والمرة دي مش هجبلكم ارانب ولا قطط زي الجزء الاول - ال مشفش الجزء الاول يرجع يبص عليه- المرة دي خاطرة كده من الحاجات العزيزة عليا... وبرضو مش عاوزين تريقة... لأني كاتب الحاجات دي وانا عندي اربعتاشر ولا خمستاشر بالكتير...
يلا اسيبكم معاها... اسمها " من غير اسباب"
من غير أسباب
أنا قلبي فين راح مني فين
حبيبي راح
وملاني جراح
ومنين ارتاح
ده من يوم معرفته
وبعيوني شوفته
قلبي سلم
ولساني ما تكلم
وعقلي غاب
وتقولوا ليه
من غير أسباب
جايز سحرتني عينيه
بعد ملمستني أيديه
حبيته أنا ليه
معرفش
متستنوش جواب
ده من غير أسباب
كأنها نجمة وعالية
وليها ايدي مش طايلة
ركبتلها سحابة
زي عنيها المليانة غرابة
لا مش زي عنيها
زي عيوني أنا
نهيتها دموع
ونزول من غير رجوع
ويقيدوا عليها شموع
تكتر النار والعذاب
ليه؟؟
من غير أسباب
ليه بعد مجرحتيني
جايه بتترجيني
ياما قولتيلي كلام
ورديت بكلام
وعشت في أحلام
ودي كانت أوهام
وبعيدة سراب
ومن غير أسباب
دي عنيها كانت بريئة
مكنتش أبدا جريئة
دلوقتي بانت الحقيقة
ليه جرحتي
ليه بعدتي
وقلبي خنتي
فين كلام زمان
والحب الكان
ويريته ما كان
مش كنا أحباب
ليه بعتيني
من غير أسباب؟؟؟؟؟؟؟؟؟
هناك 16 تعليقًا:
انا اول مره اعلق هنا وباذن الله موش هتكون الاخيره
وبجد الكلام حلو موش مهم اذا كان مترتب ولا لا
المهم يوصل من القلب للقلب
تقبل مروري وتحياتي
اما ده كلام المراهقه
امال دلوقتى حتقول ايه؟
الكلام حلو قوى و محسوس و طالع من واحد حاسس بيه قوى
تسلم الايادى
sony2000
يرب متكونش الاخيرة ان شاء الله.. ده شرف للبلوج...
وشكرا اوي علي تعليقك الجميل ده.. ربنا يكرمك...
نورتيني ... وتحياتي
صيدلانية طالعة نازلة
والله زيارتك يادكتورة كفاية عليا انها تفرحني...
بس كلام حلو ومشجع كده كمان... انا مقدرش علي الرضا ده كله...
وبالنسبة لدلوقتي خلاص... مفيش خالص.. ربنا تاب عليا...ههههههههه
ربنا يخليكي يا دكتورة علا... وصباحك جميل ان شاء الله....
تحياتي
صباح الفل
الراجل ده بيقول كلام زي الفل
مش زي بنتي اللي شعرها يجيب تتح في النفوخ
مين بس ها يتريق على الكلام ده
ده رقيق جدا
ستيتة حسب الله الحمش
دكتورة ستيتة عندنا... يامرحبا يامرحبا... شاي ولا قهوة... ولا اقولك.. انا هبعت اجيبلك سحلب فتلة من الميطلعش غير للحبايب..
الله يكرمك علي ردك الحلو ده..
بس ليا استفسار صغير... انا مرة سألت مودرسة العربي.. يعني ايه رقيق ياميس... قلتلي رقيق يعني عبيد ياحبيبي.... صحيح الكلام ده... (وش بيغمز) ههههههههههههه
نورتيني... وصباحك زي الفل..
تحياتي
احلي كلام بيطلع اما تكون مشاعره بريئة وصافيه لسه الزمن ما شوههاش ولا اتاثرت بالغش والخداع
حقيقي الكلمات جميله ومؤثرة تسلم ايدك
اه في تعقيب علي انك سالت مدرسه العربي يعني ايه رقيق قالتلك عبيد
انا مرة رحت للدكتور وقالي اشربي سوائل كتير فبسال ماما يعني ايه سوائل قالتلي زي الجاز والبنزين
فعادي كل كلمة ولها ميت معني
وانت ال اختار ال يريحك منهم
تحياتي
wasf_elahsas
شكرا لكلامك وزوقك..
منوراني ديما... منتي عارفة..
وبالنسبة للتعقيب علي موضوع "رقيق"... دنا بس بغلس عي دكتورة ستيتة... (وش شرير).....
نورتيني..
تحياتي
(حبيبي راح
وملاني جراح
ومنين ارتاح
ده من يوم معرفته
وبعيوني شوفته
قلبي سلم
ولساني ما تكلم
وعقلي غاب
وتقولوا ليه
من غير أسباب)
حلوة اوى الجزء دا؟!
norahaty
الجزء ده بس؟؟؟؟؟؟؟؟؟؟ هههههههههههه
ربنا يكرمك يا نورا...
بس سؤال خبيث: اشمعنا الجزء ده بالتحديد؟؟
صباحك زي الفل...
نورتيني... تحياتي
ايه الكلام الحلو ده والمشاعر الرقيقة دى
بجد الكلام جميل جدا ومحسوس اوى
تحياتى
مدام شفقة... استاذ احسان..
نورتوني... ويرب متكونش اخر زيارة
شكرا علي الكلام الحلو ده...
ربنا يكرمك
يومك جميل ان شاء الله
تحياتي
على فكره الموهبه واضحه في الكلام
اتمنى انك تداوم الكتابه علشان ما تدندفنش
تحياتي
فتاة من الصعيد
الله يرحمها بقي... اتدفنت من زمان..
نورتيني,
تحياتي ليكي
فتاة من الصعيد
الله يرحمها بقي... اتدفنت من زمان..
نورتيني,
تحياتي ليكي
نحن في حاجه الي رأيك في مشاكل القراء بمدونة "دقات قلب بعد الخمسين"
مع خالص تقديري
إرسال تعليق