الأحد، 28 مارس 2010

اسمع زغروتة الاول لو سمحتو...


انا النهاردة جايلكم بخبر حلو.. تقريبا اول مرة اجيلكم بخبر حلو...
يمكن ده احلي حاجة حصلتلي من فترة كبيرة اوي...
انا هخطب ياجدعااااااااااااااااااااااان...
اسمع زغروتــــة؟؟!...
وكلكم معزومين علي حفلة خطوبتي دي... دي مش عزومة مركبية... ودي برضو مش خطوبة اوي... دي تلبيس دبل بس...
انا هبقي مستني كل الناس الحلوة البتشرفني هنا في البلوج...
الحفلة هتبقي في قاعة جاردنيا ال في اخر جسر السويس... يوم الخميس 29 ابريل...
يعني يولاد بلدنا يوم الخميس ... هلبس عروستي الدبل وهبقي عريس.. والدعوة عامة... وايييييييييييييييييييييييه..... ههههههه...
متتخيلوش مدي السعادة ال انا فيها حاليا...  وانا عارف انكم اكيد فرحنين ليا...
طبعا زمنكم بتقولو عليا خبيث وسوسة... اني مخبي عليكم كل ده...
بس انا بحب المقولة بتاعة "داري علي شمعتك تقيد"...
وأول مبقي فيه حاجة رسمي اهو انتو اول المدعوووين...
طبعا عاوزين تفاصيل الخبر الحلو المفاجئ ده... وعاوزين تعرفو مين سعيدة الحظ.. ال امها داعية عليها.. احم احم.. اقصد دعيالها يعني...
ومش هبخل عليكم... علشان فرحان بس...
التفاصيل بسيطة علي قد مهي جميلة اوي بالنسبة ليا..
ببساطة من شهر ونص تقريبا فيه بنت جات اشتغلت في شركة جمبي في نفس الدور...
رقيقة جميلة مؤدبة... ده كان انطباعي الاول عنها...
وطلع انطباعي في محله...
اتعرفت عليها...  اسمها "ريم"- ريم ومحمد- لايقين علي بعض مش كده؟؟
المهم شدني ليها غير الحاجات الفوق دي انها ذكية اوي اوي... استنو كده... لا دي اوي اوي اوي...
بقينا اصحاب بسرعة بحكم اننا في مجال شغل واحد... وبنتقابل في البريكات... او واحنا مروحين... بحكم اننا في دور واحد زي مقلتلكم...
بس انا بصراحة احساسي نحيتها من اول معرفتها مكنش صداقة...
من اسبوعين .. فاتحتها في الموضوع... والحمدلله.. لقيتها هيا كمان معجبة بالعبد لله- ايه حد عنده اعتراض؟؟- وانا بصراحة حسيت ان طالما انا قاصد خير يبقي ادخل البيت من بابه علي طووول... ومستناش...
عارف انكم هتقولو ايه السرعة دي وكده... بس انا مؤمن ان الحياة مبتتحسبش بالساعات.... بتتحسب ب ال حسناه في الساعات دي... ده غير ان كل حاجة حلوة في حياتنا جات بسرعة وراحت بسرعة... فلازم نتحرك برضو بنفس السرعة علشان منضيعش الحاجات البنحبها من ايدنا...
المهم...
لما لقيتها موافقة... فاتحت ابويا في الموضوع ... واخدت معاد عندها في البيت...
ورحت في ميعادي.. طبعا اول مرة رحت لوحدي...
قابلت ابوها... راجل زي العسل... ومحترم جدا... ومش من الابهات ال انا كنت ديما بدعي ربنا يبعدني عن طريق بناتهم...
اب متساهل بيحب بنته... وفوق كل ده اهلاوي صميم...
مامتها اروبة شوية بس طيبة... علشان كده بترزع كلام زي الدبش ساعات... لو كانت خبيثة كانت رزعت الكلام بطريقة خبيثة... اوعو حد يقول علي ال بكتبه هنا... لحسن تخربوو عليا من بدري... ههههههههه...
المهند انهم وافقو بصورة مبدئية...
تاني مرة رحتلهم كان بعدها بيومين... وكان معايا السيد الوالد والسيدة الوالدة والبت اختي الكبيرة – كانت مصممة تيجي معانا علشان تعاين العروسة- بس خليتها تنفض لجوزها.. مكنتش طالبااه بصراحة...
الموضوع مشي بسرعة وسهولة غريبة.. مش عارف.. اول مرة الاقي ال انا عاوزه بيحصل بالشكل ال انا عاوزوه...
بعد اتفاقات ومناقشات وموداولات... مكنتش اعرف ان الواحد لازم يعمل المفاوضات دي كلها قبل الجواز... بس كله عدي علي خير الحمدلله ... مش هحكلكم علي المفاوضات دي... علشان دي حاجات عائلية دلوقتي... وش بيطلع لسانه..
اتفقنا علي ان الفاتحة يوم الجمعة الجاية... والخطوبة بعدها ب اسبوعين او تلاتة علي حسب القاعة..
وانا لسه جاي من القاعة دلوقتي حالا بعد محجزتها زي مقلتلكم يوم 29 ابريل الجاي... قلت اول ناس هفرحهم معايا انتو... شفتو بقي غلاوتكم عندي؟؟
طبعا بعد مفرحت "ريم".... متصدقوش انكم اول ناس يعني...
ادعولي ربنا يتمملي علي خير....
وبجد ال مش هيجي الحفلة هوا حر.. اعتبرو نفسكم رايحين لقاء تدويني... وهيبقي فيه اكل لل بيحب الاكل.. وهيبقي فيه مزز لل بيحب المزز... فرح بقي... هههههههههههههه... بس محدش يعاكس... دول هيبقو قريبي او قرايب ريم...
مستنيكم...
اه حاجة كمان...
تقريبا لما الحاجات الحلوة بتحصل بتحصل مع بعض...
فيه خبر كمان حلو
يمكن ناس منكم يعتبرووه احلي من الخبر الاولاني- انا بالنسبة ليا الاولاني اهم طبعا- علشان خاص بالمدونة..
...تن
.....تن
........تاتاتاتا
..............تن تاتا
....................تتتاتاتاتاتاتاتا
.........................تن
........................................
..............................
تااااااااااااااااااا
....................................
.
.
.
الخبر 
السعيد
التاني
هوا



ان كل ال قريتوه فوق ده كان كدبة ابريل....
نيهاهاهااهانيهاهاهانيهاهاها...
قلت اكدبها بدري علشان تصدقوها...
هعهعهعهععهعهعهعهعهعهعهعه
شرير انا..
بس خلاص

هناك 110 تعليقات:

ســـهــــر يقول...

وانا اللى داخلة ابارك وقلبى مرفرف م الفرحة عاااااااااااااااااا

ســـهــــر يقول...

افرض مكنتش قريت التنوية اللى بالاخر وطلعت بت صاحبة واجب ورحت الخطوبة
كان هيبقا شكلى اية يا ابو على يا جن
هههههههههههههه

ســـهــــر يقول...

المدونة مدونتنا ونتكلم براحتيت راحتنا
وكل ابريل وانت طيب يا ابو على

ســـهــــر يقول...

انا همشى بقا اشوفك فى البوست الجديد
هههههههههههههههههه
خلاص متزقش كدة سلامة عليكو

غير معرف يقول...

وربنا انت غلس

مش هقل كلمة غير كده

Sarah Sobhi يقول...

abo Aliiiiiiiiii


I HATE U
:@:@ :@

mal7e2tsh afra7 ya shereeeeeeeeeeer



mashy ya 3am

we yarab april el gay ykon el klam da b2a 7a2ee2y ;)

bas bged r5em moot ya3ny

ana ba7b esm reeem ya re5em :@

سمع هوص (Abo 3li) يقول...

سهر

ما الفرحة انا حسيتها في البلووووج... اول مدخلتي... مش لازم يبقي بجد علشان تفرحيلي...

لو كنتي رحتي علي هناك منغير متكملي البوست... كنت هتلاقي عريس وعروسة تانين.. كنتي هتباركيلهم.. وتفرحي بيهم شوية... وتروحي بيتكم وانتي بتشتمي فيا وفي اليوم ال دخلتي فيه البلوج عندي... ههههههههههههه .. واهي كلها افراح...

وطبعا ياسهر... المدونة مدونتك ... حبيتي تعملي اي مناسبة هنا... انا في الخدمة...
وكل ابريل وانتي بخير..

طب قبل متمشي متشربي حاجة..
مستنيكي البوست الجاي...

سمع هوص (Abo 3li) يقول...

star in the sky

انا غلس؟؟؟
انا؟؟؟
ليه؟؟ ااااااااااااه.. اكيد علشان اخترت مكان بعيد عليكي.. فعلا جسر السويس بعيد عليا انا كمان... بس علشان خاطر اهل ريم... ههههههههههههههه... وش بيطلع لسانه..
لو تحبي نغيره اوكي...

صيدلانيه طالعه نازله يقول...

مهو طبعا
اصل لو كان حقيقى كنت خنقتك انا دلوقتى
ههههههههههههههه
كويس انك لحقت نفسك و اعترفت
اتقى شرى احسن بدل ما املى المدونه قشر موز
بس برضه الف مبروك
فال حلو برضه

سمع هوص (Abo 3li) يقول...

Sarah Sobhi

فينك ياسارة؟؟؟ البلوج كان نقصه حاجة الفترة الفاتت... مكنتيش بتزورينا..

هههههههههههه... انا شرير... دنا غلبااااان...
لا وكتبالي I HATE U كابيتل ليتر.. يعني بتقوليهالي بصوت عالي كمان... ههههههههههه...

وعقبال ابريل الجاي يكون حلو عليكي انتي كمان...

وانا كمان بحب اسم "ريم"... اومال هخطبها في الكدبة كده وانا مبحبش الاسم ... هههههههه

نورتيني ياسارة

غير معرف يقول...

لا اصلا انا مكنتش هاجى يا خفيف لانى مش فى كايرو


والله فرحت بجد

وفى الاخر الاقيك كاتب انها كدبة ابريل

يخربيت الرخامة

روح يا شيخ وتعالى بسرعة

ولا اقولك انت نزل بوست اعتذار
ههههههههههههههههههههههه

sony2000 يقول...

هييييييييييييييييييييه
لولولولولولولولولولولولولولويييييييييييييييييييييييييييييييييييييييييي
ايييييه دا كدبه ابرييييييييييييييييييييل
؟؟؟؟؟؟؟؟؟؟؟؟؟؟؟؟؟؟؟؟؟
عااااااااااااااااااااااااااااااااااا
ماشي
لما يحصل بحق وحقيقي
موش هنيجي خاااااااااالص
وشوف بقي هتعذم مين
بس
هوووه
؟لالالالالالالالالالالالالالالالا
ذعلاااااااان منك اويييييييي

سمع هوص (Abo 3li) يقول...

صيدلانيه طالعه نازله

يادكتورة علا وانتي تصدقي برضو اني اخبط من وراكي.. اقصد اخطب؟؟ هخاف لحسن تخنقيني... ههههههههههه...

لا بلاش موووز حرااام عليكي... كفاية... رجلي مش ناقصة...

والله يبارك فيكي عقبال سيف.. بس يكون فال بجد...

سمع هوص (Abo 3li) يقول...

star in the sky

اخص عليكي ياسمية... يعني لو كان بجد مكنتيش جيتي برضو؟؟؟ زعلتيني... ههههه..

رخامة؟؟ فين دي؟؟؟ اطلاقااا.. دي اسمها سخافة مش رخامة... ههههههههه..
بوست الاعتزار ممكن انزله مع عيد العمال في اول مايو..

سمع هوص (Abo 3li) يقول...

sony2000

لالالالالالا... هتيجوو .. انا عارف قلبكم ابيض وهتسمحوني..

متزعليش... شوفي ممكن اصالحك بكام شيكولاتاية؟؟

Sad Angel يقول...

هههههههههههههههههههه


اصلا شكلك كان خايف وانت بتقول انها كدبه ابريل

هههههههههههههههههههههههه

انا قولت فى حاجه مش طبيعيه اصلك صغرت الخط فجأة كده

بس حلووووووووة
شغاله كدبه ابريل

سمع هوص (Abo 3li) يقول...

Sad Angel

انا كنت خايف بصراحة.. مكدبش عليكي...
نورتيني في اول زيارة.. مستني تتكرر ان شاء الله..

Sad Angel يقول...

ههههههههههههههههههههههه
ميرسى
بس دى مش اول زيارة اكيد زورتك بس بالكونت القديم
على كل حال مدونتك بتعجبنى فعلا

سمع هوص (Abo 3li) يقول...

Sad Angel

ربنا يكرمك ده من زوقك... خلاص خليني اقولك مستني زيارات بالاكونت الجديد..

نورتيني

لــــ زهــــــراء ــــولا يقول...

على فكرة انا الدموع اتجمعت في عيوني من الفرحة بالخبر الجمييل ده ...بس زعلت انها طلعت كدبة ابريل ..كدة برضه ...ع العموم ياسيدي ربنا يوفقك ويسعدك ومين عارف ممكن تلاقي واحدة في نفس الدور بتاع شركتكم واسمها ريم وتحبها وتحبك وساعتها لما تقولنا مش هنصدقك ابدااااااااااااااااااااااااا

وابقى خلي كدبة ابريل تنفعك بقى
وش بيطلع لسانة

سوري يعني

لـــولا

لــــ زهــــــراء ــــولا يقول...

على فكرة شكلي كان هيبقى وحش قوووووي لما كنت هنيجي الفرح انا والبنت لولو ومنلاقيش لاريم ولا محمد !!!
بقى كداااااااا تعمل فينا المقلب ده ..طب عقاباً ليك مش هنسقلك الفرح بتاعك عشان انا بنسق افراح هنسق فرح ريم وبس
:d


زهراء

sony2000 يقول...

ولافيها شيكولاتات خالص
(فالسر كدا هات عشرين عالماشي
هههههههههههه)

سواحة يقول...

سمع هوص
ابو على حيضرب يا رجالة :-)))

:-)) مبدر اربع ايام بحالهم يا مفترى :-)
و الناس الى حتقرا البداية و تروح حتعمل فيهم ايه ؟؟؟

عموا برضه مدام فيه كذبة
و مدام فيه ريم :-))
و مدام ابوعلى بيدور على شقة
يبقى فيه امل :-)))

يارب يتمملك على خير :-)))
الا اسمها ريم فعلا ؟؟؟ وش بيغمز
اسم حلو بصراحة

و بعدين انت ساكن فى جسر السويس يعنى
و اشمعنى القاعة ديه
ديعه الى فى اخر سور النادى الشمس
؟؟

ستيتة يقول...

شريرررررررررررررررررررررررررررر
شريرررررررررررررررررررررررررررر

ده انا دعيت دعا
وعمالة اقول الواد ابو علي ها يجيب الحسد والعين يا دي النيلة

وبعدها قلت طالما ابوها اهلاوي يالا انا موافقة وامري لله
وفرحت وهيصت وقلت مش ها تنفض شقة العزوبية ولا ها تقعد في الضلمة تاني

حااااااااااااااااااااضر

سمع هوص (Abo 3li) يقول...

لولا

تصدقي انتي كده زعلتيني من نفسي..
واشمعنا في نفس الدور... اانا سمعت ان فيه بنت امورة في الدور الفوق... هبقي اطلع ابص... هههههههههه..

ايه ده انتو هتعقبوني زي الولد بتاع الخرفان والديب؟؟
لا خلاص السماح يا اهل السماح...

نورتيني يالولا ياقمر

سمع هوص (Abo 3li) يقول...

زهراء

انتي فعلا بتنسقي افراح؟؟؟ طيب فاضية خلال ال سبع سنين الجايين؟؟ غالبا هيكون فرحي في الفترة دي.. هههههه

ايه ده انتي تعرفي ريم؟؟ طب متعرفيني عليها.. ههههه...

البلوج نور باجمل زهرا في البلوجز

سمع هوص (Abo 3li) يقول...

sony2000

عشرين.. دنتي قانوعة اوي....
في الطريق يا سوني...
قومي افتحي الباب ...

سمع هوص (Abo 3li) يقول...

Wanda

هتضرب؟؟؟؟ ربنا يستر... الكثرة بتغلب الشجاعة فعلا...

لازم يقرو البوست لأخره يمكن اختلف مع ابو العروسة علي الشبكة في نص البوست!!

الامل ديما موجود... اقولك بقي علي خبر بجد علشان انتي بنت عمي بس... انا حجزت شقة خلاص.. الحمدلله.. بس لسه العقد علشان البطاقة بتاعتي منتاهية..

بس مين ريم دي؟؟؟ انا بحب الاسم ده... بس عمري معرفت حد اسمه ريم... للاسف..

ومش لازم وش يغمز ولا بتاع.. وانا هخبي علي بنت عمي برضو؟؟
ولا فيه ريم ولا فيه فتكات..

وانا مش ساكن في جسر السويس.. انا من قاطني ميدان الجيزة امام الكوبري مباشرة...

واشمعني القاعة دي... ال جات في دماغي... حاجة كده صغيرة وممكن تتصدق علي حفلة خطوبة... ههههههههه

سمع هوص (Abo 3li) يقول...

ستيتة حسب الله الحمش

انا طيب والله يادكتورة... شرير ايه بس.. دنا خيبة... ههههههههه..
الدعوة كويسة برضو.. ربنا يخليكي.. ادعيلي كده كتير... ربنا يسمع منك..

وطبعا ده شرطي الاول... تكون من عائلة اهلاوية اصيلة...

وحضرلك الخير يادكتووووور

هراء لا داعى له ..... يقول...

أيوة كدا يا جدع

أنا برضه كنت حاسس إن الأمور سهلة كدا و ماشية ....حسيت إننا مش فى مصر

مفيش شاب مصرى عادى بيتجوز بسهولة

دى حكمةأيقنتها مؤخرا


بس الصراحة ...

إنت مقنع

سمع هوص (Abo 3li) يقول...

هراء لا داعى له

وهوا فيه في الجواز اب بيكون متساهل؟؟ ولا ام طيبة؟؟ دي كمان حكمة ... ههههههه...

لازم كنت تشك يامعلم...

انا مقنع؟؟!!
مع اني مكنتش مقتنع خااالص بال بكتبه... اني ممكن ابقي في الموقف ده... تقريبا الموضوع ده بقي عامل بالنسبة لي زي فوز الزمالك بالدوري...

نورتني ياباشا

أع ـقل مـ ج ـنـونــة يقول...

ادعي عليك بايه وفيك كل العبر :@

ليه بعد ما فرحت وقولت هاقول لخطيبي واشوفه هايقولي ايه

وسالت فين جسر السويس دي عشان انا معرفهاش

وبقرأ قصة الحب السريعة ومبسوطة

واذ فجأة افوجأ ان الموضوع كذبة ابريل

لــــن أنســــــي لكـ هذا المـــوقف

فاعل خير يقول...

والله انا حاسس انى موضوع كدبه ابريل ده هو اللى كدبه
وانك رجعت فى كلامك عشان ما نروحش الفرح
ونخلصلك الجاتوه
عموما انا بقا ح اسبق واقولك
الف الف الف الف الف مبروك
عشان حسك مش بتكدب
وانا عموما ح اروح كبرى السويس ده وح اشوف وحاسس انى ح تكون انت العريس مع انى ما اعرفكش ولا اعرف شكلاك معزرتا
تقبل مرورى المتواضع

خالص احترامى
امضاء
فاعل خير

فاعل خير يقول...
أزال المؤلف هذا التعليق.
خواطر شابة يقول...

هههه وأنا أقول ايه الصفة الغريبة دي كأني بتفرج في فيلم بس صراحة ملعوبة صدقتك ولسه حأبارك وأهني يالله أديك فولت على نفسك من يدري
دمت بكل الود

sony2000 يقول...

لاااااااااتقلق ياعم
الذمالك فطريقه لكدا
بس انت اتجدعن واعملها
علشان نفسييييييييييييييي افر فييييييييييييييك
احم....اقصد بيك
هههههههههههه

ghada mOhsen يقول...

كذبــــة إبـــريــل مين ..؟!!

ده إنت خليتني أنسى أنا في إيش من شهر أو إيش من يوم ...
وخليتني قلبت يمني كمان من الصدمه ..عجبك ههههههههههه

ده أنا في أول البوست كنت زعلانه عشان عارفه إن السلطات العليا هنا مش هاترضى تخليني أروح الخطوبه ...

أنا بحذرك ..إوعى تمشي لوحدك من هنا ورايح ... عشان ممكن نهجم كلنا عليك هجوم بلوجوريه معتبر هههههههههه ...

ربنا بجد يحققلك المراد ... ونسمع عنك دايما أخبار حلوه ...

... ;) ,,, ;) ...

Lady E يقول...

ألف مبروك وربنا يسعدك ويسعد ريم
يمكن قبل 29 ابريل تلاقي ريم مين عارف :)

وبعدين احنا لسه في مارس يبقى ايه اللي جاب كدبة ابريل لمارس؟

Bent Men ElZman Da !! يقول...

ههههههههههههههههههههههههههههه
وانا اللى جايه وناويه اعمل خير واقولك مبروك
تصدق بعد كده لو حصل فعلا مش هاقولك مبروك
هى النيه بتيجى مره واحده
وانت خدت فرصتك خلاص هههههههههههه

سمع هوص (Abo 3li) يقول...

A32L MaGNoNa

طب وليه تدعي عليا؟؟؟ متدعيلي ان الكدبة تتقلب علي دماغي!!

لالالاللا... انتي طيبة وهتنسي الكدبة البيضة دي... وهتسمحيني...


صباحك زي الفل

سمع هوص (Abo 3li) يقول...

فاعل خير

تصدق لو كنت عملت كده - اني اكدب كدبة واقول انها كدبة والحقيقة انها مش كدبة وتبقي دي كدبة ابريل- دنا كنت ابقي صايع اوووي... ابريل الجاي ان شاء الله...

بس للاسف انا بكدب... والله يبارك فيك.. وعقبالك... وعاوز تروح بقي رووح... انت حر.. انت ال بتتلكك بقي.. ههههههههه... بس يبقي صورلي العريس والعروسة...

مرورك اسعدني وشرفني... واتمني يتكرر...

تحياتي

سمع هوص (Abo 3li) يقول...

خواطر شابة

صدقتيني؟؟ طب الحمدلله ان خيالي طلع واسع.. وعرفت اقنعكم.. ههههههه..
ويمكن فعلا اكون فولت علي نفسي... يااارريييت... بس الاقي ال اسمها ريم دي بس...

نورتيني... صباح الفل

سمع هوص (Abo 3li) يقول...

sony2000

لا والف لا... ال زمالك ياخد الدوري ال... علي جثتي... دنا قلت الجملة دي علي اساس انها زي العنقاء والغول... هههههه...
انا مستعد اضحي واتجوز. بس الزمالك متخدش الدوري...

وان شاء الله هفرحك فيكي الاول.. اقصد بيكي..

صباحك بيضحك

سمع هوص (Abo 3li) يقول...

ghada mOhsen

هههههههه.. طيب مهي حلوة اللهجة اليمني... بس ايه ده؟ دنا شرير اوي علي كده..

لاااااا اعملي حسابك تقنعي السلطات العليا انك تحضري فرحي كمان 7 سنين يدنيا ويديكي طولة العمر... ههههههه..

وانا هشوفلي اتنين بوودي جارد علشان تقريبا
البوست ده كتر اعدائي والمطالبين براسي..

وشكرا اوي علي الدعوة الحلوة دي... ربنا يكرمك..

تحياتي ليكي

سمع هوص (Abo 3li) يقول...

Lady E

الله يبارك فيكي.. بس علي ايه؟؟
طيب يلا دورو معايا علي ريم.. وال هيلاقيها ليه عندي هدية... ههههههه..

منا قلت لو كتبت البوست ده كمان يومين ممكن تشكوو علشان في اول ابريل... لكن قلها ب تلت ايام.. هبعد الشك... ههههه
منتهي الشر انا... نيهاهانيهاها

البلوج نور بالزيارة دي .. وياريت تتكرر...

تحياتي

سمع هوص (Abo 3li) يقول...

Bent Men ElZaman Da !!

اديلو فرصة تانية اديلو فرصة تانية ...
الفرصة دي متتحسبش... خلي قلبك كبير...
بس ايه ده؟؟ انتي بتعتبري انك لو قلتيلي "مبرووك" يبقي هوا ده الخير؟؟؟ اومال لو كنتي جبتيلي معاكي علبة جاتووه ولا كيلو مووز ولا حتي طبقتيلي عشرة جنيه في ايدي وانا في الكوشة كان هيبقي اسمه ايه؟؟ هوا ده الخير... مش مبرووك حاف كده... ههههههههههه

نورتيني... وصباحك سكر زيادة

TIMMY !! يقول...

يا ألف نهار أبيض ,
يا ألف نهار مبروك ,


أنا لما لقيتك مبسوط قلت أبارك ,
و لو إني مش مستريح للجواز و مشتقاته ,

عموما بارك الله لكما و بارك عليكما و جمع بينكما في خير

سمع هوص (Abo 3li) يقول...

TIMMY

يابني ياحبيبي.. مش تقري البوست لأخره؟؟؟
ينفع كده؟؟؟
انا كده زعلان منك....

سمع هوص (Abo 3li) يقول...

عقاب ال ميقراش البوست لاخره.... هيروح الفرح ومهيلقاش حد.... نيهههههههه نيهههههههه

من كل بستان زهرة يقول...

ههههههههههههههه
انت دمك زي العسل أنا أول ما لقيت تبدلتين

قولت أدخل أشوف الموضوع ايه

لقيته حاجه تفرح
كنت فعلا محتاجه أسمع خبر حلو
كل الي بسمعه يغم

وفعلا لسه هبدأ أزغرت .......

ولو أني مبعرفش

لقيتك صدمتني في الأخر يلا مسيرك تقع برضه في ريم

بس تكون حقيقيه


كل كدبة ابريل وانت بخير

Single Mummy يقول...

واللة العظيم دمك تقيل وبايخ وشرير انا اصلا كنت بافكر هاجى الحفلة ازاى وكنت ناويالك على كلمتين جامدين من نوعية"انتة ازاى تخطب من برة البلد" و"لية متعملشى الفرح هنا مش ف القاهرة" وشوية بواخة كدة من بتوع الاخوات الكبار بس ماااااشى مسيرك برضة تقع زى ما وقعتنا كدة..

Timmy يقول...

احم احم ,

مش تقول يا راجل إن الكلام اللي في الآخر أبو خط صغير ده مهم :D

خليتنا نظن فيك ظن سوء يا هندسة :)

P A S H A يقول...

هههههههههههههههههههههههههه






أنا بجد باشكر الأسكرول بتاع الماوس جداً اللي نجاني م الاشتغاله دي !!

بس ده ما يمنعش برضه إنك هاتدبس هاتدبس .. نو واي يا مان !

تقول إبريل تقول يونيه النصيب بييجي ف ثانية :))

ربنا يوفقك يا ريس ونزغرط لك بجد قريب إن شاء الله .


وبعدين مش لازم تعمل فرح وتكلف نفسك .. إدي كل واحد فينا سبعة جنيه ونص واحنا هانتصرف :))

سلام

سمع هوص (Abo 3li) يقول...

من كل بستان زهرة

اهم حاجة.. ايه رائيك في الدبلتين.. مش زوقي حلو؟؟!!؟؟

وشكرا ليكي ياقمر علي زوقك وعلي مجاملتك الحلوة دي... ربنا يخليكي...

والناس زعلنين مني وانا بقولهم علي حاجة تفرح.. مش عارف ليه!!؟

نورتيني ومستني زياراتك ال جاية..

تحياتي

سمع هوص (Abo 3li) يقول...

Single Mummy

ده انا ده كله؟؟ دنا غلبااااااااان.. هههه..

لا ياسارة الجواز عندنا اغلي من القاهرة... ثم انا مقيم هنا حاليا.. ف مش هتفرق كتييير..

وعاوزاني اقع.. يلا شدي حيلك وشوفيلي عروسة... ههههههه...

نورتيني يابنت بلدي ياغالية

سمع هوص (Abo 3li) يقول...

Timmy

علشان تحرم تدي الاهمية علي حسب الحجم... هههههههه...

واوعي تظن فيا الظن ده تاني ياكبير... عيييب عليك.. ههههههههه..

سمع هوص (Abo 3li) يقول...

P A S H A

اخص... ياخسارة... يعني مدخاتش عليك.. للاسف... تتعوض ابريل الجاي... ههههههه..

يااااااااه يونيو؟؟ في عز الحر؟؟ حرام عليك ياراجل...

قول يارب... شكرا علي الدعوة ياكبيير..

سبع جنيه ونص بحالهم؟؟ ليييييييييييييييه؟؟ فرح ابوتريكة؟ ههههههههه... كفاية تلاتة جنيه خمسة وسبعين..

نورتني ياشريف باشا

وصف الاحساس يقول...

بجد بجد بجد
فرحتلك اوي اوي
الف الف الف مبروك
بس طالما انت اسمك محمد مين ابو علي ده
اه علي فكره
انت خطوبتك يوم 29 انا كتب كتابي 30
الف مبرووووووووووووووووك
وربنا يتمم بخير
يارب
وسلم علي العروسة

мαησηα يقول...

تصدق انت رخم يا واد

اخص عليك بجد انا فرحت

حبست الزغروطة ف قلبى يا غلس

لا انا مخصماك امشششششششششششششى

إيمان يقول...

هههههههههههههه يانهار اسوح
وقال انا هازغرط واقول لولى وفرحنا ياجدعان
وتطلع كدبه
يلا بشرة خير هههههههههه بكرة الكدبه تصدقها وتبقى حقيقه
بس نيجى الفرح ههههههههههههه
تحياتى وتقديرى

سمع هوص (Abo 3li) يقول...

wasf_elahsas

الله يبارك فيكي...ههههههههههه... تاني ضحية...
مش تقري البوست لأخره علشان متخليش واحد شرير يشتغلك؟؟
ههههههههههههه... فرحان فيكي..

وعموما الف مبروووك علي كتب الكتاب.. وربنا يتمملك علي خير ان شاء الله

سمع هوص (Abo 3li) يقول...

мαησηα

انتي كمان يامني بتقولي عليا رخم.. انا كده هبتدي اصدق... ههههههه..
طب الحمدلله انك فرحتي ده المطلوب من البوست... انك تفرحي في اوله.. وتشتميني في اخره.. اقصد تضحكي في اخره..

لالالالا.. مقدرش علي خصامك... متوعليش مني.. طب علشان خاطر ريم... هههههههه

نورتيني يامون مون... مساءك لذيذ

سمع هوص (Abo 3li) يقول...

emymony

طب متزغردي... ايه ال مانعك.. اعتبريني يستي اتجوز وجبت عيلين توأم كمان..

ادعيلنا ...
وطبعا هتيجو الفرح... الفرح ال بجد ان شاء الله... ههههههه..

البلوج نور... تحياتي

وصف الاحساس يقول...

انا مش هسحب التهنئة لعلها تكون بشرة خير ونفرح فيك قريب

sweet angel يقول...

وبما اني متابعاك من زمان
حسيت بخبثك
قومت قريت من تحت
هههههههههههههههههههههههههه
بس والله كنت قربت ازغرت
بس انت فعلا غلس
وابقا قول فرق السن بقا
ده انا كنت هنط من الفرحه

سمع هوص (Abo 3li) يقول...

wasf_elahsas

يسمع منك ربنا.. ومبروك ليكي انتي كمان مرة

سمع هوص (Abo 3li) يقول...

sweet angel

انا برضو الخبيث... ياسوسة...
سيبك انتي.. بس بزمتك مش خدعة متقنة؟؟ هههههه...

هيا "فرق السن" بتضيقك؟؟
طب
فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن فرق السن

علشان تبقي تقولي غلس تاني... هههههههههه..

القمرالباكي يقول...

السلام عليكم
طيب اعمل انا ايه لسه جديده وجايه اشوف المدونه بتاعتك لاول مره قولت ايه الحلاوه دي ده اناجايه ع مناسبات وافراح ومباركات
الاقيها كدبه ابريل يلا ربنا يسامحك
بس دمك خفيف
تقبل مروري

سمع هوص (Abo 3li) يقول...

القمرالباكي

وعليكم السلام ورحمة الله وبركاته..

ههههههه... معلش اني خيبت ظنك... وممكن نعتبر كدبة ابريل مناسبة برضو... ونفرح بيها... اننا بنكدب وبنعترف اننا بنكدب...

دمي خفيف؟؟؟؟ احمدك يارب... قوليلهم.. بدل ماكل اليدخل يشتمني ويقولي ياغلس ويا رخم وياشرير ويا....هههههههههههه...
شكرا بجد علي زوقك...

البلوج نور يا داليا... ويارب ان شاء الله متكونش زيارة واحدة والسلام...

تحياتي

NeVeN يقول...

نعم ؟؟








وانا اللى فرحتلك وقولت هدخل اقطع نفسى زغاريط و الم المدونين صحابى ونغنيلك شعبى
ونجيب فى سيرتك ونقطع فروتك على انك خبيث



يطلع دة كله كدبة ابريل

مش محسوبة يا افندم ابريل اصلا لسة مبدئش وسهر بقا عندها حق انت بقا اسمك الجديد الجن


عموما بقا بغض النظر عن الكدبة الحلوة دى

ربنا يبعتلك ريم احلامك يارب وتيجى تعزمنا بقا و نفتكر انك بتكدب ومنجيش
هاهاهاها..... فيس شرير

بجد بقا انت دمك خفيف موت
ومعلش بقا جيت متاخرة انا تتعوض المرة الجاية



انما فى استفصار اشمعنى اسم ريم؟؟؟


ماتيجى اجوزك لارا بنتى ؟؟

ههههه
مساءك سكر

فتــافيت (رحاب الخضري) يقول...

هههههههههههههههههههههههههههه
بالذمة ده اسمه كلام.. يعني انا اول مرة اجي عندك
ابص الاقيك بتعمل كذبة ابرايل في مارس كمان يا راجل :)))))))
وانا اللي كنت هاقول مبروك.. وحاسة في كلامك حرارة وعواطف :)
مدونة لذيذة .. حلوة بجد

أسماء حسين يقول...

تصدق بايييييييه انت رخم
وعاوزة أضربك بس هاااا
أنا كنت خلاص اندمجت وفرحت وزقططت
وبحضر مبروكة كبيررررة بديلة اكمنى مبعرفش ازرغط
روح روح روووووح
وما ترجعش تانى أبدااااااااااا
قلبى غضبان عليك ليوم خطوبتك

سمع هوص (Abo 3li) يقول...

NeVeN

كنتي هتغنيلي ايه؟؟ العبد والشيطان؟؟ ولا المراية؟؟ هههههههه...

ويسمع من بؤك ربنا... شكرا يانيفين علي الدعوة الحلوة دي.. وعلي المجاملة الاحلي...
بس انا كده هيجيلي انفصام في الشخصية... غلس ورخم ولا دمي خفي... اتفقو علي حاجة وانا موافق عليها... انا كده كده رأي في نفسي اني حاجة تالتة "سخيف" ... احم احم...

اشمعني اسم ريم.. علشان بحب الاسم ده... وفي نفش ذات الوقت معرفش حد اسمه كده.. علشان القيل والقال وكده..

لارا ولا ريم.... ريم ولا لارا...
اكيد لارا طبعا... وانا اطول تبقي حماتي... بس كده لارا هتستناني كتييييييير... انا قدامي مبين 17 ل 19 سنة... هتستنو؟؟؟


صباحك سكر زيادة.. اوي

امضاء\ الجن

سمع هوص (Abo 3li) يقول...

فتافيت

ههههههههههه... البلوج نور يافندم... ومعلش بقي .. حظك كده تيجي علي كدبة ابريل ال في مارس.. ههههههههههه...
بس انا عملتها في اخر مارس علشان عارف الناس دي ناصحة وهيفقسوني لو كتبتها في اول ابريل.. فعملت خطة خداع استراتيجي... ههههه..

شكرا علي الكومنت والمجاملة... وربنا يديم التواصل...

تحياتي

سمع هوص (Abo 3li) يقول...

Boky

العفو والسماح.. ياأهل السماح...
ولا بقي هرجع ... نيهاهاهانيهاها... وتعيشي وتاكلي غيرها.... وش شرير..

يااااااااااااااااااااه.. قلبك هيفضل غضبان عليا كل ده؟؟؟ ياساتر!!

صباحك بيضحك

Ana keda يقول...

يىىىىىىىىىىىىىىىى
اعمل فيك ايه انا ناو
والله قولت بتتكلم جد
عيب كده يابوعلى دنا قلت خطوبتك هتبقى جنبى وبتاع
هههههههههههههه
بس ملعوبة صح يعنى انا مع لاى بيقولوا انك غلس ع فكرة هههههههههه
مبحبش ام الكدبة دى بتتعمل فيا وبصدقها بكل سذاجة
يعنى مفيش ريم ربنا يجيبلك الريم بتاعتك بقى :p

سمع هوص (Abo 3li) يقول...

Ana keda

تتعوض ياستي ان شاء الله... نبقي نعمل الخطوبة جنبك برضو كمان كام سنة... بس كده... انتي تأمري...

انتي مع الفريق الاكبر البيقولي اني غلس... كده الفريق ده يكسب... ههههههههه..

ممكن متكونش سذاجة... قولي طيبة وحسن نية... ودي حاجة كويسة..

يلا دوري معايا علي ريم... يمكن نلاقيها...

سلاماتي ليكي ول بيدوووو....

فراشة يقول...

ههههههههه ماشي ياسيدي كدا تعمل فينا كل دا

بس فال حلو وربنا يرزقك بالزوجة اللي تتمناها وتبقى الحكاية أحلى من دي بكتيييييييييييير يارب وتقلب بجد مش بهزار

بجد انا صدقت
ربنا يفرح قلبك دايما

سمع هوص (Abo 3li) يقول...

فراشة

انا معملتش حاجة انتو ال صدقتو... وش بيطلع لسانه... ههههههههه..

ويسمع منك ربنا... ميرسي ياجميلة علي الدعوة الحلوة دي... ربنا يخليكي

بس ايه رأيك؟؟ مش لعبة ملعوبة؟؟ هداف انا طول عمري... وش شرير... ههههههههه....


ربنا يديم التواصل... نورتيني ياقمر

كيكى عوووووو يقول...

طب افرض بقى
انا روحت. القاعه
ولاحظ انى ماعرفش اسمك واقولهم
داخلة فرح سمع هوص؟؟
على ما اظن انت عارف هيتقلى ايه؟؟
بس انت
بقى بينى وبينك
سبكتهااااااااااااا جاااااااااامد
وريم وحركات وامها وابوها
واختك
وجوز اختك الى مجاش
منك لله ياحكومة عاملين نحلم على روحنا
اسكت
مش ركبت مع سواق الميكروباص بتاع المرة الى فاتت
عارف اول ما ركبت عملت ايه
صقفت طبعاااااااا على طول
والزغروطة دى منى ليك
لولوولوولىىىىىىىىىىى
عووووووووووووو

غير معرف يقول...

انت بجد عسل اخر حاجه على فكره انا اول مره ادخل المدونه بتاعتك بس قريتلك بتاع مش عارفه كام بوست بصراحه بس كنت كل ما اقرأ واحد ابقا عايزة اقرأ اللى بعده دمك خفيف مووووووووووت بس بجد انا مكنتش متقعه انه كل ده يطلع كدبه
ROKA

صمت المشاعر يقول...

هههههههههههههههههههه ههههههههههههههههههه وانا اللي قاعده اقرء ومندمجه اوووي وفاتحه بوقي علي الاخر من الانبساط هههههههههه

حرام عليك والله دا حسيت الكلام بتاعك فيه انبساط ومقنع خالص

يلا عقبال ما يبقي بجد ونبركلك عن قريب

ويكون اسمها ريم ههههههههههه

سمع هوص (Abo 3li) يقول...

كيكى عوووووو

ههههههههه... متخيل منظرك وانتي بتسألي علي سمع هوص ... والامن هيقولك امشي يابت انتي من هنا... ده اقل واجب هيتقال... ههههههه...

طالما سبكتها يبقي انفع كده اشتغل وزير.. ولا ايه؟؟ وعود وكلام وسيناريوهات وهمية والكل يصدق .. ونقضي احلي فترة وزارية مع الشعب...

نفس السوااق؟؟ ههههههههه... دنتي مصممة بقي.. بس كويس انك بقيتي خبرة معاه.. علشان كده اختصرتي مرحلة النقاش والخناق.. ودخلتي في مرحلة التصقيف... ههههههههههه...

شكرا علي الزغروتة مع انها صغيرة اوي... انتي نفسك قصير ولا ايه.. بنات اليومين دول خلاص صحتهم علي قدهم... مشوفتيش خالتي وهيا بتزغرد بتبتدي الزغروتة يوم الحنة وتخلصها في الصبحية.... هههههه...

نورتيني ياكيكي...
وتصبحي علي خير
وعووووووووووووووووووووووووووووووووووو

سمع هوص (Abo 3li) يقول...

ROKA

ده شرف للمدونة انها تعجبك..
وشكرا اوي علي كلامك.. ال رفع من روحي المعدنية ...

مكنتيش مقتنعة.. انا كمان مكنتش مقتنع... يلا بقي ريم ملهاش نصيب... هههههههههه..

بجد نورتيني ومتقطعيش عننا الزيارات...

تحياتي

سمع هوص (Abo 3li) يقول...

صمت المشاعر

انتي عارفة بقي احلام اليقظة بتعمل اكتر من ده وبتخلينا نفتكرها حقيقة.. عشان كده اتكلمت عنها وكأنها حقيقة... هههههه.

ويارب يستجيب منك... ربنا يكرمك...

اسمها ريم برضو؟؟؟ ماشي... بس ساعديني... دوري معايا... وليكي الحلاوة..هتخدي ازازتين بيبسي في الفرح مش واحدة زي الباقي...

تحياتي

غير معرف يقول...

والله انت سكرررررر


علي فكره انا فعلا صدقتك جدا وكنت فرحانه زي العيله الصغيره
لاني من عشاق الجواز اللي بيجي عن طريق الحب المؤدب

مش حب المشي ومسك الايدين ومسك الكتاف والهطل ده



وفوقتني من سعاده جميله لضحكه اجمل


انا مواليد شهر ابريل
واكتر حاجه بكرهها حكايه كدبه ابريل ديه



يلا نعيش وناخد غيرها

سمع هوص (Abo 3li) يقول...

غير معرف

ايه ده انتي بتسمي الحركات دي حب؟؟
الحب لو مكنش قايم علي الاحترام المتبادل... بيبقي له مسميات تاينة...

والحمدلله ان البوست عجبك... وشكرا اووي اووي علي المجاملة الرقيقة دي... ربنا يخليكي...

وكل سنة وانتي طيبة ... يوم كام بقي؟؟؟

نورتيني... تحياتي

زهرة الإسلام يقول...

السلام عليكم ،
انا أول مرة أزور مدونتك ،
وبجد جميلة ،
بس ما شاء الله حبكت الدور ، ودبلتين ،وزغروتة ...
ولا أكنك عريس بصحيح ،
يلا عقبال ما نبارك لك بجد ، بيتهيأ لي لو جيت تعزم حد بجد على خطوبتك مش هتلاقي معازيم كلهم هيفتكروها كدبة أبريل

شريهان يقول...

والله العظيم انت

بس كدبة ايه

جوز اللوز

هي وظروفها يقول...

تصدق يااد يا محمد فرحتلك والله من كل قلبي وتطلع بتشتغلني اخص عليك

والحمد لله ريم طلعت ملهاش نصيب

عقبال ما نفرح بيك بجد من قلوبنا وكل ابريل وانت طيب وابريل الجاي تكون متدبس في الكوشه بجد يا معلم

علي فكره شهر ابريل شهر العظماء والعباقره اصل اخوك من مواليده
صباح الفل يا ابو علي

سمع هوص (Abo 3li) يقول...

زهرة الإسلام

المدونة نورت ب أول زيارة.. وربنا يديم التواصل..

ادعيلينا... بس انا عارف انكم طيبين وهتنسو الكدبة دي ... ويوم مهعزمكم هتنوروني... بس اعملو حسابكم من دلوقتي علشان محدش يقولي مش فاضي.. هوا فاضل بس حوالي 6 سنين... ههههههههه...

نورتيني يافندم..
تحياتي

سمع هوص (Abo 3li) يقول...

شريهان

انا ايه؟؟؟؟ انا عارف انتي عاوزة تقولي ايه... هههههههه... ماشي ماشي...

لا دي مش جوز اللوز بس... دي شنكويز العنب كمان...هههههههههه...

صباحك زي الفل

سمع هوص (Abo 3li) يقول...

هي وظروفها

يباشا المهم انك تفرحلي.. ده المطلوب... مش مهم بقي اشتغالة ولا بجد... انا بس كنت عاوز افرحكم... مش اشتغلكم زي مفتكرتو لا سمح الله... هههههههههه...

لا يامعلم نفرح فيك انت الاول...
بس انا اسمع ان شهر نوفمبر كمان من شهور العظماء.. اصل اخوك منه... ههههههه..

وكل سنة وانت طيب... وكل ابريل وانت بخير ياوليد باشا....

صباحك بيغني

Unknown يقول...

:)كدة ؟؟ :)

طيب ..
روح يا محمد
يا رب تتكعبل فيها ..
و تلاقيها ..
و تيجي هنا تشتكي ..
و اشمت فيك ..
بحق الفرحة اللي انت ضيعتها :)

سمع هوص (Abo 3li) يقول...

قهوة بالفانيليا - شيماء علي


هههههههههههه... ياريت اتكعبل فيها... بس ساعتها محدش هيشمت فيا.. هتفرحولي...

نورتيني يا شيما... تحياتي

just waiting يقول...

هههههههههههههههههههههههه
مش عارفه ليه كنت حاسه ان العلبه فيها فيل واديها طلعت كدبه ابريل

سمع هوص (Abo 3li) يقول...

Just waiting

بس ايه رأيك في الفيل... فيل ابيض هندي اصيل... هههههههههه...

نورتيني... تصبحي علي خير

محمد خالد يقول...

بعد ما كنت هقولك دي اول مرة ازور مدونتك الجميلة وييجي خبر حلو زي ده وكنت ناوي ابارك وحركات من دي

ضحكتني والله .. من زمان محدش عمل فيا مقالب

ربنا يرزقك الزوجة الصالحة يارب

سمع هوص (Abo 3li) يقول...

محمد

معلش يافندم علي الاشتغالة... لزوم ابيرل بقي...
وشكرااا اوي علي الدعوة اللهم امين...

نورتيني في اول زيارة ومستني تتكرر.. ان شاء الله..

تحياتي

E73 يقول...

اخص علييك

دي أول كلمة قلتها قول ما قرأت آخر جزء في المقال لأني بجد كنت سعيدة قوي

اللي بيكذب بيروح الصومال

عموما ألف مبروك على ريم اللي لسة هتيجي ببارك مقدمًا أهو يمكن بعد يوم يمكن بعد يومين يمكن بعد سنة يمكن بعد عشر سنين الله أعلم

يلا بقى روح جتك ريم

سمع هوص (Abo 3li) يقول...

E73

دنا غلبااااااااااان... هههههههههه...

الصومال لأ فيها قراصنة... انا بحب مصاصي الدماء اكتر..

عشر سنين ... حرام عليكي... طب خليهم سبعة كفاية..

نورتيني ياقمر..

تحياتي

احاسيس ايوشة يقول...

طبعا انا صدقت وعمال كل ما اقرا اقول ربنا يتمم بخير واقول يارب استر ومش يتحسدوا :(
بس على فكرة كانت نفس الفكرة اللى كنت هعملها فى كدبة ابريل بس استحرمت بصراحة :)

سمع هوص (Abo 3li) يقول...

احاسيس ايوشة

انتي كمان كنتي هتعملي نفس العملة... هههههههه... بس انا شرير محدش صعب عليا وقدرت اعملها ... هههههههه...

البلوج نووور.... صباحك بيضحك

عايشه لنفسي يقول...

هههههههههههههههههههههههه
لا بجد جامده موووووووووووووت
انا مش اعرفك بس والله فرحتلك
بس بعد ماعرفت انها اشتغاله عاوزة اقتلك
الحق نفسك وروح اخطب بقي
ومبروك مقدماقبل ماتشوفلك عروسه

سمع هوص (Abo 3li) يقول...

عايشه لنفسي


اول زيارة وعاوزة تقتليني؟؟؟ طب استني شوية ... ههههههههههههه....

ماشي ياستي فداكي...

طب ساعديني وابتدي رحلة البحث معايا عن ريم... ههههههههههه...

شرفتيني ونورتيني... مستني تكرار الزيارة ان شاء الله

MONTY يقول...

لولولولولولولولولى
ايه االمفاجات دى يا راجل
دنا كنت خلاص قايمه اجهز نفسى من دلوقتى
وايه الحماس دا كله وحجات عائليه وامها اروبه وابوها اهلاوى يا نهار ابيض لا وانا اللى زعلت اوى عشان دخلت المدونه متاخر اوى
لا بس تسلم يا جامد دخلت علينا بجد
ويارب يكون دا فال كويس
يالا استازن انا بقى عشان الحق اجهز نفسى واجى الفرح الكبير
اعد بالعافيه

سمع هوص (Abo 3li) يقول...

MONTY

هي دي بقي ال بيسموها الحبكة الدرامية للكذب.... ههههههههههه...

واجهزي بسرعة يالا ال هيتأخر هوا حر... البوفيه في اول الفرح مش في اخره....


اعدي بالعافية

buyket يقول...

عندما يتعلق الامر بمكافحة الحشرات فلا مجال للاستهانه به لما له من اثر مباشر علي صحة الفرد والاسره بصفه عامه
حيث ان وجود او مجرد ظهور الحشرات بالمنزل يؤدي الي انتشار الامراض بالاضافه الي الخسائر الاقتصاديه التي تخلفها ايضا
لذا كان من الواجب علينا ضمان عدم ظهور تلك الحشرات مره اخري بعد مكافحتها حيث نوفر لك عميلنا العزيزي افضل
شركة مكافحة حشرات بالخرج مع ضمان عدم ظهور تلك الحشرات كل ما عليك هو التواصل معنا

رواد الحرمين يقول...


شركة كشف تسربات المياه بالاحساء


شركة كشف تسربات المياه بالخبر


شركة كشف تسربات المياه بالقطيف


كشف تسربات المياه بالاحساء

Unknown يقول...

ههههههههههه