فاضية... بالنسبة لحجمها...

عمرنا ما شوفنا اي نوع من انواع الحشرات... لانها ببساطة لو جات عندنا ... هتموت من الجوع....

نوع الزبالة الوحيد العندنا... اكياس وعلب االاكل الدلفري الفاضية.... وكانزات البيبسي ...

مشكلتنا الوحيدة هيا التراب...

ثم التراب...

ثم التراب...

لان حجم الشبابيك كبير وطويل جدا...

واحنا دور اول.. وقدمنا مباشرة حوش مدرسة اعدادي....

وطبعا بما اننا كلنا كنا متدلعين في بيوتنا... وديما عارفين ان فيه الست الوالدة (الشغالة ال ابوكم جابهلكم- علي حد تعبيرها) وعمري ما كنت افكر اساعد في تنضيف او ترتيب...

وطبعا الطبع بيغلب التطبع...

وطبعا كان الحل الوحيد للمشكلة دي .. اننا نجيب حد ينضف الشقة كل اسبوعين...

طبعا ال بيجو ينضفو.. مكنوش بيعملو اي حاجة غير ازالة التراب ... وبس...

لان مفيش حاجة تانية تتنضف... المطبخ... محدش بيدخلو تقريبا..

الحمام رغم ان ارضيته غرقانة علي طول ... بس نضيف...

الاوض فاضية ...


المشكلة الحقيقية ال بواجها ديما هيا الكسل...

لان لما حاجة بتبوظ عندنا ...بتاخد وقت طويل جدا علشان حد يصلحها...

لاننا ببسطة بنكسل بعد منرجع من الشغل نحاول نشوف حل للمشكلة...

وغير الكسل اننا بنعند علي بعض ونتنح...

احكلكم علي حاجتين...

لفترة تجاوزت الشهر... مكنش فيه ولا لمبة شغالة في الشقة غير لمبة واحدة في اوضة من الاوض...

الموضوع ابتدي بلمبة المطبخ.. وزي مقولتلكم.. المطبخ اخر مكان ممكن نستخدمه...

طبعا طنشت.... وبعد يومين اوضة من الاوض... وبعدها الرسبشن ... وبعدها باقي الاوض...

وفي النهاية الحمام... وكأن لعنة الظلام حليت علينا...

وبقي مفيش غير اوضة واحدة ال فيها نووور...

عاوزكم تتخيلو الحياة في الظلام... والله كانت ممتعة...

طبعا زمانكم بتشتموني وبتقولو لنفسكم... ايه الكسل ده مش قادرين تغيروو لمبة...

انا افهمكم.... الواحد مننا بيشتغل 9 ساعات تقريبا- ده في العادي.. ومبيحصلش, في الغالب اكتر- وساعتين موصلات... ف بكون راجع مقتول من التعب.. ولو مش تعبان مش هرجع البيت... هشوف اي خروجة - لازم استغل الوقت اسوء استغلال...

المهم ان البيت بالنسبالي راحة وبس... يعني مبيكونش فيا دماغ اصلح دي ولا اظبط دي...

الخلاصة اننا فضلنا في الظلام الدامس ده لمدة شهر... واخدت عليه... بقيت باخد دش في الضلمة... احلق دقني قبل منزل الشغل الصبح علشان اشوف... والاكل في الاوضة المضيئة الوحيدة... وساعة النوم كده كده بحبها كحل....

لحد م ربنا الهمني في يوم راجع بدري ... والطريق مكنش زحمة علي خلاف العادة... وصدفة عديت من قدام محل كهربائي....

اشتريت كمية كبيرة من كل انواع اللمبات... احتياطي بقي...

بس قبلت مشكلة في التركيب... لان السقف عالي بزيادة...

ورغم ان طولي 180 وفكة... وحطيت كرسيين فوق بعض... وعملت عملية انتحارية بهلوانية.. والحمدلله نجحت.. والشقة نورت من تاني.....

الحكاية التانية عن الكسل... الغسالة...

عندنا غسالة هاف اتوماتك... عن نفسي عمري مستخدمتها... لان اللبس ال بحب اغسله .. يأما اوديه المغسلة.... او اخده معايا اخر الاسبوع للست الوالدة...

المهم ان الغسالة باظت.. وصاحبي وداها لواحد بيصلح غسالات...

والراجل بعد مصلحها اتصل بينا بيقولنا حد يجيي ياخدها...

بيحلم الاهبل... ال حد يجي يخدها قال...

الخصلكم الموضوع وانتو تخيلو الباقي... الغسالة فضلت عنده 13 شهر... ايوة انتو مقرتوش غلط... 13 شهر محدش فينا فكر يروح يجبها... رغم ان المحل ده بينا وبينه شارعين بالظبط...

الراجل اخر مزهق- وتقريبا المخزن عنده مبقش فيه مكان- جابهلنا وسابها علي باب الشقة....

نطلع من كل الرغي الفوق ده.. ان مشكلتي عمرها مكانت نظافة... لأن النظافة عندي من الايمان ومن الفضا... بس مشكلتي الازلية الكسل...

الكسل في اي حاجة مبتشكلش اهمية مباشرة ليا... او ليها حل ملتوي عندي....

ياريت بقي العنده حل لموضوع التراب ده يقولهولي... لان مافتش اسبوع من اخر مرة الست جات نضفت الشقة... واتردمت تراب تاني....

هناك 59 تعليقًا:

ستيتة يقول...

ههههههههههههههههههههههههههه
والله يا اخي دي مغامرات عكاشة في الأدغال

اهم شيء فيها قصة التكيف الطبيعي

نور خير
ضلمة ميضرش

غسالة تقعد 13 شهر
يعني سنة وشهر
انا لو منه كنت أجرتها زي التاكسي كده :)

التراب حله سهل جدا بس مشكلته ها ياخد وقت وانتم عندكم كسل مزمن
وبيني وبينك كلنا كسولين جدا
يعني محدش يعاير التاني
هو فيه ستات دلوقت بتنضف بنفسها علشان الرجالة تنضف


المهم في يوم وانت وزملاء الكفاح فاضيين

تنزلوا الشيش
اه شيش الشباك
تاخدوه على البانيو وتغسلوه ببساطة
لا تنزيله صعب ولا غسله صعب

ينشف

تجيب بلاستيك شفاف من بتاع المطابخ اللي بيتحط جوا الأدراج
ده بيتباع بالمتر وفيه انواع متينة وسميكة رغم انها شفافة

تقص على قد الشيش من بره
تدبسه بالدبابيس بتاعة المكتب
يبقى من بره
هو ها يمنع تماما التراب
وفعلا ها تلاحظوا النضافة وفرقها
بس لو في الصيف مفيش مكيفات تفطسوا

اه كمان عندم وجود سجاد سبب اساسي ان التراب بينتشر ويتوغل
السجاد بيدي احساس نضافة لأنه بيلم التراب

يالا بقى ادي درس الى ربات البيوت :)

تحياتي

سمع هوص (Abo 3li) يقول...

دكتورة ستيتة

اكيد انتي بتهزري صح؟؟
انزل الشيش ... واغسل الشيش... واشتري بلاستك... واقطعه... وبعدين اركبه علي الشيش... وبعدين اركب الشيش نفسه تاني!!!!!

كل دي حاجات اعملها علشان شوية تراب... ماله التراب... بحب التراب.. بموت في التراب.... علي الاقل مريح...

وبالنسبة لاقتراح السجاد ده.. اانا جربته.. بس كانت تجربة آليمة ومقرفة- خصوصا لما تتكب مية او عصاير علي السجاد- محبهاش تتكرر..
التراب امره اسهل...

"يعني محدش يعاير التاني
هو فيه ستات دلوقت بتنضف بنفسها علشان الرجالة تنضف"
ربنا يطمنك.. وانا ال كنت فاكر لما هتجوز مشاكلي دي هتتحل...
طب انا كده زي الفل... علي الاقل بجيب حد ينضفلي لوحدي... لكن لو اتجوزت علي كده .. هجيب حد ينضفلنا احنا الاتنين,

نورتيني يادكتورة..

تحياتي

P A S H A يقول...

عاوز حل لمشكلة التراب ؟

نفض له !!


:)))))))

تحياتي على مدونتك الرائعة وأسلوبك الجميل

:)

سلام

سمع هوص (Abo 3li) يقول...

pasha

والله انت باشا .. والف شكر علي كلامك ال زي العسل ده ربنا يحفظك...

وبالنسبة للنصيحة.. متقلقش.. منفض ل ابوه.. مش منفضله هوا بس...

نورتني ياباشا... تحياتي

sony2000 يقول...

انا بقي رايي
لو علي التنضيف اعملوا ذيي
انا واختي مقسمنها علينا
هي يوم وانا يوم
انتو بقي قسموها عليكو وحاول علي قد ماتقدر
وبالنسبه لموضوع الكسل فالحاجه الوحيده اللي بتنشطني الاغاني
هههههههههههههه
اه والله
اما بكون بعمل حاجه فالشقه من تنظيف لمسح لخلافه
بستغل ان مفيش حد واقوم مشغله الاغاني بالصوت اللي انا عوذاع وابتدي الحمله
اييييييييييه رايك؟؟؟؟؟؟؟

سمع هوص (Abo 3li) يقول...

sony2000

والله اقتراح الاغاني ده لطيف...
ممكن فعلا ابقي اشغل اغاني بصوت عالي- بشغلها ديما بصوت واطي- وبرضو أأنتخ... الأنتخة مع الاغاني بتكون لذيذة اوي...
وبعيد عنك الكسل ده مش كسل بمعناه المعروف... ده نوع من الرخامة اكتر منها كسل.. شايفة الصورة ال في اول البوست... دي معبرة اكتر عن الحالة البحاول اوصفهالك... اني اقدر فعلا اقوم واعمل واظبط الحياة... بس مليش مزاج.. مليش نفس... حاسس انها مش فارقة... وكله محصل كله..

نورتيني ياسوني..
تحياتي

sweet angel يقول...

ههههههه
طب والله مغامرات حلوة
وبعدين ياخوانا أنا قولت من الأول
الأولاد دول لازم من صغرهم يتعلمو الشغل زيهم زي البنات ويتقطع قلبهم
ههههههههههه
بس أنا مش هتتريق عليك كتير لأني برج الحوت
وكده كده مواليد برج الحوت بيموتو في الأنتخه

غير معرف يقول...

هههههههههه

الكسل احلى من العسل

بالنسبه للتراب ممكن تنفضوه ... طبعا لو عندكم وقت يعني :)

تحياتي

سمع هوص (Abo 3li) يقول...

sweet angel

نعم نعم نعم نعم؟؟؟؟!!!!هههههههههه
ولاد ايه اليتعلمو... خليها في سرك.. هما البنات اصلا بقو بيتعلمو حاجة علشان الولاد يتعلمو!!!

اول مرة اعرف ان برج الحوت بيحبو الانتخة... طب منا عقرب وبحب الانتخة برضوو!!! ولا الانتخة صفة مشتركة بين الابراج المائية؟؟


نورتيني

سمع هوص (Abo 3li) يقول...

فتاه من الصعيد

الكسل احلي من العسل والسكر... ده احلي من العيش البلدي كمان...

وبالنسبة لموضوع التنفيض ... معرفش بصراحة ازاي انفض الارضيات الباركيه.. ثم لو نفضت اي حاجة تانية الشقة هتبقي عاملة زي المعارك بتاعت زمان... تراب طاير في الجو ومحدش شايف حاجة..


تحياتي لكي ولأهل الصعيد

جارة القمر يقول...

ههههههههههههههههههههه
بجد موتنى من الضحك 13شهر بتهزر؟؟

ليييييييييه يا بنى ربنا يكون فى عون زوجاتكم القادمون مش عارفين الى هيجرى لهم

مدونتك حلوة و اسلوبك جميل :)

سمع هوص (Abo 3li) يقول...

جارة القمر

زوجتنا القادمة... ربنا يكون في عونهم فعلا... بس مش علشان السبب ده.. علشان اسباب اهم... اني مثلا متوقع ربنا يتوب عليا من كل بلاوي العزوبية... لأ وايه.. متوقع تحوول وردي في لون الحياة..

وشكرا جدا علي كلامك.. ويرب تنوريني تاني...

تحياتي ياأستاذة مي

وصف الاحساس يقول...

هههههههههههههه
والله ما عارفة اقولك ايه
بس عجبني رد ستيته قال بتقول اخلع الشبابيك ماتعرفش انك لو خلعتهل مش هتلاقي الشقة لانك مش هتركبها وعليه مش هتلاقي حاجة في الشقة
ياراجل 13 شهر والغساله عند الكهربائي طب والله كتر خيره ان ما بعهاش ولا اخد منها قطع غيار
والله المفروض كنت تديهاله هديه عشان حافظ عليها
طب اقولك اشتركو وجيبو مكنسة بالكهربا
بس خساره اكيد هتكسلو تتكو علي الزرار
اقولك بيع الشقة ولا اقولك بات في المترو
ربنا يديكو الصحة ويقويكو علي نفسكو
سلام

سمع هوص (Abo 3li) يقول...

wasf_elahsas

ههههههههههههههههههههههههههههههه...
مش قادر امسك نفسي من الضحك علي الكومنت بتاعك...

فعلا لو الشبابيك نزلت مش هتطلع تاني...
والمكنسة الكهربا اختراع ظريف... بس لو كانت بكرسي زي البتاعة البيشيلو بيها العشب.... تبقي دلع...
والمترو زحمة ودوشة وانا بحب الهدوء...

ويسمع من بؤك ربنا...

نورتيني

Sarah Sobhi يقول...

:)))))))))

انا قعدت شهرين من غير لمبه فى اوضتى مع العلم انى تقريبا مبطلعش منها و نشاطى ليلى D:D:
كنت عايشه على نور الكومبيوتر

ولنفس الاسباب تقريبا
طول اليوم فى الكليه فيبرجع تعبانه و انام او بابا يكون خارج و مشوفهوش
ولما تيجى اللمبه اكتشف ان الدواية اتكسرت و ..........
بس الحمد لله ركبت لمبه اخيرا و النور جه

هراء لا داعى له ..... يقول...

جامد قوى موضوع الغسالة دا

أنا متخيل إحساس الراجل بتاع التصليح

و هو كل يوم يفتح المحل يلاقيها قاعدة فى مكانها

و كل الأجهزة بتتحط و ترحل و هى لسا موجودة

و يفكر فى سره ....

الله يخربيتكم ياللى فى بالى

أنا كان مالى و مال الشغلانة السواد دى

هراء لا داعى له ..... يقول...

البوست بردوده كلهم كوميديا

:D

سمع هوص (Abo 3li) يقول...

Sarah Sobhi

ههههههههههههههه
مش مصدق... حتي انتي ياسارة؟؟؟
وكمان في بيتكم وبتعملي كده؟؟؟ لالالالالالا... ايه الكسل ده... مش مونكن... وش بيطلع لسانه..
ومبروك علي عودة النور لاوضتك سالما غانما..

ps: بالنسبة لموضوع ان الدواية اتكسرت عندك... ف احب اقولك ان فيه اوضتين عندي في الشقة مفهومش دوايا اصلا... السلوك مقطوعة في اخرها... احم احم..

نورتيني ياسارة

سواحة يقول...

لعلمك بقى موضوع 13 شهر هنا
من حقه يبيع الغسالة و ملكمش حق عنده

ايه الكسل ده
بس عارفة انا
رجالة العيلة كلهم ايديهم ممكن تشتغل فى كل حاجة بس الكسل بتاعهم لازم يقابله زنننننننننننننننننننننننننننننننننن
من نحيتنا احنا :-((
او نتعلم نعملها بنفسينا او نجيب راجل من بره و نديله فلوس يعملها

هنا فى السكن اغلب جيرانى صبيان
بس لما الغسالة تبوظ او منفذ الزبالة او باب الاسانسير او .....
بلاقينى انا الوحيدة تقريبا الى بتنحرر و ببلغ عنه او لو قابلت العامل بتاع التصليحات بقفشه و اعتقله لدور بتاعنا :-)))

بس عجبتنى موضوع 180 سم و مش طايل
:-)))
انا محصلتش 160 و الوالدة باشا ياما كانت بتستغلنى فى اعمال المرتفاعات العليا لانها بتخاف من العلو
يعنى ترابيزة عليها ترابيزة ثانية عليها كرسى و اقف بطراطيف صوابعى

الذ موقف لما اعمل الحركة ديه فى البلكونة و احنا ساكنين فوووووووووووووووووووووووووق
و اقولها امسكينى كويس لانزل بدون اسانسير ، تمسك لحد ما التلفون يرن او تفتكر بعد دقيقتين ان فى حاجة على البوتاجاز و تسبنى و تمشى :-))))))

اه الغبار
سهلة امشى بالمكنسة الكهربائية و شفطه :-)))

سمع هوص (Abo 3li) يقول...

هراء لا داعى له

ههههههههههههههههه... تقريبا ده ال كان بيقوله... واخرة مزهق نقلهلنا علي حسابه ورماها قدام الشقة... بس نسي يكتب رسالة فيها شوية شتايم من اياهم... تقريبا نفسويته مسعدتهوش يبعبع بال في قلبه...

نورتني يافندم بزيارتك الاولي... ويشرفني انها تتكرر...

سمع هوص (Abo 3li) يقول...

wanda

غسالة ايه ال يبعها ... ساعتها كانت الشهامة والكرامة نأحت عليا.. ورحت كسرتله المحل...هههههههههههه
وممكن فعلا افتقادنا للزن الحريمي هوا ال عامل فيا كده...

160 والوالدة بتستغلك... الحمدلله انا عندي اهلي كلهم طواااال... تقريبا صفة سائدة... بس فعلا عندك حق في موضوع لو حد ساندك وانتي عاملة زي بتوع السيرك ومتشعلقة... جربت الاحساس ده كتير... بس الاتزان -ال الواحد اتعلمه وهوا صغير لما كانت هويته المفضلة التنطيط من البلوك الاسود للبلوك الاسود البعده منغير ميلمس الابيض علي الرصيف ولا يقع من علي الرصيف... والمرونة- ال الواحد بقي بارع فيها من النط اليومي من علي سور المدرسة في مرحلة الاعدادي والثانوي- بتكون مفيدة في الوقت ده... ههههههههه..

نورتيني يا دكتورة واندا...

ps: بالمناسبة هرد علي سؤالك هنا... علشان مكسل ارجع ارد عليكي هناك.. ولا اقولك.. خلاص خلاص هرد هناك

تحياتي

غير معرف يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه

بصراحة حاجة اخر تمام يا معلم

تنضفوها ليه ما هى هتتبهدل تانى هههههههههههههه

سمع هوص (Abo 3li) يقول...

star in the sky

ايه الاحباط ده... بدل متشجعيني... بتعرفيني الحقيقة المرة انها هتتبهدل تاني...ههههههههههه


شكرا علي النصيحة الغالية وجاري التنفيذ..

تحياتي

غير معرف يقول...

اصل انا مقضياها جامعة وكورسات وتدريبات ونت

فموضوع النضافة وشغل البيت ده مش بفهمه صراحة

معلش بقى هى الحقيقة كده دايما بتوجع
ههههههههههههههههههههههههه

سمع هوص (Abo 3li) يقول...

star in the sky

ربنا يقويكي... شدي حيلك...
بس احب اقولك علي الزتونة.. الست ملهاش غير بيتها وعيالها في الاخر... وش بيطلع لسانه .... هعهعهعهعهعهعه

غير معرف يقول...

بس احب اقولك علي الزتونة.. الست ملهاش غير بيتها وعيالها في الاخر... وش بيطلع لسانه .... هعهعهعهعهعهعه


تصدق انا الغلطانة اللى جيت هنا
هع هع هع هع هع دى ضحكة الصعايدة حبايبى

سمع هوص (Abo 3li) يقول...

star in the sky

فعلا زي مقلتي بنفسك من شوية... الحقيقة ديما بتوجع... هههههههههههههههه

اوعي تكوني زعلتي من الحقيقة... لو كده هحبقي احتفظ بالزتونة لنفسي... بعد كده.. ومش هديلك حتة... وش تاني بيطلع لسانه غير الاولاني...

ومالهم بقي الصعايدة؟؟؟؟؟؟؟؟؟؟؟؟؟؟؟؟؟

بيني وبينك ومتزعليش: ردك الاخراني ده موتني من الضحك... حاسك اتنرفزتي...هههههههه


ثم لالالالالا انتي مش غلطانة.... انا الغلطان يستي (مش هينفع نخسر زباين المدونة)... هههههههههههه

منوراني والله

غير معرف يقول...

اه صحيح الحقيقة بتوجع بس لما تكون حقيقة هههههههههههههه
وش بيطلع لسانه ده غير الاتنين بتوعك هع هع هع هع هع هع

لا طبعا ملهمش الصعايدة احسن نااااااااااااس كفاية ان انا منهم ولا عندك مانع

احسن لى اقوم انام بدل ما انام فى المحاضرة

وابقى نضف الشقة احسن الترم تعبنى هنا بدل ما ماجيش تانى

وبعدين بقالى يجى نص ساعة ولا اكتر مشفتش كوباية مية جات يخربيت البخل اللى ملى البلد ده

سمع هوص (Abo 3li) يقول...

طبعا احسن ناس ... علشان انتي منهم يافندم... وانا اقدر اقول حاجة... اصل انا كمان منهم...

ههههههههه... وعلي ايه نامي يبنتي... لحسن تنامي فعلا في المحاضرة وتبقي مشكلة...

ومن عونيا... تنضف يفندم... طلباتك اوامر...ههههههههه

طيب تحبي تشربي ايه؟؟ ساقع ولا سخن... ولا اقولك...

واحد سحلب لستار وصلحه...

تصبحي علي خير

غير معرف يقول...

ياسلاااااااام على الصعايدة لما يغلسوا
بتكلم عليا يا فندم :D

مش عاوزة اشرب خلاص

بكرة هرجع هلكانة من الجامعة ابقى اجى اطلب دليفرى من المدونة هنا

يلا وانت من اهله

Elmasryeffendi يقول...

عايزنا نرجع زى زمان قل للزمان ارجع يا زمان، فين ايام الشقق المصممة صح و مبنية صح، فعلاً ما بقاش عندنا ذوق فى البناء و التصميم و خصوصاً بعد انقلاب 52 و ما تبعه من ثورة القبح المعمارى، بس عايز اقولك حاجة بخصوص الضلمة اللى حلت لعنتها على الشقة، دى بسبب اللمبات الرديئة الموجودة بالسوق زيها زى بوجيهات العربيات بالظبط ممكن تكون جديدة و تبوظ بعد يومين.

تحياتى

NeVeN يقول...

ايه الكسل دة كله
دة انت خلتنى مكسلة اكتب كومنت
ههههههههههه
شوف ياسيدى الكسل دة نعمة
واللى يكره النعمة يعمى
مش كدة ولا ايه
وكمان بتاكلو دليفرى؟؟
طيب مين النشيط اللى
بيطلب بتوع الدليفرى؟؟

بص بقا التراب دة هتحله ازاى؟؟
اقولك ازاى الحل بسيط اوى
كسل تبص عليه
انت هتقطع نفسك شغل ودليفرى وكهربائى ايه كفاية اوى كدة
والحمد لله انك بتروح الشغل


بجد البلوج حلو اوى هتلاقينى زبونة دايمة
تحياتى

سمع هوص (Abo 3li) يقول...

star in the sky

ههههههههههه... بكرة )ال هوا بقي النهاردة( هترجعي هلكانة من الجامعة.... لا سلامة الجامعة... اقصد سلامتك...
هههههههه.. ومستني الاوردر يافندم

سمع هوص (Abo 3li) يقول...

elmasryeffendi

انا متفق معاك في حالة القبح المعماري.. وردائة المنتجات الموجودة في السوق.. وده علشان المستورد بيسترخص... وبقي السعر اهم من الكفاءة في السوق المصري...

بس اختلف معاك في تعبير )انقلاب 52) ... ال انا متأكد انه مقصود...ههههههه... بس مش وقته دلوقتي... نبقي نتخانق بعدين... وتشرحلي وجهة نظرك....

نورتني يافندم.. تحياتي

سمع هوص (Abo 3li) يقول...

NeVeN

الحمدلله ان الكسل مزدتش معاكي.. وقدرتي تكتبي الكومنت...
وبالنسبة للنشيط البيتصل ب الدليفري.. الراجل بتاع الدليفري نفسه... مش انا ال بتصل... هوا بيتصل يسأل لو كنت عاوز حاجة... هههههههههه...

والله احلي نصيحة جاتلي... وخصوصا انها بتتفق مع مبادئي وتوجهاتي.... "كسل تبص عليه"... يسلام .. الله عليكي....

وعندك حق الواحد هيقطع نفسه... اهم حاجة الصحة وراحة البال....

وشكرا علي زوقك... ومستني زيارات قدامة ان شاء الله... انتي خلاص بقيتي زبونة المحل.. اقصد البلوج...

نورتيني.... صباحك ظريف..

غير معرف يقول...

ههههههههه

ده جزاء كل من تسول له نفسه انه يعيش عااازب


و انا عايش بره مصر عازب برده على فكره للأسف :(

بس متقلقش .. كلنا كده .. انا كنت عايش في شقه مع اصحابي في القاهره كنت بقرف أمسح الشوز في الأنتريه

تخيل بقا كان شكله ايه


و على اي حال .. فتره و تعدي و تبقا مجرد ذكرى

يا ريت نبقا اصحاب و تشرفني هنا

http://ahmedabdulmohsin.blogspot.com/2010/01/blog-post_25.html

مدونتي وحشه انا عارف .. لسه مبتدئ تدوين :(

سمع هوص (Abo 3li) يقول...

عندك حق ده عقاب.... ههههههههه
وترجع مصر بالسلامة يباشا...

وبالنسبة للانتريه مش عاوز اتخيل شكله.. هههههههه... لان التخيل عندي بيأفوور ساعات... لو حاولت اتخيله .. هتخيله بشنب طويل.... وست رجلين.. عجبك كده.. اديني اتخيلته... بوووووووووووووووم..

والشرف اكيد ليا لو بقينا اصحاب.. ممكن تبعتلي ال IMs علي الميل ال هتلاقيه في البروفيل عندي..

وبالنسبة لمدونتك... انا اشتركت فيها.. واكيد هنعكشها كلها ان شاء الله في اقرب فرصة...
ومفيش مدونة وحشة... يمكن الوحش بالنسبة ليك.. حلو بالنسبة لحد تاني... ولا ده تواضع!!؟؟

نورتني ياباشا... تحياتي

Unknown يقول...

الراجل بتاع الغسالة
دا راجل اميررررررررر
وامين ماتفرطوش فيه بجد
واحد غيره كان باعها واشترى
بتمنها قرطوس لب وقرطوس سودانى:)
آآآآآل يصلحها ويوصلها لهم يابختيكوا به ادينى عنوووووووووانه اووووووووم
ياابو على :)علشان اشكره هههههههههه

Unknown يقول...

اما مشكلة التراب
فا
























مش عارفلها حل الصراحة
ولما تلاقى ياريت تقولى عليه
ربنا يخليك يااااااااااااارب.

Single Mummy يقول...

بلدياتى العزيز

مش معقولة كمية الكسل الفزييعة دى! فى حد كدة...على فكرة لو انت ةاصحابك قعدتوا على تنضيف الشقة دى ساعتين هتبقى زى الفل جرب بس وقولى
تحياتى

سمع هوص (Abo 3li) يقول...

norahaty

ههههههههههه... مش فاهم مفرطش في الراجل بتاع الغسالة ازاي؟؟؟ ابوظ الغسالة تاني وأوديهالوو؟؟؟ هههههههه... ثم تمنها ميجبش غير نص قرطووس... مش قرطووس كامل..
وبالنسبة لعنوانه.. انا نسيته بقالي سنة مهوبتش نحيته....اه اه اه.. افتكرت ده كان بيني وبينه شارع... هوا في ميدان الجيزة لزم... ولما تشكريه .. ابعتيله شكري انا كمان........

ومشكلة التراب... الاخوة كتر خيرهم في الكومنتات اقترحو اقتراحات كتيرة.. شوفي لو حاجة منهم تنسبك.. انا عن نفسي هاخد ب اقتراح بيقول "التراب نفضله" ... مش نفضه... هههههههههه..

نورتيني يادكتورة نور... تحياتي لسيدتك

Unknown يقول...

راجل امين وكويس
وبيوصل الطلبات
قصدى الغســــالات
للمنازل:)حد يلاقى
زى كده ويسيبه؟

سمع هوص (Abo 3li) يقول...

Single Mummy

بلديتي العزيزة...
ساعتين... ساعتين بحالهم؟؟؟؟!!!!
انا لو فاضي ساعتين... هعمل حاجة من اتنين... هنام... او ههرب من الشقة الساعتين دوول واروووح اي حتة اقعد فيها مفيهاش تراب... ههههههه...

نورتيني يابنت بلدي

سمع هوص (Abo 3li) يقول...

norahaty

هههههههههههههههه... "حد يلاقي زي كده ويسيبه"

ههههههههههه... طب شوفيله عروسة بقي..

elmnzel يقول...

شركة نظافة عامة بمكة
سيدات كثيرة تبحث عن شركة نظافة عامة بمكة ونحن شركة المنزل نقدم لكي افضل خدمات التنظيف حيث تنظيف منازل,تنظيف فلل بمكة و ايضا لدينا خبراء في تنظيف المفروشات مثل غسيل كنب بمكة,غسيل سجاد,تنظيف موكيت بالبخار
غسيل كنب بمكة
http://elmnzel.com/cleaning-makkah/

elmnzel يقول...


شركة تنظيف شقق بالدمام
نحن شركة المنزل سوف نقدم لكم بعض الخدمات في تنظيف شقق بالدمام و تنظيف موكيت ايضا و بأفضل وسائل التنظيف الحديثه و يجعلون الشقق و الموكيت خالي من اتساخ او اتربه او بقع و بأقل الاسعار التي لا تقبل المنافسه
شركة تنظيف موكيت بالدمام
http://elmnzel.com/%D8%AE%D8%AF%D9%85%D8%A7%D8%AA-%D8%A7%D9%84%D8%AA%D9%86%D8%B8%D9%8A%D9%81/cleaning-dammam/

elmnzel يقول...



شركة تنظيف مجالس بالرياض
نحن شركة المنزل افضل شركة تنظيف مجالس بالرياض حيث افضل فريق عمل متخصص في تنظيف مجالس و غسيل كنب بأستخدام افضل وسائل التنظيف الحديثه و بأقل الاسعار التي لا تقبل المنافسه
غسيل كنب بالرياض
http://elmnzel.com/%D8%AE%D8%AF%D9%85%D8%A7%D8%AA-%D8%A7%D9%84%D8%AA%D9%86%D8%B8%D9%8A%D9%81/cleaning-riyadh/

elbshyar يقول...

شركة تنظيف مفروشات بمكة
هناك كثير من شركات التى تقدم خدمة تنظيف مفروشات بمكة و لكن لم تجد افضل من صقر البشاير افضل شركة تنظيف مفروشات بمكة متخصصة فى عملية تنظيف مفروشات بمكة و تقدم خدمة تنظيف موكيت بمكة ,تنظيف كنب بمكة ,غسيل كنب بمكة ,غسيل سجاد بمكة ,تنظيف مجالس بمكة ستجد افضل الخدمات فى تنظيف مفروشات بمكة مع صقر البشاير شركة تنظيف مفروشات بمكة متخصصة فى غسيل كنب بمكة ,تنظيف كنب بمكة
غسيل كنب بمكة

اتصل بنا على0500941566
http://www.elbshayr.com/7/Cleaning-furniture


elbshyar يقول...

شركة تنظيف بمكة
مع شركة تنظيف بمكة صقر البشاير ستجد افضل الخدمات فى تنظيف مع شركة تنظيف بمكة متخصصة فى تنظيف منازل بمكة,تنظيف فلل بمكة تنظيف شقق بمكة
كما انها متخصصة فى تنظيف كنب بمكة,غسيل سجاد بمكة,غسيل سجاد بمكة
تنظيف فلل بمكة
اتصل بنا على0500941566
http://www.elbshayr.com/5/House-clearance

elmnzel يقول...

شركة نظافة بمكة
نحن شركة المنزل افضل شركة نظافة بمكة لتنظيف منازل بمكة,غسيل شقق بمكة ونحن ايضا افضل شركة تنظيف فلل بمكة حيث لدينا خبراء في استخدام البخار لتنظيف جميع المفروشات مثل الموكيت وتنظيف الكنب وغسيل السجاد لذا المنزل افضل شركة نظافة بمكة
شركة تنظيف فلل بمكة
http://elmnzel.com/cleaning-makkah/

Unknown يقول...

شركة غسيل شقق بالمدينة المنورة
احصل على افضل الخدمات فى تنظيف و تخلص من كافة مهام التنظيف مع النسر الذهبى شركة نظافة بالمدينة المنورة لديها افضل العمالة التى تقوم بافضل الخدمات فى تنظيف شقق بالمدينة النورة ,تنظيف منازل بالمدينة المنورة ,غسيل شقق بالمدينة المنورة,تنظيف عمائر
شركة غسلي شقق بالمدينة المنورة معها افضل الخدمات فى تنظيف
شركة نظافة بالمدينة المنورة
اتصل بنا على 0540906041
https://nsrzhbi.com/cleaning-company-in-madinah/

elmnzel يقول...

شركة تنظيف منازل بالمدينة المنورة
شركة تنظيف منازل بالمدينة المنورة المنزل من الشركات المتخصصة فى كيفية تنظيف منازل بالمدينة المنورة تنظيف مفروشات المنزل من تنظيف مجالس بالمدينة المنورة ,تنظيف كنب,غسيل سجاد ,تنظيف موكيت بالمدينة المنورة
تنظيف مجالس بالمدينة المنورة


اتصل على :0500927360
http://elmnzel.com/cleaning-medina

Unknown يقول...

تعالو نبحث عن افضل الطرق وافض الشركات للنظافة ونخطار بنفسنا افض الطرق وافضل الشركات لان النظافة ليسة كلمة تنطق فقط النظافة لها معنا كبير لان بدونها تاتى الامراض اللى الانسان فالمهم بعد بحث كبير وجدنا ان افضل شركات التنظيف العام هى شركة تنظيف بالدمام وافضل الشركات لتسليك المجارى هى شركة تسليك مجارى بالدمام وافضل الشركات لمكافحة الحشرات هى شركة مكافحة حشرات بالاحساء وللنظافة العامة ايضا شركة تنظيف بالاحساء وشركة تنظيف بتبوك
وللاتصال وطلب الخدمة 0508400941

rana يقول...

ان لانسداد بلوعات الصرف الصحى وانسداد بلوعات المطابخ وبلوعات الحمامات اضرار كثيره
اولا ان مياه الصرف الصحى مياه ذورائحة كريهة لذلك فان استنشاقها يتسبب فى ضيق فى التنفس وازمات قلبية
ثانيا تسبب العديد من الامراض الفيروسيه والبكترية وذلك لانها تكون مياه ملوثه وغير نظيفه وتكون مليئة بالبكتريا والفيروسات والطحالب الضاره
ثالثا يؤدى تراكم مياه الصرف الصحى لفترات طويله الى رطوبة فى الجدران وبالتالى تقشير وسقوط الدهانات وخلع البلاط
ولذلك فان معظم الخبراء والمتخصون ينصحون بمعالجة تلك المشكلة فى الحال ولذلك فنحن نقدم لكم افضل شركة تسليك مجارى بالدماموفرعها شركة تسليك مجارى بالخبر فتلك الشركة تستخدم احدث الطرق والاساليب الحديثة ولذلك فهى تعد من امهر الشركات التى تتواجد فى المملكة وكما ان لها اختصاصات اخرى مثل
شركة كشف تسربات المياه بالدمام
شركة كشف تسربات المياه بالاحساء
شركة كشف تسربات المياه بالخبر
شركة تنظيف بالاحساء
شركة تنظيف منازل بالخبر
للاتصال وطلب الخدمة
جوال رقم 0558973863

Unknown يقول...


يعتبر بعض السيدات بان التنظيف للمنزل هو من المور الصعبة ويعجز عن وجود حلول لتدبير أمور المنزل بالكامل لذا تقدم لكم شركة تنظيف كنب بالدمام افضل النصائح في التنظيف الشامل لمنزلك بعيداً عن الوسائل المتعبة والشاقة مثل تنظيف الجاد مع شركة تنظيف سجاد بالدمام
بافضل الواد الخاصة وافضل المكائن والمعدات الخاصة بالتنظيف فنحنشركة تنظيف منازل بالدمام ننصح باستخدام المواد الخاصة بالتنظيف لعدم وتجنب المشاكل التى تاى بعد التنظيف مثل وجد رائحة بالسجاد معنا شركة شركة تنظيف فلل بالدمام
الحل الافضل والفورى لكل جزاء فى منزلك مع خبراء شركة تنظيف موكيت بالدمام
وايضا شركة تنظيف مجالس بالدمام ينصحون بالتنظيف الدائم للموكيت لعدم تواجد الحشرات لان عدم التنظيف يجلب الحشرات وايضا تنظيف الخزانات بصفة مستمرة ودورية وايضا لدينا قسم اخر ويسمى شركة تنظيف خزانات بالدمام
و شركة نظافة بالدمام
نحن شركة ابراج دبى نحاول ونسعى دائما على راحة عملائها الكرام وايضا نوفر لكم بالمنطقة الشرقية فرع بمدينة الخبر شركة تنظيف منازل بالخبر
وهوا من اهم وافضل الفروع لدى شركتنا .

للاستعلام والاستفار اكثر اتصلو بنا 0558973863

rana يقول...

افضل شركة تنظيف كنب بالاحساء
ان الكنب والمجالس يستغرق وقت وجهد طويل اثناء تنظيفة ولذلك سوف نقوم باخباركم بطرق تنظيف الكنب والمجالس التى تقوم بها شركتنا شركة تنظيف مجالس بالاحساء
اولا تقوم الشركة بارسال مندوبيها لمعاينة المكان وتحديد كميه المجالس والكنب المراد تنظيفها
ثانيا تقوم الشركة بارسال عمالها ومعهم الادوات والماكينات بالاضافة الى المنظفات الخاصة بالشركة وتكون تلك المنظفات على حسب نوع القماش المستخدم
ثالثا نقوم بتنظيف الاتربة باستخدام جهاز البلور لتنفيخ الاتربة
رابعا يقوم عمال الشركة بعد الانتهاء من تنفيخ الاتربة يقومون بوضع المنظف فى ماكينة الغسيل ثم يقومون بالبدء بالتنظيف واثناء التنظيف لا يتم نقل الكنب او المجالس من مكانة وذلك للحفاظ عليها من الكسر او الخدش فالاجهزة والماكينات الخاصة بشركتنا تقوم بتنظيف كل كبيرة وصغيرة
وان شركتنا لا تقوم بتنظيف الكنب والمجالس فقط ولكن تقوم بتنظيف جميع انواع الشقق من الداخل ومن الخارج وتقوم ايضا بتنظيف جميع انواع الفلل والقصور والمنازل وذلك يتم من خلال الافرع التالية للشركة
شركة تنظيف بالاحساء
شركة تنظيف منازل بالاحساء
شركة تنظيف شقق بالاحساء
شركة تنظيف فلل بالاحساء
فاذا ارتم التواصل معنا فقط قوموا بالاتصال على الارقام التالية
جوال رقم0558973863

شركة فارس الخليج يقول...


تعتبر شركة الحورس من أحسن الشركات بالمملكة العربية السعودية فى مجال التنظيف و أفضلهم على الاطلاق فنحن نسعى دوما للحفاظ على صدارة شركات النظافة و ذلك بتطوير الأفراد و المعدات و المواد المستخدمة لضمان تقديم أفضل خدمة ممكنة لعملائنا الكرام كما نوضح لك مدى جمال و نظافة المظهر الطبيعي للمكان و من حيث ياتيك اطمئنان ليتم التاكيد من مصداقية الخدمات المقدمة فتعامل معنا لكى تحصل على افضل الخدمات لاتمام عملية النظافة و بأسعار مناسبة للجميع كما نقدم العديد من خدمات التنظيف للبيوت والفلل والقصور والشقق فنحن نقدم أرخص خدمات التنظيف كما نضمن لك الراحة و الامان فى بيتك فنحن نقوم بازالة الروائح من المنزل و اضافة رائحة منعشة و متجددة للمكان باستخدام افضل المعطرات و المطهرات كما نعمل على تنظيف و تطهير الحمامات و المطابخ كما نعمل على تنظيف و ازالة الغبار من داخل المنزل و خارجه كما نقوم بجلى البلاط و تلميعه و تنظيف النوافذ و الابواب و غسل الستائر و تنظيف الواجهات الزجاجية والحجرية و تلميع الارضيات و نظافة الموكيت و السجاد مع التعطير و كل ما يلزم لتنظيف و تطهير المنزل كما نقوم بتنظيف المجالس بكل انواعها من الارضية و العلوية حيث أن مجالسنا هى المكان المفضل دائما فى المنزل كما انها تكون محفل استقبال الضيوف و أول أنطباع يكون لدى الزائر دائما يكون مجلس المنزل فدائما نحرص عزيزى العميل بأن نعمل من أجل ان تتمتع بشعور التجدد و السعادة كما نقوم بنظافة حمامات السباحة التى تمتلكها الفلل و القصور كما نقوم بتعقيمها جيدا و إزالة الاتربة الموجودة به و تطهيره بأستخدام أحدث المواد المستخدمة فى عمليات التطهير و التعقيم كما نقوم بتنظيف الخزانات و هى الاهم على الاطلاق لانها توجد بها المياة التى نستخدمها فى جميع الاعمال كما نقوم بعزل الخزانات و تعقيمها بأحدث المواد المستخدمة فى هذا المجال كما نعمل على ازالة البقع و الاوساخ والصدأ من على الاسطح مع عزل الاسطح المنازل و الفلل فأتصلوا بينا و أستمتعوا بكل خدماتنا المميزة .
شركة تنظيف خزانات بالجبيل

شركة تسويق الكترونى يقول...

شركة الياسمينة لمكافحة جميع انواع الحشرات الطائرة والزاحفة فى جدة - 0533163233
يمكن الحديث عن كيفية التخلص من الحشرات المنزل بشكل تفصيلي لكي يستطيع العملاء التعرف على الأضرار التي تسببها تلك الحشرات وكيف تتمكن الشركة من التخلص منها.
شركة مكافحة حشرات بجدة
شركة رش مبيدات بجدة
شركة مكافحة الصراصير بجدة
شركة مكافحة النمل الابيض بجدة
شركة مكافحة العته بجدة
شركة مكافحة البق بجدة
شركة مكافحة الفئران بجدة

nada.mixseogy يقول...

شركة تنظيف ابوظبي
اننا شركة تنظيف ابوظبي نختلف جميع الشركات الاخرى معنا سوف تستطيع الحصول على مختلف خدمات التنظيف بأفضل صورة ممكنة فقط عليك الاتصال بنا كما يتوافر لدينا ايضا خدمة جلي رخام أبوظبي بأفضل صورة واقل تكلفة مناسبة للجميع فاذا اردت ان تحصل على هذه الخدمة لن تستطيع ايجاد شركة افضل من شركتنا

جلي رخام أبوظبي
https://www.smartcareae.com/arabic/abu-dhabi-cleaning-company/