طبعا النهاردة عيد ميلاد الريس... وبالمناسبة دي انا اديت لنفسي اجازة ومرحتش الشغل...
اومااال ايه... لازم احتفل بمرور 82 سنة علي ميلاد بسلامته...
بس انا نفسي اعرف الراجل ده بياكل ايه؟؟؟ علشان اكل زيه... يمكن لما اوصل سن ال 82 – ده لو وصلت اصلا- ابقي صحتي حلوووووووة كده... دنا جدي لسه مكملش السبعين وعنده امراض الدنيا كلها ومبيعرفش يقف علي رجليه... مع انه من الناس القديمة البتاكل العسل الاسود بالسمنة بالبلدي...
يبقي الريس بياكل ايه علشان يفضل بشبابه كده؟؟؟
اكيد الباتون سالييه والجريب فروووت مش بيطووولو العمر ولا بيرجعو الشباب كده...
ايه السر يتري...
ورحمة ابوك ياريس – نفسي اعرف الحاج ابوك عاش كام سنة- تقولي انت بتاكل ايه؟؟ طب وبتلعب رياضة ايه علشان تفضل صااالب طووولك كده...
طب بص.... بيني وبينك كده... قولي اسم "الجيم" البترووحه ...
طب بلاش دي... قولي اسم الحلاق البيصبغلك شعرك...
لالالالالالالالالالا.... متقوليش انك كمان مبتصبغش شعرك!!!
دنا مكملتش ال 24 وقفشت شعرتين بيض في راسي....
يجدع قووول بقي... انا عارف انك جدع ورجولة ومش هتخبي علي اخوووك..
تكونش لقيت اكسير الحياة البيطلع في الافلام النص كم؟؟؟!!
طب لو لقيته متقولنا بيتباع فين..
اهوو نجيبه ونديه للشعب علشان يعيش كتيييير زيك...
انت الكسبان صدقني...
الشعب بيفيص من الجوووع والمرض... وممكن مرة واحدة متلقيش شعب تحكمه...
طب ياجدعان اليعرف اي معلومات الريس بياكل ايه او بيشرب ايه... او بيبلبع حبوب ايه... يقولي... لحسن انا حاسس بكرشة نفس من الصبح...
انا مش معترض علي حكمة ربنا...
انا عارف ان ممكن يكون ربنا بيبتلينا... وبيعقبنا.. وبيختبر صبرنا..
واحنا زي محنا صاااااااااااااابرين اووووي....
وبالموناسبة دي بقول للريس... كل سنة وانت عايش... كل سنة وانت صحتك حلوة اوووووووووووووووووووووووي....
هناك 54 تعليقًا:
النبى انتا ما هتسكت
الا لما نجيبلك العيش
و الحلاوة ام شكولاتة و فزدق
يا واد اتكن بقى
ف ليلتك دى
مالك و مال الناس
انتوا كمان هتحسدوا البشر
على عمرها و انها بتكبر ؟؟
بلاش النق دا
عيونكم فلقت الحجر
و جابت البلد ورا
يا سااااااااااتر
يا ابو على
يا سمع هوص
سمع هووووص
شوية الله يكرمك عشان اخواتك
ف التدوين عاوزينك
بس خلايص
و كل سنة و انتا طيب يا فندم
متستنة شوية عليا دى اول مرة اجى عندك لا مبحبش الشاى
خلينا ندخل فى الموضوع بقى
انت بقى بتعيد على الراجل ولا بتسمم علية عيشتو
على رأى الأخت فاتيما العين فلقت الحجر
على العموم مش ريحت من الشغل دى اهم حاجة
تمام كدة
امشى بقة بدل ما تضربنى يا عم
شكرا
دا نق ولا حقد ولا حسد
انت لازم تحدد موقفك
عموما لو فكرت اكيد هتعرف ان دراكولا بيعيش مدى الحياة لو محدش قتله
ودا بسبب انه بيشرب من دم الناس
اهو دا نفس الحكاية وياريت يعني اللي يجي يزورك يبقى يعدي عليا بالمرة
يابني اكيد شرب دم الغلابة هو السر...بس انا بجد نفسي اسأل الريس سؤال بجد هو ليه بيصبغ؟ بجد السؤال ده وربنا محيرني اكتر من سؤالك
مساء الخير يابوعلي
بص
انت تجيب حبايه مستكه وحبايه مش مستكه
وشويه ميه مبلوله
وتشربهم:d
ايه مالك بتقر علي خلق الله ليه
ربنا يطول في عمرة ياسيدى
منقرش علي حد وبالذات العمر يعنى ضميرك مش هيأنبك لو حصله حاجه
ممكن نكون مضايقين من حاجات كتير بس منكونش احنا السبب في موت حد دة ذنبه كبير
شفتنى وانا بدافع عن ريسنا اعذرنى اصل صحبتى عضوة في الحسب وطنى وانا بحبها
ثانيا اتلم انا بموت في مدونتك مين هيكتب لنا لو اخدوك يابمبو
اهدى بقي شويه وربنا يدى العمر لمن يشاء وربنا يدى الناس الصحه وطوله العمر ويديك الصحه وطوله العمر ولمه اللسان علشان الشعريتين اللى قفشتهم دول هتبقي دماغك كلها من اللى هتشوفه بسبب كلامك
المشكله ان اسلوبك ماشاء الله عليه تحفه
بس ساعات بتقول كلام يودى في داهيه
نيس توبيك يودى جوانتنمو "وياريت تكون اخر المواضيع من النوع ده"
هههههههههههههه
والده عاش 109 سنه...يعني قاعد معانا كمان 27 سنه بعون الله ..
بس انا موش هكمل معاكم اكيد للعمر ده كله :D ..هسيبكم تلعبوا لوحدكم واتكل أنا :)) ..
بالنوسبه للأكل فمااعرفش...بس هو صحته حلوه وبياخد باله من نفسه شكله كده ..
وربنا يخليله الكونسلتو اللي ماشي في ديله على طول :)..
تحياتي
أختك فاتيما خايفة عليك
ابراهيم سعدة كان هيتحبس
علشان قال ان مولانا بشر وممكن يموت
وانت نازل حسد فى الراجل
ايه ده؟
لكن اقدر اقول لسيادتك ان السلطة هى الاجابة الصح
انا مرة المديرة كانت عايزانى اعمل حاجات عندها فى المكتب
ومكتبها ماشاء الله كاشف مبانى المدرسة والباب كمان
والست كانت خارجة وطلبت منى اقعد مكانها
لا
تخيل انت شعورى بمجرد ماقعدت على الكرسى
حاجة تانية خالص
مابالك لو فرعون بقى
وهذه الانهار (الله يرحمها خلاص)
تجرى من تحته وله ملك مصر
لازم يصغر يابابا مش يكبر زينا
الله يرحمه سيدنا عمر بن الخطاب
اللى طلب من ابنه ساعة وفاته يحط خده على التراب
ومن خوفه من المسئولية وحساب ربنا قال ياليت أم عمر لم تلد عمر
ورفض ان ابنه يتولى الخلافة وقال مامعناه كفاية يحمل همها واحد فقط من بنى الخطاب يوم القيامة
ربنا يكرمك ماتجيبش سيرة الشعرات البيض دول
علشان نفسوياتى بتتعب
ودى اكتر حاجة خانقانى منه
لكن انت محتاج ايه غير العيش والحلاوة؟
السلام عليكم
مش عارف والله
والخيبه الكبرى
الواحد كل لما يكبر عقليه بتتعب
وبيقل ذكائه
بس يلا ربنا يسهله
__________
ارجوا المشاركه
فى الصالون الفكرى على مدونتى
عن النيل ومصر ومنابع نهر النيل
التفاصيل
http://qalbfars.blogspot.com/2010/05/blog-post.html
لولولولولووووووووووووووووووولي ^_^
هههههه
والله والله كنت لسه بسأل ماما السؤال دا ..
وبعدين المعلومات دي very secret عشان الناس تموت وترتاح م الهم يعني هو خايف علينا شفت بقى الحب يعني عايز الشعب يعيش 80 سنة ف غلب ولا يدخل الجنة أحسن :)
وكل سنة وانت هنا مش ورا الشمس
احم احم
سلامو عليكو
يا عم نضف انت بس قلبك
وبطل تنق ع الراجل
وانت ربنا يباركلك
انت عارف ربنا مادد في عمره ليه ؟؟
عشان هو قلبه ابيض
مبيفكرش في اي حاجة وحشة
ولا حلوة للامانة يعني
هو مبيفكرش اصلا
هيعيا بقي ليه ولا يمرض ليه
علي فكرة انا جدي مات عنده 82 سنة
دي معلومة كده يعني دردشة
متفكرش حاجة يعني
هههههههه
سلااااااام
فاتيما
ههههههههههههههههههه.... طيب متديني رشوة؟؟
ايون رشوة وانا اسكت... ابعتيلي الحلاوة البالشيكولاتة دي وانا هتلم واقعد ساكت...
وكل سنة وانتي الطيبة...
منوراني ياتيما...
samy
لالالالالا دنا بعيد عليه... وبستفسر علي شوية حاجات بس....
ضرب ؟؟؟ لا مقدرش... دي اول زيارة ... ممكن ابلغ واقول انك شريكي بس... هههههههههههه...
البلوج نوور... ويارب متكونش اخر زيارة..
Just waiting
ده التلاتة...
دراكولا!! ازي مفكرتش في الموضوع ده قبل كده؟؟ مصاص دماء... فينك يا "بافي"...
متقلقيش هبقي ابعتلك شوية حلاة من ال هتجيلي...
Tarkieb
ليه بيصبغ؟؟؟ يعم يمكن مبيصبغش وهوا كده رباااني... شباااااب شبااااب يعني...
اول زيارة منورني بيها... مستني تتكرر...
عايشه لنفسي
بيني وبينك... ساعتها ضميري هيموووت.... ههههههههههههه...
وهحاول اتلم شوية حااضر... علشان خايف علي شعري... ههههههههههه....
شكرا ليكي ياقمر علي كلامك ده... بجد منوراني وزيارتك بتفرحني...
فتاه من الصعيد
109... لااااااااااااااااااااااااااا.... ربنا يطمنك...
ربنا يكرمك ويديلك طولة العمر والصحة...
تحياتي..
حفيدة عرابى
متقلقوووش... اكيد مش هيهتم بعيل هااايف زيييي.. ومش هياخد علي تخاريفي وهرتلتي... انا مجرد مدوون مختل عقليا..
بس تفتكري هيا السلطة السبب؟؟؟
طب سلطة خضرا ولا سلطة الطحينة؟؟؟؟
ربنا يجازي كل واحد علي اعماله ونيته...
تحياتي..
قلــ"بـــلال"ــــــب فارس
لالالالالالالالالالالا... متقولش كده... عيـــــــــب....
هههههههههههههه...
ربنا يسهل واقوم بالزيارة الطلبتها...
نورتني...
أع ـقل مـ ج ـنـونــة
ههههههههههههههه... بتزغردي علي ايه؟؟؟ مش فاهمك؟؟؟؟!!!
اوعي يكوون ال في بالي؟؟؟؟
فراشة
عندك حق... الفقراء يدخلوووون الجنة... والشعب كله فقراء...
منوراني يامونمون...
تصبحي علي خير..
انسان عادي
الله يرحم جدك...
طيب انا هنضف قلبي .... وهبطل حقد... بس تفتكر ده هيجيب نتيجة؟؟؟ وهكمل ال 30 حتي؟؟؟
تحياتي...
وربنا شكلك ما هتجبها لبر
ال وجايبله تورته ال وبعدين انت لما
تقول ان نفسك الشعب ياخد اللى هو بيخده
عشان عمرنا يطول يبقى انت كده بتدعى علينا يا بنى مش احنا الشعب ده احنا عايزين نموت ونخلص وخللى لهم هما البلد يحكموها لوحدهم هو والوزرا بتوعه
ولو عايزه يفييص بسرعه نزله فرن عيش
ولا ركبه اتوبيس ولا شربه من الميه بتاعتنا
مش هيلحق حتى يعيا
لو عنيك هتجيب نتيجه يبقى خليك وراه
بس ما ظنش دا واخد مناااااعه يا بنى
يااااااه 82 سنه ياريت اعيش نصهم
ندر عليا لو عشت نصهم وعييت ما هروح لدكتور يبقى كتر خير الدنيا على كده
هه يالا يالا دنيا
هتخلينى انق ع الراجل
ربنا يهديك ويجعل كلامنا خفيف عليه
MONTY
تصدقي عندك حق... انا كده بتمني الشر للشعب.. انه يعيش كتير في الظروف المنيلة دي.....
41 بس .... انتي قنوعة اووووي...
يستي ربنا يديلك طولة العمر...
نورتيني,
صباحك بيضحك..
اللى يشوف تعليقاتك يعرف ان شخصيتك دمها خفيف لان تعليقاتك ساخرة عند البشر التانيين
لكن كل لما اجى ازروك الاقى سياسة زهقتنى بصراحة لان السياسة دمها مش خفيف خالص
عموما
بطل حقد على الراجل ده لسه ف عز شبابه هو ناوى يجيب ال 105 وهو مستريح برده
يلا حصل خير ان شاء الله
تحياتى
هبة
Doba
افهم من كده ان دمي تقيل هنا؟؟!!!!!
لااااااااااااااااااااااااااا.... ههههههههههه...
خلاص يستي البوست الجاي مش سياسة علشان خاطرك بس.... مع اني مش معتبر البوست ده سياسة...
نورتي البلوج بزيارتك ياهبة...... ال اتمني تتكرر...
صباحك شيكولاتة...
نق بقى على الراجل نق
ياااااااساتر
أيه عايزين منه أيه
متسبوا يعيش الدنيا بالطول والعرض
ويبهدل ويجوع ويهين فينا زيه مهوا عايز
بلدهم وهما حرين فيها
الظاهر ان ضباط أمن الدوله المره الي فاتت كانت أيديهم خفيفه شويه
أنا هوصيهم عليك المره دي
من كل بستان زهرة
لا انا مش بنق.. اطلاقا مطلقا..
وبلاش توصيات ... الواحد مش ناقص... هههههههه...
نورتيني..
إهيه !!!
يعنى الحكاية تخلص بعلبة حلاوة ؟!!
بس كدا؟
طيييب يا سيدى
يعنى انتا جيت ف جمل
التجمع التدوينى الكاااااادم
إن شاء الله
ليك عندى علبة حلاوة
الرشيدى الميزان
عشان خاطر الطفاسة دى
بس يا خوفى يا بدران
لتاخد العلبة
و متبطلش جر شكل برضو
خلى بالك
انا حدودى القاهرة الكبرى
و اسكندرية
و المنصورة
و بورسعيد بس
الواحات
و وداى النطرون
و الحتت المتطرفة دى مليش فيها
متشحططناش وراك
الله يكرمك
هه
صباحك كل خير يا رب
يادى النق والحسد والقر اللى ماشى فى البلد هههههههههههههههههههه
شوف يا ابو على
انا معايا الوصفة
انت تعمل ودن من طين وودن من عجين والناس تصرخ وتصوت وانت تضحك وتقول دعونا نعمل فى صمت
كده انت هتبقى تمام
هههههههههه خد بالك من نفسك بقى لانك مش هتجيبها لبر
صباحو قر يا سيدي
ايه يا عم داخل تقر علي الناس
خليك في الشعرتين البيض بتوعك
ابقي اعملهم عيد ميلاد
هو انا حألاحق على مين ولا مين من المدونين في العيش والحلاوة انت ولا وليد هي وظروفها عموما قولهم يخلوكم في مكان واحد عشان المواصلات هههه
تحياتي
فاتيما
لالالالالالا... انا هطالبهم يحبسوني في سجن المزرعة مع علية القوم... واحنا اقل منهم ولا ايه!!
طيب ينفع ابدل علبة الرشيدي.. بعلبة كادبوري... :P:P:
Ms Venus
طب منا علي طووول بعمل عبيط مع اي حد يكلمني عن حاجة تخصني... ووداني الاتنين مقطعوين.... مش حاسس بفرق ليه!!
بس انا ممكن اذودها مع طلبات الناس ونشوووف...
ودي وصفة سهلة... دي وصفة هايلة.. ودي وصفة سهلة... دي وصفة هايلة.. هههههههههه...
وسيبيها علي الله...
منوراني..
wasf_elahsas
انا مش بقر ياشهد .. مش اخلاقي.... هههههههه...
انا بسأل سؤال برئ ....
ولا يستي مش هحتفل بيهم... خليهم كده... بدل مخوتهم يغيرو منهم واصحي الاقي كله قلب....
منوراني كالعادة... تحياتي..
خواطر شابة
لاااااااااا... انا لن اتنازل عن الحلاوة الخاصة بيا.... مش تقولي الاتنين جنب بعض وتجيبلنا علبة واحدة نقسم فيها.... ههههههههههه....
احنا النهاردة هنا... ياعالم بكرة هنبقي فين...
منوراني..
ابو علي يا ضينايا
امانة عليك لو رد
امانة يا شيخ وحيااااااااااة صحة شباب مصر وعافيتهم اللي راحت من قبل ما يقولوا يا ليل ولا يا عين
تسأله بس هو بيصبغ حواجبه هو وعلي لطفي فين؟
انا فارق معايا الحواجب اكتر من الشعر بكتير
متنساش
هه :)
ستيتة حسب الله الحمش
من عنيا... هسألهولك ... بس هوا يرد بس... منغير متحلفيني بالغالية....
منوراني يادكتورة..
ايه اللي في بالك يابني :D
لا انا بس خلاص قولت اللى عندي ف البوست ع المدونة
فـ حبيت ازغرط هنا بئة هاقول ايه يعني :D
حاسة اني هافرقع من الفرحة
كمل 82 سنة ياضنايا وربنا يديله طولت العمر
من اجمل التعليقات اللى قريتها
الشعب يهنئ الرئيس حسني مبارك بعيد ميلاده الـ 82 .. ويتمني الاحتفال بالذكري الاولي له قريبا :D
خير الكلام ماقل ودل وعبر عن محتواه
نياهاهاهاها :D :D
أع ـقل مـ ج ـنـونــة
ال في بالي ان الحكومة في الطريق... ههههههههه.... علشان يخدونا احنا الاتنين...
تصدقي تعليق حلو... بس عيب نتمني الموت لحد... وحرام...
ممكن نقر بس...
صباحك ميلك تشيك..
السلام عليكم ورحمه الله وبركاته
مساء الخير يابو علي
عامل ايه
بقي كده بتقر ع ريسنا يطول عمره يزهزه عمره ينصره ع مين يعاديه
ههههههه
كل سنه وهو طيب وبخير وعقبال ال 182
ده لسه شباب مش عارفه مالك بقالك فتره عايز تودينا ورا الشمس مترحم يابني
خليك في حالك ههههه
دومت بخير
مساء الخير
ازيك يا ابو على ؟
يارب تكون تمام
كل سنة والكبييييييير بتاعنا طيب
الا بقولك ايه
مفيش عنوان نبعتلوا عليه كادوو شيك كدا D:
بس اقولك .. دا مش عيد ميلاده ال 82 .. دا الاول من غير مرارة ;)
لو مش خايف ع نفسك .. خاف ع الشعريتين اللى قفشتهم .. دول ولاد ناس بردو :)
القمرالباكي
وعليكم السلام ورحمة الله وبركاته...
انا بخير الحمدلله.. وانتي؟
وعلي رأيك... طويل العمر يطول عمره ويزهزه عصره وينصره علي مين يعديه هاااااي هييييك...
ويستي عقبال المتين... يالااااااااااا..
اصلي سمعت ان الجو وراا الشمس تحفة... اليومين دووول... هههههههه...
وهسمع نصيحتك... حاضر,,
منوراني... تحياتي..
Silver Eyes
مساء الفل والياسمين.. انا الحمدلله .. وانتي؟؟؟؟ اخبارك؟؟
تصدقي عندك حق ... ده عيده الاول منغير مرارة... يعني 81 بالمرارة... وان شاء الله 81 منغيرها...
العنوان سهل.. ورا محطة البنزين... بس بلاش موضوع الهدية دي... بدل ميعملو فيكي زي احمد حلمي في "اسف علي الازعاج"...
والشعرتين البيض انا مستعد ادلعهم اخر دلع... بس ميعدووش اصحابهم... مش ناقصة ... دول اتنين بالعدد وجابولي اكتئاب...
منوراني كالعادة..
تحياتي..
انت ناوى على ايه
ياابنى خاف على نفسك شويه
انت مستبيع
بالله عليك ماتقولش الحاجات الصعبه دى تانى
ولا تلقوا بانفسكم فى الهلوكه
اسفه على كلامى
بس انتا لو اخويا كنت حبستك
انا خايفه عليك والله
تحياتى
الشـوكة الــنـاعـمـة
منغير اسف... بجد شكرا ليكي اوووي..
بس انا عاوز اشقولك حاجة.. كلامي بسيط.. مش زي منتي متخيلة.. ومفتكرش انهم هيعملو عقلهم بعقلي.. زي مقولت قبل كده.. انا مجرد مجنون غير مستقر عقليا.. ميتخدش علي كلامه... هههههههههههه....
شكرا ليكي كمان مرة...
تصبحي علي خير..
مش ناوى تجيبها لبرررررررررر
هههههههههه
يا عم الحاج انت هتبص للراجل فى الكام سندوتش اللى بياكلهم
اية يخواتى القر دة بطلووووووو حقد بقا ابو على وربنا لو اتمسكت مهسيبك عيب عليك هو احنا مدونين اى كلام لالالالا
دة انا هجيبلهم برينت من بوست جوابك للريس وتعليقاتك كمان امال اية
ههههههههههه
وبعدين ربنا يدى جدك الصحه وطولة العمر
ويديك الصحه وطولة العمر وتعيش لحد 100 سنه وتشوف يارب اللهم امين ولادى وولاد ولاد ولادى امال اية:)
لا يا أبو على يا خويا
أنا مش معاك خالص
ده الراجل بيودع يا جدع
هو آه ممكن يقعد يودع عشرة عشرين خمسة و اربعين سنة
إنما بيودع برضك
ده أنا سمعت صوته في خطاب عيد العمال قام صِعِب عليا
و قلته في وشه كده
آه .. حاكم أخوك ما يخافش غير م اللي خلقه
قلتله في وشه و ده جاي عليك بإيه ده كله يا جدو
ما تتكن في بيتكم أحسن ولا روح موت في أي حتة بره وسيبها بقى للي ينفع لها
الغريبة انه ما ردش يا جدع
يكون زعل ؟؟!!
يلا ما علينا
يزعل ما يزعلش المهم ان الواحد رصّله الكلمتين في وشه و استريح
يلللا سلام
ســـهــــر
اخص... هتبعيني ... اكيد علشان طمعانة في نسبتي ال في القهوة بتاعتنا.. عاوزة تكوووشي عليها لوحدك؟؟؟ ماشي ماشي.... هههههههههههههههه...
ويستي 100 كتيير عليا...
كفاية اشوف ولادك... مش لازم ولادهم... شوفيهم انتي... هههههههههههه...
منوراني ياسهر ياعسل..
ňįĝŗő
لا ياراجل هيزعل من ايه... وانت قلت حاجة تزعل....
هوا يمكن مكنش سامعك كويس.. من هتافات العمال ال "بيحبوووه اووووي"....
نورتني ياباشا... ويرب متكونش زيارة عابرة وتنورني تاني...
تحياتي
وش واحدة مكسوفة ومش مركزة
معلش السن ليه حكمه
ابراهيم عيسى
ابراهيم عيسى
ابراهيم عيسى
حفيدة عرابى
هوا انا مفهمتش التعليق بصراحة... بس انتي تقريبا تقصدي حاجة من اتنين... يا أما تشابه موضوع البوست مع مقال من مقالات ابراهيم عيسي وافتكر ممكن يكون قصدك "انك ميت وانهم لميتون"...
او تقصدي هتحبس زيه...
ياأما قصد حاجة انا مش فاهمها؟؟؟!!!!
ولا ايه؟؟؟
هلا أبو علي ...
إيه البوست المليان قر ( على عينك ياتاجر ) ههههههههههه
طيب مش تجيبله الأول هديه معتبره وبعدين تسأل إللي إنت عايزوا ...
ولا إنت عايز تاخد إجابتك كده بلاش .. لا كده عيييييييب :)))
إبقى فكرني أعمل معاك لقاء صحفي قبل مايرحلوك .. عشان أشوف إنت نفسك في إيه :)))
تسلم ياباشا على كورس القر إللي أخدتوا من البوست ده هههههههه
ربنا يسعد أيامك
... ;) ,,, ;) ...
ghada mOhsen
بس دي تبقي رشوة مش هدية!!
هههههههههههههههههه... القاء الصحفي بعشرين جنيه... والصورة بتلاتين... لازم استغل الموقف...
نورتيني...ربنا يسعدك..
إرسال تعليق