الخميس، 25 فبراير 2010

اغتيالي...

كارثة قومية

فضيحة عالمية

حادثة القرن

دي عناوين الجرايد والمجلات.. بعد الحادث المرووع... او علي الاقل دي العناوين ال مفروض تبقي علي الصفحات الاولي ....

بس للاسف الصحافة عندنا بتخاف تنشر الحوادث الفظيعة ال ممكن تقلب الرأي العام كله....

لكل الناس الميعرفوش ايه الحادثة ال بتكلم عنها....

اليكم الخبر:

محاولة اغتيال فاشلة (الحمدلله) للعبدلله ....

ايون محاولة اغتيال .. ليا...

بس الحمدلله ربنا نجاني منها...

طبعا المغتالين الاوغاد.. استخدمو معايا اسؤ انواع الاغتيال واكثرها قرفا...

حاولو يسمووووني....

شوفتو...

ولاد التيت .. حاولو يسمموني....

بس علي مين.... انا بطني مصفحة ضد كل انواع الاكل منتهي الصلاحية.. والغير صالح للاستخدام الادمي... دنا حتي لما باكل الاكل بتاع الحاجة بحس ان فيه حاجة غلط... بحس انه اكل نضيف زيادة عن اللزوم..

ف احب اطمنكم ... انا الحمدلله بخير... والازمة في مراحلها الاخيرة... اينعم... انا لسه في السرير ...

ولسه بطني قفشة عليا.... ولسه دماغي عاملة زي البتاع البيكسرو بيه الاسفلت...

بس كله تمام.... والامن مستتب...

وابتديت تحقيقاتي لتحديد هوية الجناة...

وبما اني شرلوك هولمز زماني...

فتوصلت لتلت مشبوهين... ملهومش رابع...

جاد... عادل .. كنتاكي...

انا اتعشيت من عند (جاد) قبل منام.... ولما صحيت ... فطرت في الشغل سندوتشات بيعملها (عادل) الاوفيس بوي.... ولما روحت – وبما اني كنت لسه قابض جزء من مرتب شهر يناير ال لسه مقبضتوش بسبب مشاكل مع الكاش زي ما الراجل صاحب الكشك بيقول- فقلت اطلب اكل بقي لحد البيت شوية تناكة والاطة ومش هانزل بنفسي .. وطلبت من (كنتاكي).....

كده عندنا المشتبه بهم.... لازم نحدد الدوافع...

المشتبه الاول محلات جاد: مفيش مبيني وبينه عداوة بالعكس... دحنا جيران... والجيران ميعملوش كده في بعض... الا اذا كان اتضايق شوية اني ديما بسرب كل انواع الفلوس المعدنية ال بتخنق منها في جيبي عنده... بس مهو ديما بيردهالي لما مبيكونش معايا فكة ... وباخد الباقي كوينز برضو...

المشتبه التاني عادل: يمكن يكون متضايق مني علشان مشربتش ال نسكافيه ال عملهولي من كام يوم.. بس مهو عارف اني مبشربش نسكافيه معمول بلبن بودرة – تم استبدال اللبن العادي بلبن بودرة مؤخرا عندنا في الشركة اقصد الكشك علشان مشكلة الكاش البقولكم عليها- بس كان شكله زعلان وهوا راجع بالمج بتاعي مليان... وبصلي بصة كده..... بس عادل ده صعيدي زيي والصعايدة ميعملوش كده في بعض....

المشتبه الاخير كنتاكي: طول عمري مبثقش فيه... تحسوه راجل مولعب كده... عجوز وشايب وعايب... بصوو كده علي دقنه العملها سكسوكة ولا نضرته... والمصيبة بقي ضحكته... ضحكة عجوز في السبعين عاوز يتجوز بنت عندها عشرين سنة... بصراحة انا شاكك فيه .. وخصوصا ان الامريكان ليهم نفوذ معاه.. وطبعا انا مستهدف من الامريكان ... بسبب خطورتي الشديدة علي الامن الكومي الامريكي.. والجوكر الامريكي كمان مش الكومي بس....... بس رجعت وقلت لالالالالالا اكيد مش كنتاكي.... كان هيوصلني خبر لو فيه خطة لتصفيتي... انا زارع عندهم عميل.. صاحبي المعايا في الشقة بيشتغل مساعد مدير في فرع من فروعهم... كان اكيد هيديني خبر...

وفي النهاية توصلت لان المشتبه فيهم لسه زي مهما... اكيد واحد فيهم المنفذ.. بس المحرض والغرض من الجريمة لسه مجهولين...

ال عنده اي معلومات عن الحادث الاليم.... يتصل علي 0900 0900 ويمكن يكسب رحلة لشخصين لزيارتي بس مينساش يجيب معاه كيلو موز وازازة بيبسي لتر... ال هيجيب كانز هزعله....

ومازال البحث مستمرا..........

هناك 20 تعليقًا:

صيدلانيه طالعه نازله يقول...

ههههههههههههههههه

هو كنتاكى بعينه و غباوته

امريكا يا باشا حست بخطورتك ومش حتسيبك فى حالك

من ساعه ما اسمع لمع فى التدوين و هما حاطينك فى اللسته السودا و قائمه الاغتيالات

بس و لا يهمك جموع الشعب حتعمل اعتصامات و اضرابات لغايه ما نخلص عليك

يوووووووووه قصدى على الجناه و حنضرب بيد من حديد على كل من تسول له نفسه تهديد الامن القومى السمع هصى

و اخترناك اخترنااااااااااك

Unknown يقول...

انا شـــاكة
فى كنتاكى
مش علشان
سكسوكة
الراجل
لكن علشان
فراخ الراجل
اكيد من اللى راحت
فى الوبا ياهنادى ياوووهـ
قصدى اللى راحت فى الفّررررة
بتاعة انفلونزا المعيز وهو لمهم
ببلاش وحط عليهم السبيسى المتين
وبعهم للى عليهم العين اللى
هم حضرتك وأخوانك
واقفل المحضر
فى ساعته
وتاريخه
ابصم:)

سمع هوص (Abo 3li) يقول...

صيدلانيه طالعه نازله

شكرا شكرا... وانا من موقعي هذا -وانا نفسي اربط دماغي ربطة الشغالات- بقولكم ياايها الشعب بوعدكم متقلقوش كله هيبقي بونو واللحمة هتبقي بخمسين قرش...

بس يادكتورة مطلعش منك بمصلحة.. اسم برشام ابلبعه.. دوا شرب اضربه علي الريق... وصفة بلدي حتي...
اي علاج لحالتي... طب بلاش... فين كيلو الموز... حق زيارة المريض؟؟؟


نورتيني يادكتورة علا.. تحياتي

سمع هوص (Abo 3li) يقول...

norahaty
الشكوك كلها بتحوم حولين كنتاكي.. رغم ان اكل الراجل كان اخر حاجة قبل الحادثة مباشرة مش متأكد ان تكون معدتي لحقت تهضم...
بس علي فكرة كده مش هينفع... بجد مش هينفع... تاني دكتورة تدخل ومتسبش روشتة... يعني جو الاثارة والغموض اهم من شغلكم؟؟ بدل متفكرو وتحققو مين المجرم... كان افيدلي لو سيبتيلي نصيحة طبية زي "اشرب عصير قصب هتبقي كويس" واهو كله بثوابه..... هههههههههههه

منوراني بجد كعادتك دائما.... تحياتي

sony2000 يقول...

ههههههههه
بوست حلو ياعم كرومبو
بس خلي بالك بقي من المعادن اليومين دول
تقبل مروري وتحياتي

سمع هوص (Abo 3li) يقول...

sony

الله يحفظك ده من زوقك...
بس قوليلي معادن ايه؟؟؟
انا مش ناقص.. انا لسه مخفتش اساسا!!!


منوراني... تصبحي علي خير

Unknown يقول...

عصير قصب ايه
بس ياأبو على
انت تصووووووووم
3ايام وتفطر على بصلة
فاهم بصلة لا أكثر ولا أقل
وأكيد حتخف يعنى حتخف :واحد
عصير قصب يابنى انت لى وصلحه :)

سمع هوص (Abo 3li) يقول...

وعندك واحد عصير قصب منغير سكر لدكتورة نورا وصلحه...


تسلمي علي النصيحة... ايوة كده... هي دي النصايح ال انا مستنيها.. حتي نصايح موفرة وزي الفل...

بس انتي محددتيش بصل اخضر ولا مخلل ولا ايه ظروفه بالظبط؟؟ اكيد هتفرق...

وده ليه اعراض جانبية؟؟؟

غير معرف يقول...

ايوة اشرب بس متحطش سكر كتير :D

انا اتصلت ب 0900 0900 محدش رد ليه

ههههههههههه

معلش المهم انك فاين دلوقتى

غير معرف يقول...

الف سلامه على حضرتك

طالما حاطط صره البرادعي ..... يبقى كنتاكي :)

تحياتي

وصف الاحساس يقول...

هممم طبعا هو زي ما كل الناس ماقالت انه كنتاكي لانه اكيد داخل فيه دهن الخنازير
بس ما فكرتش كنتاكي هيعرفك منين معرفه تامة تخليك يخطط اغتيالك الا اذا كان حد من ولاد الحلال ال جنبك وز عليك
زي جاد مثلا بما انه جاركوبينكو افشات وهكذا
وممكن يكون عادل كبرها في دماغه بما انه متغاظ منك
المهم حمدلله علي السلامة

ستيتة يقول...

بعد الشر
ههههههههههههههههههههههه
تتسمم قبل ما نبدأ نصيح ونقول برادعي وغيره مفيش
لأ مش ممكن

على العموم انا مناخيري بتقول كنتاكي
بس ان بعض الظن إثم :)

طب نبلغ دلوقت ولا نجيب كيلو يوستفاندي يا راجل اي خدعة أؤمر :)

سمع هوص (Abo 3li) يقول...

star in the sky
اشرب.... لالالالالا...انا اشرب...لايمكن... انا مبشربش الحمدلله... وش بيطلع لسانه..
الا اذا كان قصدك علي القصب كده ممكن.. بس هحط معلقتين سكر بعد اذنك علشان بيبقي مر شوية...

قوليلي انتي اتصلتي الساعة كام وهما مردووش؟؟ اكيد اتصلتي بدري... جربي تاني.. ولو محدش رد.. ابعتي تلغراف (جو ابيض واسود بقي)...

الله يسلمك وشكرا مرورك وسؤالك.. وانا الحمدلله بقيت فاين وفلورا كمان...
نورتيني

سمع هوص (Abo 3li) يقول...

فتاه من الصعيد

الله يسلمك ويبارك فيكي... بس امانة عليكي بلاش كلمة حضرتك دي.. لحسن بتقف في زوري مببلعهاش...

وانتي كمان شاكة في كنتاكي؟؟ مستعدة تشهدي بكده؟؟؟

نورتي المحكمة..
يووووووووه اقصد نورتي البلوج...

تحياتي

سمع هوص (Abo 3li) يقول...

وصف الاحساس

مممممممممم..... خنازير... اولاد الايه حتي الفراخ مسلمتش من الخنازير...

وتحليلك للقضية عقدها زيادة... انتي كده تقصدي انه تنظيم.. مش عمل فردي؟؟
الموضوع كبر!!

المهم الله يسلمك...
تحياتي

سمع هوص (Abo 3li) يقول...

دكتورة ستيتة

لا متقلقيش... انا ممكن اصيح من علي سراير المستشفيات.. بال اس ام اس... ميكونش عندك قلق من التصيح... ثم ساعتها هيبقي شعار المرحلة.. اذا ذهب ابوعلي... فكلنا ابوعلي...

انا بقي مناخيري عرفت مين المجرم...
وانا من هنا بعلن ان الجاني هو (ماس كهربي) وده طبعا بمساعدة شريكه الاساسي في الجريمة (مختل عقليا)...

ولأ طبعا متبلغيش... احنا صعايدة بناخد بالتار.. الحكومة ملهاش صالح بينا... ثم لو مخدناش بالتار يبقي اليوستفندي افيد وعفا الله عما سلف...


نورتيني .. تحياتي

sweet angel يقول...

هههههههههه
لا لازم يتعين لك حراسه بعد كده

هنشوف نكلم احمد السقا
قصدي تيمور
ماهو انت مش اقل من الوزيره شفيقه يعني
ولازم يجيلك حرس

والف الف سلامه

سمع هوص (Abo 3li) يقول...

sweet angel

ابـــشر ياتيمووووور...ههههههههههههه..
بس تفتكري تيمور لوحده كفاية ولا نجيب مصطفي شعبان كمان؟؟

الله يسلمك
المدونة نورت بزيارتك ويرب تتكرر..

TIMMY !! يقول...

يا بختك يا عم ,
فيه ناس بتعبرك و لو حتى باغتيال ,

عقبالنا , بس يبقى اغتيال سريع , علشان مش عاوز أتوجع و انا بموت !!

سمع هوص (Abo 3li) يقول...

timmy

ايه القر ده؟؟حتي في الاغتيالات... هههههههههههههه....


لا يسيدي بعد الشر عنك وعن الجميع...
بس لو مصمم .. انا ممكن اخدمك في المشوار ده... ومش هنختلف في السعر...


نورتني.... تحياتي