السبت، 27 فبراير 2010

مواقف من شقق العزوبية

الحياة بعيد عن الاهل- بحكم الدراسة او الشغل- ليها مميزات كتيرة وعيوب اكتر...

اهم مميزاتها انك بتعيش مع اهل جداد انت ال بتختارهم... وبتختار المكان ال تعيش فيه..

بس مهما كان المكان ال بتختاره كويس او سئ... كله بيندرج تحت اسم واحد... شقة عزاب...

وشقق العزاب للمجربش او المشفش... بيحصل جواها مليون فيلم كل يوم وكل يوم مختلف عن التاني.. يوم فيلم رعب ويوم كوميدي.. ويوم تراجيدي...

يمكن الحادث الاليم ال حكتلكم عنه البوست الفات هوا ال شجعني اكتب شوية واحكيلكم عن شوية فضايح من ال عاصرتهم في شقق العزاب .. بلاوي حصلت في الشقق الكنت عايش فيها... وبلاوي حصلت قدامي في شقق ناس تانية...

ودي شوية مواقف صغيرة من ال ممكن يتحكو... ال ميتحكيش... بيبقي مع اصحابي علي القهوة بس...

............................

الحلقة الاولي

عداد الكهربا

كنت بزور واحد من اصحابي وكان لسه من اسبوع مأجر شقة مفروش وعايش فيها لوحده... والباب خبط... قومنا فتحنا لقينا محصل الكهربا ومعاه شخص تاني مقدرناش ساعتها نفهم هوا مين...

المهم الاخ قالنا كهربا... صاحبي رد عليه ان الست صاحبة البيت هيا ال بتحاسب علي الكهربا والمية وهيا ساكنة في الشقة التحت...

المحصل رد عليه بقرف محدش بيفتح تحت ثم انا هقري العداد... ويبقي ادفعو براحتكم بعدين...

المهم المحصل والشخص المجهول ال معاه دخلو شافو العداد...

راح محصل الكهربا صارخ: ايه ده؟؟؟؟؟؟ وكأنهم شافو عفريت...

انا وصاحبي بصراحة اتخضينا .... انا قلت في عقلي شكلهم مدفعوش الكهربا من عشر سنين... ولا مثلا الشارع كله موصل تكيفاته علي العداد ده ...

المهم المحصل راح قايلنا بلهجة المتهكم: ايه ده يا استاذ؟؟

انا تدخلت- لأني صاحبي كان من النوع الطيب ال مش هيسد مع العالم دي- وقلتله ده عداد حضرتك ان شاء الله...

راح رد عليا بطريقة فيها شماته: منا عارف انه عداد... بس عداد بلغاري...

صاحبي فتح فمه علامة علي عدم الاستيعاب...

وانا حاولت استفسر: وايه يعني لما يكون بلغاري.... ورحت مستظرف : مش احسن ميكون صيني...

الراجل اتنرفز: يااستاذ بقولك بلغاري... بلغاااااااااااااااااااااري....

انا بصراحة حسيت بهول المصيبة والوارطة ال صاحبي فيها... قلت لازم انقذه بشهامتي المعهودة... وادبس الست صاحبة البيت... لحسن يطلع العدادات البلغاري مخلة بالاداب... ولا من الممنوعات واحنا منعرفش...

رحت قافلوو فمه ال كان لسه مفتوح... وشخطت فيه: ازاي الست صاحبة البيت تأجرلك شقة فيها عداد بلغاري.. عالم معندهاش ضمير صحيح...

ورحت قايل للمحصل : طب والحل ايه؟

المحصل: العداد ده لازم يتفك... ويتسلم في المصلحة...

رديت عليه: انا بصراحة مكنتش اعرف ان مصر قاطعة علاقتها الكهربية مع دولة بلغريا... ومكنتش اعرف ان ...

راح مقطعني بغضب: هنهزر يااستاذ... انا بشوف شغلي... العداد ده بلغاري ولازم يتصادر..

انا بحماس: شيل ياراجل شيل ... العداد البلغاري ابن الكلب ده بسرعة ياراجل ... ال بلغاري ال... انا صاحبي يتأجرلو شقة زبالة كده... عالم بقي معندهاش ضمير...

وابتدي هوا وال شخص المعاه يفكو العداد...

وانا بأنب صاحبي: يابني مش تتأكد من ان الشقة مفهاش حاجة غلط قبل متأجرها... شفت طيبتك دي ودتك لفين؟؟

المهم المحصل اخد العداد ومشي...

وانا اقنعت صاحبي ننزل نتخانق مع صاحبة البيت علي نصبها وانعدام ضميرها- ازاي تأجر شقة لشب فيها عداد بلغاري لو اوكراني كنا سامحناها لكن بلغاري لايمكن نسكت - وفعلا نزلنلها وحكينلها ال حصل.... وعاتبتها وقلتلها بقي ينفع كده ياحاجة هوا علشان صاحبي طيب تعملي فيه كده؟؟

ردت: يابني مكل العدادات ال في البيت بلغاري...

انا: معقولة ؟؟؟ دي كارثة... وازاي ساكتين علي نفسكم كده...

الست طبعا قعدت تتريق علينا شوية وعلي خيبتنا اننا حتي مأخدناش اسم المحصل...

انا روحت بعد الموقف ده وعرفت من صاحبي بعدها بكام يوم... اان المحصل كان بيشتغلنا... وشال العداد علشان حاجة تانية خالص... ان الشقة متأخر عليها فواتير كتير... وانا الكنت عامل ناصح اوي وصايع وواقف للراجل ند بالند..

بس ساعتها عرفت اننا ضحايا سهلة جدا لجميع انواع الاشتغالات والنصب في كل ما نجهل...

الحلقة الجاية بقي عن النضافة في شقق العزاب

هناك 29 تعليقًا:

ستيتة يقول...

طب والله اول مرة اعرف ان العدادات لها جنسية
طب انا لو حد عمل كده معايا كنت اديته العداد وقرشين رشوة علشان يستر عليا :)

يالهوي
هو ممكن الدنيا تبقى فيها ناس كده
يعني بدل ما يقول الفواتير متأخرة ولازم نفك العداد يقول بلغاري واستغفر الله ويتوضا كمان

اه كل يومين كده علم امثالي من جهلاء الحياة حاجة جديدة

دي مصر بقت تكنن

ستيتة يقول...

وصلت لكده؟
انا اول تعليق يا استاذ
احنا ها نهزر ولا إيه
انت متعرفش ان اول تعليق ده لازم تدفع عليه غرامة
يا نجاتي أنفخ البلالين :)

سمع هوص (Abo 3li) يقول...

دكتورة ستيتة

طبعا العداد ليها جنسيات.. وليها اب وام.. انتي كنتي فاكراهم مقطوعين...

ثم احنا ال بنتعلم منك يادكتورة ... حاشا وماشا متقوليش كده...

ومصر طول عمرها ارض العجايب...

وبالنسبة للغرامة... لو مدفعتهاش هتيجي تقفليلي المدونة وتقوليلي المدونة دي من التشيك... هههههههه


منوراني يادكتورة...

-_- يقول...

ههههههههههههههه

بلغاااااااااااااااااري

سمع هوص (Abo 3li) يقول...

sharm

اه بلغاري.. تخيل...هههههههههههههههه


نورتني ياباشا...

sweet angel يقول...

ههههههههههه
ايه الشطاره دي ؟؟

سمع هوص (Abo 3li) يقول...

sweet angel

وايه التريقة دي؟؟ ههههههههه...
عادي يعني.. لما واحد يشتغلني... مهو البنعمله في الناس لازم يطلع علينا برضو... ولا ايه؟؟


زيارتك اسعدتني... وتعليقك موتني من الضحك...

وصف الاحساس يقول...

هههههههههههههههه
عارف بتفكرني بايه
اقولك وما تزعلش
لا خلاص مش هقول















طب خلاص خلاص هقول
















فاكر الصعيدي ههههههههه
ال كان عايز يروح امريكا بس ما يعرفش انجليزي
وسال صاحبه قاله هما تلات كلمات يس ونو واوك
اول ما راح لقي قتيل جات الشرطة قالتله بالانقليزي انت ال قتلته قال يس
قالو بردة بالانقليزي لك شركاء قال نو
قالو يلا بينا علي القسم
قال اوك



يعني اي حد يقولك هاخد العداد تديهوله
اه يا خوفي
اه ياخوفي
ولا بلاش
هههههههههههههه
تحياتي

اه
احنا قلنا من غير زعل

سمع هوص (Abo 3li) يقول...

وصف الاحساس

ههههههههههههههههههههههه... لا مفيش زعل ولاحاجة...
ثم ال عداد مكنش في شقتي... عارفة بقي لو كان في شقتي... كنت ادتهولو برضو...


وياخوفك من ايه بقي؟؟؟؟؟؟؟؟!!!!!!!!!

وصف الاحساس يقول...

ما هو ال يفرط في عداد الشقة مش بعيد يفرط في اي حاجة تانية


واه ياخوفي من اخر المشوار اه يا خوفي

سمع هوص (Abo 3li) يقول...

وصف الاحساس

لأاااااااااااااااااااااااااااااااااااااااااااااااااااااااااااا... مش انا...
انا كينج كونج... هههههههههه...
مش معني ان اتضحك عليا مرة... يبقي خلاص...
لا والف لا... لست انا هذا الرجال.. ولست من هؤلاء الرجل... واخدة بالك من الحماس...

ثم ده زي مقولتلك دين وكان لازم الواحد يدفعه... ههههههه

وصف الاحساس يقول...

احم ..احم ...احم
معلش يا ابو علي لو فيها غلاسة يعني
ممكن بس لو بتدخل عند صيدلانيه طالعة نازلة
تقولها ان من يوم ما غيرت اللوك بتاعها وانا الجهاز عندي بيهنج كل ما افتح عندها
اصل الحج عندي عندي عضمة كبيرة وما يستحملش الحاجات دي فاما بيرستر واما بيقف خالص
وبس
وشكرا

سمع هوص (Abo 3li) يقول...

لا مفيهاش غلاسة... احنا تحت امر سيدتك...
والرسالة اتبعتت.. وفي انتظار الرد...
اي خودعة
;)
بس خلاص

الشعب لابد له من حكومه تشكمه يقول...

بلغارى كويس انه مطلعش من الهند:)

عارفه انا المواقف دى وحفظاااااااااها ومستنيه حلقاتك الجايه اصل اختك كانت بتتعلم فى جامعه عين شمس وقاعدين باه فى بيت طالبات وشفنا العجب.

بس تعرف احلى ايام وذكريات:)

سمع هوص (Abo 3li) يقول...

العروسة
يوووووه ...اقصد شيماء

مش عارف ليه حاسس انك بتلمحي لحاجة خبيثة بموضوع الهند ده؟؟؟ ههههههههه
لااااا انا زي ما الست قالت: انا مصري وابويا مصري بسماري ولوني مصري..

مش هندي... انتي شيفاني منجة؟؟ ههههههههه

نورتيني ياعروسة...

sony2000 يقول...

طب سؤال بجد :ماله العداد البلغاري يعني
هو مخدرات ماركه يوم السبت ولا ايه
هههههههههه

Sarah Sobhi يقول...

:)))))))))
7elwa bol3'ary de :D

mestaneya el ba2y ba7eb el mo3'amarat de :D:D

غير معرف يقول...

ناصحيييين

هههههههههههههه

تحياتي

سمع هوص (Abo 3li) يقول...

sony
منا لو اعرف هقولك مش هخبي عليكي... بس تقريبا في توتر في العلاقات المصرية البلغاية

نورتيني

سمع هوص (Abo 3li) يقول...

sarah sobhi
البلوج نور بزيارتك... ويريت يفضل منوور كده ديما...
انا كمان كنت معجب اوي بموضوع بلغاري... لحد ما اكتشفت ان الراجل بيشتغلني...
هههههههه....
نورتيني ياسارة... ومستني الزيارة تتكرر

سمع هوص (Abo 3li) يقول...

فتاة من الصعيد
ههههههه... ناصحين جدا... وميوقع الا الناصح...

صباحك بيضحك.... تحياتي

Single Mummy يقول...

يا نهار اسود...عداد كهربا بلغارى(وكمان بتقولى صباح الخير)هى حصلت لكدة..أدى العزاب واللى بييجى من ورا شقق العزاب.قال بلغارى قال..عموما تستاهلو اللى جرالكم

TIMMY !! يقول...

فكرتني بالشقة اللي كنت قاعد فيها الفترة اللي فاتت في القاهرة ,

كانت الحنفيات بتخر من كل اتجاه ,

و المطبخ كانت ريحته سابقاه ,


بس الحمد لله سبتها خلاص ,

سمع هوص (Abo 3li) يقول...

single mummy


فرحانة فيا؟؟؟؟ هههههههههههه ..... ماشي ماشي....


نورتيني... ويريت تكرريها

سمع هوص (Abo 3li) يقول...

timmy

بص ياريت متجبش سيرة الحنفيات قدامي... علشان بتعصب... ههههههههههه
والمطبخ بقي عندي عمره مكان ليه ريحة... الحمدلله... محدش بيستخدمه... مش نضافة لا سمح الله...


نورتني... تحياتي

غير معرف يقول...

هههههههههههههههههههههههههههههههههههههههههههههههههههههه

معلش

استحملوا بقى

سمع هوص (Abo 3li) يقول...

star in the sky

بنستحمل والله.... ال بنستحملو... خلي عندنا مناعة من كل انواع الغرائب... وبقت حاجة طبيعية وروتين يومي....


نورتيني.. صباحك بيضحك
تحياتي

فكرة من الزمن ده يقول...

افكارك جميلة
ومشوقة
هههههههه
ضحك علك الكشاف
سرقو الصندوق يامحمد لكن مفتاحه معايا

تحياتي وفي انتظار المزيد

سمع هوص (Abo 3li) يقول...

فكرة من الزمن ده

لا وحياتك دول سرقو الصندوق ومفتاحه... مسبوش حاجة...

وانا في انتظار المزيد من الزيارات...

نورتيني... وتحياتي