الظاهر ان الحملة الحكومية نجحت...
اه نجحت... الحملة الحكومية ضد الامل في التغيير...
الحكومة ديما بتطلع القطط الفطسانة في اي حد ممكن الشعب يعتبروو امل.. في التغيير... حتي لو التغيير ده للأسوء..
زي ما الحكومة نجحت قبل كده... في انها تظهر ايمن نور علي انه خاين وعميل لامريكا- حتي لو ده صحيح- ونجحت تخلي الناس معظم الناس مش واثقين فيه... وده برضه يتحسب علي ايمن نور نفسه.. انه ادي الفرصة للحكومة المبجلة انها تمسك عليه الحاجات دي...
طيب مهو جمال بيه مبارك امين سياسات حزبنا الوثني.. كل يومين في امريكا.... حد قال عليه عميل ... ولا بيرضخ لمطالب امريكا؟؟؟
طبعا لأ...
عمرو موسي لما شعبيته زادت بين الناس وبين حكام الدول العربية ... ايه الحصل؟؟ اتنفي في جامعة الدول... ال هيا منظمة لا ليها طعم ولا لون ولا ريحة- غير ريحة الاكل الحمضان-...
واخيرا البرادعي...
اول ما الراجل قال انا ممكن ارشح نفسي بشرووط كذا وكذا وكذا....
هوبا الجرايد الحكومية كلها نزلت فيه شتيمة... وتجريح.. وتشخيص...
اليقول ده ماله ومال السياسية .. وال يقول ده بره مصر من زمن.. وده يعرف ايه عن مشاكلنا... واليقول ده بيسمع كلام امريكا بأمارة الحرب علي العراق والعقوبات بتاعت ايران...
المصيبة الاكبر لما تسمع الكلام ده من ناس مسئولة.... يعني لما صحفي يطلع يقول ده عالم ... ايه الدخله في السياسة ... هنقول صحفي مقراش عن الموضوع البيكتب عنه... ومعلوماته قليلة في الحتة دي...
لكن لما وزير ورجل مهم في حكومتنا الفاضلة زي مفيد شهاب ... يطلع يقول انا بحترم البرادعي لأنه عالم ذرة شرف مصر... لكن ده ميخلهوش ليه الحق انه يتكلم في السياسة وفي الترشح للرئاسة..... دي بقي مصيبة...
تلفيق وكدب مفيش بعد كده.... واي كلام بيتقال علشان يتردد.. ويترسخ عند الناس...
ياناس ياهووو... البرادعي مش عالم زرة.... ولا يعرف عنها حاجة...
البرادعي رجل قانون دولي.... اتخرج من كلية حقوق... واشتغل في وزارة الخارجية المصرية.... والامم المتحدة.... ثم الوكالة الدولية للطاقة الذرية... مش لازم رئيس وكالة زي دي يبقي عالم .... دي وكالة دولية محتاجة مدير... فاهم في القانون الدولي .. والسياسة الدولية.... راجل العالم كان واثق فيه من سنة 97 لحد نهاية ولايته التالتة....
انا مش بقول هنا ان البرادعي نبي.. ولا مخلص جايلنا بسيف وحصان....
جايز ميكونش شخصية تصلح لقيادة بلد... بس نقدر نعتبره اسم لنجم...
اه نجم... احنا مش محتاجين شخصية زي فيدل كاسترو تقود ثورة او انقلاب...
لا احنا محتاجين شخصية مشهورة في مصر وبره مصر... شخصية قوية... جذابة...
محتاجين نجم...
نجم اسمه والتفاف الناس حوليه يضغط علي اعصاب الحكومة ...
ويقلق راحتهم...
ويمكن !!
يمكن نجوميته تبقي سبب في تغيير..
حتي لو للأسوء ..
بس اسمه تغيير...
ومفتكرش ان فيه اسوء من حالنا ال احنا فيه دلوقتي...
مفتكرش ان فيه اسوء من الحزب الوثني بكل اصنامه...
ف ليه... منلمعش النجم ده....
طالما مصلحتنا القريبة معاه...
بمعني... لو حصل- لوحصل- تغيير ما... الناس هتفووق...
هتحس وتعرف ان اصنام الحزب مش الهه مخلدة... وانهم ممكن يتغيروو....
وساعتها اي تغير بعد كده هيكون سهل... يعني الهيجي والشعب مش هيقتنع بيه...
هيبقي سهل يشيله ويجيب غيره... هتبقي جزوره في الارض لسه ضعيفة... الشعب هيخلعها بسهولة...
لكن وضعنا الحالي ده... محتاج معجزة علشان الناس تفوق... وتعرف انها ممكن تغير... وممكن تتحكم في مصيرها...
التغيير في اوله صعب..
لكن مش مستحيل....
علشان كده انا مع النجم-حتي لو مرشحش نفسه-...
انا مع البرادعي
هناك 9 تعليقات:
اولا رجاء لا لا لا حمدلله علي السلامة ليه الغياب
اللهم اجعله خير
ثانيا حرام عليك الخط ال انت كاتب بيه الموضوع ده انا نقلته للوورد عشان اكبره واتقله واعرف اقراه
ثالثا بقي ياسيدي بالنسبة للموضوع سيبك من البرادعي ولا ايمن نور
الحكاية ومافيها ان البلد دي بقت ماشية علي منحدر جامد اوي مش بتمشي لا دي بتجري ناحية السقوط
والبرادعي او ال زيه قشة في نص الطريق
ما ينفعش نتمسك فيها عشان نرجع او يحصل التغيير ال بتتكلم عنه
كمان من خبرتي المتواضعه ما ينفعش راجل اكاديمي بس اخره القانون يبقي قائد القائد مش بس لازم يعرف القانون ولا الذرة القائد ال يمسك بايده شعب علي حافة السقوط يبقي واثق من نفسه ومن قراراته وعارف كل كلمة بيقولها معناها ايه راجل يعرف يتكلم في العلم والحب والحرب وكل حاجة
يقدر يحتوي غضب شعبه وغضب عدوه ويعدي ببلده بر الامان ومايخليش حد يفكر مجرد يفكر انه يهوب ناحيتها
وعشان انا بعيد عن السياسة من سنين وعشان ما اظلمش الراجل فعشان يترشح وينفع يبقي رئيس لازمله مؤهلات كتير وما تنكرش اننا ما نعرفوش وما عندناش وقت لسه نتعرف لاننا فعلا خلاص قربنا نوصل للهاوية معندناش وقت للتجربه
محتاجين جبل صامد لا هو شاب لسه بيجري ورا كورة ولا واحد ال يعرفه عن بلده اسمها
محتاجين راجل واصلا تلات تربع الرجالة راحو في حرب 67 خلاص يابني عوضنا عليه هو
وعشان كدة بقي انا حاسة ان موضوع الانتخابات دي زي التوك شو ال دمه تقيل علي طول اقفل التليفزيون وقوم نام
سوري اني طولت
تحياتي
نسيت اقول اني اول كرسي
هع هع هع هع هع
منورنا
طبعا انا مش انت
وصف الاحساس
اولا اسف علي الغيبة.. ظروف الشغل ... مطحون.. ادعيلي...
ثانيا... اسف اني تعبتك بالخط.. بس اصلي كتبت البوست ده من الموبيل.... فطلع كده... بس اتصلح خلاص .. كله تمام يافندم..
ثالثا.. برضو احنا كده هنرجع لنقطة الصفر... ال نعرفه احسن من المنعرفهوش... وااننا محتاجين صلاح الدين الايوبي علشان ينقذ البلد... والكلام الكتير عن البطل الوهمي ذو القدرات الخارقة ال ينهض بشعب وامة....
لا احنا مش محتاجين سوبرهيرو... احنا محتاجين شخص عادي... بل اقل من العادي كمان...
شخص نعتبره امل .. حتي لو امل زائف..
محتاجين نفوق.. ونعرف اننا لازم نبتدي... وكفاية بقي انتخة وسلبية...
سامحيني في ال هقوله دلوقتي بس الجملة دي "وعشان كدة بقي انا حاسة ان موضوع الانتخابات دي زي التوك شو ال دمه تقيل علي طول اقفل التليفزيون وقوم نام"
منتهي السلبية... وده حالنا كلنا مش انتي بس... وده ال هما بيحولو يرسخووه جوانا...
بس مش دي الحقيقة... احنا ال في ايدينا التغيير... واحنا ال هننقذ نفسنا قبل مننقذ البلد من الهاوية ال بتقولي عليها... اسف كمان مرة علي تطاولي...
رابعا.. الكرسي الاول منور بيكي... خالي بالك بقي وحافظي عليه ديما...
تحياتي
اولا انا موافق على البرادعى للتغير
-----------
ثانيا اريد من حضرتك ومن جميع زوارك المشاركة فى الصالون الفكرى على مدونتى مدونة قلب فارس
التفاصيل زيارة مدونتى
http://qalbfars.blogspot.com/
وجهة نظر تحترم
ولكن خد بالك
انا مش ضد البرادعي
هو مواطن مصري ولو كنا نعيش عصر ديموقراطي كان يبقى حقه زي حق غيره يترشح
لكن لا هو ها يترشح
ولا مادة الدستور ها تتغير
ولا اعرف عنه شيء
ولا عاوزة حسني ولا جمال
يعني تقدر تقول كده عجيبة من عجائب الدنيا
متاهه فعلا
لا عاوزين الركود الحالي
ولا حاجة بتقول ان ممكن حد يترشح
والأدهى والأمر
حتى لو حد اترشح
طب ونسبة 99 في المية التي نعشقها
معقوله كده ها تسيبنا بالساهل وبأمان كده
ادينا بنشوف
والراجل اهو يومين في بيته مع عيلته في مدة زيارة ثماني ايام
تحياتي لطرحك القيم
هو طبعا موش هيرشح نفسه
بس هو ادى للناس امل في التغيير
وادى احساس ان الناس زهقت خلاص... يمكن يفوقوا بقا
تحياتي
قلب فارس
اولا : نورتني...
ثانيا : ان شاء الله دعوة مقبولة للمشاركة في الصالون الفكري..
تحياتي
دكتورة ستيتة
بلاش تشائم.... ان شاء الله خير.. واكيد التغيير جاي... بال برادعي او بغيره... النهاردة او بكرة.. بس اكيد هيجي...
وعي رأي المؤرخ الكبير علي الحجار.. ولابد من يوم محسوم تترد فيه المظالم ..ابيض علي كل مظلوم اسود علي كل ظالم...
تحياتي
فتاة من الصعيد
يسمع من بؤك ربنا ... والدوشة بتاعة البرادعي دي تفوق الناس... وتعرفهم حقوقهم...
نورتيني كالعادة... تحياتي.. وصباحك زي الفل
إرسال تعليق